| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
3. து³ட்டு²ல்லவாசாஸிக்கா²பத³ங்
3. Duṭṭhullavācāsikkhāpadaṃ
283. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ அரஞ்ஞே விஹரதி. தஸ்ஸாயஸ்மதோ விஹாரோ அபி⁴ரூபோ ஹோதி த³ஸ்ஸனீயோ பாஸாதி³கோ. தேன கோ² பன ஸமயேன ஸம்ப³ஹுலா இத்தி²யோ ஆராமங் ஆக³மங்ஸு விஹாரபெக்கி²காயோ. அத² கோ² தா இத்தி²யோ யேனாயஸ்மா உதா³யீ தேனுபஸங்கமிங்ஸு; உபஸங்கமித்வா ஆயஸ்மந்தங் உதா³யிங் ஏதத³வோசுங் – ‘‘இச்சா²ம மயங், ப⁴ந்தே, அய்யஸ்ஸ விஹாரங் பெக்கி²து’’ந்தி. அத² கோ² ஆயஸ்மா உதா³யீ தா இத்தி²யோ விஹாரங் பெக்கா²பெத்வா தாஸங் இத்தீ²னங் வச்சமக்³க³ங் பஸ்ஸாவமக்³க³ங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி யாசதிபி ஆயாசதிபி புச்ச²திபி படிபுச்ச²திபி ஆசிக்க²திபி அனுஸாஸதிபி அக்கோஸதிபி. யா தா இத்தி²யோ சி²ன்னிகா து⁴த்திகா அஹிரிகாயோ தா ஆயஸ்மதா உதா³யினா ஸத்³தி⁴ங் உஹஸந்திபி உல்லபந்திபி உஜ்ஜக்³க⁴ந்திபி உப்பண்டெ³ந்திபி. யா பன தா இத்தி²யோ ஹிரிமனா தா நிக்க²மித்வா பி⁴க்கூ² உஜ்ஜா²பெந்தி – ‘‘இத³ங், ப⁴ந்தே, நச்ச²ன்னங் நப்பதிரூபங். ஸாமிகேனபி மயங் ஏவங் வுத்தா ந இச்செ²ய்யாம, கிங் பனாய்யேன உதா³யினா’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மங் து³ட்டு²ல்லாஹி வாசாஹி ஓபா⁴ஸிஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உதா³யிங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா ஆயஸ்மந்தங் உதா³யிங் படிபுச்சி² – ‘‘ஸச்சங் கிர த்வங், உதா³யி, மாதுகா³மங் து³ட்டு²ல்லாஹி வாசாஹி ஓபா⁴ஸஸீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங், மோக⁴புரிஸ, அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம த்வங், மோக⁴புரிஸ, மாதுகா³மங் து³ட்டு²ல்லாஹி வாசாஹி ஓபா⁴ஸிஸ்ஸஸி! நனு மயா, மோக⁴புரிஸ, அனேகபரியாயேன விராகா³ய த⁴ம்மோ தே³ஸிதோ நோ ஸராகா³ய…பே॰… காமபரிளாஹானங் வூபஸமோ அக்கா²தோ. நேதங், மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
283. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī araññe viharati. Tassāyasmato vihāro abhirūpo hoti dassanīyo pāsādiko. Tena kho pana samayena sambahulā itthiyo ārāmaṃ āgamaṃsu vihārapekkhikāyo. Atha kho tā itthiyo yenāyasmā udāyī tenupasaṅkamiṃsu; upasaṅkamitvā āyasmantaṃ udāyiṃ etadavocuṃ – ‘‘icchāma mayaṃ, bhante, ayyassa vihāraṃ pekkhitu’’nti. Atha kho āyasmā udāyī tā itthiyo vihāraṃ pekkhāpetvā tāsaṃ itthīnaṃ vaccamaggaṃ passāvamaggaṃ ādissa vaṇṇampi bhaṇati avaṇṇampi bhaṇati yācatipi āyācatipi pucchatipi paṭipucchatipi ācikkhatipi