| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
3. து³ட்டு²ல்லவாசாஸிக்கா²பத³வண்ணனா
3. Duṭṭhullavācāsikkhāpadavaṇṇanā
283. தேன ஸமயேன பு³த்³தோ⁴ ப⁴க³வாதி து³ட்டு²ல்லவாசாஸிக்கா²பத³ங். தத்த² ஆதி³ஸ்ஸாதி அபதி³ஸித்வா. வண்ணம்பி ப⁴ணதீதிஆதீ³னி பரதோ ஆவி ப⁴விஸ்ஸந்தி. சி²ன்னிகாதி சி²ன்னஒத்தப்பா. து⁴த்திகாதி ஸடா². அஹிரிகாயோதி நில்லஜ்ஜா . உஹஸந்தீதி ஸிதங் கத்வா மந்த³ஹஸிதங் ஹஸந்தி. உல்லபந்தீதி ‘‘அஹோ அய்யோ’’திஆதி³னா நயேன உச்சகரணிங் நானாவித⁴ங் பலோப⁴னகத²ங் கதெ²ந்தி. உஜ்ஜக்³க⁴ந்தீதி மஹாஹஸிதங் ஹஸந்தி. உப்பண்டெ³ந்தீதி ‘‘பண்ட³கோ அயங், நாயங் புரிஸோ’’திஆதி³னா நயேன பரிஹாஸங் கரொந்தி.
283.Tena samayena buddho bhagavāti duṭṭhullavācāsikkhāpadaṃ. Tattha ādissāti apadisitvā. Vaṇṇampi bhaṇatītiādīni parato āvi bhavissanti. Chinnikāti chinnaottappā. Dhuttikāti saṭhā. Ahirikāyoti nillajjā . Uhasantīti sitaṃ katvā mandahasitaṃ hasanti. Ullapantīti ‘‘aho ayyo’’tiādinā nayena uccakaraṇiṃ nānāvidhaṃ palobhanakathaṃ kathenti. Ujjagghantīti mahāhasitaṃ hasanti. Uppaṇḍentīti ‘‘paṇḍako ayaṃ, nāyaṃ puriso’’tiādinā nayena parihāsaṃ karonti.
285. ஸாரத்தோதி து³ட்டு²ல்லவாசஸ்ஸாத³ராகே³ன ஸாரத்தோ. அபெக்க²வா படிப³த்³த⁴சித்தோதி வுத்தனயமேவ, கேவலங் இத⁴ வாசஸ்ஸாத³ராகோ³ யோஜேதப்³போ³. மாதுகா³மங் து³ட்டு²ல்லாஹி வாசாஹீதி எத்த² அதி⁴ப்பேதங் மாதுகா³மங் த³ஸ்ஸெந்தோ ‘‘மாதுகா³மோ’’திஆதி³மாஹ. தத்த² விஞ்ஞூ படிப³லா ஸுபா⁴ஸிதது³ப்³பா⁴ஸிதங் து³ட்டு²ல்லாது³ட்டு²ல்லங் ஆஜானிதுந்தி யா பண்டி³தா ஸாத்த²கனிரத்த²ககத²ங் அஸத்³த⁴ம்மஸத்³த⁴ம்மபடிஸங்யுத்தகத²ஞ்ச ஜானிதுங் படிப³லா, அயங் இத⁴ அதி⁴ப்பேதா. யா பன மஹல்லிகாபி பா³லா ஏலமூகா³ அயங் இத⁴ அனதி⁴ப்பேதாதி த³ஸ்ஸேதி.
285.Sārattoti duṭṭhullavācassādarāgena sāratto. Apekkhavā paṭibaddhacittoti vuttanayameva, kevalaṃ idha vācassādarāgo yojetabbo. Mātugāmaṃ duṭṭhullāhi vācāhīti ettha adhippetaṃ mātugāmaṃ dassento ‘‘mātugāmo’’tiādimāha. Tattha viññū paṭibalā subhāsitadubbhāsitaṃ duṭṭhullāduṭṭhullaṃ ājānitunti yā paṇḍitā sātthakaniratthakakathaṃ asaddhammasaddhammapaṭisaṃyuttakathañca jānituṃ paṭibalā, ayaṃ idha adhippetā. Yā pana mahallikāpi bālā elamūgā ayaṃ idha anadhippetāti dasseti.
