| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၃. ဒုဋ္ဌုလ္လဝာစာသိက္ခာပဒဝဏ္ဏနာ
3. Duṭṭhullavācāsikkhāpadavaṇṇanā
၂၈၃. တေန သမယေန ဗုဒ္ဓော ဘဂဝာတိ ဒုဋ္ဌုလ္လဝာစာသိက္ခာပဒံ။ တတ္ထ အာဒိသ္သာတိ အပဒိသိတ္ဝာ။ ဝဏ္ဏမ္ပိ ဘဏတီတိအာဒီနိ ပရတော အာဝိ ဘဝိသ္သန္တိ။ ဆိန္နိကာတိ ဆိန္နဩတ္တပ္ပာ။ ဓုတ္တိကာတိ သဌာ။ အဟိရိကာယောတိ နိလ္လဇ္ဇာ ။ ဥဟသန္တီတိ သိတံ ကတ္ဝာ မန္ဒဟသိတံ ဟသန္တိ။ ဥလ္လပန္တီတိ ‘‘အဟော အယ္ယော’’တိအာဒိနာ နယေန ဥစ္စကရဏိံ နာနာဝိဓံ ပလောဘနကထံ ကထေန္တိ။ ဥဇ္ဇဂ္ဃန္တီတိ မဟာဟသိတံ ဟသန္တိ။ ဥပ္ပဏ္ဍေန္တီတိ ‘‘ပဏ္ဍကော အယံ, နာယံ ပုရိသော’’တိအာဒိနာ နယေန ပရိဟာသံ ကရောန္တိ။
283.Tena samayena buddho bhagavāti duṭṭhullavācāsikkhāpadaṃ. Tattha ādissāti apadisitvā. Vaṇṇampi bhaṇatītiādīni parato āvi bhavissanti. Chinnikāti chinnaottappā. Dhuttikāti saṭhā. Ahirikāyoti nillajjā . Uhasantīti sitaṃ katvā mandahasitaṃ hasanti. Ullapantīti ‘‘aho ayyo’’tiādinā nayena uccakaraṇiṃ nānāvidhaṃ palobhanakathaṃ kathenti. Ujjagghantīti mahāhasitaṃ hasanti. Uppaṇḍentīti ‘‘paṇḍako ayaṃ, nāyaṃ puriso’’tiādinā nayena parihāsaṃ karonti.
၂၈၅. သာရတ္တောတိ ဒုဋ္ဌုလ္လဝာစသ္သာဒရာဂေန သာရတ္တော။ အပေက္ခဝာ ပဋိဗဒ္ဓစိတ္တောတိ ဝုတ္တနယမေဝ, ကေဝလံ ဣဓ ဝာစသ္သာဒရာဂော ယောဇေတဗ္ဗော။ မာတုဂာမံ ဒုဋ္ဌုလ္လာဟိ ဝာစာဟီတိ ဧတ္ထ အဓိပ္ပေတံ မာတုဂာမံ ဒသ္သေန္တော ‘‘မာတုဂာမော’’တိအာဒိမာဟ။ တတ္ထ ဝိညူ ပဋိဗလာ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတုန္တိ ယာ ပဏ္ဍိတာ သာတ္ထကနိရတ္ထကကထံ အသဒ္ဓမ္မသဒ္ဓမ္မပဋိသံယုတ္တကထဉ္စ ဇာနိတုံ ပဋိဗလာ, အယံ ဣဓ အဓိပ္ပေတာ။ ယာ ပန မဟလ္လိကာပိ ဗာလာ ဧလမူဂာ အယံ ဣဓ အနဓိပ္ပေတာတိ ဒသ္သေတိ။
285.Sārattoti duṭṭhullavācassādarāgena sāratto. Apekkhavā paṭibaddhacittoti vuttanayameva, kevalaṃ idha vācassādarāgo yojetabbo. Mātugāmaṃ duṭṭhullāhi vācāhīti ettha adhippetaṃ mātugāmaṃ dassento ‘‘mātugāmo’’tiādimāha. Tattha viññū paṭibalā subhāsitadubbhāsitaṃ duṭṭhullāduṭṭhullaṃ ājānitunti yā paṇḍitā sātthakaniratthakakathaṃ asaddhammasaddhammapaṭisaṃyuttakathañca jānituṃ paṭibalā, ayaṃ idha adhippetā. Yā pana mahallikāpi bālā elamūgā ayaṃ idha anadhippetāti dasseti.
