| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
து³வித⁴ரூபஸங்க³ஹோ
Duvidharūpasaṅgaho
தத்ராயங் நயோ – து³தியஸங்க³ஹே தாவ ஸதங் சத்தாரோ ச து³கா. தத்த² அத்தி² ரூபங் உபாதா³, அத்தி² ரூபங் நோஉபாதா³திஆத³யோ ஆதி³ம்ஹி சுத்³த³ஸ து³கா அஞ்ஞமஞ்ஞஸம்ப³ந்தா⁴பா⁴வதோ பகிண்ணகது³கா நாம. ததோ அத்தி² ரூபங் சக்கு²ஸம்ப²ஸ்ஸஸ்ஸ வத்தூ²திஆத³யோ பஞ்சவீஸதி து³கா வத்து²அவத்து²உபபரிக்க²ணவஸேன பவத்தத்தா வத்து²து³கா நாம. ததோ அத்தி² ரூபங் சக்கு²ஸம்ப²ஸ்ஸஸ்ஸ ஆரம்மணந்திஆத³யோ பஞ்சவீஸதி ஆரம்மணானாரம்மணஉபபரிக்க²ணவஸேன பவத்தத்தா ஆரம்மணது³கா நாம. ததோ அத்தி² ரூபங் சக்கா²யதனந்தி ஆத³யோ த³ஸ ஆயதனானாயதனஉபபரிக்க²ணவஸேன பவத்தத்தா ஆயதனது³கா நாம. ததோ அத்தி² ரூபங் சக்கு²தா⁴தூதிஆத³யோ த³ஸ தா⁴துஅதா⁴துஉபபரிக்க²ணவஸேன பவத்தத்தா தா⁴துது³கா நாம. ததோ அத்தி² ரூபங் சக்கு²ந்த்³ரியந்திஆத³யோ அட்ட² இந்த்³ரியானிந்த்³ரியஉபபரிக்க²ணவஸேன பவத்தத்தா இந்த்³ரியது³கா நாம. ததோ அத்தி² ரூபங் காயவிஞ்ஞத்தீதிஆத³யோ த்³வாத³ஸ ஸுகு²மாஸுகு²மரூபஉபபரிக்க²ணவஸேன பவத்தத்தா ஸுகு²மரூபது³கா நாமாதி. இத³ங் து³தியஸங்க³ஹே பாளிவவத்தா²னங்.
Tatrāyaṃ nayo – dutiyasaṅgahe tāva sataṃ cattāro ca dukā. Tattha atthi rūpaṃ upādā, atthi rūpaṃ noupādātiādayo ādimhi cuddasa dukā aññamaññasambandhābhāvato pakiṇṇakadukā nāma. Tato atthi rūpaṃ cakkhusamphassassa vatthūtiādayo pañcavīsati dukā vatthuavatthuupaparikkhaṇavasena pavattattā vatthudukā nāma. Tato atthi rūpaṃ cakkhusamphassassa ārammaṇantiādayo pañcavīsati ārammaṇānārammaṇaupaparikkhaṇavasena pavattattā ārammaṇadukā nāma. Tato atthi rūpaṃ cakkhāyatananti ādayo dasa āyatanānāyatanaupaparikkhaṇavasena pavattattā āyatanadukā nāma. Tato atthi rūpaṃ cakkhudhātūtiādayo dasa dhātuadhātuupaparikkhaṇavasena pavattattā dhātudukā nāma. Tato atthi rūpaṃ cakkhundriyantiādayo aṭṭha indriyānindriyaupaparikkhaṇavasena pavattattā indriyadukā nāma. Tato atthi rūpaṃ kāyaviññattītiādayo dvādasa sukhumāsukhumarūpaupaparikkhaṇavasena pavattattā sukhumarūpadukā nāmāti. Idaṃ dutiyasaṅgahe pāḷivavatthānaṃ.