ஓபா⁴ஸெய்யாதி அவபா⁴ஸெய்ய நானாப்பகாரகங் அஸத்³த⁴ம்மவசனங் வதெ³ய்ய. யஸ்மா பனேவங் ஓபா⁴ஸந்தஸ்ஸ யோ ஸோ ஓபா⁴ஸோ நாம, ஸோ அத்த²தோ அஜ்ஜா²சாரோ ஹோதி ராக³வஸேன அபி⁴ப⁴வித்வா ஸஞ்ஞமவேலங் ஆசாரோ, தஸ்மா தமத்த²ங் த³ஸ்ஸெந்தோ ‘‘ஓபா⁴ஸெய்யாதி அஜ்ஜா²சாரோ வுச்சதீ’’தி ஆஹ. யதா² தந்தி எத்த² தந்தி நிபாதமத்தங், யதா² யுவா யுவதிந்தி அத்தோ².
Obhāseyyāti avabhāseyya nānāppakārakaṃ asaddhammavacanaṃ vadeyya. Yasmā panevaṃ obhāsantassa yo so obhāso nāma, so atthato ajjhācāro hoti rāgavasena abhibhavitvā saññamavelaṃ ācāro, tasmā tamatthaṃ dassento ‘‘obhāseyyāti ajjhācāro vuccatī’’ti āha. Yathā tanti ettha tanti nipātamattaṃ, yathā yuvā yuvatinti attho.
த்³வே மக்³கே³ ஆதி³ஸ்ஸாதிஆதி³ யேனாகாரேன ஓபா⁴ஸதோ ஸங்கா⁴தி³ஸேஸோ ஹோதி, தங் த³ஸ்ஸேதுங் வுத்தங். தத்த² த்³வே மக்³கே³தி வச்சமக்³க³ஞ்ச பஸ்ஸாவமக்³க³ஞ்ச. ஸேஸங் உத்³தே³ஸே தாவ பாகடமேவ. நித்³தே³ஸே பன தோ²மேதீதி ‘‘இத்தி²லக்க²ணேன ஸுப⁴லக்க²ணேன ஸமன்னாக³தாஸீ’’தி வத³தி, ந தாவ ஸீஸங் ஏதி. ‘‘தவ வச்சமக்³கோ³ ச பஸ்ஸாவமக்³கோ³ ச ஈதி³ஸோ தேன நாம ஈதி³ஸேன இத்தி²லக்க²ணேன ஸுப⁴லக்க²ணேன ஸமன்னாக³தாஸீ’’தி வத³தி, ஸீஸங் ஏதி, ஸங்கா⁴தி³ஸேஸோ. வண்ணேதி பஸங்ஸதீதி இமானி பன தோ²மனபத³ஸ்ஸேவ வேவசனானி.
Dve magge ādissātiādi yenākārena obhāsato saṅghādiseso hoti, taṃ dassetuṃ vuttaṃ. Tattha dve maggeti vaccamaggañca passāvamaggañca. Sesaṃ uddese tāva pākaṭameva. Niddese pana thometīti ‘‘itthilakkhaṇena subhalakkhaṇena samannāgatāsī’’ti vadati, na tāva sīsaṃ eti. ‘‘Tava vaccamaggo ca passāvamaggo ca īdiso tena nāma īdisena itthilakkhaṇena subhalakkhaṇena samannāgatāsī’’ti vadati, sīsaṃ eti, saṅghādiseso. Vaṇṇeti pasaṃsatīti imāni pana thomanapadasseva vevacanāni.
