| Library / Tipiṭaka / ತಿಪಿಟಕ • Tipiṭaka / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā |
೩. ದುಟ್ಠುಲ್ಲವಾಚಾಸಿಕ್ಖಾಪದವಣ್ಣನಾ
3. Duṭṭhullavācāsikkhāpadavaṇṇanā
೨೮೩. ತತಿಯೇ ಉತ್ತರಪದಲೋಪೇನ ಛಿನ್ನಓತ್ತಪ್ಪಾ ‘‘ಛಿನ್ನಿಕಾ’’ತಿ ವುತ್ತಾತಿ ಆಹ ‘‘ಛಿನ್ನಿಕಾತಿ ಛಿನ್ನಓತಪ್ಪಾ’’ತಿ।
283. Tatiye uttarapadalopena chinnaottappā ‘‘chinnikā’’ti vuttāti āha ‘‘chinnikāti chinnaotappā’’ti.
೨೮೫. ಯಥಾ ಯುವಾ ಯುವತಿನ್ತಿ ಏತೇನ ಓಭಾಸನೇ ನಿರಾಸಙ್ಕಭಾವಂ ದಸ್ಸೇತಿ। ಮೇಥುನುಪಸಞ್ಹಿತಾಹೀತಿ ಇದಂ ದುಟ್ಠುಲ್ಲವಾಚಾಯ ಸಿಖಾಪ್ಪತ್ತಲಕ್ಖಣದಸ್ಸನಂ। ಇತ್ಥಿಲಕ್ಖಣೇನಾತಿ ವುತ್ತಮತ್ಥಂ ವಿವರಿತುಂ ‘‘ಸುಭಲಕ್ಖಣೇನಾ’’ತಿ ವುತ್ತಂ। ನ ತಾವ ಸೀಸಂ ಏತೀತಿ ‘‘ಇತ್ಥಿಲಕ್ಖಣೇನ ಸಮನ್ನಾಗತಾಸೀ’’ತಿಆದಿನಾ ವಣ್ಣಭಣನಂ ಸಙ್ಘಾದಿಸೇಸಾಪತ್ತಿಜನಕಂ ಹುತ್ವಾ ಮತ್ಥಕಂ ನ ಪಾಪುಣಾತಿ। ವಣ್ಣಭಣನಞ್ಹಿ ಯೇನಾಕಾರೇನ ಭಣನ್ತಸ್ಸ ಸಙ್ಘಾದಿಸೇಸೋ ಹೋತಿ, ತೇನಾಕಾರೇನ ಭಣನ್ತಸ್ಸ ಸಿಖಾಪ್ಪತ್ತಂ ನಾಮ ಹೋತಿ। ‘‘ಇತ್ಥಿಲಕ್ಖಣೇನ ಸಮನ್ನಾಗತಾಸೀತಿಆದಿಕಂ ಪನ ದುಟ್ಠುಲ್ಲವಾಚಸ್ಸಾದರಾಗವಸೇನ ಭಣನ್ತಸ್ಸ ದುಕ್ಕಟ’’ನ್ತಿ ಗಣ್ಠಿಪದೇಸು ವುತ್ತಂ।
285.Yathā yuvā yuvatinti etena obhāsane nirāsaṅkabhāvaṃ dasseti. Methunupasañhitāhīti idaṃ duṭṭhullavācāya sikhāppattalakkhaṇadassanaṃ. Itthilakkhaṇenāti vuttamatthaṃ vivarituṃ ‘‘subhalakkhaṇenā’’ti vuttaṃ. Na tāva sīsaṃ etīti ‘‘itthilakkhaṇena samannāgatāsī’’tiādinā vaṇṇabhaṇanaṃ saṅghādisesāpattijanakaṃ hutvā matthakaṃ na pāpuṇāti. Vaṇṇabhaṇanañhi yenākārena bhaṇantassa saṅghādiseso hoti, tenākārena bhaṇantassa sikhāppattaṃ nāma hoti. ‘‘Itthilakkhaṇena samannāgatāsītiādikaṃ pana duṭṭhullavācassādarāgavasena bhaṇantassa dukkaṭa’’nti gaṇṭhipadesu vuttaṃ.
