| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৩. দুট্ঠুল্লৰাচাসিক্খাপদৰণ্ণনা
3. Duṭṭhullavācāsikkhāpadavaṇṇanā
২৮৩. তেন সমযেন বুদ্ধো ভগৰাতি দুট্ঠুল্লৰাচাসিক্খাপদং। তত্থ আদিস্সাতি অপদিসিত্ৰা। ৰণ্ণম্পি ভণতীতিআদীনি পরতো আৰি ভৰিস্সন্তি। ছিন্নিকাতি ছিন্নওত্তপ্পা। ধুত্তিকাতি সঠা। অহিরিকাযোতি নিল্লজ্জা । উহসন্তীতি সিতং কত্ৰা মন্দহসিতং হসন্তি। উল্লপন্তীতি ‘‘অহো অয্যো’’তিআদিনা নযেন উচ্চকরণিং নানাৰিধং পলোভনকথং কথেন্তি। উজ্জগ্ঘন্তীতি মহাহসিতং হসন্তি। উপ্পণ্ডেন্তীতি ‘‘পণ্ডকো অযং, নাযং পুরিসো’’তিআদিনা নযেন পরিহাসং করোন্তি।
283.Tena samayena buddho bhagavāti duṭṭhullavācāsikkhāpadaṃ. Tattha ādissāti apadisitvā. Vaṇṇampi bhaṇatītiādīni parato āvi bhavissanti. Chinnikāti chinnaottappā. Dhuttikāti saṭhā. Ahirikāyoti nillajjā . Uhasantīti sitaṃ katvā mandahasitaṃ hasanti. Ullapantīti ‘‘aho ayyo’’tiādinā nayena uccakaraṇiṃ nānāvidhaṃ palobhanakathaṃ kathenti. Ujjagghantīti mahāhasitaṃ hasanti. Uppaṇḍentīti ‘‘paṇḍako ayaṃ, nāyaṃ puriso’’tiādinā nayena parihāsaṃ karonti.
২৮৫. সারত্তোতি দুট্ঠুল্লৰাচস্সাদরাগেন সারত্তো। অপেক্খৰা পটিবদ্ধচিত্তোতি ৰুত্তনযমেৰ, কেৰলং ইধ ৰাচস্সাদরাগো যোজেতব্বো। মাতুগামং দুট্ঠুল্লাহি ৰাচাহীতি এত্থ অধিপ্পেতং মাতুগামং দস্সেন্তো ‘‘মাতুগামো’’তিআদিমাহ। তত্থ ৰিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুন্তি যা পণ্ডিতা সাত্থকনিরত্থককথং অসদ্ধম্মসদ্ধম্মপটিসংযুত্তকথঞ্চ জানিতুং পটিবলা, অযং ইধ অধিপ্পেতা। যা পন মহল্লিকাপি বালা এলমূগা অযং ইধ অনধিপ্পেতাতি দস্সেতি।
285.Sārattoti duṭṭhullavācassādarāgena sāratto. Apekkhavā paṭibaddhacittoti vuttanayameva, kevalaṃ idha vācassādarāgo yojetabbo. Mātugāmaṃ duṭṭhullāhi vācāhīti ettha adhippetaṃ mātugāmaṃ dassento ‘‘mātugāmo’’tiādimāha. Tattha viññū paṭibalā subhāsitadubbhāsitaṃ duṭṭhullāduṭṭhullaṃ ājānitunti yā paṇḍitā sātthakaniratthakakathaṃ asaddhammasaddhammapaṭisaṃyuttakathañca jānituṃ paṭibalā, ayaṃ idha adhippetā. Yā pana mahallikāpi bālā elamūgā ayaṃ idha anadhippetāti dasseti.
