| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၄. ဒုဋ္ဌုလ္လသိက္ခာပဒံ
4. Duṭṭhullasikkhāpadaṃ
၃၉၉. စတုတ္ထေ အတ္ထုဒ္ဓာရဝသေန ဒသ္သိတာနိ ဒုဋ္ဌုလ္လသဒ္ဒတ္ထဘာဝေန သဒိသတ္တာတိ အဓိပ္ပာယော။ ‘‘ဓုရ’’န္တိ ဧတ္ထ လက္ခဏဝန္တတ္တာ ဘုမ္မတ္ထေ ဥပယောဂဝစနန္တိ အာဟ ‘‘ဓုရေ’’တိ။ ဓုရေ နိက္ခိတ္တမတ္တေ သတီတိ ယောဇနာ။
399. Catutthe atthuddhāravasena dassitāni duṭṭhullasaddatthabhāvena sadisattāti adhippāyo. ‘‘Dhura’’nti ettha lakkhaṇavantattā bhummatthe upayogavacananti āha ‘‘dhure’’ti. Dhure nikkhittamatte satīti yojanā.
ဧဝံ ဓုရံ နိက္ခိပိတ္ဝာတိ ‘‘အညသ္သ နာရောစေသ္သာမီ’’တိ ဧဝံ ဓုရံ နိက္ခိပိတ္ဝာ။ အညသ္သာတိ ဝတ္ထု, ပုဂ္ဂလတော အညသ္သ ဒုတိယသ္သ။ သောပီတိ ဒုတိယောပိ။ အညသ္သာတိ တတိယသ္သ။ ယာဝ ကောဋိ န ဆိဇ္ဇတိ, တာဝ အာပဇ္ဇတိယေဝာတိ ယောဇနာ။ တသ္သေဝာတိ အာပတ္တိံ အာပန္နပုဂ္ဂလသ္သ။ ဝတ္ထုပုဂ္ဂလောယေဝာတိ အာပတ္တိံ အာပန္နပုဂ္ဂလောယေဝ။ အယန္တိ ပဌမဘိက္ခု။ အညသ္သာတိ ဒုတိယသ္သ။ သောတိ ဒုတိယော အာရောစေတီတိ သမ္ဗန္ဓော။ ယေနာတိ ပဌမဘိက္ခုနာ။ အသ္သာတိ ဒုတိယသ္သ။ တသ္သေဝာတိ ပဌမဘိက္ခုသ္သေဝ။ ဝတ္ထုပုဂ္ဂလံ ဥပနိဓာယ ‘‘တတိယေန ပုဂ္ဂလေန ဒုတိယသ္သာ’’တိ ဝုတ္တံ။
Evaṃdhuraṃ nikkhipitvāti ‘‘aññassa nārocessāmī’’ti evaṃ dhuraṃ nikkhipitvā. Aññassāti vatthu, puggalato aññassa dutiyassa. Sopīti dutiyopi. Aññassāti tatiyassa. Yāva koṭi na chijjati, tāva āpajjatiyevāti yojanā. Tassevāti āpattiṃ āpannapuggalassa. Vatthupuggaloyevāti āpattiṃ āpannapuggaloyeva. Ayanti paṭhamabhikkhu. Aññassāti dutiyassa. Soti dutiyo ārocetīti sambandho. Yenāti paṭhamabhikkhunā. Assāti dutiyassa. Tassevāti paṭhamabhikkhusseva. Vatthupuggalaṃ upanidhāya ‘‘tatiyena puggalena dutiyassā’’ti vuttaṃ.
၄၀၀. ပဉ္စာပတ္တိက္ခန္ဓေတိ ထုလ္လစ္စယာဒိကေ ပဉ္စ အာပတ္တိက္ခန္ဓေ။ အဇ္ဈာစာရော နာမာတိ အဓိဘဝိတ္ဝာ ဝီတိက္ကမိတ္ဝာ အာစရိတဗ္ဗတ္တာ အဇ္ဈာစာရော နာမာတိ။ စတုတ္ထံ။
400.Pañcāpattikkhandheti thullaccayādike pañca āpattikkhandhe. Ajjhācāro nāmāti adhibhavitvā vītikkamitvā ācaritabbattā ajjhācāro nāmāti. Catutthaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၇. သပ္ပာဏကဝဂ္ဂော • 7. Sappāṇakavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၄. ဒုဋ္ဌုလ္လသိက္ခာပဒဝဏ္ဏနာ • 4. Duṭṭhullasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၄. ဒုဋ္ဌုလ္လသိက္ခာပဒဝဏ္ဏနာ • 4. Duṭṭhullasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၄. ဒုဋ္ဌုလ္လသိက္ခာပဒဝဏ္ဏနာ • 4. Duṭṭhullasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၄. ဒုဋ္ဌုလ္လသိက္ခာပဒဝဏ္ဏနာ • 4. Duṭṭhullasikkhāpadavaṇṇanā