ဩဘာသေယ္ယာတိ အဝဘာသေယ္ယ နာနာပ္ပကာရကံ အသဒ္ဓမ္မဝစနံ ဝဒေယ္ယ။ ယသ္မာ ပနေဝံ ဩဘာသန္တသ္သ ယော သော ဩဘာသော နာမ, သော အတ္ထတော အဇ္ဈာစာရော ဟောတိ ရာဂဝသေန အဘိဘဝိတ္ဝာ သညမဝေလံ အာစာရော, တသ္မာ တမတ္ထံ ဒသ္သေန္တော ‘‘ဩဘာသေယ္ယာတိ အဇ္ဈာစာရော ဝုစ္စတီ’’တိ အာဟ။ ယထာ တန္တိ ဧတ္ထ တန္တိ နိပာတမတ္တံ, ယထာ ယုဝာ ယုဝတိန္တိ အတ္ထော။
Obhāseyyāti avabhāseyya nānāppakārakaṃ asaddhammavacanaṃ vadeyya. Yasmā panevaṃ obhāsantassa yo so obhāso nāma, so atthato ajjhācāro hoti rāgavasena abhibhavitvā saññamavelaṃ ācāro, tasmā tamatthaṃ dassento ‘‘obhāseyyāti ajjhācāro vuccatī’’ti āha. Yathā tanti ettha tanti nipātamattaṃ, yathā yuvā yuvatinti attho.
ဒ္ဝေ မဂ္ဂေ အာဒိသ္သာတိအာဒိ ယေနာကာရေန ဩဘာသတော သင္ဃာဒိသေသော ဟောတိ, တံ ဒသ္သေတုံ ဝုတ္တံ။ တတ္ထ ဒ္ဝေ မဂ္ဂေတိ ဝစ္စမဂ္ဂဉ္စ ပသ္သာဝမဂ္ဂဉ္စ။ သေသံ ဥဒ္ဒေသေ တာဝ ပာကဋမေဝ။ နိဒ္ဒေသေ ပန ထောမေတီတိ ‘‘ဣတ္ထိလက္ခဏေန သုဘလက္ခဏေန သမန္နာဂတာသီ’’တိ ဝဒတိ, န တာဝ သီသံ ဧတိ။ ‘‘တဝ ဝစ္စမဂ္ဂော စ ပသ္သာဝမဂ္ဂော စ ဤဒိသော တေန နာမ ဤဒိသေန ဣတ္ထိလက္ခဏေန သုဘလက္ခဏေန သမန္နာဂတာသီ’’တိ ဝဒတိ, သီသံ ဧတိ, သင္ဃာဒိသေသော။ ဝဏ္ဏေတိ ပသံသတီတိ ဣမာနိ ပန ထောမနပဒသ္သေဝ ဝေဝစနာနိ။
Dve magge ādissātiādi yenākārena obhāsato saṅghādiseso hoti, taṃ dassetuṃ vuttaṃ. Tattha dve maggeti vaccamaggañca passāvamaggañca. Sesaṃ uddese tāva pākaṭameva. Niddese pana thometīti ‘‘itthilakkhaṇena subhalakkhaṇena samannāgatāsī’’ti vadati, na tāva sīsaṃ eti. ‘‘Tava vaccamaggo ca passāvamaggo ca īdiso tena nāma īdisena itthilakkhaṇena subhalakkhaṇena samannāgatāsī’’ti vadati, sīsaṃ eti, saṅghādiseso. Vaṇṇeti pasaṃsatīti imāni pana thomanapadasseva vevacanāni.