ওভাসেয্যাতি অৰভাসেয্য নানাপ্পকারকং অসদ্ধম্মৰচনং ৰদেয্য। যস্মা পনেৰং ওভাসন্তস্স যো সো ওভাসো নাম, সো অত্থতো অজ্ঝাচারো হোতি রাগৰসেন অভিভৰিত্ৰা সঞ্ঞমৰেলং আচারো, তস্মা তমত্থং দস্সেন্তো ‘‘ওভাসেয্যাতি অজ্ঝাচারো ৰুচ্চতী’’তি আহ। যথা তন্তি এত্থ তন্তি নিপাতমত্তং, যথা যুৰা যুৰতিন্তি অত্থো।
Obhāseyyāti avabhāseyya nānāppakārakaṃ asaddhammavacanaṃ vadeyya. Yasmā panevaṃ obhāsantassa yo so obhāso nāma, so atthato ajjhācāro hoti rāgavasena abhibhavitvā saññamavelaṃ ācāro, tasmā tamatthaṃ dassento ‘‘obhāseyyāti ajjhācāro vuccatī’’ti āha. Yathā tanti ettha tanti nipātamattaṃ, yathā yuvā yuvatinti attho.
দ্ৰে মগ্গে আদিস্সাতিআদি যেনাকারেন ওভাসতো সঙ্ঘাদিসেসো হোতি, তং দস্সেতুং ৰুত্তং। তত্থ দ্ৰে মগ্গেতি ৰচ্চমগ্গঞ্চ পস্সাৰমগ্গঞ্চ। সেসং উদ্দেসে তাৰ পাকটমেৰ। নিদ্দেসে পন থোমেতীতি ‘‘ইত্থিলক্খণেন সুভলক্খণেন সমন্নাগতাসী’’তি ৰদতি, ন তাৰ সীসং এতি। ‘‘তৰ ৰচ্চমগ্গো চ পস্সাৰমগ্গো চ ঈদিসো তেন নাম ঈদিসেন ইত্থিলক্খণেন সুভলক্খণেন সমন্নাগতাসী’’তি ৰদতি, সীসং এতি, সঙ্ঘাদিসেসো। ৰণ্ণেতি পসংসতীতি ইমানি পন থোমনপদস্সেৰ ৰেৰচনানি।
Dve magge ādissātiādi yenākārena obhāsato saṅghādiseso hoti, taṃ dassetuṃ vuttaṃ. Tattha dve maggeti vaccamaggañca passāvamaggañca. Sesaṃ uddese tāva pākaṭameva. Niddese pana thometīti ‘‘itthilakkhaṇena subhalakkhaṇena samannāgatāsī’’ti vadati, na tāva sīsaṃ eti. ‘‘Tava vaccamaggo ca passāvamaggo ca īdiso tena nāma īdisena itthilakkhaṇena subhalakkhaṇena samannāgatāsī’’ti vadati, sīsaṃ eti, saṅghādiseso. Vaṇṇeti pasaṃsatīti imāni pana thomanapadasseva vevacanāni.
খুংসেতীতি ৰাচাপতোদেন ঘট্টেতি। ৰম্ভেতীতি অপসাদেতি। গরহতীতি দোসং দেতি। পরতো পন পাল়িযা আগতেহি ‘‘অনিমিত্তাসী’’তিআদীহি একাদসহি পদেহি অঘটিতে সীসং ন এতি, ঘটিতেপি তেসু সিখরণীসি সম্ভিন্নাসি উভতোব্যঞ্জনাসীতি ইমেহি তীহি ঘটিতেযেৰ সঙ্ঘাদিসেসো।
Khuṃsetīti vācāpatodena ghaṭṭeti. Vambhetīti apasādeti. Garahatīti dosaṃ deti. Parato pana pāḷiyā āgatehi ‘‘animittāsī’’tiādīhi ekādasahi padehi aghaṭite sīsaṃ na eti, ghaṭitepi tesu sikharaṇīsi sambhinnāsi ubhatobyañjanāsīti imehi tīhi ghaṭiteyeva saṅghādiseso.
দেহি মেতি যাচনাযপি এত্তকেনেৰ সীসং ন এতি, ‘‘মেথুনং ধম্মং দেহী’’তি এৰং মেথুনধম্মেন ঘটিতে এৰ সঙ্ঘাদিসেসো।
Dehi meti yācanāyapi ettakeneva sīsaṃ na eti, ‘‘methunaṃ dhammaṃ dehī’’ti evaṃ methunadhammena ghaṭite eva saṅghādiseso.
