| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
3. து³ட்டு²ல்லவாசாஸிக்கா²பத³வண்ணனா
3. Duṭṭhullavācāsikkhāpadavaṇṇanā
285. ததியே அஸத்³த⁴ம்மபடிஸஞ்ஞுத்தந்தி மேது²னத⁴ம்மபடிஸங்யுத்தங். பா³லாதி ஸுபா⁴ஸிதது³ப்³பா⁴ஸிதங் அஜானந்தீ , ஸுராமத³மத்ததாய உம்மத்தகாதி³பா⁴வேன ச அஜானந்தீபி எத்தே²வ ஸங்க³ய்ஹதி. ந தாவ ஸீஸங் ஏதீதி ஸங்கா⁴தி³ஸேஸபச்சயத்தஸங்கா²தங் மத்த²கங் பாரிபூரி ந ஹோதி, மக்³க³மேது²னேஹி அக⁴டிதத்தா து³க்கடங் பன ஹோதி ஏவ.
285. Tatiye asaddhammapaṭisaññuttanti methunadhammapaṭisaṃyuttaṃ. Bālāti subhāsitadubbhāsitaṃ ajānantī , surāmadamattatāya ummattakādibhāvena ca ajānantīpi ettheva saṅgayhati. Na tāva sīsaṃ etīti saṅghādisesapaccayattasaṅkhātaṃ matthakaṃ pāripūri na hoti, maggamethunehi aghaṭitattā dukkaṭaṃ pana hoti eva.
அபஸாதே³தீதி அபஸாத³கரவசனங் கரோதி. தோ³ஸங் தே³தீதி தோ³ஸங் பதிட்டா²பேதி. தீஹீதி அனிமித்தாஸீதிஆதீ³னங் பதா³னங் அது³ட்டு²ல்லபா⁴வேனாபி அத்த²யோஜனாரஹத்தா பஸ்ஸாவமக்³கா³தி³படிஸஞ்ஞுத்ததானியமோ நத்தீ²தி வுத்தங், தேஹி பன அட்ட²ஹி பதே³ஹி பரிப்³பா³ஜிகாவத்து²ஸ்மிங் (பாரா॰ 289) விய து²ல்லச்சயந்தி வேதி³தப்³ப³ங்.
Apasādetīti apasādakaravacanaṃ karoti. Dosaṃ detīti dosaṃ patiṭṭhāpeti. Tīhīti animittāsītiādīnaṃ padānaṃ aduṭṭhullabhāvenāpi atthayojanārahattā passāvamaggādipaṭisaññuttatāniyamo natthīti vuttaṃ, tehi pana aṭṭhahi padehi paribbājikāvatthusmiṃ (pārā. 289) viya thullaccayanti veditabbaṃ.
குஞ்சிகபனாளிமத்தந்தி குஞ்சிகாசி²த்³த³மத்தங். ஸுக்க²ஸோதாதி த³கஸோதஸ்ஸ ஸுக்க²தாய லோஹிதவண்ணவிக³மோ ஹோதீதி வுத்தங்.
Kuñcikapanāḷimattanti kuñcikāchiddamattaṃ. Sukkhasotāti dakasotassa sukkhatāya lohitavaṇṇavigamo hotīti vuttaṃ.
ஸுத்³தா⁴னீதி மேது²னாதி³பதே³ஹி அயோஜிதானிபி. மேது²னத⁴ம்மேன க⁴டிதானேவாதி இத³ங் உபலக்க²ணமத்தங், வச்சமக்³க³பஸ்ஸாவமக்³கே³ஹிபி அனிமித்தே ‘‘தவ வச்சமக்³கோ³, பஸ்ஸாவமக்³கோ³ வா ஈதி³ஸோ’’திஆதி³னா க⁴டிதேபி ஆபத்திகரானேவ.
Suddhānīti methunādipadehi ayojitānipi. Methunadhammena ghaṭitānevāti idaṃ upalakkhaṇamattaṃ, vaccamaggapassāvamaggehipi animitte ‘‘tava vaccamaggo, passāvamaggo vā īdiso’’tiādinā ghaṭitepi āpattikarāneva.
286. க³ருகாபத்திந்தி பி⁴க்கு²னியா உப்³ப⁴ஜாணுமண்ட³லிகாய பாராஜிகாபத்திங் ஸந்தா⁴ய வத³தி.
286.Garukāpattinti bhikkhuniyā ubbhajāṇumaṇḍalikāya pārājikāpattiṃ sandhāya vadati.
287. ஹஸந்தோ ஹஸந்தோதி உபலக்க²ணமத்தங், அஹஸந்தோபி யேன கேனசி ஆகாரேன அத்தனோ விபரிணதசித்ததங் இத்தி²யா பகாஸெந்தோ வத³தி, ஆபத்தியேவ.
287.Hasanto hasantoti upalakkhaṇamattaṃ, ahasantopi yena kenaci ākārena attano vipariṇatacittataṃ itthiyā pakāsento vadati, āpattiyeva.
காயசித்ததோதி ஹத்த²முத்³தா³ய ஓபா⁴ஸெந்தஸ்ஸ காயசித்ததோ ஸமுட்டா²தி.
Kāyacittatoti hatthamuddāya obhāsentassa kāyacittato samuṭṭhāti.