கு²ங்ஸேதீதி வாசாபதோதே³ன க⁴ட்டேதி. வம்பே⁴தீதி அபஸாதே³தி. க³ரஹதீதி தோ³ஸங் தே³தி. பரதோ பன பாளியா ஆக³தேஹி ‘‘அனிமித்தாஸீ’’திஆதீ³ஹி ஏகாத³ஸஹி பதே³ஹி அக⁴டிதே ஸீஸங் ந ஏதி, க⁴டிதேபி தேஸு ஸிக²ரணீஸி ஸம்பி⁴ன்னாஸி உப⁴தொப்³யஞ்ஜனாஸீதி இமேஹி தீஹி க⁴டிதேயேவ ஸங்கா⁴தி³ஸேஸோ.
Khuṃsetīti vācāpatodena ghaṭṭeti. Vambhetīti apasādeti. Garahatīti dosaṃ deti. Parato pana pāḷiyā āgatehi ‘‘animittāsī’’tiādīhi ekādasahi padehi aghaṭite sīsaṃ na eti, ghaṭitepi tesu sikharaṇīsi sambhinnāsi ubhatobyañjanāsīti imehi tīhi ghaṭiteyeva saṅghādiseso.
தே³ஹி மேதி யாசனாயபி எத்தகேனேவ ஸீஸங் ந ஏதி, ‘‘மேது²னங் த⁴ம்மங் தே³ஹீ’’தி ஏவங் மேது²னத⁴ம்மேன க⁴டிதே ஏவ ஸங்கா⁴தி³ஸேஸோ.
Dehi meti yācanāyapi ettakeneva sīsaṃ na eti, ‘‘methunaṃ dhammaṃ dehī’’ti evaṃ methunadhammena ghaṭite eva saṅghādiseso.
கதா³ தே மாதா பஸீதி³ஸ்ஸதீதிஆதீ³ஸு ஆயாசனவசனேஸுபி எத்தகேனேவ ஸீஸங் ந ஏதி, ‘‘கதா³ தே மாதா பஸீதி³ஸ்ஸதி, கதா³ தே மேது²னங் த⁴ம்மங் லபி⁴ஸ்ஸாமீ’’தி வா ‘‘தவ மாதரி பஸன்னாய மேது²னங் த⁴ம்மங் லபி⁴ஸ்ஸாமீ’’தி வா ஆதி³னா பன நயேன மேது²னத⁴ம்மேன க⁴டிதேயேவ ஸங்கா⁴தி³ஸேஸோ.
Kadā te mātā pasīdissatītiādīsu āyācanavacanesupi ettakeneva sīsaṃ na eti, ‘‘kadā te mātā pasīdissati, kadā te methunaṃ dhammaṃ labhissāmī’’ti vā ‘‘tava mātari pasannāya methunaṃ dhammaṃ labhissāmī’’ti vā ādinā pana nayena methunadhammena ghaṭiteyeva saṅghādiseso.
கத²ங் த்வங் ஸாமிகஸ்ஸ தே³ஸீதிஆதீ³ஸு புச்சா²வசனேஸுபி மேது²னத⁴ம்மந்தி வுத்தேயேவ ஸங்கா⁴தி³ஸேஸோ, ந இதரதா². ஏவங் கிர த்வங் ஸாமிகஸ்ஸ தே³ஸீதி படிபுச்சா²வசனேஸுபி ஏஸேவ நயோ.
Kathaṃ tvaṃ sāmikassa desītiādīsu pucchāvacanesupi methunadhammanti vutteyeva saṅghādiseso, na itarathā. Evaṃ kira tvaṃ sāmikassa desīti paṭipucchāvacanesupi eseva nayo.
