| Library / Tipiṭaka / ತಿಪಿಟಕ • Tipiṭaka / ವಜಿರಬುದ್ಧಿ-ಟೀಕಾ • Vajirabuddhi-ṭīkā |
೪. ದುಟ್ಠುಲ್ಲಸಿಕ್ಖಾಪದವಣ್ಣನಾ
4. Duṭṭhullasikkhāpadavaṇṇanā
೩೯೯. ‘‘ಪಾರಾಜಿಕಾನೀತಿ ಅತ್ಥುದ್ಧಾರವಸೇನ ದಸ್ಸಿತಾನೀ’’ತಿ ಕಥಂ ವಿಞ್ಞಾಯತೀತಿ ಚೇ? ಪರಿವಾರಪಾಳಿತೋ। ವುತ್ತಞ್ಹಿ ತತ್ಥ ‘‘ಆಪತ್ತಾಧಿಕರಣಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ। ಆಪತ್ತಾಧಿಕರಣಪಚ್ಚಯಾ ಚತಸ್ಸೋ ಆಪತ್ತಿಯೋ ಆಪಜ್ಜತಿ। ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಪಟಿಚ್ಛಾದೇತಿ, ಆಪತ್ತಿ ಪಾರಾಜಿಕಸ್ಸ। ವೇಮತಿಕಾ ಪಟಿಚ್ಛಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ। ಭಿಕ್ಖು ಸಙ್ಘಾದಿಸೇಸಂ ಪಟಿಚ್ಛಾದೇತಿ, ಆಪತ್ತಿ ಪಾಚಿತ್ತಿಯಸ್ಸ। ಆಚಾರವಿಪತ್ತಿಂ ಪಟಿಚ್ಛಾದೇತಿ , ಆಪತ್ತಿ ದುಕ್ಕಟಸ್ಸಾ’’ತಿ (ಪರಿ॰ ೨೯೦)। ಪಾರಾಜಿಕಂ ಪಟಿಚ್ಛಾದೇನ್ತೋ ಭಿಕ್ಖು ಅನಾಪತ್ತಿ, ನೋ ಆಪತ್ತಿಂ ಆಪಜ್ಜತಿ ಅವುತ್ತತ್ತಾತಿ ಚೇ? ನ, ಸಂಕಿಲಿಟ್ಠೇನ ಚಿತ್ತೇನ ಪಟಿಚ್ಛಾದನೇ ವಿನಾ ಆಪತ್ತಿಯಾ ಅಸಮ್ಭವತೋ। ದುಕ್ಕಟವಾರೇ ವತ್ತಬ್ಬಾಪಿ ಪಾರಾಜಿಕಾಪತ್ತಿಯೋ ಪಠಮಂ ಅತ್ಥುದ್ಧಾರವಸೇನ ಸಙ್ಘಾದಿಸೇಸೇಹಿ ಸಹ ವುತ್ತತ್ತಾ ನ ಸಕ್ಕಾ ಪುನ ವತ್ತುನ್ತಿ ನ ವುತ್ತಾತಿ ವೇದಿತಬ್ಬಾ।
399. ‘‘Pārājikānīti atthuddhāravasena dassitānī’’ti kathaṃ viññāyatīti ce? Parivārapāḷito. Vuttañhi tattha ‘‘āpattādhikaraṇapaccayā kati āpattiyo āpajjati. Āpattādhikaraṇapaccayā catasso āpattiyo āpajjati. Bhikkhunī jānaṃ pārājikaṃ dhammaṃ paṭicchādeti, āpatti pārājikassa. Vematikā paṭicchādeti, āpatti thullaccayassa. Bhikkhu saṅghādisesaṃ paṭicchādeti, āpatti pācittiyassa. Ācāravipattiṃ paṭicchādeti , āpatti dukkaṭassā’’ti (pari. 290). Pārājikaṃ paṭicchādento bhikkhu anāpatti, no āpattiṃ āpajjati avuttattāti ce? Na, saṃkiliṭṭhena cittena paṭicchādane vinā āpattiyā asambhavato. Dukkaṭavāre vattabbāpi pārājikāpattiyo paṭhamaṃ atthuddhāravasena saṅghādisesehi saha vuttattā na sakkā puna vattunti na vuttāti veditabbā.