anusāsatipi akkosatipi. Yā tā itthiyo chinnikā dhuttikā ahirikāyo tā āyasmatā udāyinā saddhiṃ uhasantipi ullapantipi ujjagghantipi uppaṇḍentipi. Yā pana tā itthiyo hirimanā tā nikkhamitvā bhikkhū ujjhāpenti – ‘‘idaṃ, bhante, nacchannaṃ nappatirūpaṃ. Sāmikenapi mayaṃ evaṃ vuttā na iccheyyāma, kiṃ panāyyena udāyinā’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmaṃ duṭṭhullāhi vācāhi obhāsissatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ udāyiṃ paṭipucchi – ‘‘saccaṃ kira tvaṃ, udāyi, mātugāmaṃ duṭṭhullāhi vācāhi obhāsasī’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, mātugāmaṃ duṭṭhullāhi vācāhi obhāsissasi! Nanu mayā, moghapurisa, anekapariyāyena virāgāya dhammo desito no sarāgāya…pe… kāmapariḷāhānaṃ vūpasamo akkhāto. Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
284. ‘‘யோ பன பி⁴க்கு² ஓதிண்ணோ விபரிணதேன சித்தேன மாதுகா³மங் து³ட்டு²ல்லாஹி வாசாஹி ஓபா⁴ஸெய்ய யதா² தங் யுவா யுவதிங் மேது²னுபஸங்ஹிதாஹி, ஸங்கா⁴தி³ஸேஸோ’’தி.
284.‘‘Yo pana bhikkhu otiṇṇo vipariṇatena cittena mātugāmaṃ duṭṭhullāhi vācāhi obhāseyya yathā taṃ yuvā yuvatiṃ methunupasaṃhitāhi, saṅghādiseso’’ti.
285. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
285.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ஓதிண்ணோ நாம ஸாரத்தோ அபெக்க²வா படிப³த்³த⁴சித்தோ.
Otiṇṇo nāma sāratto apekkhavā paṭibaddhacitto.
விபரிணதந்தி ரத்தம்பி சித்தங் விபரிணதங், து³ட்ட²ம்பி சித்தங் விபரிணதங் மூள்ஹம்பி சித்தங் விபரிணதங். அபிச, ரத்தங் சித்தங் இமஸ்மிங் அத்தே² அதி⁴ப்பேதங் விபரிணதந்தி.
Vipariṇatanti rattampi cittaṃ vipariṇataṃ, duṭṭhampi cittaṃ vipariṇataṃ mūḷhampi cittaṃ vipariṇataṃ. Apica, rattaṃ cittaṃ imasmiṃ atthe adhippetaṃ vipariṇatanti.
மாதுகா³மோ நாம மனுஸ்ஸித்தீ², ந யக்கீ², ந பேதீ, ந திரச்சா²னக³தா. விஞ்ஞூ படிப³லா ஸுபா⁴ஸிதது³ப்³பா⁴ஸிதங் து³ட்டு²ல்லாது³ட்டு²ல்லங் ஆஜானிதுங்.
Mātugāmo nāma manussitthī, na yakkhī, na petī, na tiracchānagatā. Viññū paṭibalā subhāsitadubbhāsitaṃ duṭṭhullāduṭṭhullaṃ ājānituṃ.
து³ட்டு²ல்லா நாம வாசா வச்சமக்³க³பஸ்ஸாவமக்³க³மேது²னத⁴ம்மப்படிஸங்யுத்தா வாசா.
Duṭṭhullā nāma vācā vaccamaggapassāvamaggamethunadhammappaṭisaṃyuttā vācā.
ஓபா⁴ஸெய்யாதி அஜ்ஜா²சாரோ வுச்சதி.
Obhāseyyāti ajjhācāro vuccati.
யதா² தங் யுவா யுவதிந்தி த³ஹரோ த³ஹரிங், தருணோ தருணிங், காமபோ⁴கீ³ காமபோ⁴கி³னிங்.
