| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༩. དུཊྛུལླཱརོཙནསིཀྑཱཔདཝཎྞནཱ
9. Duṭṭhullārocanasikkhāpadavaṇṇanā
དྭིནྣཾ ‘ཨཱཔཏྟིཀྑནྡྷཱནནྟི པཱརཱཛིཀསངྒྷཱདིསེསསངྑཱཏཱནཾ དྭིནྣཾ ཨཱཔཏྟིཀྑནྡྷཱནཾ། ཨཱཡཏིཾ སཾཝརཏྠཱཡཱཏི ‘‘ཨེཝམེས པརེསུ ཧིརོཏྟཔྤེནཱཔི ཨཱཡཏིཾ སཾཝརཾ ཨཱཔཛྫིསྶཏཱི’’ཏི ཨཱཡཏིཾ སཾཝརཏྠཱཡ། ཨཱཔཏྟཱིནཉྩ ཀུལཱནཉྩ པརིཡནྟཾ ཀཏྭཱ ཝཱ ཨཀཏྭཱ ཝཱཏི ‘‘ཨེཏྟཀཱ ཨཱཔཏྟིཡོ ཨཱརོཙེཏབྦཱ, ཨེཏྟཀེསུ ཀུལེསུ ཨཱརོཙེཏབྦཱ’’ཏི ཨེཝཾ ཨཱཔཏྟཱིནཉྩ ཀུལཱནཉྩ པརིཡནྟཾ ཀཏྭཱ ཝཱ ཨཀཏྭཱ ཝཱ།
Dvinnaṃ‘āpattikkhandhānanti pārājikasaṅghādisesasaṅkhātānaṃ dvinnaṃ āpattikkhandhānaṃ. Āyatiṃ saṃvaratthāyāti ‘‘evamesa paresu hirottappenāpi āyatiṃ saṃvaraṃ āpajjissatī’’ti āyatiṃ saṃvaratthāya. Āpattīnañca kulānañca pariyantaṃ katvā vā akatvā vāti ‘‘ettakā āpattiyo ārocetabbā, ettakesu kulesu ārocetabbā’’ti evaṃ āpattīnañca kulānañca pariyantaṃ katvā vā akatvā vā.
ཨདུཊྛུལླཱཡཱཏི པཱརཱཛིཀསངྒྷཱདིསེསཾ ཋཔེཏྭཱ ཨཝསེསཔཉྩཱཔཏྟིཀྑནྡྷསངྑཱཏཱཡ ཨདུཊྛུལླཱཡ ཨཱཔཏྟིཡཱ། ཨཝསེསེ ཚ ཨཱཔཏྟིཀྑནྡྷེཏི སངྒྷཱདིསེསཝཛྫིཏེ སེསེ ཚ ཨཱཔཏྟིཀྑནྡྷེ། པུརིམཔཉྩསིཀྑཱཔདཝཱིཏིཀྐམསངྑཱཏཾ དུཊྛུལླནྟི པཱཎཱཏིཔཱཏཝེརམཎིཨཱདིཀསྶ ཨཱདིཏོ པཉྩསིཀྑཱཔདསྶ ཝཱིཏིཀྐམསངྑཱཏཾ དུཊྛུལླཾ། ཨིཏརཾ ཨདུཊྛུལླཾ ཝཱ ཨཛ྄ཛྷཱཙཱརནྟི ཏཏོ ཨཉྙཾ ཝིཀཱལབྷོཛནཱདིཀཔཉྩཀཾ, སུཀྐཝིསཊྛིཀཱཡསཾསགྒདུཊྛུལླཨཏྟཀཱམཉྩེཏི ཨདུཊྛུལླཾ ཝཱ ཨཛ྄ཛྷཱཙཱརཾ། ཝཏྠུམཏྟནྟི ‘‘ཨཡཾ སུཀྐཝིསྶཊྛིཾ ཨཱཔནྣོ, དུཊྛུལླཾ, ཨཏྟཀཱམཾ, ཀཱཡསཾསགྒཾ ཨཱཔནྣོ’’ཏི ཨེཝཾ ཝཏྠུམཏྟཾ ཝཱ ཨཱརོཙེནྟསྶ། ཨཱཔཏྟིམཏྟནྟི ‘‘ཨཡཾ པཱརཱཛིཀཾ ཨཱཔནྣོ, སངྒྷཱདིསེསཾ, ཐུལླཙྩཡཾ, པཱཙིཏྟིཡཾ, པཱཊིདེསནཱིཡཾ, དུཀྐཊཾ, དུབྦྷཱསིཏཾ ཨཱཔནྣོ’’ཏི ཨེཝཾ ཨཱཔཏྟིམཏྟཾ ཝཱ ཨཱརོཙེནྟསྶ། ཝུཏྟལཀྑཎསྶཱཏི ‘‘པཱརཱཛིཀཾ ཨནཛ྄ཛྷཱཔནྣསྶཱ’’ཏི ཀངྑཱ॰ ཨཊྛ॰ དུཊྛུལླཱརོཙནསིཀྑཱཔདཝཎྞནཱ) ཨེཝཾ ཝུཏྟལཀྑཎསྶ། སཝཏྠུཀོཏི ཝཏྠུནཱ སཧ གྷཊིཏོ།
Aduṭṭhullāyāti pārājikasaṅghādisesaṃ ṭhapetvā avasesapañcāpattikkhandhasaṅkhātāya aduṭṭhullāya āpattiyā. Avasese cha āpattikkhandheti saṅghādisesavajjite sese cha āpattikkhandhe. Purimapañcasikkhāpadavītikkamasaṅkhātaṃ duṭṭhullanti pāṇātipātaveramaṇiādikassa ādito pañcasikkhāpadassa vītikkamasaṅkhātaṃ duṭṭhullaṃ. Itaraṃ aduṭṭhullaṃ vā ajjhācāranti tato aññaṃ vikālabhojanādikapañcakaṃ, sukkavisaṭṭhikāyasaṃsaggaduṭṭhullaattakāmañceti aduṭṭhullaṃ vā ajjhācāraṃ. Vatthumattanti ‘‘ayaṃ sukkavissaṭṭhiṃ āpanno, duṭṭhullaṃ, attakāmaṃ, kāyasaṃsaggaṃ āpanno’’ti evaṃ vatthumattaṃ vā ārocentassa. Āpattimattanti ‘‘ayaṃ pārājikaṃ āpanno, saṅghādisesaṃ, thullaccayaṃ, pācittiyaṃ, pāṭidesanīyaṃ, dukkaṭaṃ, dubbhāsitaṃ āpanno’’ti evaṃ āpattimattaṃ vā ārocentassa. Vuttalakkhaṇassāti ‘‘pārājikaṃ anajjhāpannassā’’ti kaṅkhā. aṭṭha. duṭṭhullārocanasikkhāpadavaṇṇanā) evaṃ vuttalakkhaṇassa. Savatthukoti vatthunā saha ghaṭito.
དུཊྛུལླཱརོཙནསིཀྑཱཔདཝཎྞནཱ ནིཊྛིཏཱ།
Duṭṭhullārocanasikkhāpadavaṇṇanā niṭṭhitā.
