| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༤. དུཊྛུལླསིཀྑཱཔདཝཎྞནཱ
4. Duṭṭhullasikkhāpadavaṇṇanā
ཙཏྟཱརི པཱརཱཛིཀཱནི ཨཏྠུདྡྷཱརཝསེན པདབྷཱཛནིཡཾ དསྶིཏཱནཱིཏི ཨཱཧ ‘‘དུཊྛུལླནྟི སངྒྷཱདིསེསཾ ཨདྷིཔྤེཏ’’ནྟི། ཡེན ཀེནཙི ཨུཔཱཡེནཱཏི ‘‘སཱམཾ ཝཱ ཛཱནཱཏི, ཨཉྙེ ཝཱ ཏསྶ ཨཱརོཙེནྟི, སོ ཝཱ ཨཱརོཙེཏཱི’’ཏི (པཱཙི॰ ༣༩༩) ཝུཏྟེསུ ཡེན ཀེནཙི ཨུཔཱཡེན། པཱཙིཏྟིཡཾ དྷུརཾ ནིཀྑིཏྟམཏྟེཡེཝཱཏི ཨདྷིཔྤཱཡོ། སཙེ པཙྪཱཔི ཨཱརོཙེཏི, དྷུརནིཀྑེཔནེ ཨཱཔཏྟིཏོ ན མུཙྩཏི། ཏེནཱཧ ‘‘སཙེཔཱི’’ཏིཨཱདི། སམཎསཏམྤི ཨཱཔཛྫཏིཡེཝཱཏི སམཎསཏམྤི སུཏྭཱ ཡདི ཚཱདེཏི, པཱཙིཏྟིཡཾ ཨཱཔཛྫཏིཡེཝཱཏི ཨཏྠོ། ཡེནསྶ ཨཱརོཙིཏནྟི ཡེན དུཏིཡེན ཨསྶ ཏཏིཡསྶ ཨཱརོཙིཏཾ། ཏསྶེཝཱཏི ཏསྶ དུཏིཡསྶེཝ། ཨཱརོཙེཏཱིཏི པཊིཙྪཱདནཏྠམེཝ ‘‘མཱ ཀསྶཙི ཨཱརོཙེསཱི’’ཏི ཝདཏི། ཀོཊིཚིནྣཱ ཧོཏཱིཏི (སཱརཏྠ॰ ཊཱི॰ པཱཙིཏྟིཡ ༣.༣༩༩) ཡསྨཱ པཊིཙྪཱདནཔཙྩཡཱ ཨཱཔཏྟིཾ ཨཱཔཛྫིཏྭཱཝ དུཏིཡེན ཏཏིཡསྶ ཨཱརོཙིཏཾ, ཏསྨཱ ཏཔྤཙྩཡཱ པུན ཏེན ཨཱཔཛྫིཏབྦཱཔཏྟིཡཱ ཨབྷཱཝཏོ ཨཱཔཏྟིཡཱ ཀོཊི ཚིནྣཱ ནཱམ ཧོཏི།
Cattāri pārājikāni atthuddhāravasena padabhājaniyaṃ dassitānīti āha ‘‘duṭṭhullanti saṅghādisesaṃ adhippeta’’nti. Yena kenaci upāyenāti ‘‘sāmaṃ vā jānāti, aññe vā tassa ārocenti, so vā ārocetī’’ti (pāci. 399) vuttesu yena kenaci upāyena. Pācittiyaṃ dhuraṃ nikkhittamatteyevāti adhippāyo. Sace pacchāpi āroceti, dhuranikkhepane āpattito na muccati. Tenāha ‘‘sacepī’’tiādi. Samaṇasatampi āpajjatiyevāti samaṇasatampi sutvā yadi chādeti, pācittiyaṃ āpajjatiyevāti attho. Yenassa ārocitanti yena dutiyena assa tatiyassa ārocitaṃ. Tassevāti tassa dutiyasseva. Ārocetīti paṭicchādanatthameva ‘‘mā kassaci ārocesī’’ti vadati. Koṭichinnā hotīti (sārattha. ṭī. pācittiya 3.399) yasmā paṭicchādanapaccayā āpattiṃ āpajjitvāva dutiyena tatiyassa ārocitaṃ, tasmā tappaccayā puna tena āpajjitabbāpattiyā abhāvato āpattiyā koṭi chinnā nāma hoti.