Yathā taṃ yuvā yuvatinti daharo dahariṃ, taruṇo taruṇiṃ, kāmabhogī kāmabhoginiṃ.
மேது²னுபஸங்ஹிதாஹீதி மேது²னத⁴ம்மப்படிஸங்யுத்தாஹி.
Methunupasaṃhitāhīti methunadhammappaṭisaṃyuttāhi.
ஸங்கா⁴தி³ஸேஸோதி …பே॰… தேனபி வுச்சதி ஸங்கா⁴தி³ஸேஸோதி.
Saṅghādisesoti …pe… tenapi vuccati saṅghādisesoti.
த்³வே மக்³கே³ ஆதி³ஸ்ஸ வண்ணம்பி ப⁴ணதி, அவண்ணம்பி ப⁴ணதி, யாசதிபி, ஆயாசதிபி, புச்ச²திபி, படிபுச்ச²திபி, ஆசிக்க²திபி, அனுஸாஸதிபி, அக்கோஸதிபி.
Dve magge ādissa vaṇṇampi bhaṇati, avaṇṇampi bhaṇati, yācatipi, āyācatipi, pucchatipi, paṭipucchatipi, ācikkhatipi, anusāsatipi, akkosatipi.
வண்ணங் ப⁴ணதி நாம த்³வே மக்³கே³ தோ²மேதி வண்ணேதி பஸங்ஸதி.
Vaṇṇaṃ bhaṇati nāma dve magge thometi vaṇṇeti pasaṃsati.
அவண்ணங் ப⁴ணதி நாம த்³வே மக்³கே³ கு²ங்ஸேதி வம்பே⁴தி க³ரஹதி.
Avaṇṇaṃ bhaṇati nāma dve magge khuṃseti vambheti garahati.
யாசதி நாம தே³ஹி மே, அரஹஸி மே தா³துந்தி.
Yācati nāma dehi me, arahasi me dātunti.
ஆயாசதி நாம கதா³ தே மாதா பஸீதி³ஸ்ஸதி, கதா³ தே பிதா பஸீதி³ஸ்ஸதி, கதா³ தே தே³வதாயோ பஸீதி³ஸ்ஸந்தி, கதா³ 1 ஸுக²ணோ ஸுலயோ ஸுமுஹுத்தோ ப⁴விஸ்ஸதி, கதா³ தே மேது²னங் த⁴ம்மங் லபி⁴ஸ்ஸாமீதி.
Āyācati nāma kadā te mātā pasīdissati, kadā te pitā pasīdissati, kadā te devatāyo pasīdissanti, kadā 2 sukhaṇo sulayo sumuhutto bhavissati, kadā te methunaṃ dhammaṃ labhissāmīti.
புச்ச²தி நாம கத²ங் த்வங் ஸாமிகஸ்ஸ தே³ஸி, கத²ங் ஜாரஸ்ஸ தே³ஸீதி?
Pucchati nāma kathaṃ tvaṃ sāmikassa desi, kathaṃ jārassa desīti?
படிபுச்ச²தி நாம ஏவங் கிர த்வங் ஸாமிகஸ்ஸ தே³ஸி, ஏவங் ஜாரஸ்ஸ தே³ஸீதி.
Paṭipucchati nāma evaṃ kira tvaṃ sāmikassa desi, evaṃ jārassa desīti.
ஆசிக்க²தி நாம புட்டோ² ப⁴ணதி – ‘‘ஏவங் தே³ஹி. ஏவங் தெ³ந்தா ஸாமிகஸ்ஸ பியா ப⁴விஸ்ஸஸி மனாபா சா’’தி.
Ācikkhati nāma puṭṭho bhaṇati – ‘‘evaṃ dehi. Evaṃ dentā sāmikassa piyā bhavissasi manāpā cā’’ti.