288. தஸ்மா து³க்கடந்தி அப்படிவிஜானநதோ து³க்கடங், படிவிஜானநே பன ஸதி து²ல்லச்சயமேவ பரிப்³பா³ஜிகாவத்து²ஸ்மிங் (பாரா॰ 289) விய அகெ²த்தபத³த்தா. கெ²த்தபதே³ ஹி படிவிஜானந்தியா ஸங்கா⁴தி³ஸேஸோவ ஸியா மேது²னத⁴ம்மயாசனவத்து²த்³வயே (பாரா॰ 289) விய, தங் பன வத்து²த்³வயங் மேது²னயாசனதோ சதுத்த²ஸங்கா⁴தி³ஸேஸே வத்தப்³ப³ம்பி து³ட்டு²ல்லவாசஸ்ஸாத³மத்தேன பவத்தத்தா இத⁴ வுத்தந்தி வேதி³தப்³ப³ங். ஏவங் கெ²த்தபதே³ன வத³ந்தஸ்ஸ இத்தி²யா அப்படிவிஜானந்தியா கிங் ஹோதீதி? கிஞ்சாபி அயங் நாம ஆபத்தீதி பாளிஅட்ட²கதா²ஸு ந வுத்தங், அத² கோ² து²ல்லச்சயேனேவெத்த² ப⁴விதப்³ப³ங் . ததா² ஹி அகெ²த்தபதே³ அப்படிவிஜானந்தியா து³க்கடங், படிவிஜானந்தியா து²ல்லச்சயங் வுத்தங். கெ²த்தபதே³ பன படிவிஜானநே ஸங்கா⁴தி³ஸேஸோவ வுத்தோ, அப்படிவிஜானநே து²ல்லச்சயமேவ ப⁴விதுங் யுத்தங், ந து³க்கடங், அகெ²த்தபத³தோ விஸேஸாபா⁴வப்பஸங்கோ³தி க³ஹேதப்³ப³ங். யதா² செத்த², ஏவங் சதுத்த²ஸிக்கா²பதே³பி அகெ²த்தபதே³ படிவிஜானந்தியா து²ல்லச்சயங், அப்படிவிஜானந்தியா து³க்கடங், கெ²த்தபதே³ பன அப்படிவிஜானந்தியா து²ல்லச்சயந்தி வேதி³தப்³ப³ங். பாளியங் நவாவுதந்தி நவவீதங்.
288.Tasmā dukkaṭanti appaṭivijānanato dukkaṭaṃ, paṭivijānane pana sati thullaccayameva paribbājikāvatthusmiṃ (pārā. 289) viya akhettapadattā. Khettapade hi paṭivijānantiyā saṅghādisesova siyā methunadhammayācanavatthudvaye (pārā. 289) viya, taṃ pana vatthudvayaṃ methunayācanato catutthasaṅghādisese vattabbampi duṭṭhullavācassādamattena pavattattā idha vuttanti veditabbaṃ. Evaṃ khettapadena vadantassa itthiyā appaṭivijānantiyā kiṃ hotīti? Kiñcāpi ayaṃ nāma āpattīti pāḷiaṭṭhakathāsu na vuttaṃ, atha kho thullaccayenevettha bhavitabbaṃ . Tathā hi akhettapade appaṭivijānantiyā dukkaṭaṃ, paṭivijānantiyā thullaccayaṃ vuttaṃ. Khettapade pana paṭivijānane saṅghādisesova vutto, appaṭivijānane thullaccayameva bhavituṃ yuttaṃ, na dukkaṭaṃ, akhettapadato visesābhāvappasaṅgoti gahetabbaṃ. Yathā cettha, evaṃ catutthasikkhāpadepi akhettapade paṭivijānantiyā thullaccayaṃ, appaṭivijānantiyā dukkaṭaṃ, khettapade pana appaṭivijānantiyā thullaccayanti veditabbaṃ. Pāḷiyaṃ navāvutanti navavītaṃ.
288. அஸத்³த⁴ம்மங் ஸந்தா⁴யாதி மேது²னங் ஸந்தா⁴ய வுத்தங். தஞ்ஹி புத்தஸமுப்பத்தியா பீ³ஜனிக்கே²பதோ வப்பபரியாயங் லப⁴தீதி.
288.Asaddhammaṃ sandhāyāti methunaṃ sandhāya vuttaṃ. Tañhi puttasamuppattiyā bījanikkhepato vappapariyāyaṃ labhatīti.
ஸங்ஸீத³தீதி வஹதி, ஸங்ஸரீயதீதி வா அத்தோ². மனுஸ்ஸித்தீ², ததா²ஸஞ்ஞிதா, து³ட்டு²ல்லவாசஸ்ஸாத³ராகோ³, தேன ஓபா⁴ஸனங், தங்க²ணவிஜானநந்தி இமானெத்த² பஞ்ச அங்கா³னி.
Saṃsīdatīti vahati, saṃsarīyatīti vā attho. Manussitthī, tathāsaññitā, duṭṭhullavācassādarāgo, tena obhāsanaṃ, taṅkhaṇavijānananti imānettha pañca aṅgāni.
து³ட்டு²ல்லவாசாஸிக்கா²பத³வண்ணனா நிட்டி²தா.
Duṭṭhullavācāsikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. து³ட்டு²ல்லவாசாஸிக்கா²பத³ங் • 3. Duṭṭhullavācāsikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. து³ட்டு²ல்லவாசாஸிக்கா²பத³வண்ணனா • 3. Duṭṭhullavācāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பத³பா⁴ஜனீயவண்ணனா • Padabhājanīyavaṇṇanā
