| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
4. து³ட்டு²ல்லஸிக்கா²பத³வண்ணனா
4. Duṭṭhullasikkhāpadavaṇṇanā
399. சதுத்தே² – து³ட்டு²ல்லா நாம ஆபத்தீதி எத்த² சத்தாரி பாராஜிகானி அத்து²த்³தா⁴ரவஸேன த³ஸ்ஸிதானி, ஸங்கா⁴தி³ஸேஸாபத்தி பன அதி⁴ப்பேதா, தங் சா²தெ³ந்தஸ்ஸ பாசித்தியங். து⁴ரங் நிக்கி²த்தமத்தேதி து⁴ரே நிக்கி²த்தமத்தே. ஸசேபி து⁴ரங் நிக்கி²பித்வா பச்சா² ஆரோசேதி, ந ரக்க²தி; து⁴ரங் நிக்கி²த்தமத்தேயேவ பாசித்தியந்தி வுத்தங் ஹோதி. ஸசே பன ஏவங் து⁴ரங் நிக்கி²பித்வா படிச்சா²த³னத்த²மேவ அஞ்ஞஸ்ஸ ஆரோசேதி, ஸோபி அஞ்ஞஸ்ஸாதி ஏதேனுபாயேன ஸமணஸதம்பி ஸமணஸஹஸ்ஸம்பி ஆபத்திங் ஆபஜ்ஜதியேவ தாவ, யாவ கோடி ந சி²ஜ்ஜதி. கதா³ பன கோடி சி²ஜ்ஜதீதி? மஹாஸுமத்தே²ரோ தாவ வத³தி – ‘‘ஆபத்திங் ஆபன்னோ ஏகஸ்ஸ ஆரோசேதி, ஸோ படினிவத்தித்வா தஸ்ஸேவ ஆரோசேதி; ஏவங் கோடி சி²ஜ்ஜதீ’’தி. மஹாபது³மத்தே²ரோ பனாஹ – ‘‘அயஞ்ஹி வத்து²புக்³க³லோயேவ. ஆபத்திங் ஆபன்னோ பன ஏகஸ்ஸ பி⁴க்கு²னோ ஆரோசேதி, அயங் அஞ்ஞஸ்ஸ ஆரோசேதி, ஸோ படினிவத்தித்வா யேனஸ்ஸ ஆரோசிதங், தஸ்ஸேவ ஆரோசேதி; ஏவங் ததியேன புக்³க³லேன து³தியஸ்ஸ ஆரோசிதே கோடி சி²ன்னா ஹோதீ’’தி.
399. Catutthe – duṭṭhullā nāma āpattīti ettha cattāri pārājikāni atthuddhāravasena dassitāni, saṅghādisesāpatti pana adhippetā, taṃ chādentassa pācittiyaṃ. Dhuraṃ nikkhittamatteti dhure nikkhittamatte. Sacepi dhuraṃ nikkhipitvā pacchā āroceti, na rakkhati; dhuraṃ nikkhittamatteyeva pācittiyanti vuttaṃ hoti. Sace pana evaṃ dhuraṃ nikkhipitvā paṭicchādanatthameva aññassa āroceti, sopi aññassāti etenupāyena samaṇasatampi samaṇasahassampi āpattiṃ āpajjatiyeva tāva, yāva koṭi na chijjati. Kadā pana koṭi chijjatīti? Mahāsumatthero tāva vadati – ‘‘āpattiṃ āpanno ekassa āroceti, so paṭinivattitvā tasseva āroceti; evaṃ koṭi chijjatī’’ti. Mahāpadumatthero panāha – ‘‘ayañhi vatthupuggaloyeva. Āpattiṃ āpanno pana ekassa bhikkhuno āroceti, ayaṃ aññassa āroceti, so paṭinivattitvā yenassa ārocitaṃ, tasseva āroceti; evaṃ tatiyena puggalena dutiyassa ārocite koṭi chinnā hotī’’ti.
400. அது³ட்டு²ல்லங் ஆபத்திந்தி அவஸேஸே பஞ்சாபத்திக்க²ந்தே⁴. அனுபஸம்பன்னஸ்ஸ து³ட்டு²ல்லங் வா அது³ட்டு²ல்லங் வா அஜ்ஜா²சாரந்தி எத்த² அனுபஸம்பன்னஸ்ஸ ஸுக்கவிஸ்ஸட்டி² ச காயஸங்ஸக்³கோ³ சாதி அயங் து³ட்டு²ல்லஅஜ்ஜா²சாரோ நாம. ஸேஸமெத்த² உத்தானமேவாதி. து⁴ரனிக்கே²பஸமுட்டா²னங் – காயவாசாசித்ததோ ஸமுட்டா²தி, அகிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங் , து³க்க²வேத³னந்தி.
400.Aduṭṭhullaṃ āpattinti avasese pañcāpattikkhandhe. Anupasampannassa duṭṭhullaṃ vā aduṭṭhullaṃ vā ajjhācāranti ettha anupasampannassa sukkavissaṭṭhi ca kāyasaṃsaggo cāti ayaṃ duṭṭhullaajjhācāro nāma. Sesamettha uttānamevāti. Dhuranikkhepasamuṭṭhānaṃ – kāyavācācittato samuṭṭhāti, akiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ , dukkhavedananti.
து³ட்டு²ல்லஸிக்கா²பத³ங் சதுத்த²ங்.
Duṭṭhullasikkhāpadaṃ catutthaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. ஸப்பாணகவக்³கோ³ • 7. Sappāṇakavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. து³ட்டு²ல்லஸிக்கா²பத³வண்ணனா • 4. Duṭṭhullasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. து³ட்டு²ல்லஸிக்கா²பத³வண்ணனா • 4. Duṭṭhullasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. து³ட்டு²ல்லஸிக்கா²பத³வண்ணனா • 4. Duṭṭhullasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. து³ட்டு²ல்லஸிக்கா²பத³ங் • 4. Duṭṭhullasikkhāpadaṃ
