| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
9. து³ட்டு²ல்லாரோசனஸிக்கா²பத³வண்ணனா
9. Duṭṭhullārocanasikkhāpadavaṇṇanā
78. நவமஸிக்கா²பதே³ – து³ட்டு²ல்லா நாம ஆபத்தி சத்தாரி ச பாராஜிகானி தேரஸ ச ஸங்கா⁴தி³ஸேஸாதி இமிஸ்ஸா பாளியா ‘‘பாராஜிகானி து³ட்டு²ல்லஸத்³த³த்த²த³ஸ்ஸனத்த²ங் வுத்தானி, ஸங்கா⁴தி³ஸேஸங் பன இத⁴ அதி⁴ப்பேத’’ந்தி அட்ட²கதா²ஸு வுத்தங். தத்ராயங் விசாரணா – ஸசே பாராஜிகங் ஆரோசெந்தஸ்ஸ பாசித்தியங் ந ப⁴வெய்ய, யதா² ஸமானேபி பி⁴க்கு²-பி⁴க்கு²னீனங் உபஸம்பன்னஸத்³தே³ யத்த² பி⁴க்கு²னீ அனதி⁴ப்பேதா ஹோதி, தத்த² பி⁴க்கு²ங் ட²பெத்வா அவஸேஸோ அனுபஸம்பன்னோதி வுச்சதி; ஏவமித⁴ ஸமானேபி பாராஜிகஸங்கா⁴தி³ஸேஸானங் து³ட்டு²ல்லஸத்³தே³ யதி³ பாராஜிகங் அனதி⁴ப்பேதங், ‘‘து³ட்டு²ல்லா நாம ஆபத்தி தேரஸ ஸங்கா⁴தி³ஸேஸா’’தி ஏததே³வ வத்தப்³ப³ங் ஸியா. தத்த² ப⁴வெய்ய ‘‘யோ பாராஜிகங் ஆபன்னோ, ஸோ பி⁴க்கு²பா⁴வதோ சுதோ, தஸ்மா தஸ்ஸ ஆபத்திங் ஆரோசெந்தோ து³க்கடங் ஆபஜ்ஜதீ’’தி. ஏவங் ஸதி அக்கோஸந்தோபி து³க்கடங் ஆபஜ்ஜெய்ய, பாசித்தியமேவ ச ஆபஜ்ஜதி. வுத்தஞ்ஹேதங் – ‘‘அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ, தஞ்சே அஸுத்³த⁴தி³ட்டி² ஸமானோ ஓகாஸங் காராபெத்வா அக்கோஸாதி⁴ப்பாயோ வத³தி, ஆபத்தி ஓமஸவாத³ஸ்ஸா’’தி (பாரா॰ 389). ஏவங் பாளியா விசாரியமானாய பாராஜிகங் ஆரோசெந்தஸ்ஸாபி பாசித்தியமேவ தி³ஸ்ஸதி. கிஞ்சாபி தி³ஸ்ஸதி, அத² கோ² ஸப்³ப³அட்ட²கதா²ஸு வுத்தத்தா அட்ட²கதா²சரியாவ எத்த² பமாணங், ந அஞ்ஞா விசாரணா. புப்³பே³பி ச ஆவோசும்ஹ – ‘‘பு³த்³தே⁴ன த⁴ம்மோ வினயோ ச வுத்தோ, யோ தஸ்ஸ புத்தேஹி ததே²வ ஞாதோ’’திஆதி³ (பாரா॰ அட்ட²॰ 1.க³ந்தா²ரம்ப⁴கதா²). அட்ட²கதா²சரியா ஹி பு³த்³த⁴ஸ்ஸ அதி⁴ப்பாயங் ஜானந்தி.
