| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
၃. ဒုဋ္ဌုလ္လဝာစာသိက္ခာပဒဝဏ္ဏနာ
3. Duṭṭhullavācāsikkhāpadavaṇṇanā
၂၈၃. တတိယေ ဥတ္တရပဒလောပေန ဆိန္နဩတ္တပ္ပာ ‘‘ဆိန္နိကာ’’တိ ဝုတ္တာတိ အာဟ ‘‘ဆိန္နိကာတိ ဆိန္နဩတပ္ပာ’’တိ။
283. Tatiye uttarapadalopena chinnaottappā ‘‘chinnikā’’ti vuttāti āha ‘‘chinnikāti chinnaotappā’’ti.
၂၈၅. ယထာ ယုဝာ ယုဝတိန္တိ ဧတေန ဩဘာသနေ နိရာသင္ကဘာဝံ ဒသ္သေတိ။ မေထုနုပသဉ္ဟိတာဟီတိ ဣဒံ ဒုဋ္ဌုလ္လဝာစာယ သိခာပ္ပတ္တလက္ခဏဒသ္သနံ။ ဣတ္ထိလက္ခဏေနာတိ ဝုတ္တမတ္ထံ ဝိဝရိတုံ ‘‘သုဘလက္ခဏေနာ’’တိ ဝုတ္တံ။ န တာဝ သီသံ ဧတီတိ ‘‘ဣတ္ထိလက္ခဏေန သမန္နာဂတာသီ’’တိအာဒိနာ ဝဏ္ဏဘဏနံ သင္ဃာဒိသေသာပတ္တိဇနကံ ဟုတ္ဝာ မတ္ထကံ န ပာပုဏာတိ။ ဝဏ္ဏဘဏနဉ္ဟိ ယေနာကာရေန ဘဏန္တသ္သ သင္ဃာဒိသေသော ဟောတိ, တေနာကာရေန ဘဏန္တသ္သ သိခာပ္ပတ္တံ နာမ ဟောတိ။ ‘‘ဣတ္ထိလက္ခဏေန သမန္နာဂတာသီတိအာဒိကံ ပန ဒုဋ္ဌုလ္လဝာစသ္သာဒရာဂဝသေန ဘဏန္တသ္သ ဒုက္ကဋ’’န္တိ ဂဏ္ဌိပဒေသု ဝုတ္တံ။
285.Yathā yuvā yuvatinti etena obhāsane nirāsaṅkabhāvaṃ dasseti. Methunupasañhitāhīti idaṃ duṭṭhullavācāya sikhāppattalakkhaṇadassanaṃ. Itthilakkhaṇenāti vuttamatthaṃ vivarituṃ ‘‘subhalakkhaṇenā’’ti vuttaṃ. Na tāva sīsaṃ etīti ‘‘itthilakkhaṇena samannāgatāsī’’tiādinā vaṇṇabhaṇanaṃ saṅghādisesāpattijanakaṃ hutvā matthakaṃ na pāpuṇāti. Vaṇṇabhaṇanañhi yenākārena bhaṇantassa saṅghādiseso hoti, tenākārena bhaṇantassa sikhāppattaṃ nāma hoti. ‘‘Itthilakkhaṇena samannāgatāsītiādikaṃ pana duṭṭhullavācassādarāgavasena bhaṇantassa dukkaṭa’’nti gaṇṭhipadesu vuttaṃ.
ဧကာဒသဟိ ပဒေဟိ အဃဋိတေ သီသံ န ဧတီတိ ‘‘အနိမိတ္တာသီ’’တိအာဒီဟိ ဧကာဒသဟိ ပဒေဟိ အဃဋိတေ အဝဏ္ဏဘဏနံ သီသံ န ဧတိ, အဝဏ္ဏဘဏနံ နာမ န ဟောတီတိ ဝုတ္တံ ဟောတိ။ ဃဋိတေပီတိ ဧကာဒသဟိ ပဒေဟိ အဝဏ္ဏဘဏနေ ဃဋိတေပိ။ ဣမေဟိ တီဟိ ဃဋိတေယေဝ သင္ဃာဒိသေသောတိ ‘‘သိခရဏီ’’တိအာဒီဟိ တီဟိယေဝ ပဒေဟိ အဝဏ္ဏဘဏနေ ဃဋိတေယေဝ သင္ဃာဒိသေသော ပသ္သာဝမဂ္ဂသ္သ နိယတဝစနတ္တာ အစ္စောဠာရိကတ္တာ စ။ အနိမိတ္တာသီတိအာဒီဟိ ပန အဋ္ဌဟိ ပဒေဟိ ဃဋိတေ ကေဝလံ အဝဏ္ဏဘဏနမေဝ သမ္ပဇ္ဇတိ, န သင္ဃာဒိသေသော, တသ္မာ တာနိ ထုလ္လစ္စယဝတ္ထူနီတိ ကေစိ။ အက္ကောသနမတ္တတ္တာ ဒုက္ကဋဝတ္ထူနီတိ အပရေ။ ပရိဗ္ဗာဇိကာဝတ္ထုသ္မိံ ဝိယ ထုလ္လစ္စယမေဝေတ္ထ ယုတ္တတရံ ဒိသ္သတိ။ ကုဉ္စိကပဏာလိမတ္တန္တိ ကုဉ္စိကာဆိဒ္ဒမတ္တံ။
Ekādasahi padehi aghaṭite sīsaṃ na etīti ‘‘animittāsī’’tiādīhi ekādasahi padehi aghaṭite avaṇṇabhaṇanaṃ sīsaṃ na eti, avaṇṇabhaṇanaṃ nāma na hotīti vuttaṃ hoti. Ghaṭitepīti ekādasahi padehi avaṇṇabhaṇane ghaṭitepi. Imehi tīhi ghaṭiteyeva saṅghādisesoti ‘‘sikharaṇī’’tiādīhi tīhiyeva padehi avaṇṇabhaṇane ghaṭiteyeva saṅghādiseso passāvamaggassa niyatavacanattā accoḷārikattā ca. Animittāsītiādīhi pana aṭṭhahi padehi ghaṭite kevalaṃ avaṇṇabhaṇanameva sampajjati, na saṅghādiseso, tasmā tāni thullaccayavatthūnīti keci. Akkosanamattattā dukkaṭavatthūnīti apare. Paribbājikāvatthusmiṃ viya thullaccayamevettha yuttataraṃ dissati. Kuñcikapaṇālimattanti kuñcikāchiddamattaṃ.