ခုံသေတီတိ ဝာစာပတောဒေန ဃဋ္ဋေတိ။ ဝမ္ဘေတီတိ အပသာဒေတိ။ ဂရဟတီတိ ဒောသံ ဒေတိ။ ပရတော ပန ပာဠိယာ အာဂတေဟိ ‘‘အနိမိတ္တာသီ’’တိအာဒီဟိ ဧကာဒသဟိ ပဒေဟိ အဃဋိတေ သီသံ န ဧတိ, ဃဋိတေပိ တေသု သိခရဏီသိ သမ္ဘိန္နာသိ ဥဘတောဗ္ယဉ္ဇနာသီတိ ဣမေဟိ တီဟိ ဃဋိတေယေဝ သင္ဃာဒိသေသော။
Khuṃsetīti vācāpatodena ghaṭṭeti. Vambhetīti apasādeti. Garahatīti dosaṃ deti. Parato pana pāḷiyā āgatehi ‘‘animittāsī’’tiādīhi ekādasahi padehi aghaṭite sīsaṃ na eti, ghaṭitepi tesu sikharaṇīsi sambhinnāsi ubhatobyañjanāsīti imehi tīhi ghaṭiteyeva saṅghādiseso.
ဒေဟိ မေတိ ယာစနာယပိ ဧတ္တကေနေဝ သီသံ န ဧတိ, ‘‘မေထုနံ ဓမ္မံ ဒေဟီ’’တိ ဧဝံ မေထုနဓမ္မေန ဃဋိတေ ဧဝ သင္ဃာဒိသေသော။
Dehi meti yācanāyapi ettakeneva sīsaṃ na eti, ‘‘methunaṃ dhammaṃ dehī’’ti evaṃ methunadhammena ghaṭite eva saṅghādiseso.
ကဒာ တေ မာတာ ပသီဒိသ္သတီတိအာဒီသု အာယာစနဝစနေသုပိ ဧတ္တကေနေဝ သီသံ န ဧတိ, ‘‘ကဒာ တေ မာတာ ပသီဒိသ္သတိ, ကဒာ တေ မေထုနံ ဓမ္မံ လဘိသ္သာမီ’’တိ ဝာ ‘‘တဝ မာတရိ ပသန္နာယ မေထုနံ ဓမ္မံ လဘိသ္သာမီ’’တိ ဝာ အာဒိနာ ပန နယေန မေထုနဓမ္မေန ဃဋိတေယေဝ သင္ဃာဒိသေသော။
Kadā te mātā pasīdissatītiādīsu āyācanavacanesupi ettakeneva sīsaṃ na eti, ‘‘kadā te mātā pasīdissati, kadā te methunaṃ dhammaṃ labhissāmī’’ti vā ‘‘tava mātari pasannāya methunaṃ dhammaṃ labhissāmī’’ti vā ādinā pana nayena methunadhammena ghaṭiteyeva saṅghādiseso.
ကထံ တ္ဝံ သာမိကသ္သ ဒေသီတိအာဒီသု ပုစ္ဆာဝစနေသုပိ မေထုနဓမ္မန္တိ ဝုတ္တေယေဝ သင္ဃာဒိသေသော, န ဣတရထာ။ ဧဝံ ကိရ တ္ဝံ သာမိကသ္သ ဒေသီတိ ပဋိပုစ္ဆာဝစနေသုပိ ဧသေဝ နယော။
Kathaṃ tvaṃ sāmikassa desītiādīsu pucchāvacanesupi methunadhammanti vutteyeva saṅghādiseso, na itarathā. Evaṃ kira tvaṃ sāmikassa desīti paṭipucchāvacanesupi eseva nayo.
အာစိက္ခနာယ ပုဋ္ဌော ဘဏတီတိ ‘‘ကထံ ဒဒမာနာ သာမိကသ္သ ပိယာ ဟောတီ’’တိ ဧဝံ ပုဋ္ဌော အာစိက္ခတိ။ ဧတ္ထ စ ‘‘ဧဝံ ဒေဟိ ဧဝံ ဒဒမာနာ’’တိ ဝုတ္တေပိ သီသံ န ဧတိ။ ‘‘မေထုနဓမ္မံ ဧဝံ ဒေဟိ ဧဝံ ဥပနေဟိ ဧဝံ မေထုနဓမ္မံ ဒဒမာနာ ဥပနယမာနာ ပိယာ ဟောတီ’’တိအာဒိနာ ပန နယေန မေထုနဓမ္မေန ဃဋိတေယေဝ သင္ဃာဒိသေသော။ အနုသာသနီဝစနေသုပိ ဧသေဝ နယော။
Ācikkhanāya puṭṭho bhaṇatīti ‘‘kathaṃ dadamānā sāmikassa piyā hotī’’ti evaṃ puṭṭho ācikkhati. Ettha ca ‘‘evaṃ dehi evaṃ dadamānā’’ti vuttepi sīsaṃ na eti. ‘‘Methunadhammaṃ evaṃ dehi evaṃ upanehi evaṃ methunadhammaṃ dadamānā upanayamānā piyā hotī’’tiādinā pana nayena methunadhammena ghaṭiteyeva saṅghādiseso. Anusāsanīvacanesupi eseva nayo.
