| Library / Tipiṭaka / ਤਿਪਿਟਕ • Tipiṭaka / ਧਮ੍ਮਸਙ੍ਗਣਿ-ਅਟ੍ਠਕਥਾ • Dhammasaṅgaṇi-aṭṭhakathā |
ਦੁવਿਧਰੂਪਸਙ੍ਗਹੋ
Duvidharūpasaṅgaho
ਤਤ੍ਰਾਯਂ ਨਯੋ – ਦੁਤਿਯਸਙ੍ਗਹੇ ਤਾવ ਸਤਂ ਚਤ੍ਤਾਰੋ ਚ ਦੁਕਾ। ਤਤ੍ਥ ਅਤ੍ਥਿ ਰੂਪਂ ਉਪਾਦਾ, ਅਤ੍ਥਿ ਰੂਪਂ ਨੋਉਪਾਦਾਤਿਆਦਯੋ ਆਦਿਮ੍ਹਿ ਚੁਦ੍ਦਸ ਦੁਕਾ ਅਞ੍ਞਮਞ੍ਞਸਮ੍ਬਨ੍ਧਾਭਾવਤੋ ਪਕਿਣ੍ਣਕਦੁਕਾ ਨਾਮ। ਤਤੋ ਅਤ੍ਥਿ ਰੂਪਂ ਚਕ੍ਖੁਸਮ੍ਫਸ੍ਸਸ੍ਸ વਤ੍ਥੂਤਿਆਦਯੋ ਪਞ੍ਚવੀਸਤਿ ਦੁਕਾ વਤ੍ਥੁਅવਤ੍ਥੁਉਪਪਰਿਕ੍ਖਣવਸੇਨ ਪવਤ੍ਤਤ੍ਤਾ વਤ੍ਥੁਦੁਕਾ ਨਾਮ। ਤਤੋ ਅਤ੍ਥਿ ਰੂਪਂ ਚਕ੍ਖੁਸਮ੍ਫਸ੍ਸਸ੍ਸ ਆਰਮ੍ਮਣਨ੍ਤਿਆਦਯੋ ਪਞ੍ਚવੀਸਤਿ ਆਰਮ੍ਮਣਾਨਾਰਮ੍ਮਣਉਪਪਰਿਕ੍ਖਣવਸੇਨ ਪવਤ੍ਤਤ੍ਤਾ ਆਰਮ੍ਮਣਦੁਕਾ ਨਾਮ। ਤਤੋ ਅਤ੍ਥਿ ਰੂਪਂ ਚਕ੍ਖਾਯਤਨਨ੍ਤਿ ਆਦਯੋ ਦਸ ਆਯਤਨਾਨਾਯਤਨਉਪਪਰਿਕ੍ਖਣવਸੇਨ ਪવਤ੍ਤਤ੍ਤਾ ਆਯਤਨਦੁਕਾ ਨਾਮ। ਤਤੋ ਅਤ੍ਥਿ ਰੂਪਂ ਚਕ੍ਖੁਧਾਤੂਤਿਆਦਯੋ ਦਸ ਧਾਤੁਅਧਾਤੁਉਪਪਰਿਕ੍ਖਣવਸੇਨ ਪવਤ੍ਤਤ੍ਤਾ ਧਾਤੁਦੁਕਾ ਨਾਮ। ਤਤੋ ਅਤ੍ਥਿ ਰੂਪਂ ਚਕ੍ਖੁਨ੍ਦ੍ਰਿਯਨ੍ਤਿਆਦਯੋ ਅਟ੍ਠ ਇਨ੍ਦ੍ਰਿਯਾਨਿਨ੍ਦ੍ਰਿਯਉਪਪਰਿਕ੍ਖਣવਸੇਨ ਪવਤ੍ਤਤ੍ਤਾ ਇਨ੍ਦ੍ਰਿਯਦੁਕਾ ਨਾਮ। ਤਤੋ ਅਤ੍ਥਿ ਰੂਪਂ ਕਾਯવਿਞ੍ਞਤ੍ਤੀਤਿਆਦਯੋ ਦ੍વਾਦਸ ਸੁਖੁਮਾਸੁਖੁਮਰੂਪਉਪਪਰਿਕ੍ਖਣવਸੇਨ ਪવਤ੍ਤਤ੍ਤਾ ਸੁਖੁਮਰੂਪਦੁਕਾ ਨਾਮਾਤਿ। ਇਦਂ ਦੁਤਿਯਸਙ੍ਗਹੇ ਪਾਲ਼ਿવવਤ੍ਥਾਨਂ।
Tatrāyaṃ nayo – dutiyasaṅgahe tāva sataṃ cattāro ca dukā. Tattha atthi rūpaṃ upādā, atthi rūpaṃ noupādātiādayo ādimhi cuddasa dukā aññamaññasambandhābhāvato pakiṇṇakadukā nāma. Tato atthi rūpaṃ cakkhusamphassassa vatthūtiādayo pañcavīsati dukā vatthuavatthuupaparikkhaṇavasena pavattattā vatthudukā nāma. Tato atthi rūpaṃ cakkhusamphassassa ārammaṇantiādayo pañcavīsati ārammaṇānārammaṇaupaparikkhaṇavasena pavattattā ārammaṇadukā nāma. Tato atthi rūpaṃ cakkhāyatananti ādayo dasa āyatanānāyatanaupaparikkhaṇavasena pavattattā āyatanadukā nāma. Tato atthi rūpaṃ cakkhudhātūtiādayo dasa dhātuadhātuupaparikkhaṇavasena pavattattā dhātudukā nāma. Tato atthi rūpaṃ cakkhundriyantiādayo aṭṭha indriyānindriyaupaparikkhaṇavasena pavattattā indriyadukā nāma. Tato atthi rūpaṃ kāyaviññattītiādayo dvādasa sukhumāsukhumarūpaupaparikkhaṇavasena pavattattā sukhumarūpadukā nāmāti. Idaṃ dutiyasaṅgahe pāḷivavatthānaṃ.
