| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
9. து³ட்டு²ல்லாரோசனஸிக்கா²பத³வண்ணனா
9. Duṭṭhullārocanasikkhāpadavaṇṇanā
78. நவமே து³ட்டு²ல்லஸத்³த³த்த²த³ஸ்ஸனத்த²ந்தி து³ட்டு²ல்லஸத்³த³ஸ்ஸ அத்த²த³ஸ்ஸனத்த²ங். அத்தே² ஹி த³ஸ்ஸிதே ஸத்³தோ³பி ‘‘அயங் ஏதேஸு அத்தே²ஸு வத்ததீ’’தி த³ஸ்ஸிதோயேவ ஹோதி. ‘‘யங் யங் து³ட்டு²ல்லஸத்³தே³ன அபி⁴தீ⁴யதி, தங் ஸப்³ப³ங் த³ஸ்ஸேதுங் பாராஜிகானி வுத்தானீ’’தி அயஞ்ஹெத்த² அதி⁴ப்பாயோ. தத்ராயங் விசாரணாதி தத்ர பாளியங் அயங் விசாரணா, தத்ர பாளிஅட்ட²கதா²ஸு வா அயங் விசாரணா. தத்த² ப⁴வெய்யாதி தத்த² கஸ்ஸசி விமதி ஏவங் ப⁴வெய்ய. அனுபஸம்பன்னஸ்ஸ து³ட்டு²ல்லாரோசனே விய து³க்கடேன ப⁴விதப்³ப³ந்தி ஆஹ ‘‘து³க்கடங் ஆபஜ்ஜதீ’’தி. அக்கோஸந்தோபி து³க்கடங் ஆபஜ்ஜெய்யாதி ஓமஸவாதே³ன து³க்கடங் ஆபஜ்ஜெய்ய. அதி⁴ப்பாயங் அஜானந்தேனபி அட்ட²கதா²சரியானங் வசனேயேவ டா²தப்³ப³ந்தி தீ³பனத்த²ங் ‘‘அட்ட²கதா²சரியாவ எத்த² பமாண’’ந்தி வுத்தங். புனபி அட்ட²கதா²வசனமேவ உபபத்திதோ த³ள்ஹங் கத்வா பதிட்ட²பெந்தோ ‘‘இமினாபி சேத’’ந்திஆதி³மாஹ.
78. Navame duṭṭhullasaddatthadassanatthanti duṭṭhullasaddassa atthadassanatthaṃ. Atthe hi dassite saddopi ‘‘ayaṃ etesu atthesu vattatī’’ti dassitoyeva hoti. ‘‘Yaṃ yaṃ duṭṭhullasaddena abhidhīyati, taṃ sabbaṃ dassetuṃ pārājikāni vuttānī’’ti ayañhettha adhippāyo. Tatrāyaṃ vicāraṇāti tatra pāḷiyaṃ ayaṃ vicāraṇā, tatra pāḷiaṭṭhakathāsu vā ayaṃ vicāraṇā. Tattha bhaveyyāti tattha kassaci vimati evaṃ bhaveyya. Anupasampannassa duṭṭhullārocane viya dukkaṭena bhavitabbanti āha ‘‘dukkaṭaṃ āpajjatī’’ti. Akkosantopi dukkaṭaṃ āpajjeyyāti omasavādena dukkaṭaṃ āpajjeyya. Adhippāyaṃ ajānantenapi aṭṭhakathācariyānaṃ vacaneyeva ṭhātabbanti dīpanatthaṃ ‘‘aṭṭhakathācariyāva ettha pamāṇa’’nti vuttaṃ. Punapi aṭṭhakathāvacanameva upapattito daḷhaṃ katvā patiṭṭhapento ‘‘imināpi ceta’’ntiādimāha.
80. ‘‘அஞ்ஞத்ர பி⁴க்கு²ஸம்முதியா’’தி வுத்தத்தா ஸம்முதி அத்தீ²தி க³ஹேதப்³பா³தி ஆஹ ‘‘இத⁴ வுத்தத்தாயேவா’’திஆதி³.
