| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
দ্ৰাদসমচিত্তং
Dvādasamacittaṃ
৪২৭. দ্ৰাদসমস্স সমযৰৰত্থানে উদ্ধচ্চেন সম্পযুত্তন্তি উদ্ধচ্চসম্পযুত্তং। ইদঞ্হি চিত্তং ছসু আরম্মণেসু ৰেদনাৰসেন মজ্ঝত্তং হুত্ৰা উদ্ধতং হোতি। ইধ ধম্মুদ্দেসে ‘ৰিচিকিচ্ছা’-ঠানে ‘উদ্ধচ্চং হোতী’তি আগতং। পদপটিপাটিযা অট্ঠৰীসতি পদানি হোন্তি। অগ্গহিতগ্গহণেন চুদ্দস। তেসং ৰসেন সৰিভত্তিকাৰিভত্তিকরাসিৰিধানং ৰেদিতব্বং। অধিমোক্খো মনসিকারোতি দ্ৰেযেৰ যেৰাপনকা।
427. Dvādasamassa samayavavatthāne uddhaccena sampayuttanti uddhaccasampayuttaṃ. Idañhi cittaṃ chasu ārammaṇesu vedanāvasena majjhattaṃ hutvā uddhataṃ hoti. Idha dhammuddese ‘vicikicchā’-ṭhāne ‘uddhaccaṃ hotī’ti āgataṃ. Padapaṭipāṭiyā aṭṭhavīsati padāni honti. Aggahitaggahaṇena cuddasa. Tesaṃ vasena savibhattikāvibhattikarāsividhānaṃ veditabbaṃ. Adhimokkho manasikāroti dveyeva yevāpanakā.
৪২৯. নিদ্দেসৰারস্স উদ্ধচ্চনিদ্দেসে চিত্তস্সাতি ন সত্তস্স, ন পোসস্স। উদ্ধচ্চন্তি উদ্ধতাকারো। ন ৰূপসমোতি অৰূপসমো। চেতো ৰিক্খিপতীতি চেতসোৰিক্খেপো। ভন্তত্তং চিত্তস্সাতি চিত্তস্স ভন্তভাৰো, ভন্তযানভন্তগোণাদীনি ৰিয। ইমিনা একারম্মণস্মিংযেৰ ৰিপ্ফন্দনং কথিতং। উদ্ধচ্চঞ্হি একারম্মণে ৰিপ্ফন্দতি, ৰিচিকিচ্ছা নানারম্মণে। সেসং সব্বৰারেসু হেট্ঠা ৰুত্তনযেনেৰ ৰেদিতব্বং।
429. Niddesavārassa uddhaccaniddese cittassāti na sattassa, na posassa. Uddhaccanti uddhatākāro. Na vūpasamoti avūpasamo. Ceto vikkhipatīti cetasovikkhepo. Bhantattaṃ cittassāti cittassa bhantabhāvo, bhantayānabhantagoṇādīni viya. Iminā ekārammaṇasmiṃyeva vipphandanaṃ kathitaṃ. Uddhaccañhi ekārammaṇe vipphandati, vicikicchā nānārammaṇe. Sesaṃ sabbavāresu heṭṭhā vuttanayeneva veditabbaṃ.