அனுஸாஸதி நாம அபுட்டோ² ப⁴ணதி – ‘‘ஏவங் தே³ஹி. ஏவங் தெ³ந்தா ஸாமிகஸ்ஸ பியா ப⁴விஸ்ஸதி மனாபா சா’’தி.
Anusāsati nāma apuṭṭho bhaṇati – ‘‘evaṃ dehi. Evaṃ dentā sāmikassa piyā bhavissati manāpā cā’’ti.
அக்கோஸதி நாம அனிமித்தாஸி, நிமித்தமத்தாஸி, அலோஹிதாஸி, து⁴வலோஹிதாஸி , து⁴வசோளாஸி, பக்³க⁴ரந்தீஸி, ஸிக²ரணீஸி, இத்தி²பண்ட³காஸி, வேபுரிஸிகாஸி, ஸம்பி⁴ன்னாஸி, உப⁴தொப்³யஞ்ஜனாஸீதி.
Akkosati nāma animittāsi, nimittamattāsi, alohitāsi, dhuvalohitāsi , dhuvacoḷāsi, paggharantīsi, sikharaṇīsi, itthipaṇḍakāsi, vepurisikāsi, sambhinnāsi, ubhatobyañjanāsīti.
286. இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நங் இத்தி²யா வச்சமக்³க³ங் பஸ்ஸாவமக்³க³ங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி யாசதிபி ஆயாசதிபி புச்ச²திபி படிபுச்ச²திபி ஆசிக்க²திபி அனுஸாஸதிபி அக்கோஸதிபி, ஆபத்தி ஸங்கா⁴தி³ஸேஸஸ்ஸ…பே॰… .
286. Itthī ca hoti itthisaññī sāratto ca. Bhikkhu ca naṃ itthiyā vaccamaggaṃ passāvamaggaṃ ādissa vaṇṇampi bhaṇati avaṇṇampi bhaṇati yācatipi āyācatipi pucchatipi paṭipucchatipi ācikkhatipi anusāsatipi akkosatipi, āpatti saṅghādisesassa…pe… .
த்³வே இத்தி²யோ த்³வின்னங் இத்தீ²னங் இத்தி²ஸஞ்ஞீ ஸாரத்தோ ச. பி⁴க்கு² ச நங் த்³வின்னங் இத்தீ²னங் வச்சமக்³க³ங் பஸ்ஸாவமக்³க³ங் ஆதி³ஸ்ஸ வண்ணம்பி ப⁴ணதி அவண்ணங்பி ப⁴ணதி…பே॰… அக்கோஸதிபி, ஆபத்தி த்³வின்னங் ஸங்கா⁴தி³ஸேஸானங்…பே॰… .
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ vaccamaggaṃ passāvamaggaṃ ādissa vaṇṇampi bhaṇati avaṇṇaṃpi bhaṇati…pe… akkosatipi, āpatti dvinnaṃ saṅghādisesānaṃ…pe… .
இத்தீ² ச பண்ட³கோ ச உபி⁴ன்னங் இத்தி²ஸஞ்ஞீ ஸாரத்தோ ச. பி⁴க்கு² ச நங் உபி⁴ன்னங் வச்சமக்³க³ங் பஸ்ஸாவமக்³க³ங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி ஸங்கா⁴தி³ஸேஸேன து³க்கடஸ்ஸ…பே॰… .
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ vaccamaggaṃ passāvamaggaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti saṅghādisesena dukkaṭassa…pe… .
இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நங் இத்தி²யா வச்சமக்³க³ங் பஸ்ஸாவமக்³க³ங் ட²பெத்வா அத⁴க்க²கங் உப்³ப⁴ஜாணுமண்ட³லங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி , ஆபத்தி து²ல்லச்சயஸ்ஸ…பே॰….
Itthī ca hoti itthisaññī sāratto ca. Bhikkhu ca naṃ itthiyā vaccamaggaṃ passāvamaggaṃ ṭhapetvā adhakkhakaṃ ubbhajāṇumaṇḍalaṃ ādissa vaṇṇampi bhaṇati avaṇṇampi bhaṇati…pe… akkosatipi , āpatti thullaccayassa…pe….