ಏಕಾದಸಹಿ ಪದೇಹಿ ಅಘಟಿತೇ ಸೀಸಂ ನ ಏತೀತಿ ‘‘ಅನಿಮಿತ್ತಾಸೀ’’ತಿಆದೀಹಿ ಏಕಾದಸಹಿ ಪದೇಹಿ ಅಘಟಿತೇ ಅವಣ್ಣಭಣನಂ ಸೀಸಂ ನ ಏತಿ, ಅವಣ್ಣಭಣನಂ ನಾಮ ನ ಹೋತೀತಿ ವುತ್ತಂ ಹೋತಿ। ಘಟಿತೇಪೀತಿ ಏಕಾದಸಹಿ ಪದೇಹಿ ಅವಣ್ಣಭಣನೇ ಘಟಿತೇಪಿ। ಇಮೇಹಿ ತೀಹಿ ಘಟಿತೇಯೇವ ಸಙ್ಘಾದಿಸೇಸೋತಿ ‘‘ಸಿಖರಣೀ’’ತಿಆದೀಹಿ ತೀಹಿಯೇವ ಪದೇಹಿ ಅವಣ್ಣಭಣನೇ ಘಟಿತೇಯೇವ ಸಙ್ಘಾದಿಸೇಸೋ ಪಸ್ಸಾವಮಗ್ಗಸ್ಸ ನಿಯತವಚನತ್ತಾ ಅಚ್ಚೋಳಾರಿಕತ್ತಾ ಚ। ಅನಿಮಿತ್ತಾಸೀತಿಆದೀಹಿ ಪನ ಅಟ್ಠಹಿ ಪದೇಹಿ ಘಟಿತೇ ಕೇವಲಂ ಅವಣ್ಣಭಣನಮೇವ ಸಮ್ಪಜ್ಜತಿ, ನ ಸಙ್ಘಾದಿಸೇಸೋ, ತಸ್ಮಾ ತಾನಿ ಥುಲ್ಲಚ್ಚಯವತ್ಥೂನೀತಿ ಕೇಚಿ। ಅಕ್ಕೋಸನಮತ್ತತ್ತಾ ದುಕ್ಕಟವತ್ಥೂನೀತಿ ಅಪರೇ। ಪರಿಬ್ಬಾಜಿಕಾವತ್ಥುಸ್ಮಿಂ ವಿಯ ಥುಲ್ಲಚ್ಚಯಮೇವೇತ್ಥ ಯುತ್ತತರಂ ದಿಸ್ಸತಿ। ಕುಞ್ಚಿಕಪಣಾಲಿಮತ್ತನ್ತಿ ಕುಞ್ಚಿಕಾಛಿದ್ದಮತ್ತಂ।
Ekādasahi padehi aghaṭite sīsaṃ na etīti ‘‘animittāsī’’tiādīhi ekādasahi padehi aghaṭite avaṇṇabhaṇanaṃ sīsaṃ na eti, avaṇṇabhaṇanaṃ nāma na hotīti vuttaṃ hoti. Ghaṭitepīti ekādasahi padehi avaṇṇabhaṇane ghaṭitepi. Imehi tīhi ghaṭiteyeva saṅghādisesoti ‘‘sikharaṇī’’tiādīhi tīhiyeva padehi avaṇṇabhaṇane ghaṭiteyeva saṅghādiseso passāvamaggassa niyatavacanattā accoḷārikattā ca. Animittāsītiādīhi pana aṭṭhahi padehi ghaṭite kevalaṃ avaṇṇabhaṇanameva sampajjati, na saṅghādiseso, tasmā tāni thullaccayavatthūnīti keci. Akkosanamattattā dukkaṭavatthūnīti apare. Paribbājikāvatthusmiṃ viya thullaccayamevettha yuttataraṃ dissati. Kuñcikapaṇālimattanti kuñcikāchiddamattaṃ.
೨೮೬-೨೮೭. ಗರುಕಾಪತ್ತಿನ್ತಿ ಭಿಕ್ಖುನಿಯಾ ಕಾಯಸಂಸಗ್ಗೇ ಪಾರಾಜಿಕಾಪತ್ತಿಂ ಸನ್ಧಾಯ ವದತಿ। ಹಸನ್ತೋ ಹಸನ್ತೋತಿ ಸಭಾವದಸ್ಸನತ್ಥಂ ವುತ್ತಂ। ಅಹಸನ್ತೋಪಿ ವಾಚಸ್ಸಾದರಾಗೇನ ಪುನಪ್ಪುನಂ ವದತಿ, ಆಪತ್ತಿಯೇವ। ಕಾಯಚಿತ್ತತೋತಿ ಹತ್ಥಮುದ್ದಾಯ ಓಭಾಸನ್ತಸ್ಸ ಕಾಯಚಿತ್ತತೋ ಸಮುಟ್ಠಾತಿ।
286-287.Garukāpattinti bhikkhuniyā kāyasaṃsagge pārājikāpattiṃ sandhāya vadati. Hasanto hasantoti sabhāvadassanatthaṃ vuttaṃ. Ahasantopi vācassādarāgena punappunaṃ vadati, āpattiyeva. Kāyacittatoti hatthamuddāya obhāsantassa kāyacittato samuṭṭhāti.
