| Library / Tipiṭaka / တိပိဋက • Tipiṭaka / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā |
ဒုဝိဓရူပသင္ဂဟော
Duvidharūpasaṅgaho
တတ္ရာယံ နယော – ဒုတိယသင္ဂဟေ တာဝ သတံ စတ္တာရော စ ဒုကာ။ တတ္ထ အတ္ထိ ရူပံ ဥပာဒာ, အတ္ထိ ရူပံ နောဥပာဒာတိအာဒယော အာဒိမ္ဟိ စုဒ္ဒသ ဒုကာ အညမညသမ္ဗန္ဓာဘာဝတော ပကိဏ္ဏကဒုကာ နာမ။ တတော အတ္ထိ ရူပံ စက္ခုသမ္ဖသ္သသ္သ ဝတ္ထူတိအာဒယော ပဉ္စဝီသတိ ဒုကာ ဝတ္ထုအဝတ္ထုဥပပရိက္ခဏဝသေန ပဝတ္တတ္တာ ဝတ္ထုဒုကာ နာမ။ တတော အတ္ထိ ရူပံ စက္ခုသမ္ဖသ္သသ္သ အာရမ္မဏန္တိအာဒယော ပဉ္စဝီသတိ အာရမ္မဏာနာရမ္မဏဥပပရိက္ခဏဝသေန ပဝတ္တတ္တာ အာရမ္မဏဒုကာ နာမ။ တတော အတ္ထိ ရူပံ စက္ခာယတနန္တိ အာဒယော ဒသ အာယတနာနာယတနဥပပရိက္ခဏဝသေန ပဝတ္တတ္တာ အာယတနဒုကာ နာမ။ တတော အတ္ထိ ရူပံ စက္ခုဓာတူတိအာဒယော ဒသ ဓာတုအဓာတုဥပပရိက္ခဏဝသေန ပဝတ္တတ္တာ ဓာတုဒုကာ နာမ။ တတော အတ္ထိ ရူပံ စက္ခုန္ဒ္ရိယန္တိအာဒယော အဋ္ဌ ဣန္ဒ္ရိယာနိန္ဒ္ရိယဥပပရိက္ခဏဝသေန ပဝတ္တတ္တာ ဣန္ဒ္ရိယဒုကာ နာမ။ တတော အတ္ထိ ရူပံ ကာယဝိညတ္တီတိအာဒယော ဒ္ဝာဒသ သုခုမာသုခုမရူပဥပပရိက္ခဏဝသေန ပဝတ္တတ္တာ သုခုမရူပဒုကာ နာမာတိ။ ဣဒံ ဒုတိယသင္ဂဟေ ပာဠိဝဝတ္ထာနံ။
Tatrāyaṃ nayo – dutiyasaṅgahe tāva sataṃ cattāro ca dukā. Tattha atthi rūpaṃ upādā, atthi rūpaṃ noupādātiādayo ādimhi cuddasa dukā aññamaññasambandhābhāvato pakiṇṇakadukā nāma. Tato atthi rūpaṃ cakkhusamphassassa vatthūtiādayo pañcavīsati dukā vatthuavatthuupaparikkhaṇavasena pavattattā vatthudukā nāma. Tato atthi rūpaṃ cakkhusamphassassa ārammaṇantiādayo pañcavīsati ārammaṇānārammaṇaupaparikkhaṇavasena pavattattā ārammaṇadukā nāma. Tato atthi rūpaṃ cakkhāyatananti ādayo dasa āyatanānāyatanaupaparikkhaṇavasena pavattattā āyatanadukā nāma. Tato atthi rūpaṃ cakkhudhātūtiādayo dasa dhātuadhātuupaparikkhaṇavasena pavattattā dhātudukā nāma. Tato atthi rūpaṃ cakkhundriyantiādayo aṭṭha indriyānindriyaupaparikkhaṇavasena pavattattā indriyadukā nāma. Tato atthi rūpaṃ kāyaviññattītiādayo dvādasa sukhumāsukhumarūpaupaparikkhaṇavasena pavattattā sukhumarūpadukā nāmāti. Idaṃ dutiyasaṅgahe pāḷivavatthānaṃ.