த்³வே இத்தி²யோ த்³வின்னங் இத்தீ²னங் இத்தி²ஸஞ்ஞீ ஸாரத்தோ ச. பி⁴க்கு² ச நங் த்³வின்னங் இத்தீ²னங் வச்சமக்³க³ங் பஸ்ஸாவமக்³க³ங் ட²பெத்வா அத⁴க்க²கங் உப்³ப⁴ஜாணுமண்ட³லங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி த்³வின்னங் து²ல்லச்சயானங்…பே॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ vaccamaggaṃ passāvamaggaṃ ṭhapetvā adhakkhakaṃ ubbhajāṇumaṇḍalaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti dvinnaṃ thullaccayānaṃ…pe….
இத்தீ² ச பண்ட³கோ ச உபி⁴ன்னங் இத்தி²ஸஞ்ஞீ ஸாரத்தோ ச. பி⁴க்கு² ச நங் உபி⁴ன்னங் வச்சமக்³க³ங் பஸ்ஸாவமக்³க³ங் ட²பெத்வா அத⁴க்க²கங் உப்³ப⁴ஜாணுமண்ட³லங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி து²ல்லச்சயேன து³க்கடஸ்ஸ…பே॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ vaccamaggaṃ passāvamaggaṃ ṭhapetvā adhakkhakaṃ ubbhajāṇumaṇḍalaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti thullaccayena dukkaṭassa…pe….
இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நங் இத்தி²யா உப்³ப⁴க்க²கங் அதோ⁴ஜாணுமண்ட³லங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி து³க்கடஸ்ஸ…பே॰….
Itthī ca hoti itthisaññī sāratto ca. Bhikkhu ca naṃ itthiyā ubbhakkhakaṃ adhojāṇumaṇḍalaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti dukkaṭassa…pe….
த்³வே இத்தி²யோ த்³வின்னங் இத்தீ²னங் இத்தி²ஸஞ்ஞீ ஸாரத்தோ ச. பி⁴க்கு² ச நங் த்³வின்னங் இத்தீ²னங் உப்³ப⁴க்க²கங் அதோ⁴ஜாணுமண்ட³லங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி த்³வின்னங் து³க்கடானங்…பே॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ ubbhakkhakaṃ adhojāṇumaṇḍalaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti dvinnaṃ dukkaṭānaṃ…pe….
இத்தீ² ச பண்ட³கோ ச உபி⁴ன்னங் இத்தி²ஸஞ்ஞீ ஸாரத்தோ ச. பி⁴க்கு² ச நங் உபி⁴ன்னங் உப்³ப⁴க்க²கங் அதோ⁴ஜாணுமண்ட³லங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி த்³வின்னங் து³க்கடானங்…பே॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ ubbhakkhakaṃ adhojāṇumaṇḍalaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti dvinnaṃ dukkaṭānaṃ…pe….
இத்தீ² ச ஹோதி இத்தி²ஸஞ்ஞீ ஸாரத்தோ ச. பி⁴க்கு² ச நங் இத்தி²யா காயபடிப³த்³த⁴ங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி து³க்கடஸ்ஸ…பே॰….
Itthī ca hoti itthisaññī sāratto ca. Bhikkhu ca naṃ itthiyā kāyapaṭibaddhaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti dukkaṭassa…pe….
த்³வே இத்தி²யோ த்³வின்னங் இத்தீ²னங் இத்தி²ஸஞ்ஞீ ஸாரத்தோ ச. பி⁴க்கு² ச நங் த்³வின்னங் இத்தீ²னங் காயபடிப³த்³த⁴ங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி த்³வின்னங் து³க்கடானங்…பே॰….
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ kāyapaṭibaddhaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti dvinnaṃ dukkaṭānaṃ…pe….