কদা তে মাতা পসীদিস্সতীতিআদীসু আযাচনৰচনেসুপি এত্তকেনেৰ সীসং ন এতি, ‘‘কদা তে মাতা পসীদিস্সতি, কদা তে মেথুনং ধম্মং লভিস্সামী’’তি ৰা ‘‘তৰ মাতরি পসন্নায মেথুনং ধম্মং লভিস্সামী’’তি ৰা আদিনা পন নযেন মেথুনধম্মেন ঘটিতেযেৰ সঙ্ঘাদিসেসো।
Kadā te mātā pasīdissatītiādīsu āyācanavacanesupi ettakeneva sīsaṃ na eti, ‘‘kadā te mātā pasīdissati, kadā te methunaṃ dhammaṃ labhissāmī’’ti vā ‘‘tava mātari pasannāya methunaṃ dhammaṃ labhissāmī’’ti vā ādinā pana nayena methunadhammena ghaṭiteyeva saṅghādiseso.
কথং ত্ৰং সামিকস্স দেসীতিআদীসু পুচ্ছাৰচনেসুপি মেথুনধম্মন্তি ৰুত্তেযেৰ সঙ্ঘাদিসেসো, ন ইতরথা। এৰং কির ত্ৰং সামিকস্স দেসীতি পটিপুচ্ছাৰচনেসুপি এসেৰ নযো।
Kathaṃ tvaṃ sāmikassa desītiādīsu pucchāvacanesupi methunadhammanti vutteyeva saṅghādiseso, na itarathā. Evaṃ kira tvaṃ sāmikassa desīti paṭipucchāvacanesupi eseva nayo.
আচিক্খনায পুট্ঠো ভণতীতি ‘‘কথং দদমানা সামিকস্স পিযা হোতী’’তি এৰং পুট্ঠো আচিক্খতি। এত্থ চ ‘‘এৰং দেহি এৰং দদমানা’’তি ৰুত্তেপি সীসং ন এতি। ‘‘মেথুনধম্মং এৰং দেহি এৰং উপনেহি এৰং মেথুনধম্মং দদমানা উপনযমানা পিযা হোতী’’তিআদিনা পন নযেন মেথুনধম্মেন ঘটিতেযেৰ সঙ্ঘাদিসেসো। অনুসাসনীৰচনেসুপি এসেৰ নযো।
Ācikkhanāya puṭṭho bhaṇatīti ‘‘kathaṃ dadamānā sāmikassa piyā hotī’’ti evaṃ puṭṭho ācikkhati. Ettha ca ‘‘evaṃ dehi evaṃ dadamānā’’ti vuttepi sīsaṃ na eti. ‘‘Methunadhammaṃ evaṃ dehi evaṃ upanehi evaṃ methunadhammaṃ dadamānā upanayamānā piyā hotī’’tiādinā pana nayena methunadhammena ghaṭiteyeva saṅghādiseso. Anusāsanīvacanesupi eseva nayo.
অক্কোসনিদ্দেসে – অনিমিত্তাসীতি নিমিত্তরহিতাসি, কুঞ্চিকপণালিমত্তমেৰ তৰ দকসোতন্তি ৰুত্তং হোতি।
Akkosaniddese – animittāsīti nimittarahitāsi, kuñcikapaṇālimattameva tava dakasotanti vuttaṃ hoti.