ཨཱདིཔདེཏི དུཊྛུལླཱཔཏྟིསཉྙཱི, ཝེམཏིཀོ, ཨདུཊྛུལླཱཔཏྟིསཉྙཱིཏི ཨིམེསུ ཏཱིསུ ‘‘དུཊྛུལླཱཔཏྟིསཉྙཱི པཊིཙྪཱདེཏཱི’’ཏི (པཱཙི॰ ༤༠༠) ཨིམསྨིཾ པཋམཔདེ། ཨིཏརེསུ དྭཱིསཱུཏི ‘‘ཝེམཏིཀོ པཊིཙྪཱདེཏི, ཨདུཊྛུལླཱཔཏྟིསཉྙཱི པཊིཙྪཱདེཏཱི’’ཏི ཨིམེསུ པདེསུ། ཨདུཊྛུལླཱཡཱཏི ཨཝསེསཔཉྩཱཔཏྟིཀྑནྡྷེ། ཨནུཔསམྤནྣསྶ དུཊྛུལླེ ཝཱ ཨདུཊྛུལླེ ཝཱ ཨཛ྄ཛྷཱཙཱརེཏི ཨནུཔསམྤནྣསྶ པུརིམཔཉྩསིཀྑཱཔདཝཱིཏིཀྐམསངྑཱཏེ དུཊྛུལླེ ཝཱ ཨིཏརསྨིཾ ཨདུཊྛུལླེ ཝཱ ཨཛ྄ཛྷཱཙཱརེ། ཡཾ པན སམནྟཔཱསཱདིཀཱཡཾ ‘‘ཨནུཔསམྤནྣསྶ སུཀྐཝིསཊྛི ཙ ཀཱཡསཾསགྒོ ཙཱཏི ཨཡཾ དུཊྛུལླཨཛ྄ཛྷཱཙཱརོ ནཱམཱ’’ཏི (པཱཙི॰ ཨཊྛ॰ ༤༠༠) ཝུཏྟཾ, ཏཾ དུཊྛུལླཱརོཙནསིཀྑཱཔདཊྛཀཐཱཡ (པཱཙི॰ ཨཊྛ॰ ༧༨ ཨཱདཡོ) ན སམེཏི, ན ཙཱཔི ཨེཝཾ ཝཏྟུཾ ཡུཛྫཏི ‘‘ཨཱརོཙནེ ཨནུཔསམྤནྣསྶ དུཊྛུལླཾ ཨཉྙཐཱ ཨདྷིཔྤེཏཾ, པཊིཙྪཱདནེ ཨཉྙཐཱ’’ཏི (སཱརཏྠ॰ ཊཱི॰ པཱཙིཏྟིཡ ༤༠༠) ཝིསེསཀཱརཎསྶཱནུཔལབྦྷནཏོ, ཏསྨཱ ཏཾ ཨུཔཔརིཀྑིཏབྦཾ།
Ādipadeti duṭṭhullāpattisaññī, vematiko, aduṭṭhullāpattisaññīti imesu tīsu ‘‘duṭṭhullāpattisaññī paṭicchādetī’’ti (pāci. 400) imasmiṃ paṭhamapade. Itaresu dvīsūti ‘‘vematiko paṭicchādeti, aduṭṭhullāpattisaññī paṭicchādetī’’ti imesu padesu. Aduṭṭhullāyāti avasesapañcāpattikkhandhe. Anupasampannassa duṭṭhulle vā aduṭṭhulle vā ajjhācāreti anupasampannassa purimapañcasikkhāpadavītikkamasaṅkhāte duṭṭhulle vā itarasmiṃ aduṭṭhulle vā ajjhācāre. Yaṃ pana samantapāsādikāyaṃ ‘‘anupasampannassa sukkavisaṭṭhi ca kāyasaṃsaggo cāti ayaṃ duṭṭhullaajjhācāro nāmā’’ti (pāci. aṭṭha. 400) vuttaṃ, taṃ duṭṭhullārocanasikkhāpadaṭṭhakathāya (pāci. aṭṭha. 78 ādayo) na sameti, na cāpi evaṃ vattuṃ yujjati ‘‘ārocane anupasampannassa duṭṭhullaṃ aññathā adhippetaṃ, paṭicchādane aññathā’’ti (sārattha. ṭī. pācittiya 400) visesakāraṇassānupalabbhanato, tasmā taṃ upaparikkhitabbaṃ.
དུཊྛུལླསིཀྑཱཔདཝཎྞནཱ ནིཊྛིཏཱ།
Duṭṭhullasikkhāpadavaṇṇanā niṭṭhitā.