ಯಾವ ಕೋಟಿ ನ ಛಿಜ್ಜತೀತಿ ಚೇತ್ಥ ಯೋ ಅನ್ತಮಸೋ ಪಟಿಚ್ಛಾದನತ್ಥಂ ಅಞ್ಞಸ್ಸ ಆರೋಚೇತು ವಾ, ಮಾ ವಾ, ಪಟಿಚ್ಛಾದನಚಿತ್ತೇನೇವ ಆಪತ್ತಿಂ ಆಪನ್ನೋ। ತಸ್ಸ ಪುನ ಅಞ್ಞಸ್ಸ ಪಟಿಚ್ಛಾದನತ್ಥಂ ಅನಾರೋಚನೇನೇವ ನ ಕೋಟಿ ಛಿನ್ನಾ ಹೋತಿ, ಕಿಂ ಪುನ ಪಟಿನಿವತ್ತಿತ್ವಾ ವಚನೇನ ಪಯೋಜನನ್ತಿ ನ ಅನ್ತಿಮಸ್ಸ ಅನಾರೋಚನೇನ ಛಿನ್ನಾ ಹೋತಿ, ಅಪ್ಪಟಿಚ್ಛಾದನೇನ ಏವ ಛಿನ್ನಾ ಹೋತಿ, ತತೋ ಅಪ್ಪಟಿಚ್ಛಾದನತ್ಥಂ ಅಪುಬ್ಬಸ್ಸ ಆರೋಚೇತಬ್ಬಂ, ತತೋ ಪಟ್ಠಾಯ ಕೋಟಿ ಛಿನ್ನಾ ಹೋತಿ, ತದಭಾವೋ ಪಟಿನಿವತ್ತಿತ್ವಾ ಅಪ್ಪಟಿಚ್ಛಾದನತ್ಥಂ ಆರೋಚೇತಬ್ಬಂ, ಏವಮ್ಪಿ ಕೋಟಿ ಛಿನ್ನಾ ಹೋತೀತಿ ಏವಂ ನೋ ಪಟಿಭಾತೀತಿ ಆಚರಿಯೋ। ತತಿಯೇನ ದುತಿಯಸ್ಸಾತಿ ಏತ್ಥ ‘‘ದುತಿಯೋ ನಾಮ ಪಠಮೋ’’ತಿ ವದನ್ತಾನಂ ‘‘ವತ್ಥು ಪುಗ್ಗಲೋ ನ ವತ್ತಬ್ಬೋ’’ತಿ ವಾರಿತತ್ತಾ ನ ಸುನ್ದರಂ। ಅಞ್ಞಸ್ಸ ಚತುತ್ಥಸ್ಸ ಆರೋಚನೇಪಿ ನ ಸುನ್ದರಂ। ಕಸ್ಮಾ? ಪುಬ್ಬೇವ ಸುತ್ವಾ ಅಞ್ಞಸ್ಸ ಅನಾರೋಚಿತತ್ತಾ। ‘‘ಸುತೇನ ಅಞ್ಞಸ್ಸ ಆರೋಚೇತಬ್ಬಂ ಸಿಯಾ’’ತಿ ವದನ್ತಿ।
Yāva koṭi na chijjatīti cettha yo antamaso paṭicchādanatthaṃ aññassa ārocetu vā, mā vā, paṭicchādanacitteneva āpattiṃ āpanno. Tassa puna aññassa paṭicchādanatthaṃ anārocaneneva na koṭi chinnā hoti, kiṃ puna paṭinivattitvā vacanena payojananti na antimassa anārocanena chinnā hoti, appaṭicchādanena eva chinnā hoti, tato appaṭicchādanatthaṃ apubbassa ārocetabbaṃ, tato paṭṭhāya koṭi chinnā hoti, tadabhāvo paṭinivattitvā appaṭicchādanatthaṃ ārocetabbaṃ, evampi koṭi chinnā hotīti evaṃ no paṭibhātīti ācariyo. Tatiyena dutiyassāti ettha ‘‘dutiyo nāma paṭhamo’’ti vadantānaṃ ‘‘vatthu puggalo na vattabbo’’ti vāritattā na sundaraṃ. Aññassa catutthassa ārocanepi na sundaraṃ. Kasmā? Pubbeva sutvā aññassa anārocitattā. ‘‘Sutena aññassa ārocetabbaṃ siyā’’ti vadanti.
ದುಟ್ಠುಲ್ಲಸಿಕ್ಖಾಪದವಣ್ಣನಾ ನಿಟ್ಠಿತಾ।
Duṭṭhullasikkhāpadavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೭. ಸಪ್ಪಾಣಕವಗ್ಗೋ • 7. Sappāṇakavaggo
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೪. ದುಟ್ಠುಲ್ಲಸಿಕ್ಖಾಪದವಣ್ಣನಾ • 4. Duṭṭhullasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೪. ದುಟ್ಠುಲ್ಲಸಿಕ್ಖಾಪದವಣ್ಣನಾ • 4. Duṭṭhullasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೪. ದುಟ್ಠುಲ್ಲಸಿಕ್ಖಾಪದವಣ್ಣನಾ • 4. Duṭṭhullasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೪. ದುಟ್ಠುಲ್ಲಸಿಕ್ಖಾಪದಂ • 4. Duṭṭhullasikkhāpadaṃ