80. ‘‘Aññatra bhikkhusammutiyā’’ti vuttattā sammuti atthīti gahetabbāti āha ‘‘idha vuttattāyevā’’tiādi.
82. ஆதி³தோ பஞ்ச ஸிக்கா²பதா³னீதி பாணாதிபாதாதீ³னி பஞ்ச ஸிக்கா²பதா³னி. ‘‘ஸேஸானீதி விகாலபோ⁴ஜனாதீ³னி பஞ்சா’’தி வத³ந்தி. கேசி பன ‘‘ஆதி³தோ பட்டா²ய பஞ்ச ஸிக்கா²பதா³னீதி ஸுக்கவிஸ்ஸட்டி²ஆதீ³னி பஞ்சா’’தி வத³ந்தி, தங் ந க³ஹேதப்³ப³ங். பாணாதிபாதாதீ³னி ஹி த³ஸேவ ஸிக்கா²பதா³னி ஸாமணேரானங் பஞ்ஞத்தானி. வுத்தஞ்ஹேதங் –
82.Ādito pañca sikkhāpadānīti pāṇātipātādīni pañca sikkhāpadāni. ‘‘Sesānīti vikālabhojanādīni pañcā’’ti vadanti. Keci pana ‘‘ādito paṭṭhāya pañca sikkhāpadānīti sukkavissaṭṭhiādīni pañcā’’ti vadanti, taṃ na gahetabbaṃ. Pāṇātipātādīni hi daseva sikkhāpadāni sāmaṇerānaṃ paññattāni. Vuttañhetaṃ –
‘‘அத² கோ² ஸாமணேரானங் ஏதத³ஹோஸி ‘கதி நு கோ² அம்ஹாகங் ஸிக்கா²பதா³னி, கத்த² ச அம்ஹேஹி ஸிக்கி²தப்³ப³’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸாமணேரானங் த³ஸ ஸிக்கா²பதா³னி, தேஸு ச ஸாமணேரேஹி ஸிக்கி²துங், பாணாதிபாதா வேரமணீ அதி³ன்னாதா³னா வேரமணீ’’திஆதி³ (மஹாவ॰ 106).
‘‘Atha kho sāmaṇerānaṃ etadahosi ‘kati nu kho amhākaṃ sikkhāpadāni, kattha ca amhehi sikkhitabba’nti? Bhagavato etamatthaṃ ārocesuṃ. Anujānāmi, bhikkhave, sāmaṇerānaṃ dasa sikkhāpadāni, tesu ca sāmaṇerehi sikkhituṃ, pāṇātipātā veramaṇī adinnādānā veramaṇī’’tiādi (mahāva. 106).
தேஸங் பஞ்ஞத்தேஸுயேவ ஸிக்கா²பதே³ஸு து³ட்டு²ல்லாது³ட்டு²ல்லவிசாரணா காதப்³பா³, ந ச ஸுக்கவிஸ்ஸட்டி²ஆதீ³னி விஸுங் தேஸங் பஞ்ஞத்தானி அத்தீ²தி. அத² பி⁴க்கு²னோ து³ட்டு²ல்லஸங்கா²தானி ஸுக்கவிஸ்ஸட்டி²ஆதீ³னி அனுபஸம்பன்னஸ்ஸ கிங் நாம ஹொந்தீதி ஆஹ ‘‘ஸுக்கவிஸ்ஸட்டி²…பே॰… அஜ்ஜா²சாரோ நாமாதி வுத்த’’ந்தி. இமினாபி சேதங் ஸித்³த⁴ங் ‘‘அனுபஸம்பன்னஸ்ஸ ஸுக்கவிஸ்ஸட்டி²ஆதி³ து³ட்டு²ல்லங் நாம ந ஹோதீ’’தி. அஜ்ஜா²சாரோ நாமாதி ஹி வத³ந்தோ அனுபஸம்பன்னஸ்ஸ ஸுக்கவிஸ்ஸட்டி²ஆதி³ கேவலங் அஜ்ஜா²சாரோ நாம ஹோதி, ந பன து³ட்டு²ல்லோ நாம அஜ்ஜா²சாரோதி தீ³பேதி. ‘‘அஜ்ஜா²சாரோ நாமாதி ச அட்ட²கதா²யங் வுத்தத்தா அகத்தப்³ப³ரூபத்தா ச அனுபஸம்பன்னஸ்ஸ ஸுக்கவிஸ்ஸட்டி²ஆதீ³னி