নিমিত্তমত্তাসীতি তৰ ইত্থিনিমিত্তং অপরিপুণ্ণং সঞ্ঞামত্তমেৰাতি ৰুত্তং হোতি। অলোহিতাতি সুক্খসোতা। ধুৰলোহিতাতি নিচ্চলোহিতা কিলিন্নদকসোতা। ধুৰচোল়াতি নিচ্চপক্খিত্তাণিচোল়া, সদা আণিচোল়কং সেৰসীতি ৰুত্তং হোতি। পগ্ঘরন্তীতি সৰন্তী; সদা তে মুত্তং সৰতীতি ৰুত্তং হোতি। সিখরণীতি বহিনিক্খন্তআণিমংসা। ইত্থিপণ্ডকাতি অনিমিত্তাৰ ৰুচ্চতি। ৰেপুরিসিকাতি সমস্সুদাঠিকা পুরিসরূপা ইত্থী। সম্ভিন্নাতি সম্ভিন্নৰচ্চমগ্গপস্সাৰমগ্গা। উভতোব্যঞ্জনাতি ইত্থিনিমিত্তেন চ পুরিসনিমিত্তেন চাতি উভোহি ব্যঞ্জনেহি সমন্নাগতা।
Nimittamattāsīti tava itthinimittaṃ aparipuṇṇaṃ saññāmattamevāti vuttaṃ hoti. Alohitāti sukkhasotā. Dhuvalohitāti niccalohitā kilinnadakasotā. Dhuvacoḷāti niccapakkhittāṇicoḷā, sadā āṇicoḷakaṃ sevasīti vuttaṃ hoti. Paggharantīti savantī; sadā te muttaṃ savatīti vuttaṃ hoti. Sikharaṇīti bahinikkhantaāṇimaṃsā. Itthipaṇḍakāti animittāva vuccati. Vepurisikāti samassudāṭhikā purisarūpā itthī. Sambhinnāti sambhinnavaccamaggapassāvamaggā. Ubhatobyañjanāti itthinimittena ca purisanimittena cāti ubhohi byañjanehi samannāgatā.
ইমেসু চ পন একাদসসু পদেসু সিখরণীসি সম্ভিন্নাসি উভতোব্যঞ্জনাসীতি ইমানিযেৰ তীণি পদানি সুদ্ধানি সীসং এন্তি। ইতি ইমানি চ তীণি পুরিমানি চ ৰচ্চমগ্গপস্সাৰমগ্গমেথুনধম্মপদানি তীণীতি ছ পদানি সুদ্ধানি আপত্তিকরানি। সেসানি অনিমিত্তাতিআদীনি ‘‘অনিমিত্তে মেথুনধম্মং মে দেহী’’তি ৰা ‘‘অনিমিত্তাসি মেথুনধম্মং মে দেহী’’তি ৰা আদিনা নযেন মেথুনধম্মেন ঘটিতানেৰ আপত্তিকরানি হোন্তীতি ৰেদিতব্বানি।
Imesu ca pana ekādasasu padesu sikharaṇīsi sambhinnāsi ubhatobyañjanāsīti imāniyeva tīṇi padāni suddhāni sīsaṃ enti. Iti imāni ca tīṇi purimāni ca vaccamaggapassāvamaggamethunadhammapadāni tīṇīti cha padāni suddhāni āpattikarāni. Sesāni animittātiādīni ‘‘animitte methunadhammaṃ me dehī’’ti vā ‘‘animittāsi methunadhammaṃ me dehī’’ti vā ādinā nayena methunadhammena ghaṭitāneva āpattikarāni hontīti veditabbāni.
২৮৬. ইদানি য্ৰাযং ওতিণ্ণো ৰিপরিণতেন চিত্তেন ওভাসতি, তস্স ৰচ্চমগ্গপস্সাৰমগ্গে আদিস্স এতেসং ৰণ্ণভণনাদীনং ৰসেন ৰিত্থারতো আপত্তিভেদং দস্সেন্তো ‘‘ইত্থী চ হোতি ইত্থিসঞ্ঞী’’তিআদিমাহ। তেসং অত্থো কাযসংসগ্গে ৰুত্তনযেনেৰ ৰেদিতব্বো।
286. Idāni yvāyaṃ otiṇṇo vipariṇatena cittena obhāsati, tassa vaccamaggapassāvamagge ādissa etesaṃ vaṇṇabhaṇanādīnaṃ vasena vitthārato āpattibhedaṃ dassento ‘‘itthī ca hoti itthisaññī’’tiādimāha. Tesaṃ attho kāyasaṃsagge vuttanayeneva veditabbo.