၂၈၆-၂၈၇. ဂရုကာပတ္တိန္တိ ဘိက္ခုနိယာ ကာယသံသဂ္ဂေ ပာရာဇိကာပတ္တိံ သန္ဓာယ ဝဒတိ။ ဟသန္တော ဟသန္တောတိ သဘာဝဒသ္သနတ္ထံ ဝုတ္တံ။ အဟသန္တောပိ ဝာစသ္သာဒရာဂေန ပုနပ္ပုနံ ဝဒတိ, အာပတ္တိယေဝ။ ကာယစိတ္တတောတိ ဟတ္ထမုဒ္ဒာယ ဩဘာသန္တသ္သ ကာယစိတ္တတော သမုဋ္ဌာတိ။
286-287.Garukāpattinti bhikkhuniyā kāyasaṃsagge pārājikāpattiṃ sandhāya vadati. Hasanto hasantoti sabhāvadassanatthaṃ vuttaṃ. Ahasantopi vācassādarāgena punappunaṃ vadati, āpattiyeva. Kāyacittatoti hatthamuddāya obhāsantassa kāyacittato samuṭṭhāti.
၂၈၈. တသ္မာ ဒုက္ကဋန္တိ အပ္ပဋိဝိဇာနနဟေတု ဒုက္ကဋံ, ပဋိဝိဇာနန္တိယာ ပန အခေတ္တပဒတ္တာ ထုလ္လစ္စယေန ဘဝိတဗ္ဗံ။ တေနေဝ ပရိဗ္ဗာဇိကာဝတ္ထုသ္မိံ ပဋိဝိဇာနန္တိယာ ထုလ္လစ္စယံ ဝက္ခတိ။
288.Tasmā dukkaṭanti appaṭivijānanahetu dukkaṭaṃ, paṭivijānantiyā pana akhettapadattā thullaccayena bhavitabbaṃ. Teneva paribbājikāvatthusmiṃ paṭivijānantiyā thullaccayaṃ vakkhati.
၂၈၉. အသဒ္ဓမ္မံ သန္ဓာယာဟာတိ ‘‘ဝာပိတ’’န္တိ ဣမသ္သ ဗီဇနိက္ခေပဝစနတ္တာ ဝုတ္တံ။ သံသီဒတီတိ ဝဟတိ ပဝတ္တတိ။ အထ ဝာ သံသီဒတီတိ သံသီဒိသ္သတိ။ မနုသ္သိတ္ထီ, ဣတ္ထိသညိတာ, ဒုဋ္ဌုလ္လဝာစသ္သာဒရာဂော, တေန ရာဂေန ဩဘာသနံ, တင္ခဏဝိဇာနနန္တိ ဣမာနေတ္ထ ပဉ္စ အင္ဂာနိ။
289.Asaddhammaṃsandhāyāhāti ‘‘vāpita’’nti imassa bījanikkhepavacanattā vuttaṃ. Saṃsīdatīti vahati pavattati. Atha vā saṃsīdatīti saṃsīdissati. Manussitthī, itthisaññitā, duṭṭhullavācassādarāgo, tena rāgena obhāsanaṃ, taṅkhaṇavijānananti imānettha pañca aṅgāni.
ဒုဋ္ဌုလ္လဝာစာသိက္ခာပဒဝဏ္ဏနာ နိဋ္ဌိတာ။
Duṭṭhullavācāsikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၃. ဒုဋ္ဌုလ္လဝာစာသိက္ခာပဒံ • 3. Duṭṭhullavācāsikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၃. ဒုဋ္ဌုလ္လဝာစာသိက္ခာပဒဝဏ္ဏနာ • 3. Duṭṭhullavācāsikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā
၃. ဒုဋ္ဌုလ္လဝာစာသိက္ခာပဒဝဏ္ဏနာ • 3. Duṭṭhullavācāsikkhāpadavaṇṇanā
ပဒဘာဇနီယဝဏ္ဏနာ • Padabhājanīyavaṇṇanā
ဝိနီတဝတ္ထုဝဏ္ဏနာ • Vinītavatthuvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၃. ဒုဋ္ဌုလ္လဝာစာသိက္ခာပဒဝဏ္ဏနာ • 3. Duṭṭhullavācāsikkhāpadavaṇṇanā