இத்தீ² ச பண்ட³கோ ச உபி⁴ன்னங் இத்தி²ஸஞ்ஞீ ஸாரத்தோ ச. பி⁴க்கு² ச நங் உபி⁴ன்னங் காயபடிப³த்³த⁴ங் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி…பே॰… அக்கோஸதிபி, ஆபத்தி த்³வின்னங் து³க்கடானங்…பே॰….
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ kāyapaṭibaddhaṃ ādissa vaṇṇampi bhaṇati avaṇṇampi bhaṇati…pe… akkosatipi, āpatti dvinnaṃ dukkaṭānaṃ…pe….
287. அனாபத்தி அத்த²புரெக்கா²ரஸ்ஸ, த⁴ம்மபுரெக்கா²ரஸ்ஸ, அனுஸாஸனிபுரெக்கா²ரஸ்ஸ, உம்மத்தகஸ்ஸ, ஆதி³கம்மிகஸ்ஸாதி.
287. Anāpatti atthapurekkhārassa, dhammapurekkhārassa, anusāsanipurekkhārassa, ummattakassa, ādikammikassāti.
வினீதவத்து²உத்³தா³னகா³தா²
Vinītavatthuuddānagāthā
லோஹிதங் கக்கஸாகிண்ணங், க²ரங் தீ³க⁴ஞ்ச வாபிதங்;
Lohitaṃ kakkasākiṇṇaṃ, kharaṃ dīghañca vāpitaṃ;
கச்சி ஸங்ஸீத³தி மக்³கோ³, ஸத்³தா⁴ தா³னேன கம்முனாதி.
Kacci saṃsīdati maggo, saddhā dānena kammunāti.
வினீதவத்து²
Vinītavatthu
288. தேன கோ² பன ஸமயேன அஞ்ஞதரா இத்தீ² நவரத்தங் கம்ப³லங் பாருதா ஹோதி. அஞ்ஞதரோ பி⁴க்கு² ஸாரத்தோ தங் இத்தி²ங் ஏதத³வோச – ‘‘லோஹிதங் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, நவரத்தோ கம்ப³லோ’’தி. தஸ்ஸ குக்குச்சங் அஹோஸி ‘‘ப⁴க³வதா ஸிக்கா²பத³ங் பஞ்ஞத்தங், கச்சி நு கோ² அஹங் ஸங்கா⁴தி³ஸேஸங் ஆபத்திங் ஆபன்னோ’’தி? ப⁴க³வதோ ஏதமத்த²ங் ஆரோசேஸி. ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.
288. Tena kho pana samayena aññatarā itthī navarattaṃ kambalaṃ pārutā hoti. Aññataro bhikkhu sāratto taṃ itthiṃ etadavoca – ‘‘lohitaṃ kho te, bhaginī’’ti. Sā na paṭivijāni. ‘‘Āmāyya, navaratto kambalo’’ti. Tassa kukkuccaṃ ahosi ‘‘bhagavatā sikkhāpadaṃ paññattaṃ, kacci nu kho ahaṃ saṅghādisesaṃ āpattiṃ āpanno’’ti? Bhagavato etamatthaṃ ārocesi. ‘‘Anāpatti, bhikkhu, saṅghādisesassa; āpatti dukkaṭassā’’ti.
தேன கோ² பன ஸமயேன அஞ்ஞதரா இத்தீ² க²ரகம்ப³லங் பாருதா ஹோதி. அஞ்ஞதரோ பி⁴க்கு² ஸாரத்தோ தங் இத்தி²ங் ஏதத³வோச – ‘‘கக்கஸலோமங் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, க²ரகம்ப³லகோ’’தி. தஸ்ஸ குக்குச்சங் அஹோஸி…பே॰… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.
