| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༣. དུཊྛུལླཝཱཙཱསིཀྑཱཔདཝཎྞནཱ
3. Duṭṭhullavācāsikkhāpadavaṇṇanā
༢༨༣. ཏཏིཡེ ཨུཏྟརཔདལོཔེན ཚིནྣཨོཏྟཔྤཱ ‘‘ཚིནྣིཀཱ’’ཏི ཝུཏྟཱཏི ཨཱཧ ‘‘ཚིནྣིཀཱཏི ཚིནྣཨོཏཔྤཱ’’ཏི།
283. Tatiye uttarapadalopena chinnaottappā ‘‘chinnikā’’ti vuttāti āha ‘‘chinnikāti chinnaotappā’’ti.
༢༨༥. ཡཐཱ ཡུཝཱ ཡུཝཏིནྟི ཨེཏེན ཨོབྷཱསནེ ནིརཱསངྐབྷཱཝཾ དསྶེཏི། མེཐུནུཔསཉྷིཏཱཧཱིཏི ཨིདཾ དུཊྛུལླཝཱཙཱཡ སིཁཱཔྤཏྟལཀྑཎདསྶནཾ། ཨིཏྠིལཀྑཎེནཱཏི ཝུཏྟམཏྠཾ ཝིཝརིཏུཾ ‘‘སུབྷལཀྑཎེནཱ’’ཏི ཝུཏྟཾ། ན ཏཱཝ སཱིསཾ ཨེཏཱིཏི ‘‘ཨིཏྠིལཀྑཎེན སམནྣཱགཏཱསཱི’’ཏིཨཱདིནཱ ཝཎྞབྷཎནཾ སངྒྷཱདིསེསཱཔཏྟིཛནཀཾ ཧུཏྭཱ མཏྠཀཾ ན པཱཔུཎཱཏི། ཝཎྞབྷཎནཉྷི ཡེནཱཀཱརེན བྷཎནྟསྶ སངྒྷཱདིསེསོ ཧོཏི, ཏེནཱཀཱརེན བྷཎནྟསྶ སིཁཱཔྤཏྟཾ ནཱམ ཧོཏི། ‘‘ཨིཏྠིལཀྑཎེན སམནྣཱགཏཱསཱིཏིཨཱདིཀཾ པན དུཊྛུལླཝཱཙསྶཱདརཱགཝསེན བྷཎནྟསྶ དུཀྐཊ’’ནྟི གཎྛིཔདེསུ ཝུཏྟཾ།
285.Yathā yuvā yuvatinti etena obhāsane nirāsaṅkabhāvaṃ dasseti. Methunupasañhitāhīti idaṃ duṭṭhullavācāya sikhāppattalakkhaṇadassanaṃ. Itthilakkhaṇenāti vuttamatthaṃ vivarituṃ ‘‘subhalakkhaṇenā’’ti vuttaṃ. Na tāva sīsaṃ etīti ‘‘itthilakkhaṇena samannāgatāsī’’tiādinā vaṇṇabhaṇanaṃ saṅghādisesāpattijanakaṃ hutvā matthakaṃ na pāpuṇāti. Vaṇṇabhaṇanañhi yenākārena bhaṇantassa saṅghādiseso hoti, tenākārena bhaṇantassa sikhāppattaṃ nāma hoti. ‘‘Itthilakkhaṇena samannāgatāsītiādikaṃ pana duṭṭhullavācassādarāgavasena bhaṇantassa dukkaṭa’’nti gaṇṭhipadesu vuttaṃ.
ཨེཀཱདསཧི པདེཧི ཨགྷཊིཏེ སཱིསཾ ན ཨེཏཱིཏི ‘‘ཨནིམིཏྟཱསཱི’’ཏིཨཱདཱིཧི ཨེཀཱདསཧི པདེཧི ཨགྷཊིཏེ ཨཝཎྞབྷཎནཾ སཱིསཾ ན ཨེཏི, ཨཝཎྞབྷཎནཾ ནཱམ ན ཧོཏཱིཏི ཝུཏྟཾ ཧོཏི། གྷཊིཏེཔཱིཏི ཨེཀཱདསཧི པདེཧི ཨཝཎྞབྷཎནེ གྷཊིཏེཔི། ཨིམེཧི ཏཱིཧི གྷཊིཏེཡེཝ སངྒྷཱདིསེསོཏི ‘‘སིཁརཎཱི’’ཏིཨཱདཱིཧི ཏཱིཧིཡེཝ པདེཧི ཨཝཎྞབྷཎནེ གྷཊིཏེཡེཝ སངྒྷཱདིསེསོ པསྶཱཝམགྒསྶ ནིཡཏཝཙནཏྟཱ ཨཙྩོལཱ༹རིཀཏྟཱ ཙ། ཨནིམིཏྟཱསཱིཏིཨཱདཱིཧི པན ཨཊྛཧི པདེཧི གྷཊིཏེ ཀེཝལཾ ཨཝཎྞབྷཎནམེཝ སམྤཛྫཏི, ན སངྒྷཱདིསེསོ, ཏསྨཱ ཏཱནི ཐུལླཙྩཡཝཏྠཱུནཱིཏི ཀེཙི། ཨཀྐོསནམཏྟཏྟཱ དུཀྐཊཝཏྠཱུནཱིཏི ཨཔརེ། པརིབྦཱཛིཀཱཝཏྠུསྨིཾ ཝིཡ ཐུལླཙྩཡམེཝེཏྠ ཡུཏྟཏརཾ དིསྶཏི། ཀུཉྩིཀཔཎཱལིམཏྟནྟི ཀུཉྩིཀཱཚིདྡམཏྟཾ།
Ekādasahi padehi aghaṭite sīsaṃ na etīti ‘‘animittāsī’’tiādīhi ekādasahi padehi aghaṭite avaṇṇabhaṇanaṃ sīsaṃ na eti, avaṇṇabhaṇanaṃ nāma na hotīti vuttaṃ hoti. Ghaṭitepīti ekādasahi padehi avaṇṇabhaṇane ghaṭitepi. Imehi tīhi ghaṭiteyeva saṅghādisesoti ‘‘sikharaṇī’’tiādīhi tīhiyeva padehi avaṇṇabhaṇane ghaṭiteyeva saṅghādiseso passāvamaggassa niyatavacanattā accoḷārikattā ca. Animittāsītiādīhi pana aṭṭhahi padehi ghaṭite kevalaṃ avaṇṇabhaṇanameva sampajjati, na saṅghādiseso, tasmā tāni thullaccayavatthūnīti keci. Akkosanamattattā dukkaṭavatthūnīti apare. Paribbājikāvatthusmiṃ viya thullaccayamevettha yuttataraṃ dissati. Kuñcikapaṇālimattanti kuñcikāchiddamattaṃ.
