| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
4. து³ட்டு²ல்லஸிக்கா²பத³வண்ணனா
4. Duṭṭhullasikkhāpadavaṇṇanā
சத்தாரி பாராஜிகானி அத்து²த்³தா⁴ரவஸேன பத³பா⁴ஜனியங் த³ஸ்ஸிதானீதி ஆஹ ‘‘து³ட்டு²ல்லந்தி ஸங்கா⁴தி³ஸேஸங் அதி⁴ப்பேத’’ந்தி. யேன கேனசி உபாயேனாதி ‘‘ஸாமங் வா ஜானாதி, அஞ்ஞே வா தஸ்ஸ ஆரோசெந்தி, ஸோ வா ஆரோசேதீ’’தி (பாசி॰ 399) வுத்தேஸு யேன கேனசி உபாயேன. பாசித்தியங் து⁴ரங் நிக்கி²த்தமத்தேயேவாதி அதி⁴ப்பாயோ. ஸசே பச்சா²பி ஆரோசேதி, து⁴ரனிக்கே²பனே ஆபத்திதோ ந முச்சதி. தேனாஹ ‘‘ஸசேபீ’’திஆதி³. ஸமணஸதம்பி ஆபஜ்ஜதியேவாதி ஸமணஸதம்பி ஸுத்வா யதி³ சா²தே³தி, பாசித்தியங் ஆபஜ்ஜதியேவாதி அத்தோ². யேனஸ்ஸ ஆரோசிதந்தி யேன து³தியேன அஸ்ஸ ததியஸ்ஸ ஆரோசிதங். தஸ்ஸேவாதி தஸ்ஸ து³தியஸ்ஸேவ. ஆரோசேதீதி படிச்சா²த³னத்த²மேவ ‘‘மா கஸ்ஸசி ஆரோசேஸீ’’தி வத³தி. கோடிசி²ன்னா ஹோதீதி (ஸாரத்த²॰ டீ॰ பாசித்திய 3.399) யஸ்மா படிச்சா²த³னபச்சயா ஆபத்திங் ஆபஜ்ஜித்வாவ து³தியேன ததியஸ்ஸ ஆரோசிதங், தஸ்மா தப்பச்சயா புன தேன ஆபஜ்ஜிதப்³பா³பத்தியா அபா⁴வதோ ஆபத்தியா கோடி சி²ன்னா நாம ஹோதி.
Cattāri pārājikāni atthuddhāravasena padabhājaniyaṃ dassitānīti āha ‘‘duṭṭhullanti saṅghādisesaṃ adhippeta’’nti. Yena kenaci upāyenāti ‘‘sāmaṃ vā jānāti, aññe vā tassa ārocenti, so vā ārocetī’’ti (pāci. 399) vuttesu yena kenaci upāyena. Pācittiyaṃ dhuraṃ nikkhittamatteyevāti adhippāyo. Sace pacchāpi āroceti, dhuranikkhepane āpattito na muccati. Tenāha ‘‘sacepī’’tiādi. Samaṇasatampi āpajjatiyevāti samaṇasatampi sutvā yadi chādeti, pācittiyaṃ āpajjatiyevāti attho. Yenassa ārocitanti yena dutiyena assa tatiyassa ārocitaṃ. Tassevāti tassa dutiyasseva. Ārocetīti paṭicchādanatthameva ‘‘mā kassaci ārocesī’’ti vadati. Koṭichinnā hotīti (sārattha. ṭī. pācittiya 3.399) yasmā paṭicchādanapaccayā āpattiṃ āpajjitvāva dutiyena tatiyassa ārocitaṃ, tasmā tappaccayā puna tena āpajjitabbāpattiyā abhāvato āpattiyā koṭi chinnā nāma hoti.
