| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
3. து³ட்டு²ல்லவாசாஸிக்கா²பத³வண்ணனா
3. Duṭṭhullavācāsikkhāpadavaṇṇanā
283. ததியே உத்தரபத³லோபேன சி²ன்னஒத்தப்பா ‘‘சி²ன்னிகா’’தி வுத்தாதி ஆஹ ‘‘சி²ன்னிகாதி சி²ன்னஓதப்பா’’தி.
283. Tatiye uttarapadalopena chinnaottappā ‘‘chinnikā’’ti vuttāti āha ‘‘chinnikāti chinnaotappā’’ti.
285. யதா² யுவா யுவதிந்தி ஏதேன ஓபா⁴ஸனே நிராஸங்கபா⁴வங் த³ஸ்ஸேதி. மேது²னுபஸஞ்ஹிதாஹீதி இத³ங் து³ட்டு²ல்லவாசாய ஸிகா²ப்பத்தலக்க²ணத³ஸ்ஸனங். இத்தி²லக்க²ணேனாதி வுத்தமத்த²ங் விவரிதுங் ‘‘ஸுப⁴லக்க²ணேனா’’தி வுத்தங். ந தாவ ஸீஸங் ஏதீதி ‘‘இத்தி²லக்க²ணேன ஸமன்னாக³தாஸீ’’திஆதி³னா வண்ணப⁴ணனங் ஸங்கா⁴தி³ஸேஸாபத்திஜனகங் ஹுத்வா மத்த²கங் ந பாபுணாதி. வண்ணப⁴ணனஞ்ஹி யேனாகாரேன ப⁴ணந்தஸ்ஸ ஸங்கா⁴தி³ஸேஸோ ஹோதி, தேனாகாரேன ப⁴ணந்தஸ்ஸ ஸிகா²ப்பத்தங் நாம ஹோதி. ‘‘இத்தி²லக்க²ணேன ஸமன்னாக³தாஸீதிஆதி³கங் பன து³ட்டு²ல்லவாசஸ்ஸாத³ராக³வஸேன ப⁴ணந்தஸ்ஸ து³க்கட’’ந்தி க³ண்டி²பதே³ஸு வுத்தங்.
285.Yathā yuvā yuvatinti etena obhāsane nirāsaṅkabhāvaṃ dasseti. Methunupasañhitāhīti idaṃ duṭṭhullavācāya sikhāppattalakkhaṇadassanaṃ. Itthilakkhaṇenāti vuttamatthaṃ vivarituṃ ‘‘subhalakkhaṇenā’’ti vuttaṃ. Na tāva sīsaṃ etīti ‘‘itthilakkhaṇena samannāgatāsī’’tiādinā vaṇṇabhaṇanaṃ saṅghādisesāpattijanakaṃ hutvā matthakaṃ na pāpuṇāti. Vaṇṇabhaṇanañhi yenākārena bhaṇantassa saṅghādiseso hoti, tenākārena bhaṇantassa sikhāppattaṃ nāma hoti. ‘‘Itthilakkhaṇena samannāgatāsītiādikaṃ pana duṭṭhullavācassādarāgavasena bhaṇantassa dukkaṭa’’nti gaṇṭhipadesu vuttaṃ.
ஏகாத³ஸஹி பதே³ஹி அக⁴டிதே ஸீஸங் ந ஏதீதி ‘‘அனிமித்தாஸீ’’திஆதீ³ஹி ஏகாத³ஸஹி பதே³ஹி அக⁴டிதே அவண்ணப⁴ணனங் ஸீஸங் ந ஏதி, அவண்ணப⁴ணனங் நாம ந ஹோதீதி வுத்தங் ஹோதி. க⁴டிதேபீதி ஏகாத³ஸஹி பதே³ஹி அவண்ணப⁴ணனே க⁴டிதேபி. இமேஹி தீஹி க⁴டிதேயேவ ஸங்கா⁴தி³ஸேஸோதி ‘‘ஸிக²ரணீ’’திஆதீ³ஹி தீஹியேவ பதே³ஹி அவண்ணப⁴ணனே க⁴டிதேயேவ ஸங்கா⁴தி³ஸேஸோ பஸ்ஸாவமக்³க³ஸ்ஸ நியதவசனத்தா அச்சோளாரிகத்தா ச. அனிமித்தாஸீதிஆதீ³ஹி பன அட்ட²ஹி பதே³ஹி க⁴டிதே கேவலங் அவண்ணப⁴ணனமேவ ஸம்பஜ்ஜதி, ந ஸங்கா⁴தி³ஸேஸோ, தஸ்மா தானி து²ல்லச்சயவத்தூ²னீதி கேசி. அக்கோஸனமத்தத்தா து³க்கடவத்தூ²னீதி அபரே. பரிப்³பா³ஜிகாவத்து²ஸ்மிங் விய து²ல்லச்சயமேவெத்த² யுத்ததரங் தி³ஸ்ஸதி. குஞ்சிகபணாலிமத்தந்தி குஞ்சிகாசி²த்³த³மத்தங்.