ஆசிக்க²னாய புட்டோ² ப⁴ணதீதி ‘‘கத²ங் த³த³மானா ஸாமிகஸ்ஸ பியா ஹோதீ’’தி ஏவங் புட்டோ² ஆசிக்க²தி. எத்த² ச ‘‘ஏவங் தே³ஹி ஏவங் த³த³மானா’’தி வுத்தேபி ஸீஸங் ந ஏதி. ‘‘மேது²னத⁴ம்மங் ஏவங் தே³ஹி ஏவங் உபனேஹி ஏவங் மேது²னத⁴ம்மங் த³த³மானா உபனயமானா பியா ஹோதீ’’திஆதி³னா பன நயேன மேது²னத⁴ம்மேன க⁴டிதேயேவ ஸங்கா⁴தி³ஸேஸோ. அனுஸாஸனீவசனேஸுபி ஏஸேவ நயோ.
Ācikkhanāya puṭṭho bhaṇatīti ‘‘kathaṃ dadamānā sāmikassa piyā hotī’’ti evaṃ puṭṭho ācikkhati. Ettha ca ‘‘evaṃ dehi evaṃ dadamānā’’ti vuttepi sīsaṃ na eti. ‘‘Methunadhammaṃ evaṃ dehi evaṃ upanehi evaṃ methunadhammaṃ dadamānā upanayamānā piyā hotī’’tiādinā pana nayena methunadhammena ghaṭiteyeva saṅghādiseso. Anusāsanīvacanesupi eseva nayo.
அக்கோஸனித்³தே³ஸே – அனிமித்தாஸீதி நிமித்தரஹிதாஸி, குஞ்சிகபணாலிமத்தமேவ தவ த³கஸோதந்தி வுத்தங் ஹோதி.
Akkosaniddese – animittāsīti nimittarahitāsi, kuñcikapaṇālimattameva tava dakasotanti vuttaṃ hoti.
நிமித்தமத்தாஸீதி தவ இத்தி²னிமித்தங் அபரிபுண்ணங் ஸஞ்ஞாமத்தமேவாதி வுத்தங் ஹோதி. அலோஹிதாதி ஸுக்க²ஸோதா. து⁴வலோஹிதாதி நிச்சலோஹிதா கிலின்னத³கஸோதா. து⁴வசோளாதி நிச்சபக்கி²த்தாணிசோளா, ஸதா³ ஆணிசோளகங் ஸேவஸீதி வுத்தங் ஹோதி. பக்³க⁴ரந்தீதி ஸவந்தீ; ஸதா³ தே முத்தங் ஸவதீதி வுத்தங் ஹோதி. ஸிக²ரணீதி ப³ஹினிக்க²ந்தஆணிமங்ஸா. இத்தி²பண்ட³காதி அனிமித்தாவ வுச்சதி. வேபுரிஸிகாதி ஸமஸ்ஸுதா³டி²கா புரிஸரூபா இத்தீ². ஸம்பி⁴ன்னாதி ஸம்பி⁴ன்னவச்சமக்³க³பஸ்ஸாவமக்³கா³. உப⁴தொப்³யஞ்ஜனாதி இத்தி²னிமித்தேன ச புரிஸனிமித்தேன சாதி உபோ⁴ஹி ப்³யஞ்ஜனேஹி ஸமன்னாக³தா.
Nimittamattāsīti tava itthinimittaṃ aparipuṇṇaṃ saññāmattamevāti vuttaṃ hoti. Alohitāti sukkhasotā. Dhuvalohitāti niccalohitā kilinnadakasotā. Dhuvacoḷāti niccapakkhittāṇicoḷā, sadā āṇicoḷakaṃ sevasīti vuttaṃ hoti. Paggharantīti savantī; sadā te muttaṃ savatīti vuttaṃ hoti. Sikharaṇīti bahinikkhantaāṇimaṃsā. Itthipaṇḍakāti animittāva vuccati. Vepurisikāti samassudāṭhikā purisarūpā itthī. Sambhinnāti sambhinnavaccamaggapassāvamaggā. Ubhatobyañjanāti itthinimittena ca purisanimittena cāti ubhohi byañjanehi samannāgatā.
