| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
3. து³ட்டு²ல்லவாசாஸிக்கா²பத³வண்ணனா
3. Duṭṭhullavācāsikkhāpadavaṇṇanā
283. ததியே தயோ ஸங்கா⁴தி³ஸேஸவாரா தயோ து²ல்லச்சயவாரா தயோ து³க்கடவாரா தயோ காயபடிப³த்³த⁴வாராதி த்³வாத³ஸ வாரா ஸரூபேன ஆக³தா. தத்த² தயோ ஸங்கா⁴தி³ஸேஸவாரா து³தியஸிக்கா²பதே³ வுத்தாதி திண்ணங் வீஸதிகானங் ஏகேகமூலா வாராதி வேதி³தப்³பா³, தஸ்மா இத⁴ விஸேஸாதி பண்ணாஸ வாரா ஸங்கி²த்தா ஹொந்தி, அஞ்ஞதா² இத்தீ² ச ஹோதி வேமதிகோ ஸாரத்தோ ச, பி⁴க்கு² ச நங் இத்தி²யா வச்சமக்³க³ங் பஸ்ஸாவமக்³க³ங் ஆதி³ஸ்ஸ வண்ணம்பி ப⁴ணதி…பே॰… ஆபத்தி து²ல்லச்சயஸ்ஸ. இத்தீ² ச ஹோதி பண்ட³கபுரிஸஸஞ்ஞீ திரச்சா²னக³தஸஞ்ஞீ ஸாரத்தோ ச, பி⁴க்கு² ச நங் இத்தி²யா வச்சமக்³க³ங் பஸ்ஸாவமக்³க³ங் ஆதி³ஸ்ஸ வண்ணம்பி ப⁴ணதி அக்கோஸதிபி, ஆபத்தி து²ல்லச்சயஸ்ஸ. பண்ட³கோ ச ஹோதி பண்ட³கஸஞ்ஞீ ஸாரத்தோ ச, பி⁴க்கு² ச நங் பண்ட³கஸ்ஸ வச்சமக்³க³ங் ஆதி³ஸ்ஸ வண்ணம்பி ப⁴ணதி, ஆபத்தி து²ல்லச்சயஸ்ஸாதி ஏவமாதீ³னங் ஆபத்திட்டா²னானங் அனாபத்திட்டா²னதா ஆபஜ்ஜெய்ய, ந சாபஜ்ஜதி, பண்ட³கே இத்தி²ஸஞ்ஞிஸ்ஸ து³க்கடந்தி தீ³பேதுங் ‘‘இத்தீ² ச பண்ட³கோ ச உபி⁴ன்னங் இத்தி²ஸஞ்ஞீ ஆபத்தி ஸங்கா⁴தி³ஸேஸேன து³க்கடஸ்ஸா’’தி வுத்தத்தா ‘‘பண்ட³கே பண்ட³கஸஞ்ஞிஸ்ஸ து²ல்லச்சய’’ந்தி வுத்தமேவ ஹோதி, தஸ்மா ஸப்³ப³த்த² ஸங்கி²த்தவாரேஸு து²ல்லச்சயட்டா²னே து²ல்லச்சயங், து³க்கடட்டா²னே து³க்கடம்பி வுத்தமேவ ஹோதீதி வேதி³தப்³ப³ங். ததா² ‘‘இத்தீ² ச ஹோதி வேமதிகோ ஸாரத்தோ ச, பி⁴க்கு² ச நங் இத்தி²யா வச்சமக்³க³ங் பஸ்ஸாவமக்³க³ங் ட²பெத்வா அத⁴க்க²கங் உப்³ப⁴ஜாணுமண்ட³லங் ஆதி³ஸ்ஸ வண்ணம்பி ப⁴ணதி…பே॰… து²ல்லச்சயஸ்ஸா’’திஆதி³னா நயேன து²ல்லச்சயகெ²த்தேபி யதா²ஸம்ப⁴வங் உத்³த⁴ரிதப்³பா³. ததா² ‘‘இத்தீ² ச ஹோதி வேமதிகோ ஸாரத்தோ ச, பி⁴க்கு² ச நங் இத்தி²யா காயபடிப³த்³த⁴ங் ஆதி³ஸ்ஸ வண்ணம்பி ப⁴ணதி…பே॰… து³க்கடஸ்ஸா’’திஆதி³னா நயேன காயபடிப³த்³த⁴வாராபி யதா²ஸம்ப⁴வங் உத்³த⁴ரிதப்³பா³. காயப்படிப³த்³த⁴வாரத்திகங் விய நிஸ்ஸக்³கி³யவாரத்திகங் லப்³ப⁴மானம்பி ஆபத்திவிஸேஸாபா⁴வதோ ந உத்³த⁴டங். காயப்படிப³த்³த⁴வாரத்திகே பன தி³ன்னநயத்தா தம்பி தத³னுலோமா வாரா ச உத்³த⁴ரிதப்³பா³. ஸப்³ப³த்த² ந-விஞ்ஞூ தருணதா³ரிகா, மஹல்லிகா உம்மத்திகாதி³கா ச அனதி⁴ப்பேதா, பகே³வ பாகதிகா திரச்சா²னக³தித்தீ²னங், ததா² பண்ட³காத³யோபீதி வேதி³தப்³பா³. ஸேஸங் து³தியே வுத்தனயேனேவ வேதி³தப்³ப³ங்.