অযং পন ৰিসেসো – অধক্খকন্তি অক্খকতো পট্ঠায অধো। উব্ভজাণুমণ্ডল জাণুমণ্ডলতো পট্ঠায উদ্ধং। উব্ভক্খকন্তি অক্খকতো পট্ঠায উদ্ধং। অধো জাণুমণ্ডলন্তি জাণুমণ্ডলতো পট্ঠায অধো। অক্খকং পন জাণুমণ্ডলঞ্চ এত্থেৰ দুক্কটক্খেত্তে সঙ্গহং গচ্ছন্তি ভিক্খুনিযা কাযসংসগ্গে ৰিয। ন হি বুদ্ধা গরুকাপত্তিং সাৰসেসং পঞ্ঞপেন্তীতি। কাযপ্পটিবদ্ধন্তি ৰত্থং ৰা পুপ্ফং ৰা আভরণং ৰা।
Ayaṃ pana viseso – adhakkhakanti akkhakato paṭṭhāya adho. Ubbhajāṇumaṇḍala jāṇumaṇḍalato paṭṭhāya uddhaṃ. Ubbhakkhakanti akkhakato paṭṭhāya uddhaṃ. Adho jāṇumaṇḍalanti jāṇumaṇḍalato paṭṭhāya adho. Akkhakaṃ pana jāṇumaṇḍalañca ettheva dukkaṭakkhette saṅgahaṃ gacchanti bhikkhuniyā kāyasaṃsagge viya. Na hi buddhā garukāpattiṃ sāvasesaṃ paññapentīti. Kāyappaṭibaddhanti vatthaṃ vā pupphaṃ vā ābharaṇaṃ vā.
২৮৭. অত্থপুরেক্খারস্সাতি অনিমিত্তাতিআদীনং পদানং অত্থং কথেন্তস্স, অট্ঠকথং ৰা সজ্ঝাযং করোন্তস্স।
287.Atthapurekkhārassāti animittātiādīnaṃ padānaṃ atthaṃ kathentassa, aṭṭhakathaṃ vā sajjhāyaṃ karontassa.
ধম্মপুরেক্খারস্সাতি পাল়িং ৰাচেন্তস্স ৰা সজ্ঝাযন্তস্স ৰা। এৰং অত্থঞ্চ ধম্মঞ্চ পুরক্খত্ৰা ভণন্তস্স অত্থপুরেক্খারস্স চ ধম্মপুরেক্খারস্স চ অনাপত্তি।
Dhammapurekkhārassāti pāḷiṃ vācentassa vā sajjhāyantassa vā. Evaṃ atthañca dhammañca purakkhatvā bhaṇantassa atthapurekkhārassa ca dhammapurekkhārassa ca anāpatti.
অনুসাসনিপুরেক্খারস্সাতি ‘‘ইদানিপি অনিমিত্তাসি উভত্তোব্যঞ্জনাসি অপ্পমাদং ইদানি করেয্যাসি, যথা আযতিম্পি এৰরূপা ন হোহিসী’’তি এৰং অনুসিট্ঠিং পুরক্খত্ৰা ভণন্তস্স অনুসাসনিপুরেক্খারস্স অনাপত্তি। যো পন ভিক্খুনীনং পাল়িং ৰাচেন্তো পকতিৰাচনামগ্গং পহায হসন্তো হসন্তো ‘‘সিখরণীসি সম্ভিন্নাসি উভতোব্যঞ্জনাসী’’তি পুনপ্পুনং ভণতি, তস্স আপত্তিযেৰ। উম্মত্তকস্স অনাপত্তি। ইধ আদিকম্মিকো উদাযিত্থেরো, তস্স অনাপত্তি আদিকম্মিকস্সাতি।
Anusāsanipurekkhārassāti ‘‘idānipi animittāsi ubhattobyañjanāsi appamādaṃ idāni kareyyāsi, yathā āyatimpi evarūpā na hohisī’’ti evaṃ anusiṭṭhiṃ purakkhatvā bhaṇantassa anusāsanipurekkhārassa anāpatti. Yo pana bhikkhunīnaṃ pāḷiṃ vācento pakativācanāmaggaṃ pahāya hasanto hasanto ‘‘sikharaṇīsi sambhinnāsi ubhatobyañjanāsī’’ti punappunaṃ bhaṇati, tassa āpattiyeva. Ummattakassa anāpatti. Idha ādikammiko udāyitthero, tassa anāpatti ādikammikassāti.
পদভাজনীযৰণ্ণনা নিট্ঠিতা।
Padabhājanīyavaṇṇanā niṭṭhitā.