இமேஸு ச பன ஏகாத³ஸஸு பதே³ஸு ஸிக²ரணீஸி ஸம்பி⁴ன்னாஸி உப⁴தொப்³யஞ்ஜனாஸீதி இமானியேவ தீணி பதா³னி ஸுத்³தா⁴னி ஸீஸங் எந்தி. இதி இமானி ச தீணி புரிமானி ச வச்சமக்³க³பஸ்ஸாவமக்³க³மேது²னத⁴ம்மபதா³னி தீணீதி ச² பதா³னி ஸுத்³தா⁴னி ஆபத்திகரானி. ஸேஸானி அனிமித்தாதிஆதீ³னி ‘‘அனிமித்தே மேது²னத⁴ம்மங் மே தே³ஹீ’’தி வா ‘‘அனிமித்தாஸி மேது²னத⁴ம்மங் மே தே³ஹீ’’தி வா ஆதி³னா நயேன மேது²னத⁴ம்மேன க⁴டிதானேவ ஆபத்திகரானி ஹொந்தீதி வேதி³தப்³பா³னி.
Imesu ca pana ekādasasu padesu sikharaṇīsi sambhinnāsi ubhatobyañjanāsīti imāniyeva tīṇi padāni suddhāni sīsaṃ enti. Iti imāni ca tīṇi purimāni ca vaccamaggapassāvamaggamethunadhammapadāni tīṇīti cha padāni suddhāni āpattikarāni. Sesāni animittātiādīni ‘‘animitte methunadhammaṃ me dehī’’ti vā ‘‘animittāsi methunadhammaṃ me dehī’’ti vā ādinā nayena methunadhammena ghaṭitāneva āpattikarāni hontīti veditabbāni.
286. இதா³னி ய்வாயங் ஓதிண்ணோ விபரிணதேன சித்தேன ஓபா⁴ஸதி, தஸ்ஸ வச்சமக்³க³பஸ்ஸாவமக்³கே³ ஆதி³ஸ்ஸ ஏதேஸங் வண்ணப⁴ணனாதீ³னங் வஸேன வித்தா²ரதோ ஆபத்திபே⁴த³ங் த³ஸ்ஸெந்தோ ‘‘இத்தீ² ச ஹோதி இத்தி²ஸஞ்ஞீ’’திஆதி³மாஹ. தேஸங் அத்தோ² காயஸங்ஸக்³கே³ வுத்தனயேனேவ வேதி³தப்³போ³.
286. Idāni yvāyaṃ otiṇṇo vipariṇatena cittena obhāsati, tassa vaccamaggapassāvamagge ādissa etesaṃ vaṇṇabhaṇanādīnaṃ vasena vitthārato āpattibhedaṃ dassento ‘‘itthī ca hoti itthisaññī’’tiādimāha. Tesaṃ attho kāyasaṃsagge vuttanayeneva veditabbo.
அயங் பன விஸேஸோ – அத⁴க்க²கந்தி அக்க²கதோ பட்டா²ய அதோ⁴. உப்³ப⁴ஜாணுமண்ட³ல ஜாணுமண்ட³லதோ பட்டா²ய உத்³த⁴ங். உப்³ப⁴க்க²கந்தி அக்க²கதோ பட்டா²ய உத்³த⁴ங். அதோ⁴ ஜாணுமண்ட³லந்தி ஜாணுமண்ட³லதோ பட்டா²ய அதோ⁴. அக்க²கங் பன ஜாணுமண்ட³லஞ்ச எத்தே²வ து³க்கடக்கெ²த்தே ஸங்க³ஹங் க³ச்ச²ந்தி பி⁴க்கு²னியா காயஸங்ஸக்³கே³ விய. ந ஹி பு³த்³தா⁴ க³ருகாபத்திங் ஸாவஸேஸங் பஞ்ஞபெந்தீதி. காயப்படிப³த்³த⁴ந்தி வத்த²ங் வா புப்ப²ங் வா ஆப⁴ரணங் வா.
