| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
4. து³ட்டு²ல்லஸிக்கா²பத³ங்
4. Duṭṭhullasikkhāpadaṃ
399. சதுத்தே² அத்து²த்³தா⁴ரவஸேன த³ஸ்ஸிதானி து³ட்டு²ல்லஸத்³த³த்த²பா⁴வேன ஸதி³ஸத்தாதி அதி⁴ப்பாயோ. ‘‘து⁴ர’’ந்தி எத்த² லக்க²ணவந்தத்தா பு⁴ம்மத்தே² உபயோக³வசனந்தி ஆஹ ‘‘து⁴ரே’’தி. து⁴ரே நிக்கி²த்தமத்தே ஸதீதி யோஜனா.
399. Catutthe atthuddhāravasena dassitāni duṭṭhullasaddatthabhāvena sadisattāti adhippāyo. ‘‘Dhura’’nti ettha lakkhaṇavantattā bhummatthe upayogavacananti āha ‘‘dhure’’ti. Dhure nikkhittamatte satīti yojanā.
ஏவங் து⁴ரங் நிக்கி²பித்வாதி ‘‘அஞ்ஞஸ்ஸ நாரோசெஸ்ஸாமீ’’தி ஏவங் து⁴ரங் நிக்கி²பித்வா. அஞ்ஞஸ்ஸாதி வத்து², புக்³க³லதோ அஞ்ஞஸ்ஸ து³தியஸ்ஸ. ஸோபீதி து³தியோபி. அஞ்ஞஸ்ஸாதி ததியஸ்ஸ. யாவ கோடி ந சி²ஜ்ஜதி, தாவ ஆபஜ்ஜதியேவாதி யோஜனா. தஸ்ஸேவாதி ஆபத்திங் ஆபன்னபுக்³க³லஸ்ஸ. வத்து²புக்³க³லோயேவாதி ஆபத்திங் ஆபன்னபுக்³க³லோயேவ. அயந்தி பட²மபி⁴க்கு². அஞ்ஞஸ்ஸாதி து³தியஸ்ஸ. ஸோதி து³தியோ ஆரோசேதீதி ஸம்ப³ந்தோ⁴. யேனாதி பட²மபி⁴க்கு²னா. அஸ்ஸாதி து³தியஸ்ஸ. தஸ்ஸேவாதி பட²மபி⁴க்கு²ஸ்ஸேவ. வத்து²புக்³க³லங் உபனிதா⁴ய ‘‘ததியேன புக்³க³லேன து³தியஸ்ஸா’’தி வுத்தங்.
Evaṃdhuraṃ nikkhipitvāti ‘‘aññassa nārocessāmī’’ti evaṃ dhuraṃ nikkhipitvā. Aññassāti vatthu, puggalato aññassa dutiyassa. Sopīti dutiyopi. Aññassāti tatiyassa. Yāva koṭi na chijjati, tāva āpajjatiyevāti yojanā. Tassevāti āpattiṃ āpannapuggalassa. Vatthupuggaloyevāti āpattiṃ āpannapuggaloyeva. Ayanti paṭhamabhikkhu. Aññassāti dutiyassa. Soti dutiyo ārocetīti sambandho. Yenāti paṭhamabhikkhunā. Assāti dutiyassa. Tassevāti paṭhamabhikkhusseva. Vatthupuggalaṃ upanidhāya ‘‘tatiyena puggalena dutiyassā’’ti vuttaṃ.
400. பஞ்சாபத்திக்க²ந்தே⁴தி து²ல்லச்சயாதி³கே பஞ்ச ஆபத்திக்க²ந்தே⁴. அஜ்ஜா²சாரோ நாமாதி அதி⁴ப⁴வித்வா வீதிக்கமித்வா ஆசரிதப்³ப³த்தா அஜ்ஜா²சாரோ நாமாதி. சதுத்த²ங்.
400.Pañcāpattikkhandheti thullaccayādike pañca āpattikkhandhe. Ajjhācāro nāmāti adhibhavitvā vītikkamitvā ācaritabbattā ajjhācāro nāmāti. Catutthaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. ஸப்பாணகவக்³கோ³ • 7. Sappāṇakavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. து³ட்டு²ல்லஸிக்கா²பத³வண்ணனா • 4. Duṭṭhullasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. து³ட்டு²ல்லஸிக்கா²பத³வண்ணனா • 4. Duṭṭhullasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. து³ட்டு²ல்லஸிக்கா²பத³வண்ணனா • 4. Duṭṭhullasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. து³ட்டு²ல்லஸிக்கா²பத³வண்ணனா • 4. Duṭṭhullasikkhāpadavaṇṇanā