Tena kho pana samayena aññatarā itthī kharakambalaṃ pārutā hoti. Aññataro bhikkhu sāratto taṃ itthiṃ etadavoca – ‘‘kakkasalomaṃ kho te, bhaginī’’ti. Sā na paṭivijāni. ‘‘Āmāyya, kharakambalako’’ti. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
தேன கோ² பன ஸமயேன அஞ்ஞதரா இத்தீ² நவாவுதங் கம்ப³லங் பாருதா ஹோதி. அஞ்ஞதரோ பி⁴க்கு² ஸாரத்தோ தங் இத்தி²ங் ஏதத³வோச – ‘‘ஆகிண்ணலோமங் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, நவாவுதோ கம்ப³லோ’’தி. தஸ்ஸ குக்குச்சங் அஹோஸி…பே॰… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.
Tena kho pana samayena aññatarā itthī navāvutaṃ kambalaṃ pārutā hoti. Aññataro bhikkhu sāratto taṃ itthiṃ etadavoca – ‘‘ākiṇṇalomaṃ kho te, bhaginī’’ti. Sā na paṭivijāni. ‘‘Āmāyya, navāvuto kambalo’’ti. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
தேன கோ² பன ஸமயேன அஞ்ஞதரா இத்தீ² க²ரகம்ப³லங் பாருதா ஹோதி. அஞ்ஞதரோ பி⁴க்கு² ஸாரத்தோ தங் இத்தி²ங் ஏதத³வோச – ‘‘க²ரலோமங் கோ² தே, ப⁴கி³னீ’’தி. ஸா ந படிவிஜானி. ‘‘ஆமாய்ய, க²ரகம்ப³லகோ’’தி. தஸ்ஸ குக்குச்சங் அஹோஸி…பே॰… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.
Tena kho pana samayena aññatarā itthī kharakambalaṃ pārutā hoti. Aññataro bhikkhu sāratto taṃ itthiṃ etadavoca – ‘‘kharalomaṃ kho te, bhaginī’’ti. Sā na paṭivijāni. ‘‘Āmāyya, kharakambalako’’ti. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
289. தேன கோ² பன ஸமயேன அஞ்ஞதரா இத்தீ² கெ²த்தங் வபாபெத்வா ஆக³ச்ச²தி. அஞ்ஞதரோ பி⁴க்கு² ஸாரத்தோ தங் இத்தி²ங் ஏதத³வோச – ‘‘வாபிதங் கோ² தே, ப⁴கி³னீ’’தி? ஸா ந படிவிஜானி. ‘‘ஆமாய்ய, நோ ச கோ² படிவுத்த’’ந்தி. தஸ்ஸ குக்குச்சங் அஹோஸி…பே॰… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.
289. Tena kho pana samayena aññatarā itthī khettaṃ vapāpetvā āgacchati. Aññataro bhikkhu sāratto taṃ itthiṃ etadavoca – ‘‘vāpitaṃ kho te, bhaginī’’ti? Sā na paṭivijāni. ‘‘Āmāyya, no ca kho paṭivutta’’nti. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
தேன கோ² பன ஸமயேன அஞ்ஞதரோ பி⁴க்கு² பரிப்³பா³ஜிகங் படிபதே² பஸ்ஸித்வா ஸாரத்தோ தங் பரிப்³பா³ஜிகங் ஏதத³வோச – ‘‘கச்சி, ப⁴கி³னி, மக்³கோ³ ஸங்ஸீத³தீ’’தி? ஸா ந படிவிஜானி. ‘‘ஆம பி⁴க்கு², படிபஜ்ஜிஸ்ஸஸீ’’தி . தஸ்ஸ குக்குச்சங் அஹோஸி…பே॰… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து²ல்லச்சயஸ்ஸா’’தி.
Tena kho pana samayena aññataro bhikkhu paribbājikaṃ paṭipathe passitvā sāratto taṃ paribbājikaṃ etadavoca – ‘‘kacci, bhagini, maggo saṃsīdatī’’ti? Sā na paṭivijāni. ‘‘Āma bhikkhu, paṭipajjissasī’’ti . Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti thullaccayassā’’ti.