Ayaṃ pana viseso – adhakkhakanti akkhakato paṭṭhāya adho. Ubbhajāṇumaṇḍala jāṇumaṇḍalato paṭṭhāya uddhaṃ. Ubbhakkhakanti akkhakato paṭṭhāya uddhaṃ. Adho jāṇumaṇḍalanti jāṇumaṇḍalato paṭṭhāya adho. Akkhakaṃ pana jāṇumaṇḍalañca ettheva dukkaṭakkhette saṅgahaṃ gacchanti bhikkhuniyā kāyasaṃsagge viya. Na hi buddhā garukāpattiṃ sāvasesaṃ paññapentīti. Kāyappaṭibaddhanti vatthaṃ vā pupphaṃ vā ābharaṇaṃ vā.
287. அத்த²புரெக்கா²ரஸ்ஸாதி அனிமித்தாதிஆதீ³னங் பதா³னங் அத்த²ங் கதெ²ந்தஸ்ஸ, அட்ட²கத²ங் வா ஸஜ்ஜா²யங் கரொந்தஸ்ஸ.
287.Atthapurekkhārassāti animittātiādīnaṃ padānaṃ atthaṃ kathentassa, aṭṭhakathaṃ vā sajjhāyaṃ karontassa.
த⁴ம்மபுரெக்கா²ரஸ்ஸாதி பாளிங் வாசெந்தஸ்ஸ வா ஸஜ்ஜா²யந்தஸ்ஸ வா. ஏவங் அத்த²ஞ்ச த⁴ம்மஞ்ச புரக்க²த்வா ப⁴ணந்தஸ்ஸ அத்த²புரெக்கா²ரஸ்ஸ ச த⁴ம்மபுரெக்கா²ரஸ்ஸ ச அனாபத்தி.
Dhammapurekkhārassāti pāḷiṃ vācentassa vā sajjhāyantassa vā. Evaṃ atthañca dhammañca purakkhatvā bhaṇantassa atthapurekkhārassa ca dhammapurekkhārassa ca anāpatti.
அனுஸாஸனிபுரெக்கா²ரஸ்ஸாதி ‘‘இதா³னிபி அனிமித்தாஸி உப⁴த்தொப்³யஞ்ஜனாஸி அப்பமாத³ங் இதா³னி கரெய்யாஸி, யதா² ஆயதிம்பி ஏவரூபா ந ஹோஹிஸீ’’தி ஏவங் அனுஸிட்டி²ங் புரக்க²த்வா ப⁴ணந்தஸ்ஸ அனுஸாஸனிபுரெக்கா²ரஸ்ஸ அனாபத்தி. யோ பன பி⁴க்கு²னீனங் பாளிங் வாசெந்தோ பகதிவாசனாமக்³க³ங் பஹாய ஹஸந்தோ ஹஸந்தோ ‘‘ஸிக²ரணீஸி ஸம்பி⁴ன்னாஸி உப⁴தொப்³யஞ்ஜனாஸீ’’தி புனப்புனங் ப⁴ணதி, தஸ்ஸ ஆபத்தியேவ. உம்மத்தகஸ்ஸ அனாபத்தி. இத⁴ ஆதி³கம்மிகோ உதா³யித்தே²ரோ, தஸ்ஸ அனாபத்தி ஆதி³கம்மிகஸ்ஸாதி.
Anusāsanipurekkhārassāti ‘‘idānipi animittāsi ubhattobyañjanāsi appamādaṃ idāni kareyyāsi, yathā āyatimpi evarūpā na hohisī’’ti evaṃ anusiṭṭhiṃ purakkhatvā bhaṇantassa anusāsanipurekkhārassa anāpatti. Yo pana bhikkhunīnaṃ pāḷiṃ vācento pakativācanāmaggaṃ pahāya hasanto hasanto ‘‘sikharaṇīsi sambhinnāsi ubhatobyañjanāsī’’ti punappunaṃ bhaṇati, tassa āpattiyeva. Ummattakassa anāpatti. Idha ādikammiko udāyitthero, tassa anāpatti ādikammikassāti.
