| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៩. ទុដ្ឋុល្លារោចនសិក្ខាបទវណ្ណនា
9. Duṭṭhullārocanasikkhāpadavaṇṇanā
ទ្វិន្នំ ‘អាបត្តិក្ខន្ធានន្តិ បារាជិកសង្ឃាទិសេសសង្ខាតានំ ទ្វិន្នំ អាបត្តិក្ខន្ធានំ។ អាយតិំ សំវរត្ថាយាតិ ‘‘ឯវមេស បរេសុ ហិរោត្តប្បេនាបិ អាយតិំ សំវរំ អាបជ្ជិស្សតី’’តិ អាយតិំ សំវរត្ថាយ។ អាបត្តីនញ្ច កុលានញ្ច បរិយន្តំ កត្វា វា អកត្វា វាតិ ‘‘ឯត្តកា អាបត្តិយោ អារោចេតព្ពា, ឯត្តកេសុ កុលេសុ អារោចេតព្ពា’’តិ ឯវំ អាបត្តីនញ្ច កុលានញ្ច បរិយន្តំ កត្វា វា អកត្វា វា។
Dvinnaṃ‘āpattikkhandhānanti pārājikasaṅghādisesasaṅkhātānaṃ dvinnaṃ āpattikkhandhānaṃ. Āyatiṃ saṃvaratthāyāti ‘‘evamesa paresu hirottappenāpi āyatiṃ saṃvaraṃ āpajjissatī’’ti āyatiṃ saṃvaratthāya. Āpattīnañca kulānañca pariyantaṃ katvā vā akatvā vāti ‘‘ettakā āpattiyo ārocetabbā, ettakesu kulesu ārocetabbā’’ti evaṃ āpattīnañca kulānañca pariyantaṃ katvā vā akatvā vā.
អទុដ្ឋុល្លាយាតិ បារាជិកសង្ឃាទិសេសំ ឋបេត្វា អវសេសបញ្ចាបត្តិក្ខន្ធសង្ខាតាយ អទុដ្ឋុល្លាយ អាបត្តិយា។ អវសេសេ ឆ អាបត្តិក្ខន្ធេតិ សង្ឃាទិសេសវជ្ជិតេ សេសេ ឆ អាបត្តិក្ខន្ធេ។ បុរិមបញ្ចសិក្ខាបទវីតិក្កមសង្ខាតំ ទុដ្ឋុល្លន្តិ បាណាតិបាតវេរមណិអាទិកស្ស អាទិតោ បញ្ចសិក្ខាបទស្ស វីតិក្កមសង្ខាតំ ទុដ្ឋុល្លំ។ ឥតរំ អទុដ្ឋុល្លំ វា អជ្ឈាចារន្តិ តតោ អញ្ញំ វិកាលភោជនាទិកបញ្ចកំ, សុក្កវិសដ្ឋិកាយសំសគ្គទុដ្ឋុល្លអត្តកាមញ្ចេតិ អទុដ្ឋុល្លំ វា អជ្ឈាចារំ។ វត្ថុមត្តន្តិ ‘‘អយំ សុក្កវិស្សដ្ឋិំ អាបន្នោ, ទុដ្ឋុល្លំ, អត្តកាមំ, កាយសំសគ្គំ អាបន្នោ’’តិ ឯវំ វត្ថុមត្តំ វា អារោចេន្តស្ស។ អាបត្តិមត្តន្តិ ‘‘អយំ បារាជិកំ អាបន្នោ, សង្ឃាទិសេសំ, ថុល្លច្ចយំ, បាចិត្តិយំ, បាដិទេសនីយំ, ទុក្កដំ, ទុព្ភាសិតំ អាបន្នោ’’តិ ឯវំ អាបត្តិមត្តំ វា អារោចេន្តស្ស។ វុត្តលក្ខណស្សាតិ ‘‘បារាជិកំ អនជ្ឈាបន្នស្សា’’តិ កង្ខា. អដ្ឋ. ទុដ្ឋុល្លារោចនសិក្ខាបទវណ្ណនា) ឯវំ វុត្តលក្ខណស្ស។ សវត្ថុកោតិ វត្ថុនា សហ ឃដិតោ។
Aduṭṭhullāyāti pārājikasaṅghādisesaṃ ṭhapetvā avasesapañcāpattikkhandhasaṅkhātāya aduṭṭhullāya āpattiyā. Avasese cha āpattikkhandheti saṅghādisesavajjite sese cha āpattikkhandhe. Purimapañcasikkhāpadavītikkamasaṅkhātaṃ duṭṭhullanti pāṇātipātaveramaṇiādikassa ādito pañcasikkhāpadassa vītikkamasaṅkhātaṃ duṭṭhullaṃ. Itaraṃ aduṭṭhullaṃ vā ajjhācāranti tato aññaṃ vikālabhojanādikapañcakaṃ, sukkavisaṭṭhikāyasaṃsaggaduṭṭhullaattakāmañceti aduṭṭhullaṃ vā ajjhācāraṃ. Vatthumattanti ‘‘ayaṃ sukkavissaṭṭhiṃ āpanno, duṭṭhullaṃ, attakāmaṃ, kāyasaṃsaggaṃ āpanno’’ti evaṃ vatthumattaṃ vā ārocentassa. Āpattimattanti ‘‘ayaṃ pārājikaṃ āpanno, saṅghādisesaṃ, thullaccayaṃ, pācittiyaṃ, pāṭidesanīyaṃ, dukkaṭaṃ, dubbhāsitaṃ āpanno’’ti evaṃ āpattimattaṃ vā ārocentassa. Vuttalakkhaṇassāti ‘‘pārājikaṃ anajjhāpannassā’’ti kaṅkhā. aṭṭha. duṭṭhullārocanasikkhāpadavaṇṇanā) evaṃ vuttalakkhaṇassa. Savatthukoti vatthunā saha ghaṭito.
ទុដ្ឋុល្លារោចនសិក្ខាបទវណ្ណនា និដ្ឋិតា។
Duṭṭhullārocanasikkhāpadavaṇṇanā niṭṭhitā.