೨೮೮. ತಸ್ಮಾ ದುಕ್ಕಟನ್ತಿ ಅಪ್ಪಟಿವಿಜಾನನಹೇತು ದುಕ್ಕಟಂ, ಪಟಿವಿಜಾನನ್ತಿಯಾ ಪನ ಅಖೇತ್ತಪದತ್ತಾ ಥುಲ್ಲಚ್ಚಯೇನ ಭವಿತಬ್ಬಂ। ತೇನೇವ ಪರಿಬ್ಬಾಜಿಕಾವತ್ಥುಸ್ಮಿಂ ಪಟಿವಿಜಾನನ್ತಿಯಾ ಥುಲ್ಲಚ್ಚಯಂ ವಕ್ಖತಿ।
288.Tasmā dukkaṭanti appaṭivijānanahetu dukkaṭaṃ, paṭivijānantiyā pana akhettapadattā thullaccayena bhavitabbaṃ. Teneva paribbājikāvatthusmiṃ paṭivijānantiyā thullaccayaṃ vakkhati.
೨೮೯. ಅಸದ್ಧಮ್ಮಂ ಸನ್ಧಾಯಾಹಾತಿ ‘‘ವಾಪಿತ’’ನ್ತಿ ಇಮಸ್ಸ ಬೀಜನಿಕ್ಖೇಪವಚನತ್ತಾ ವುತ್ತಂ। ಸಂಸೀದತೀತಿ ವಹತಿ ಪವತ್ತತಿ। ಅಥ ವಾ ಸಂಸೀದತೀತಿ ಸಂಸೀದಿಸ್ಸತಿ। ಮನುಸ್ಸಿತ್ಥೀ, ಇತ್ಥಿಸಞ್ಞಿತಾ, ದುಟ್ಠುಲ್ಲವಾಚಸ್ಸಾದರಾಗೋ, ತೇನ ರಾಗೇನ ಓಭಾಸನಂ, ತಙ್ಖಣವಿಜಾನನನ್ತಿ ಇಮಾನೇತ್ಥ ಪಞ್ಚ ಅಙ್ಗಾನಿ।
289.Asaddhammaṃsandhāyāhāti ‘‘vāpita’’nti imassa bījanikkhepavacanattā vuttaṃ. Saṃsīdatīti vahati pavattati. Atha vā saṃsīdatīti saṃsīdissati. Manussitthī, itthisaññitā, duṭṭhullavācassādarāgo, tena rāgena obhāsanaṃ, taṅkhaṇavijānananti imānettha pañca aṅgāni.
ದುಟ್ಠುಲ್ಲವಾಚಾಸಿಕ್ಖಾಪದವಣ್ಣನಾ ನಿಟ್ಠಿತಾ।
Duṭṭhullavācāsikkhāpadavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೩. ದುಟ್ಠುಲ್ಲವಾಚಾಸಿಕ್ಖಾಪದಂ • 3. Duṭṭhullavācāsikkhāpadaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೩. ದುಟ್ಠುಲ್ಲವಾಚಾಸಿಕ್ಖಾಪದವಣ್ಣನಾ • 3. Duṭṭhullavācāsikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā
೩. ದುಟ್ಠುಲ್ಲವಾಚಾಸಿಕ್ಖಾಪದವಣ್ಣನಾ • 3. Duṭṭhullavācāsikkhāpadavaṇṇanā
ಪದಭಾಜನೀಯವಣ್ಣನಾ • Padabhājanīyavaṇṇanā
ವಿನೀತವತ್ಥುವಣ್ಣನಾ • Vinītavatthuvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೩. ದುಟ್ಠುಲ್ಲವಾಚಾಸಿಕ್ಖಾಪದವಣ್ಣನಾ • 3. Duṭṭhullavācāsikkhāpadavaṇṇanā