সমুট্ঠানাদীসু ইদং সিক্খাপদং তিসমুট্ঠানং কাযচিত্ততো ৰাচাচিত্ততো কাযৰাচাচিত্ততো চ সমুট্ঠাতি, কিরিযং, সঞ্ঞাৰিমোক্খং , সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দ্ৰিৰেদনন্তি।
Samuṭṭhānādīsu idaṃ sikkhāpadaṃ tisamuṭṭhānaṃ kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ , sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dvivedananti.
২৮৮. ৰিনীতৰত্থূসু লোহিতৰত্থুস্মিং সো ভিক্খু ইত্থিযা লোহিতকং নিমিত্তং সন্ধাযাহ – ইতরা ন অঞ্ঞাসি, তস্মা দুক্কটং।
288. Vinītavatthūsu lohitavatthusmiṃ so bhikkhu itthiyā lohitakaṃ nimittaṃ sandhāyāha – itarā na aññāsi, tasmā dukkaṭaṃ.
কক্কসলোমন্তি রস্সলোমেহি বহুলোমং। আকিণ্ণলোমন্তি জটিতলোমং। খরলোমন্তি থদ্ধলোমং। দীঘলোমন্তি অরস্সলোমং। সব্বং ইত্থিনিমিত্তমেৰ সন্ধায ৰুত্তং।
Kakkasalomanti rassalomehi bahulomaṃ. Ākiṇṇalomanti jaṭitalomaṃ. Kharalomanti thaddhalomaṃ. Dīghalomanti arassalomaṃ. Sabbaṃ itthinimittameva sandhāya vuttaṃ.
২৮৯. ৰাপিতং খো তেতি অসদ্ধম্মং সন্ধাযাহ, সা অসল্লক্খেত্ৰা নো চ খো পটিৰুত্তন্তি আহ। পটিৰুত্তং নাম উদকৰপ্পে বীজেহি অপ্পতিট্ঠিতোকাসে পাণকেহি ৰিনাসিতবীজে ৰা ওকাসে পুন বীজং পতিট্ঠাপেত্ৰা উদকেন আসিত্তং, থলৰপ্পে ৰিসমপতিতানং ৰা বীজানং সমকরণত্থায পুন অট্ঠদন্তকেন সমীকতং, তেসু অঞ্ঞতরং সন্ধায এসা আহ।
289.Vāpitaṃ kho teti asaddhammaṃ sandhāyāha, sā asallakkhetvā no ca kho paṭivuttanti āha. Paṭivuttaṃ nāma udakavappe bījehi appatiṭṭhitokāse pāṇakehi vināsitabīje vā okāse puna bījaṃ patiṭṭhāpetvā udakena āsittaṃ, thalavappe visamapatitānaṃ vā bījānaṃ samakaraṇatthāya puna aṭṭhadantakena samīkataṃ, tesu aññataraṃ sandhāya esā āha.
মগ্গৰত্থুস্মিং মগ্গো সংসীদতীতি অঙ্গজাতমগ্গং সন্ধাযাহ। সেসং উত্তানমেৰাতি।
Maggavatthusmiṃ maggo saṃsīdatīti aṅgajātamaggaṃ sandhāyāha. Sesaṃ uttānamevāti.
দুট্ঠুল্লৰাচাসিক্খাপদৰণ্ণনা নিট্ঠিতা।
Duṭṭhullavācāsikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. দুট্ঠুল্লৰাচাসিক্খাপদং • 3. Duṭṭhullavācāsikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. দুট্ঠুল্লৰাচাসিক্খাপদৰণ্ণনা • 3. Duṭṭhullavācāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
৩. দুট্ঠুল্লৰাচাসিক্খাপদৰণ্ণনা • 3. Duṭṭhullavācāsikkhāpadavaṇṇanā
পদভাজনীযৰণ্ণনা • Padabhājanīyavaṇṇanā
ৰিনীতৰত্থুৰণ্ণনা • Vinītavatthuvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৩. দুট্ঠুল্লৰাচাসিক্খাপদৰণ্ণনা • 3. Duṭṭhullavācāsikkhāpadavaṇṇanā