ইদানি ইমস্মিং চিত্তদ্ৰযে পকিণ্ণকৰিনিচ্ছযো হোতি। ‘আরম্মণে পৰট্টনকচিত্তানি নাম কতী’তি? হি ৰুত্তে ‘ইমানেৰ দ্ৰে’তি ৰত্তব্বং। তত্থ ৰিচিকিচ্ছাসহগতং একন্তেন পৰট্টতি, উদ্ধচ্চসহগতং পন লদ্ধাধিমোক্খত্তা লদ্ধপতিট্ঠং পৰট্টতি। যথা হি ৰট্টচতুরস্সেসু দ্ৰীসু মণীসু পব্ভারট্ঠানে পৰট্টেত্ৰা ৰিস্সট্ঠেসু ৰট্টমণি একন্তেনেৰ পৰট্টতি, চতুরস্সো পতিট্ঠায পতিট্ঠায পৰট্টতি, এৰংসম্পদমিদং ৰেদিতব্বং। সব্বেসুপি হীনাদিভেদো ন উদ্ধটো, সব্বেসং একন্তহীনত্তা। সহজাতাধিপতি লব্ভমানোপি ন উদ্ধটো, হেট্ঠা দস্সিতনযত্তা। ঞাণাভাৰতো পনেত্থ ৰীমংসাধিপতি নাম নত্থি। পচ্ছিমদ্ৰযে সেসোপি নত্থি এৰ। কস্মা? কঞ্চি ধম্মং ধুরং কত্ৰা অনুপ্পজ্জনতো, পট্ঠানে চ পটিসিদ্ধতো।
Idāni imasmiṃ cittadvaye pakiṇṇakavinicchayo hoti. ‘Ārammaṇe pavaṭṭanakacittāni nāma katī’ti? Hi vutte ‘imāneva dve’ti vattabbaṃ. Tattha vicikicchāsahagataṃ ekantena pavaṭṭati, uddhaccasahagataṃ pana laddhādhimokkhattā laddhapatiṭṭhaṃ pavaṭṭati. Yathā hi vaṭṭacaturassesu dvīsu maṇīsu pabbhāraṭṭhāne pavaṭṭetvā vissaṭṭhesu vaṭṭamaṇi ekanteneva pavaṭṭati, caturasso patiṭṭhāya patiṭṭhāya pavaṭṭati, evaṃsampadamidaṃ veditabbaṃ. Sabbesupi hīnādibhedo na uddhaṭo, sabbesaṃ ekantahīnattā. Sahajātādhipati labbhamānopi na uddhaṭo, heṭṭhā dassitanayattā. Ñāṇābhāvato panettha vīmaṃsādhipati nāma natthi. Pacchimadvaye sesopi natthi eva. Kasmā? Kañci dhammaṃ dhuraṃ katvā anuppajjanato, paṭṭhāne ca paṭisiddhato.
ইমেহি পন দ্ৰাদসহিপি অকুসলচিত্তেহি কম্মে আযূহিতে, ঠপেত্ৰা উদ্ধচ্চসহগতং, সেসানি একাদসেৰ পটিসন্ধিং আকড্ঢন্তি। ৰিচিকিচ্ছাসহগতে অলদ্ধাধিমোক্খে দুব্বলেপি পটিসন্ধিং আকড্ঢমানে উদ্ধচ্চসহগতং লদ্ধাধিমোক্খং বলৰং কস্মা নাকড্ঢতীতি? দস্সনেন পহাতব্বাভাৰতো। যদি হি আকড্ঢেয্য ‘দস্সনেনপহাতব্ব’-পদৰিভঙ্গে আগচ্ছেয্য, তস্মা, ঠপেত্ৰা তং, সেসানি একাদস আকড্ঢন্তি। তেসু হি যেন কেনচি কম্মে আযূহিতে তায চেতনায চতূসু অপাযেসু পটিসন্ধি হোতি। অকুসলৰিপাকেসু অহেতুকমনোৰিঞ্ঞাণধাতুউপেক্খাসহগতায পটিসন্ধিং গণ্হাতি। ইতরস্সাপি এত্থেৰ পটিসন্ধিদানং ভৰেয্য। যস্মা পনেতং নত্থি, তস্মা ‘দস্সনেনপহাতব্ব’-পদৰিভঙ্গে নাগতন্তি।
Imehi pana dvādasahipi akusalacittehi kamme āyūhite, ṭhapetvā uddhaccasahagataṃ, sesāni ekādaseva paṭisandhiṃ ākaḍḍhanti. Vicikicchāsahagate aladdhādhimokkhe dubbalepi paṭisandhiṃ ākaḍḍhamāne uddhaccasahagataṃ laddhādhimokkhaṃ balavaṃ kasmā nākaḍḍhatīti? Dassanena pahātabbābhāvato. Yadi hi ākaḍḍheyya ‘dassanenapahātabba’-padavibhaṅge āgaccheyya, tasmā, ṭhapetvā taṃ, sesāni ekādasa ākaḍḍhanti. Tesu hi yena kenaci kamme āyūhite tāya cetanāya catūsu apāyesu paṭisandhi hoti. Akusalavipākesu ahetukamanoviññāṇadhātuupekkhāsahagatāya paṭisandhiṃ gaṇhāti. Itarassāpi ettheva paṭisandhidānaṃ bhaveyya. Yasmā panetaṃ natthi, tasmā ‘dassanenapahātabba’-padavibhaṅge nāgatanti.
অকুসলা ধম্মাতিপদস্স ৰণ্ণনা নিট্ঠিতা।
Akusalā dhammātipadassa vaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / দ্ৰাদস অকুসলানি • Dvādasa akusalāni
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / দ্ৰাদসমচিত্তৰণ্ণনা • Dvādasamacittavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / দ্ৰাদসমচিত্তৰণ্ণনা • Dvādasamacittavaṇṇanā