78. Navamasikkhāpade – duṭṭhullā nāma āpatti cattāri ca pārājikāni terasa ca saṅghādisesāti imissā pāḷiyā ‘‘pārājikāni duṭṭhullasaddatthadassanatthaṃ vuttāni, saṅghādisesaṃ pana idha adhippeta’’nti aṭṭhakathāsu vuttaṃ. Tatrāyaṃ vicāraṇā – sace pārājikaṃ ārocentassa pācittiyaṃ na bhaveyya, yathā samānepi bhikkhu-bhikkhunīnaṃ upasampannasadde yattha bhikkhunī anadhippetā hoti, tattha bhikkhuṃ ṭhapetvā avaseso anupasampannoti vuccati; evamidha samānepi pārājikasaṅghādisesānaṃ duṭṭhullasadde yadi pārājikaṃ anadhippetaṃ, ‘‘duṭṭhullā nāma āpatti terasa saṅghādisesā’’ti etadeva vattabbaṃ siyā. Tattha bhaveyya ‘‘yo pārājikaṃ āpanno, so bhikkhubhāvato cuto, tasmā tassa āpattiṃ ārocento dukkaṭaṃ āpajjatī’’ti. Evaṃ sati akkosantopi dukkaṭaṃ āpajjeyya, pācittiyameva ca āpajjati. Vuttañhetaṃ – ‘‘asuddho hoti puggalo aññataraṃ pārājikaṃ dhammaṃ ajjhāpanno, tañce asuddhadiṭṭhi samāno okāsaṃ kārāpetvā akkosādhippāyo vadati, āpatti omasavādassā’’ti (pārā. 389). Evaṃ pāḷiyā vicāriyamānāya pārājikaṃ ārocentassāpi pācittiyameva dissati. Kiñcāpi dissati, atha kho sabbaaṭṭhakathāsu vuttattā aṭṭhakathācariyāva ettha pamāṇaṃ, na aññā vicāraṇā. Pubbepi ca āvocumha – ‘‘buddhena dhammo vinayo ca vutto, yo tassa puttehi tatheva ñāto’’tiādi (pārā. aṭṭha. 1.ganthārambhakathā). Aṭṭhakathācariyā hi buddhassa adhippāyaṃ jānanti.
இமினாபி சேதங் பரியாயேன வேதி³தப்³ப³ங். அஞ்ஞத்ர பி⁴க்கு²ஸம்முதியாதி ஹி வுத்தங். பி⁴க்கு²ஸம்முதியா ச ஆரோசனங் ஆயதிங் ஸங்வரத்தா²ய புன ததா²ரூபங் ஆபத்திங் அனாபஜ்ஜனத்தா²ய ப⁴க³வதா அனுஞ்ஞாதங், ந தஸ்ஸ பி⁴க்கு²னோ அவண்ணமத்தப்பகாஸனத்தா²ய, ஸாஸனே சஸ்ஸ பதிட்டா²னிஸேத⁴னத்தா²ய , ந ச பாராஜிகங் ஆபன்னஸ்ஸ புன ததா²ரூபாய ஆபத்தியா அனாபஜ்ஜனேன பி⁴க்கு²பா⁴வோ நாம அத்தி². தஸ்மா ‘‘பாராஜிகானி து³ட்டு²ல்லஸத்³த³த்த²த³ஸ்ஸனத்த²ங் வுத்தானி, ஸங்கா⁴தி³ஸேஸங் பன இதா⁴தி⁴ப்பேத’’ந்தி யங் அட்ட²கதா²ஸு வுத்தங், தங் ஸுவுத்தமேவ.
Imināpi cetaṃ pariyāyena veditabbaṃ. Aññatra bhikkhusammutiyāti hi vuttaṃ. Bhikkhusammutiyā ca ārocanaṃ āyatiṃ saṃvaratthāya puna tathārūpaṃ āpattiṃ anāpajjanatthāya bhagavatā anuññātaṃ, na tassa bhikkhuno avaṇṇamattappakāsanatthāya, sāsane cassa patiṭṭhānisedhanatthāya , na ca pārājikaṃ āpannassa puna tathārūpāya āpattiyā anāpajjanena bhikkhubhāvo nāma atthi. Tasmā ‘‘pārājikāni duṭṭhullasaddatthadassanatthaṃ vuttāni, saṅghādisesaṃ pana idhādhippeta’’nti yaṃ aṭṭhakathāsu vuttaṃ, taṃ suvuttameva.
80. அத்தி² பி⁴க்கு²ஸம்முதி ஆபத்திபரியந்தாதிஆதீ³ஸு பன யா அயங் பி⁴க்கு²ஸம்முதி வுத்தா, ஸா ந கத்த²சி ஆக³தா, இத⁴ வுத்தத்தாயேவ பன அபி⁴ண்ஹாபத்திகங் பி⁴க்கு²ங் தி³ஸ்வா ஏவமேஸ பரேஸு ஹிரொத்தப்பேனாபி ஆயதிங் ஸங்வரங் ஆபஜ்ஜிஸ்ஸதீதி தஸ்ஸ பி⁴க்கு²னோ ஹிதேஸிதாய திக்க²த்துங் அபலோகெத்வா ஸங்கே⁴ன காதப்³பா³தி வேதி³தப்³பா³தி.
80.Atthibhikkhusammuti āpattipariyantātiādīsu pana yā ayaṃ bhikkhusammuti vuttā, sā na katthaci āgatā, idha vuttattāyeva pana abhiṇhāpattikaṃ bhikkhuṃ disvā evamesa paresu hirottappenāpi āyatiṃ saṃvaraṃ āpajjissatīti tassa bhikkhuno hitesitāya tikkhattuṃ apaloketvā saṅghena kātabbāti veditabbāti.