အက္ကောသနိဒ္ဒေသေ – အနိမိတ္တာသီတိ နိမိတ္တရဟိတာသိ, ကုဉ္စိကပဏာလိမတ္တမေဝ တဝ ဒကသောတန္တိ ဝုတ္တံ ဟောတိ။
Akkosaniddese – animittāsīti nimittarahitāsi, kuñcikapaṇālimattameva tava dakasotanti vuttaṃ hoti.
နိမိတ္တမတ္တာသီတိ တဝ ဣတ္ထိနိမိတ္တံ အပရိပုဏ္ဏံ သညာမတ္တမေဝာတိ ဝုတ္တံ ဟောတိ။ အလောဟိတာတိ သုက္ခသောတာ။ ဓုဝလောဟိတာတိ နိစ္စလောဟိတာ ကိလိန္နဒကသောတာ။ ဓုဝစောဠာတိ နိစ္စပက္ခိတ္တာဏိစောဠာ, သဒာ အာဏိစောဠကံ သေဝသီတိ ဝုတ္တံ ဟောတိ။ ပဂ္ဃရန္တီတိ သဝန္တီ; သဒာ တေ မုတ္တံ သဝတီတိ ဝုတ္တံ ဟောတိ။ သိခရဏီတိ ဗဟိနိက္ခန္တအာဏိမံသာ။ ဣတ္ထိပဏ္ဍကာတိ အနိမိတ္တာဝ ဝုစ္စတိ။ ဝေပုရိသိကာတိ သမသ္သုဒာဌိကာ ပုရိသရူပာ ဣတ္ထီ။ သမ္ဘိန္နာတိ သမ္ဘိန္နဝစ္စမဂ္ဂပသ္သာဝမဂ္ဂာ။ ဥဘတောဗ္ယဉ္ဇနာတိ ဣတ္ထိနိမိတ္တေန စ ပုရိသနိမိတ္တေန စာတိ ဥဘောဟိ ဗ္ယဉ္ဇနေဟိ သမန္နာဂတာ။
Nimittamattāsīti tava itthinimittaṃ aparipuṇṇaṃ saññāmattamevāti vuttaṃ hoti. Alohitāti sukkhasotā. Dhuvalohitāti niccalohitā kilinnadakasotā. Dhuvacoḷāti niccapakkhittāṇicoḷā, sadā āṇicoḷakaṃ sevasīti vuttaṃ hoti. Paggharantīti savantī; sadā te muttaṃ savatīti vuttaṃ hoti. Sikharaṇīti bahinikkhantaāṇimaṃsā. Itthipaṇḍakāti animittāva vuccati. Vepurisikāti samassudāṭhikā purisarūpā itthī. Sambhinnāti sambhinnavaccamaggapassāvamaggā. Ubhatobyañjanāti itthinimittena ca purisanimittena cāti ubhohi byañjanehi samannāgatā.