தேன கோ² பன ஸமயேன அஞ்ஞதரோ பி⁴க்கு² ஸாரத்தோ அஞ்ஞதரங் இத்தி²ங் ஏதத³வோச – ‘‘ஸத்³தா⁴ஸி த்வங், ப⁴கி³னி. அபிச, யங் ஸாமிகஸ்ஸ தே³ஸி தங் நாம்ஹாகங் தே³ஸீ’’தி . ‘‘கிங், ப⁴ந்தே’’தி? ‘‘மேது²னத⁴ம்ம’’ந்தி. தஸ்ஸ குக்குச்சங் அஹோஸி…பே॰… ‘‘ஆபத்திங் த்வங், பி⁴க்கு², ஆபன்னோ ஸங்கா⁴தி³ஸேஸ’’ந்தி.
Tena kho pana samayena aññataro bhikkhu sāratto aññataraṃ itthiṃ etadavoca – ‘‘saddhāsi tvaṃ, bhagini. Apica, yaṃ sāmikassa desi taṃ nāmhākaṃ desī’’ti . ‘‘Kiṃ, bhante’’ti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
தேன கோ² பன ஸமயேன அஞ்ஞதரோ பி⁴க்கு² ஸாரத்தோ அஞ்ஞதரங் இத்தி²ங் ஏதத³வோச – ‘‘ஸத்³தா⁴ஸி த்வங், ப⁴கி³னி. அபிச, யங் அக்³க³தா³னங் தங் நாம்ஹாகங் தே³ஸீ’’தி. ‘‘கிங், ப⁴ந்தே, அக்³க³தா³ன’’ந்தி? ‘‘மேது²னத⁴ம்ம’’ந்தி. தஸ்ஸ குக்குச்சங் அஹோஸி…பே॰… ‘‘ஆபத்திங் த்வங், பி⁴க்கு², ஆபன்னோ ஸங்கா⁴தி³ஸேஸ’’ந்தி.
Tena kho pana samayena aññataro bhikkhu sāratto aññataraṃ itthiṃ etadavoca – ‘‘saddhāsi tvaṃ, bhagini. Apica, yaṃ aggadānaṃ taṃ nāmhākaṃ desī’’ti. ‘‘Kiṃ, bhante, aggadāna’’nti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
தேன கோ² பன ஸமயேன அஞ்ஞதரா இத்தீ² கம்மங் கரோதி. அஞ்ஞதரோ பி⁴க்கு² ஸாரத்தோ தங் இத்தி²ங் ஏதத³வோச – ‘‘திட்ட², ப⁴கி³னி, அஹங் கரிஸ்ஸாமீதி…பே॰… நிஸீத³, ப⁴கி³னி, அஹங் கரிஸ்ஸாமீதி…பே॰… நிபஜ்ஜ, ப⁴கி³னி, அஹங் கரிஸ்ஸாமீ’’தி. ஸா ந படிவிஜானி. தஸ்ஸ குக்குச்சங் அஹோஸி…பே॰… ‘‘அனாபத்தி, பி⁴க்கு², ஸங்கா⁴தி³ஸேஸஸ்ஸ; ஆபத்தி து³க்கடஸ்ஸா’’தி.
Tena kho pana samayena aññatarā itthī kammaṃ karoti. Aññataro bhikkhu sāratto taṃ itthiṃ etadavoca – ‘‘tiṭṭha, bhagini, ahaṃ karissāmīti…pe… nisīda, bhagini, ahaṃ karissāmīti…pe… nipajja, bhagini, ahaṃ karissāmī’’ti. Sā na paṭivijāni. Tassa kukkuccaṃ ahosi…pe… ‘‘anāpatti, bhikkhu, saṅghādisesassa; āpatti dukkaṭassā’’ti.
து³ட்டு²ல்லவாசாஸிக்கா²பத³ங் நிட்டி²தங் ததியங்.
Duṭṭhullavācāsikkhāpadaṃ niṭṭhitaṃ tatiyaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
பத³பா⁴ஜனீயவண்ணனா • Padabhājanīyavaṇṇanā
வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