82. அது³ட்டு²ல்லங் ஆபத்திங் ஆரோசேதி ஆபத்தி து³க்கடஸ்ஸாதி பஞ்சபி ஆபத்திக்க²ந்தே⁴ ஆரோசெந்தஸ்ஸ து³க்கடங். மஹாபச்சரியங் பன பாராஜிகங் ஆரோசெந்தஸ்ஸாபி து³க்கடமேவ வுத்தங். அனுபஸம்பன்னஸ்ஸ து³ட்டு²ல்லங் வா அது³ட்டு²ல்லங் வா அஜ்ஜா²சாரந்தி எத்த² ஆதி³தோ பஞ்ச ஸிக்கா²பதா³னி து³ட்டு²ல்லோ நாம அஜ்ஜா²சாரோ, ஸேஸானி அது³ட்டு²ல்லோ. ஸுக்கவிஸ்ஸட்டி²காயஸங்ஸக்³க³து³ட்டு²ல்லஅத்தகாமா பனஸ்ஸ அஜ்ஜா²சாரோ நாமாதி வுத்தங்.
82.Aduṭṭhullaṃ āpattiṃ āroceti āpatti dukkaṭassāti pañcapi āpattikkhandhe ārocentassa dukkaṭaṃ. Mahāpaccariyaṃ pana pārājikaṃ ārocentassāpi dukkaṭameva vuttaṃ. Anupasampannassa duṭṭhullaṃ vā aduṭṭhullaṃ vā ajjhācāranti ettha ādito pañca sikkhāpadāni duṭṭhullo nāma ajjhācāro, sesāni aduṭṭhullo. Sukkavissaṭṭhikāyasaṃsaggaduṭṭhullaattakāmā panassa ajjhācāro nāmāti vuttaṃ.
83. வத்து²ங் ஆரோசேதீதி ‘‘அயங் ஸுக்கவிஸ்ஸட்டி²ங் ஆபன்னோ, து³ட்டு²ல்லங் ஆபன்னோ, அத்தகாமங் ஆபன்னோ’’ காயஸங்ஸக்³க³ங் ஆபன்னோதி ஏவங் வத³ந்தஸ்ஸ அனாபத்தி. ஆபத்திங் ஆரோசேதீதி எத்த² ‘‘அயங் பாராஜிகங் ஆபன்னோ, ஸங்கா⁴தி³ஸேஸங் து²ல்லச்சயங் பாசித்தியங் பாடிதே³ஸனீயங் து³க்கடங் து³ப்³பா⁴ஸிதங் ஆபன்னோ’’தி வத³தி அனாபத்தி. ‘‘அயங் அஸுசிங் மோசெத்வா ஸங்கா⁴தி³ஸேஸங் ஆபன்னோ’’திஆதி³னா பன நயேன வத்து²னா ஸத்³தி⁴ங் ஆபத்திங் க⁴டெத்வா ஆரோசெந்தஸ்ஸேவ ஆபத்தி. ஸேஸமெத்த² உத்தானமேவ.
83.Vatthuṃ ārocetīti ‘‘ayaṃ sukkavissaṭṭhiṃ āpanno, duṭṭhullaṃ āpanno, attakāmaṃ āpanno’’ kāyasaṃsaggaṃ āpannoti evaṃ vadantassa anāpatti. Āpattiṃ ārocetīti ettha ‘‘ayaṃ pārājikaṃ āpanno, saṅghādisesaṃ thullaccayaṃ pācittiyaṃ pāṭidesanīyaṃ dukkaṭaṃ dubbhāsitaṃ āpanno’’ti vadati anāpatti. ‘‘Ayaṃ asuciṃ mocetvā saṅghādisesaṃ āpanno’’tiādinā pana nayena vatthunā saddhiṃ āpattiṃ ghaṭetvā ārocentasseva āpatti. Sesamettha uttānameva.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
து³ட்டு²ல்லாரோசனஸிக்கா²பத³ங் நவமங்.
Duṭṭhullārocanasikkhāpadaṃ navamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. து³ட்டு²ல்லாரோசனஸிக்கா²பத³வண்ணனா • 9. Duṭṭhullārocanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. து³ட்டு²ல்லாரோசனஸிக்கா²பத³வண்ணனா • 9. Duṭṭhullārocanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 9. து³ட்டு²ல்லாரோசனஸிக்கா²பத³வண்ணனா • 9. Duṭṭhullārocanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 9. து³ட்டு²ல்லாரோசனஸிக்கா²பத³ங் • 9. Duṭṭhullārocanasikkhāpadaṃ