ဣမေသု စ ပန ဧကာဒသသု ပဒေသု သိခရဏီသိ သမ္ဘိန္နာသိ ဥဘတောဗ္ယဉ္ဇနာသီတိ ဣမာနိယေဝ တီဏိ ပဒာနိ သုဒ္ဓာနိ သီသံ ဧန္တိ။ ဣတိ ဣမာနိ စ တီဏိ ပုရိမာနိ စ ဝစ္စမဂ္ဂပသ္သာဝမဂ္ဂမေထုနဓမ္မပဒာနိ တီဏီတိ ဆ ပဒာနိ သုဒ္ဓာနိ အာပတ္တိကရာနိ။ သေသာနိ အနိမိတ္တာတိအာဒီနိ ‘‘အနိမိတ္တေ မေထုနဓမ္မံ မေ ဒေဟီ’’တိ ဝာ ‘‘အနိမိတ္တာသိ မေထုနဓမ္မံ မေ ဒေဟီ’’တိ ဝာ အာဒိနာ နယေန မေထုနဓမ္မေန ဃဋိတာနေဝ အာပတ္တိကရာနိ ဟောန္တီတိ ဝေဒိတဗ္ဗာနိ။
Imesu ca pana ekādasasu padesu sikharaṇīsi sambhinnāsi ubhatobyañjanāsīti imāniyeva tīṇi padāni suddhāni sīsaṃ enti. Iti imāni ca tīṇi purimāni ca vaccamaggapassāvamaggamethunadhammapadāni tīṇīti cha padāni suddhāni āpattikarāni. Sesāni animittātiādīni ‘‘animitte methunadhammaṃ me dehī’’ti vā ‘‘animittāsi methunadhammaṃ me dehī’’ti vā ādinā nayena methunadhammena ghaṭitāneva āpattikarāni hontīti veditabbāni.
၂၈၆. ဣဒာနိ ယ္ဝာယံ ဩတိဏ္ဏော ဝိပရိဏတေန စိတ္တေန ဩဘာသတိ, တသ္သ ဝစ္စမဂ္ဂပသ္သာဝမဂ္ဂေ အာဒိသ္သ ဧတေသံ ဝဏ္ဏဘဏနာဒီနံ ဝသေန ဝိတ္ထာရတော အာပတ္တိဘေဒံ ဒသ္သေန္တော ‘‘ဣတ္ထီ စ ဟောတိ ဣတ္ထိသညီ’’တိအာဒိမာဟ။ တေသံ အတ္ထော ကာယသံသဂ္ဂေ ဝုတ္တနယေနေဝ ဝေဒိတဗ္ဗော။
286. Idāni yvāyaṃ otiṇṇo vipariṇatena cittena obhāsati, tassa vaccamaggapassāvamagge ādissa etesaṃ vaṇṇabhaṇanādīnaṃ vasena vitthārato āpattibhedaṃ dassento ‘‘itthī ca hoti itthisaññī’’tiādimāha. Tesaṃ attho kāyasaṃsagge vuttanayeneva veditabbo.
အယံ ပန ဝိသေသော – အဓက္ခကန္တိ အက္ခကတော ပဋ္ဌာယ အဓော။ ဥဗ္ဘဇာဏုမဏ္ဍလ ဇာဏုမဏ္ဍလတော ပဋ္ဌာယ ဥဒ္ဓံ။ ဥဗ္ဘက္ခကန္တိ အက္ခကတော ပဋ္ဌာယ ဥဒ္ဓံ။ အဓော ဇာဏုမဏ္ဍလန္တိ ဇာဏုမဏ္ဍလတော ပဋ္ဌာယ အဓော။ အက္ခကံ ပန ဇာဏုမဏ္ဍလဉ္စ ဧတ္ထေဝ ဒုက္ကဋက္ခေတ္တေ သင္ဂဟံ ဂစ္ဆန္တိ ဘိက္ခုနိယာ ကာယသံသဂ္ဂေ ဝိယ။ န ဟိ ဗုဒ္ဓာ ဂရုကာပတ္တိံ သာဝသေသံ ပညပေန္တီတိ။ ကာယပ္ပဋိဗဒ္ဓန္တိ ဝတ္ထံ ဝာ ပုပ္ဖံ ဝာ အာဘရဏံ ဝာ။
Ayaṃ pana viseso – adhakkhakanti akkhakato paṭṭhāya adho. Ubbhajāṇumaṇḍala jāṇumaṇḍalato paṭṭhāya uddhaṃ. Ubbhakkhakanti akkhakato paṭṭhāya uddhaṃ. Adho jāṇumaṇḍalanti jāṇumaṇḍalato paṭṭhāya adho. Akkhakaṃ pana jāṇumaṇḍalañca ettheva dukkaṭakkhette saṅgahaṃ gacchanti bhikkhuniyā kāyasaṃsagge viya. Na hi buddhā garukāpattiṃ sāvasesaṃ paññapentīti. Kāyappaṭibaddhanti vatthaṃ vā pupphaṃ vā ābharaṇaṃ vā.