த³ண்ட³கம்மவத்து²பக்க²ங் ப⁴ஜந்தி, தானி ச அஞ்ஞஸ்ஸ அனுபஸம்பன்னஸ்ஸ அவண்ணகாமதாய ஆரோசெந்தோ பி⁴க்கு² து³க்கடங் ஆபஜ்ஜதீ’’தி வத³ந்தி. இத⁴ பன அனுபஸம்பன்னக்³க³ஹணேன ஸாமணேரஸாமணேரீஸிக்க²மானானங் க³ஹணங் வேதி³தப்³ப³ங். ஸேஸமெத்த² உத்தானமேவ. அந்திமவத்து²ங் அனஜ்ஜா²பன்னஸ்ஸ பி⁴க்கு²னோ ஸவத்து²கோ ஸங்கா⁴தி³ஸேஸோ, அனுபஸம்பன்னஸ்ஸ ஆரோசனங், பி⁴க்கு²ஸம்முதியா அபா⁴வோதி இமானி பனெத்த² தீணி அங்கா³னி.
Tesaṃ paññattesuyeva sikkhāpadesu duṭṭhullāduṭṭhullavicāraṇā kātabbā, na ca sukkavissaṭṭhiādīni visuṃ tesaṃ paññattāni atthīti. Atha bhikkhuno duṭṭhullasaṅkhātāni sukkavissaṭṭhiādīni anupasampannassa kiṃ nāma hontīti āha ‘‘sukkavissaṭṭhi…pe… ajjhācāro nāmāti vutta’’nti. Imināpi cetaṃ siddhaṃ ‘‘anupasampannassa sukkavissaṭṭhiādi duṭṭhullaṃ nāma na hotī’’ti. Ajjhācāro nāmāti hi vadanto anupasampannassa sukkavissaṭṭhiādi kevalaṃ ajjhācāro nāma hoti, na pana duṭṭhullo nāma ajjhācāroti dīpeti. ‘‘Ajjhācāro nāmāti ca aṭṭhakathāyaṃ vuttattā akattabbarūpattā ca anupasampannassa sukkavissaṭṭhiādīni daṇḍakammavatthupakkhaṃ bhajanti, tāni ca aññassa anupasampannassa avaṇṇakāmatāya ārocento bhikkhu dukkaṭaṃ āpajjatī’’ti vadanti. Idha pana anupasampannaggahaṇena sāmaṇerasāmaṇerīsikkhamānānaṃ gahaṇaṃ veditabbaṃ. Sesamettha uttānameva. Antimavatthuṃ anajjhāpannassa bhikkhuno savatthuko saṅghādiseso, anupasampannassa ārocanaṃ, bhikkhusammutiyā abhāvoti imāni panettha tīṇi aṅgāni.
து³ட்டு²ல்லாரோசனஸிக்கா²பத³வண்ணனா நிட்டி²தா.
Duṭṭhullārocanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 9. து³ட்டு²ல்லாரோசனஸிக்கா²பத³வண்ணனா • 9. Duṭṭhullārocanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. து³ட்டு²ல்லாரோசனஸிக்கா²பத³வண்ணனா • 9. Duṭṭhullārocanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 9. து³ட்டு²ல்லாரோசனஸிக்கா²பத³வண்ணனா • 9. Duṭṭhullārocanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 9. து³ட்டு²ல்லாரோசனஸிக்கா²பத³ங் • 9. Duṭṭhullārocanasikkhāpadaṃ