༢༨༦-༢༨༧. གརུཀཱཔཏྟིནྟི བྷིཀྑུནིཡཱ ཀཱཡསཾསགྒེ པཱརཱཛིཀཱཔཏྟིཾ སནྡྷཱཡ ཝདཏི། ཧསནྟོ ཧསནྟོཏི སབྷཱཝདསྶནཏྠཾ ཝུཏྟཾ། ཨཧསནྟོཔི ཝཱཙསྶཱདརཱགེན པུནཔྤུནཾ ཝདཏི, ཨཱཔཏྟིཡེཝ། ཀཱཡཙིཏྟཏོཏི ཧཏྠམུདྡཱཡ ཨོབྷཱསནྟསྶ ཀཱཡཙིཏྟཏོ སམུཊྛཱཏི།
286-287.Garukāpattinti bhikkhuniyā kāyasaṃsagge pārājikāpattiṃ sandhāya vadati. Hasanto hasantoti sabhāvadassanatthaṃ vuttaṃ. Ahasantopi vācassādarāgena punappunaṃ vadati, āpattiyeva. Kāyacittatoti hatthamuddāya obhāsantassa kāyacittato samuṭṭhāti.
༢༨༨. ཏསྨཱ དུཀྐཊནྟི ཨཔྤཊིཝིཛཱནནཧེཏུ དུཀྐཊཾ, པཊིཝིཛཱནནྟིཡཱ པན ཨཁེཏྟཔདཏྟཱ ཐུལླཙྩཡེན བྷཝིཏབྦཾ། ཏེནེཝ པརིབྦཱཛིཀཱཝཏྠུསྨིཾ པཊིཝིཛཱནནྟིཡཱ ཐུལླཙྩཡཾ ཝཀྑཏི།
288.Tasmā dukkaṭanti appaṭivijānanahetu dukkaṭaṃ, paṭivijānantiyā pana akhettapadattā thullaccayena bhavitabbaṃ. Teneva paribbājikāvatthusmiṃ paṭivijānantiyā thullaccayaṃ vakkhati.
༢༨༩. ཨསདྡྷམྨཾ སནྡྷཱཡཱཧཱཏི ‘‘ཝཱཔིཏ’’ནྟི ཨིམསྶ བཱིཛནིཀྑེཔཝཙནཏྟཱ ཝུཏྟཾ། སཾསཱིདཏཱིཏི ཝཧཏི པཝཏྟཏི། ཨཐ ཝཱ སཾསཱིདཏཱིཏི སཾསཱིདིསྶཏི། མནུསྶིཏྠཱི, ཨིཏྠིསཉྙིཏཱ, དུཊྛུལླཝཱཙསྶཱདརཱགོ, ཏེན རཱགེན ཨོབྷཱསནཾ, ཏངྑཎཝིཛཱནནནྟི ཨིམཱནེཏྠ པཉྩ ཨངྒཱནི།
289.Asaddhammaṃsandhāyāhāti ‘‘vāpita’’nti imassa bījanikkhepavacanattā vuttaṃ. Saṃsīdatīti vahati pavattati. Atha vā saṃsīdatīti saṃsīdissati. Manussitthī, itthisaññitā, duṭṭhullavācassādarāgo, tena rāgena obhāsanaṃ, taṅkhaṇavijānananti imānettha pañca aṅgāni.
དུཊྛུལླཝཱཙཱསིཀྑཱཔདཝཎྞནཱ ནིཊྛིཏཱ།
Duṭṭhullavācāsikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༣. དུཊྛུལླཝཱཙཱསིཀྑཱཔདཾ • 3. Duṭṭhullavācāsikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༣. དུཊྛུལླཝཱཙཱསིཀྑཱཔདཝཎྞནཱ • 3. Duṭṭhullavācāsikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā
༣. དུཊྛུལླཝཱཙཱསིཀྑཱཔདཝཎྞནཱ • 3. Duṭṭhullavācāsikkhāpadavaṇṇanā
པདབྷཱཛནཱིཡཝཎྞནཱ • Padabhājanīyavaṇṇanā
ཝིནཱིཏཝཏྠུཝཎྞནཱ • Vinītavatthuvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༣. དུཊྛུལླཝཱཙཱསིཀྑཱཔདཝཎྞནཱ • 3. Duṭṭhullavācāsikkhāpadavaṇṇanā