Ekādasahi padehi aghaṭite sīsaṃ na etīti ‘‘animittāsī’’tiādīhi ekādasahi padehi aghaṭite avaṇṇabhaṇanaṃ sīsaṃ na eti, avaṇṇabhaṇanaṃ nāma na hotīti vuttaṃ hoti. Ghaṭitepīti ekādasahi padehi avaṇṇabhaṇane ghaṭitepi. Imehi tīhi ghaṭiteyeva saṅghādisesoti ‘‘sikharaṇī’’tiādīhi tīhiyeva padehi avaṇṇabhaṇane ghaṭiteyeva saṅghādiseso passāvamaggassa niyatavacanattā accoḷārikattā ca. Animittāsītiādīhi pana aṭṭhahi padehi ghaṭite kevalaṃ avaṇṇabhaṇanameva sampajjati, na saṅghādiseso, tasmā tāni thullaccayavatthūnīti keci. Akkosanamattattā dukkaṭavatthūnīti apare. Paribbājikāvatthusmiṃ viya thullaccayamevettha yuttataraṃ dissati. Kuñcikapaṇālimattanti kuñcikāchiddamattaṃ.
286-287. க³ருகாபத்திந்தி பி⁴க்கு²னியா காயஸங்ஸக்³கே³ பாராஜிகாபத்திங் ஸந்தா⁴ய வத³தி. ஹஸந்தோ ஹஸந்தோதி ஸபா⁴வத³ஸ்ஸனத்த²ங் வுத்தங். அஹஸந்தோபி வாசஸ்ஸாத³ராகே³ன புனப்புனங் வத³தி, ஆபத்தியேவ. காயசித்ததோதி ஹத்த²முத்³தா³ய ஓபா⁴ஸந்தஸ்ஸ காயசித்ததோ ஸமுட்டா²தி.
286-287.Garukāpattinti bhikkhuniyā kāyasaṃsagge pārājikāpattiṃ sandhāya vadati. Hasanto hasantoti sabhāvadassanatthaṃ vuttaṃ. Ahasantopi vācassādarāgena punappunaṃ vadati, āpattiyeva. Kāyacittatoti hatthamuddāya obhāsantassa kāyacittato samuṭṭhāti.
288. தஸ்மா து³க்கடந்தி அப்படிவிஜானநஹேது து³க்கடங், படிவிஜானந்தியா பன அகெ²த்தபத³த்தா து²ல்லச்சயேன ப⁴விதப்³ப³ங். தேனேவ பரிப்³பா³ஜிகாவத்து²ஸ்மிங் படிவிஜானந்தியா து²ல்லச்சயங் வக்க²தி.
288.Tasmā dukkaṭanti appaṭivijānanahetu dukkaṭaṃ, paṭivijānantiyā pana akhettapadattā thullaccayena bhavitabbaṃ. Teneva paribbājikāvatthusmiṃ paṭivijānantiyā thullaccayaṃ vakkhati.
289. அஸத்³த⁴ம்மங் ஸந்தா⁴யாஹாதி ‘‘வாபித’’ந்தி இமஸ்ஸ பீ³ஜனிக்கே²பவசனத்தா வுத்தங். ஸங்ஸீத³தீதி வஹதி பவத்ததி. அத² வா ஸங்ஸீத³தீதி ஸங்ஸீதி³ஸ்ஸதி. மனுஸ்ஸித்தீ², இத்தி²ஸஞ்ஞிதா, து³ட்டு²ல்லவாசஸ்ஸாத³ராகோ³, தேன ராகே³ன ஓபா⁴ஸனங், தங்க²ணவிஜானநந்தி இமானெத்த² பஞ்ச அங்கா³னி.
289.Asaddhammaṃsandhāyāhāti ‘‘vāpita’’nti imassa bījanikkhepavacanattā vuttaṃ. Saṃsīdatīti vahati pavattati. Atha vā saṃsīdatīti saṃsīdissati. Manussitthī, itthisaññitā, duṭṭhullavācassādarāgo, tena rāgena obhāsanaṃ, taṅkhaṇavijānananti imānettha pañca aṅgāni.
து³ட்டு²ல்லவாசாஸிக்கா²பத³வண்ணனா நிட்டி²தா.
Duṭṭhullavācāsikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. து³ட்டு²ல்லவாசாஸிக்கா²பத³ங் • 3. Duṭṭhullavācāsikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
பத³பா⁴ஜனீயவண்ணனா • Padabhājanīyavaṇṇanā
வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