283. Tatiye tayo saṅghādisesavārā tayo thullaccayavārā tayo dukkaṭavārā tayo kāyapaṭibaddhavārāti dvādasa vārā sarūpena āgatā. Tattha tayo saṅghādisesavārā dutiyasikkhāpade vuttāti tiṇṇaṃ vīsatikānaṃ ekekamūlā vārāti veditabbā, tasmā idha visesāti paṇṇāsa vārā saṃkhittā honti, aññathā itthī ca hoti vematiko sāratto ca, bhikkhu ca naṃ itthiyā vaccamaggaṃ passāvamaggaṃ ādissa vaṇṇampi bhaṇati…pe… āpatti thullaccayassa. Itthī ca hoti paṇḍakapurisasaññī tiracchānagatasaññī sāratto ca, bhikkhu ca naṃ itthiyā vaccamaggaṃ passāvamaggaṃ ādissa vaṇṇampi bhaṇati akkosatipi, āpatti thullaccayassa. Paṇḍako ca hoti paṇḍakasaññī sāratto ca, bhikkhu ca naṃ paṇḍakassa vaccamaggaṃ ādissa vaṇṇampi bhaṇati, āpatti thullaccayassāti evamādīnaṃ āpattiṭṭhānānaṃ anāpattiṭṭhānatā āpajjeyya, na cāpajjati, paṇḍake itthisaññissa dukkaṭanti dīpetuṃ ‘‘itthī ca paṇḍako ca ubhinnaṃ itthisaññī āpatti saṅghādisesena dukkaṭassā’’ti vuttattā ‘‘paṇḍake paṇḍakasaññissa thullaccaya’’nti vuttameva hoti, tasmā sabbattha saṃkhittavāresu thullaccayaṭṭhāne thullaccayaṃ, dukkaṭaṭṭhāne dukkaṭampi vuttameva hotīti veditabbaṃ. Tathā ‘‘itthī ca hoti vematiko sāratto ca, bhikkhu ca naṃ itthiyā vaccamaggaṃ passāvamaggaṃ ṭhapetvā adhakkhakaṃ ubbhajāṇumaṇḍalaṃ ādissa vaṇṇampi bhaṇati…pe… thullaccayassā’’tiādinā nayena thullaccayakhettepi yathāsambhavaṃ uddharitabbā. Tathā ‘‘itthī ca hoti vematiko sāratto ca, bhikkhu ca naṃ itthiyā kāyapaṭibaddhaṃ ādissa vaṇṇampi bhaṇati…pe… dukkaṭassā’’tiādinā nayena kāyapaṭibaddhavārāpi yathāsambhavaṃ uddharitabbā. Kāyappaṭibaddhavārattikaṃ viya nissaggiyavārattikaṃ labbhamānampi āpattivisesābhāvato na uddhaṭaṃ. Kāyappaṭibaddhavārattike pana dinnanayattā tampi tadanulomā vārā ca uddharitabbā. Sabbattha na-viññū taruṇadārikā, mahallikā ummattikādikā ca anadhippetā, pageva pākatikā tiracchānagatitthīnaṃ, tathā paṇḍakādayopīti veditabbā. Sesaṃ dutiye vuttanayeneva veditabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. து³ட்டு²ல்லவாசாஸிக்கா²பத³ங் • 3. Duṭṭhullavācāsikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