၂၈၇. အတ္ထပုရေက္ခာရသ္သာတိ အနိမိတ္တာတိအာဒီနံ ပဒာနံ အတ္ထံ ကထေန္တသ္သ, အဋ္ဌကထံ ဝာ သဇ္ဈာယံ ကရောန္တသ္သ။
287.Atthapurekkhārassāti animittātiādīnaṃ padānaṃ atthaṃ kathentassa, aṭṭhakathaṃ vā sajjhāyaṃ karontassa.
ဓမ္မပုရေက္ခာရသ္သာတိ ပာဠိံ ဝာစေန္တသ္သ ဝာ သဇ္ဈာယန္တသ္သ ဝာ။ ဧဝံ အတ္ထဉ္စ ဓမ္မဉ္စ ပုရက္ခတ္ဝာ ဘဏန္တသ္သ အတ္ထပုရေက္ခာရသ္သ စ ဓမ္မပုရေက္ခာရသ္သ စ အနာပတ္တိ။
Dhammapurekkhārassāti pāḷiṃ vācentassa vā sajjhāyantassa vā. Evaṃ atthañca dhammañca purakkhatvā bhaṇantassa atthapurekkhārassa ca dhammapurekkhārassa ca anāpatti.
အနုသာသနိပုရေက္ခာရသ္သာတိ ‘‘ဣဒာနိပိ အနိမိတ္တာသိ ဥဘတ္တောဗ္ယဉ္ဇနာသိ အပ္ပမာဒံ ဣဒာနိ ကရေယ္ယာသိ, ယထာ အာယတိမ္ပိ ဧဝရူပာ န ဟောဟိသီ’’တိ ဧဝံ အနုသိဋ္ဌိံ ပုရက္ခတ္ဝာ ဘဏန္တသ္သ အနုသာသနိပုရေက္ခာရသ္သ အနာပတ္တိ။ ယော ပန ဘိက္ခုနီနံ ပာဠိံ ဝာစေန္တော ပကတိဝာစနာမဂ္ဂံ ပဟာယ ဟသန္တော ဟသန္တော ‘‘သိခရဏီသိ သမ္ဘိန္နာသိ ဥဘတောဗ္ယဉ္ဇနာသီ’’တိ ပုနပ္ပုနံ ဘဏတိ, တသ္သ အာပတ္တိယေဝ။ ဥမ္မတ္တကသ္သ အနာပတ္တိ။ ဣဓ အာဒိကမ္မိကော ဥဒာယိတ္ထေရော, တသ္သ အနာပတ္တိ အာဒိကမ္မိကသ္သာတိ။
Anusāsanipurekkhārassāti ‘‘idānipi animittāsi ubhattobyañjanāsi appamādaṃ idāni kareyyāsi, yathā āyatimpi evarūpā na hohisī’’ti evaṃ anusiṭṭhiṃ purakkhatvā bhaṇantassa anusāsanipurekkhārassa anāpatti. Yo pana bhikkhunīnaṃ pāḷiṃ vācento pakativācanāmaggaṃ pahāya hasanto hasanto ‘‘sikharaṇīsi sambhinnāsi ubhatobyañjanāsī’’ti punappunaṃ bhaṇati, tassa āpattiyeva. Ummattakassa anāpatti. Idha ādikammiko udāyitthero, tassa anāpatti ādikammikassāti.
ပဒဘာဇနီယဝဏ္ဏနာ နိဋ္ဌိတာ။
Padabhājanīyavaṇṇanā niṭṭhitā.
သမုဋ္ဌာနာဒီသု ဣဒံ သိက္ခာပဒံ တိသမုဋ္ဌာနံ ကာယစိတ္တတော ဝာစာစိတ္တတော ကာယဝာစာစိတ္တတော စ သမုဋ္ဌာတိ, ကိရိယံ, သညာဝိမောက္ခံ , သစိတ္တကံ, လောကဝဇ္ဇံ, ကာယကမ္မံ, ဝစီကမ္မံ, အကုသလစိတ္တံ, ဒ္ဝိဝေဒနန္တိ။
Samuṭṭhānādīsu idaṃ sikkhāpadaṃ tisamuṭṭhānaṃ kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ , sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dvivedananti.