ஆதி³பதே³தி து³ட்டு²ல்லாபத்திஸஞ்ஞீ, வேமதிகோ, அது³ட்டு²ல்லாபத்திஸஞ்ஞீதி இமேஸு தீஸு ‘‘து³ட்டு²ல்லாபத்திஸஞ்ஞீ படிச்சா²தே³தீ’’தி (பாசி॰ 400) இமஸ்மிங் பட²மபதே³. இதரேஸு த்³வீஸூதி ‘‘வேமதிகோ படிச்சா²தே³தி, அது³ட்டு²ல்லாபத்திஸஞ்ஞீ படிச்சா²தே³தீ’’தி இமேஸு பதே³ஸு. அது³ட்டு²ல்லாயாதி அவஸேஸபஞ்சாபத்திக்க²ந்தே⁴. அனுபஸம்பன்னஸ்ஸ து³ட்டு²ல்லே வா அது³ட்டு²ல்லே வா அஜ்ஜா²சாரேதி அனுபஸம்பன்னஸ்ஸ புரிமபஞ்சஸிக்கா²பத³வீதிக்கமஸங்கா²தே து³ட்டு²ல்லே வா இதரஸ்மிங் அது³ட்டு²ல்லே வா அஜ்ஜா²சாரே. யங் பன ஸமந்தபாஸாதி³காயங் ‘‘அனுபஸம்பன்னஸ்ஸ ஸுக்கவிஸட்டி² ச காயஸங்ஸக்³கோ³ சாதி அயங் து³ட்டு²ல்லஅஜ்ஜா²சாரோ நாமா’’தி (பாசி॰ அட்ட²॰ 400) வுத்தங், தங் து³ட்டு²ல்லாரோசனஸிக்கா²பத³ட்ட²கதா²ய (பாசி॰ அட்ட²॰ 78 ஆத³யோ) ந ஸமேதி, ந சாபி ஏவங் வத்துங் யுஜ்ஜதி ‘‘ஆரோசனே அனுபஸம்பன்னஸ்ஸ து³ட்டு²ல்லங் அஞ்ஞதா² அதி⁴ப்பேதங், படிச்சா²த³னே அஞ்ஞதா²’’தி (ஸாரத்த²॰ டீ॰ பாசித்திய 400) விஸேஸகாரணஸ்ஸானுபலப்³ப⁴னதோ, தஸ்மா தங் உபபரிக்கி²தப்³ப³ங்.
Ādipadeti duṭṭhullāpattisaññī, vematiko, aduṭṭhullāpattisaññīti imesu tīsu ‘‘duṭṭhullāpattisaññī paṭicchādetī’’ti (pāci. 400) imasmiṃ paṭhamapade. Itaresu dvīsūti ‘‘vematiko paṭicchādeti, aduṭṭhullāpattisaññī paṭicchādetī’’ti imesu padesu. Aduṭṭhullāyāti avasesapañcāpattikkhandhe. Anupasampannassa duṭṭhulle vā aduṭṭhulle vā ajjhācāreti anupasampannassa purimapañcasikkhāpadavītikkamasaṅkhāte duṭṭhulle vā itarasmiṃ aduṭṭhulle vā ajjhācāre. Yaṃ pana samantapāsādikāyaṃ ‘‘anupasampannassa sukkavisaṭṭhi ca kāyasaṃsaggo cāti ayaṃ duṭṭhullaajjhācāro nāmā’’ti (pāci. aṭṭha. 400) vuttaṃ, taṃ duṭṭhullārocanasikkhāpadaṭṭhakathāya (pāci. aṭṭha. 78 ādayo) na sameti, na cāpi evaṃ vattuṃ yujjati ‘‘ārocane anupasampannassa duṭṭhullaṃ aññathā adhippetaṃ, paṭicchādane aññathā’’ti (sārattha. ṭī. pācittiya 400) visesakāraṇassānupalabbhanato, tasmā taṃ upaparikkhitabbaṃ.
து³ட்டு²ல்லஸிக்கா²பத³வண்ணனா நிட்டி²தா.
Duṭṭhullasikkhāpadavaṇṇanā niṭṭhitā.