பத³பா⁴ஜனீயவண்ணனா நிட்டி²தா.
Padabhājanīyavaṇṇanā niṭṭhitā.
ஸமுட்டா²னாதீ³ஸு இத³ங் ஸிக்கா²பத³ங் திஸமுட்டா²னங் காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங் , ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், த்³விவேத³னந்தி.
Samuṭṭhānādīsu idaṃ sikkhāpadaṃ tisamuṭṭhānaṃ kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ , sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dvivedananti.
288. வினீதவத்தூ²ஸு லோஹிதவத்து²ஸ்மிங் ஸோ பி⁴க்கு² இத்தி²யா லோஹிதகங் நிமித்தங் ஸந்தா⁴யாஹ – இதரா ந அஞ்ஞாஸி, தஸ்மா து³க்கடங்.
288. Vinītavatthūsu lohitavatthusmiṃ so bhikkhu itthiyā lohitakaṃ nimittaṃ sandhāyāha – itarā na aññāsi, tasmā dukkaṭaṃ.
கக்கஸலோமந்தி ரஸ்ஸலோமேஹி ப³ஹுலோமங். ஆகிண்ணலோமந்தி ஜடிதலோமங். க²ரலோமந்தி த²த்³த⁴லோமங். தீ³க⁴லோமந்தி அரஸ்ஸலோமங். ஸப்³ப³ங் இத்தி²னிமித்தமேவ ஸந்தா⁴ய வுத்தங்.
Kakkasalomanti rassalomehi bahulomaṃ. Ākiṇṇalomanti jaṭitalomaṃ. Kharalomanti thaddhalomaṃ. Dīghalomanti arassalomaṃ. Sabbaṃ itthinimittameva sandhāya vuttaṃ.
289. வாபிதங் கோ² தேதி அஸத்³த⁴ம்மங் ஸந்தா⁴யாஹ, ஸா அஸல்லக்கெ²த்வா நோ ச கோ² படிவுத்தந்தி ஆஹ. படிவுத்தங் நாம உத³கவப்பே பீ³ஜேஹி அப்பதிட்டி²தோகாஸே பாணகேஹி வினாஸிதபீ³ஜே வா ஓகாஸே புன பீ³ஜங் பதிட்டா²பெத்வா உத³கேன ஆஸித்தங், த²லவப்பே விஸமபதிதானங் வா பீ³ஜானங் ஸமகரணத்தா²ய புன அட்ட²த³ந்தகேன ஸமீகதங், தேஸு அஞ்ஞதரங் ஸந்தா⁴ய ஏஸா ஆஹ.
289.Vāpitaṃ kho teti asaddhammaṃ sandhāyāha, sā asallakkhetvā no ca kho paṭivuttanti āha. Paṭivuttaṃ nāma udakavappe bījehi appatiṭṭhitokāse pāṇakehi vināsitabīje vā okāse puna bījaṃ patiṭṭhāpetvā udakena āsittaṃ, thalavappe visamapatitānaṃ vā bījānaṃ samakaraṇatthāya puna aṭṭhadantakena samīkataṃ, tesu aññataraṃ sandhāya esā āha.
மக்³க³வத்து²ஸ்மிங் மக்³கோ³ ஸங்ஸீத³தீதி அங்க³ஜாதமக்³க³ங் ஸந்தா⁴யாஹ. ஸேஸங் உத்தானமேவாதி.
Maggavatthusmiṃ maggo saṃsīdatīti aṅgajātamaggaṃ sandhāyāha. Sesaṃ uttānamevāti.
து³ட்டு²ல்லவாசாஸிக்கா²பத³வண்ணனா நிட்டி²தா.
Duṭṭhullavācāsikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. து³ட்டு²ல்லவாசாஸிக்கா²பத³ங் • 3. Duṭṭhullavācāsikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
பத³பா⁴ஜனீயவண்ணனா • Padabhājanīyavaṇṇanā
வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