၂၈၈. ဝိနီတဝတ္ထူသု လောဟိတဝတ္ထုသ္မိံ သော ဘိက္ခု ဣတ္ထိယာ လောဟိတကံ နိမိတ္တံ သန္ဓာယာဟ – ဣတရာ န အညာသိ, တသ္မာ ဒုက္ကဋံ။
288. Vinītavatthūsu lohitavatthusmiṃ so bhikkhu itthiyā lohitakaṃ nimittaṃ sandhāyāha – itarā na aññāsi, tasmā dukkaṭaṃ.
ကက္ကသလောမန္တိ ရသ္သလောမေဟိ ဗဟုလောမံ။ အာကိဏ္ဏလောမန္တိ ဇဋိတလောမံ။ ခရလောမန္တိ ထဒ္ဓလောမံ။ ဒီဃလောမန္တိ အရသ္သလောမံ။ သဗ္ဗံ ဣတ္ထိနိမိတ္တမေဝ သန္ဓာယ ဝုတ္တံ။
Kakkasalomanti rassalomehi bahulomaṃ. Ākiṇṇalomanti jaṭitalomaṃ. Kharalomanti thaddhalomaṃ. Dīghalomanti arassalomaṃ. Sabbaṃ itthinimittameva sandhāya vuttaṃ.
၂၈၉. ဝာပိတံ ခော တေတိ အသဒ္ဓမ္မံ သန္ဓာယာဟ, သာ အသလ္လက္ခေတ္ဝာ နော စ ခော ပဋိဝုတ္တန္တိ အာဟ။ ပဋိဝုတ္တံ နာမ ဥဒကဝပ္ပေ ဗီဇေဟိ အပ္ပတိဋ္ဌိတောကာသေ ပာဏကေဟိ ဝိနာသိတဗီဇေ ဝာ ဩကာသေ ပုန ဗီဇံ ပတိဋ္ဌာပေတ္ဝာ ဥဒကေန အာသိတ္တံ, ထလဝပ္ပေ ဝိသမပတိတာနံ ဝာ ဗီဇာနံ သမကရဏတ္ထာယ ပုန အဋ္ဌဒန္တကေန သမီကတံ, တေသု အညတရံ သန္ဓာယ ဧသာ အာဟ။
289.Vāpitaṃ kho teti asaddhammaṃ sandhāyāha, sā asallakkhetvā no ca kho paṭivuttanti āha. Paṭivuttaṃ nāma udakavappe bījehi appatiṭṭhitokāse pāṇakehi vināsitabīje vā okāse puna bījaṃ patiṭṭhāpetvā udakena āsittaṃ, thalavappe visamapatitānaṃ vā bījānaṃ samakaraṇatthāya puna aṭṭhadantakena samīkataṃ, tesu aññataraṃ sandhāya esā āha.
မဂ္ဂဝတ္ထုသ္မိံ မဂ္ဂော သံသီဒတီတိ အင္ဂဇာတမဂ္ဂံ သန္ဓာယာဟ။ သေသံ ဥတ္တာနမေဝာတိ။
Maggavatthusmiṃ maggo saṃsīdatīti aṅgajātamaggaṃ sandhāyāha. Sesaṃ uttānamevāti.
ဒုဋ္ဌုလ္လဝာစာသိက္ခာပဒဝဏ္ဏနာ နိဋ္ဌိတာ။
Duṭṭhullavācāsikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၃. ဒုဋ္ဌုလ္လဝာစာသိက္ခာပဒံ • 3. Duṭṭhullavācāsikkhāpadaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. ဒုဋ္ဌုလ္လဝာစာသိက္ခာပဒဝဏ္ဏနာ • 3. Duṭṭhullavācāsikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā
၃. ဒုဋ္ဌုလ္လဝာစာသိက္ခာပဒဝဏ္ဏနာ • 3. Duṭṭhullavācāsikkhāpadavaṇṇanā
ပဒဘာဇနီယဝဏ္ဏနာ • Padabhājanīyavaṇṇanā
ဝိနီတဝတ္ထုဝဏ္ဏနာ • Vinītavatthuvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၃. ဒုဋ္ဌုလ္လဝာစာသိက္ခာပဒဝဏ္ဏနာ • 3. Duṭṭhullavācāsikkhāpadavaṇṇanā
