| Library / Tipiṭaka / ཏིཔིཊཀ • Tipiṭaka / དྷམྨསངྒཎི-ཨཊྛཀཐཱ • Dhammasaṅgaṇi-aṭṭhakathā |
དྭཱདསམཙིཏྟཾ
Dvādasamacittaṃ
༤༢༧. དྭཱདསམསྶ སམཡཝཝཏྠཱནེ ཨུདྡྷཙྩེན སམྤཡུཏྟནྟི ཨུདྡྷཙྩསམྤཡུཏྟཾ། ཨིདཉྷི ཙིཏྟཾ ཚསུ ཨཱརམྨཎེསུ ཝེདནཱཝསེན མཛ྄ཛྷཏྟཾ ཧུཏྭཱ ཨུདྡྷཏཾ ཧོཏི། ཨིདྷ དྷམྨུདྡེསེ ‘ཝིཙིཀིཙྪཱ’-ཋཱནེ ‘ཨུདྡྷཙྩཾ ཧོཏཱི’ཏི ཨཱགཏཾ། པདཔཊིཔཱཊིཡཱ ཨཊྛཝཱིསཏི པདཱནི ཧོནྟི། ཨགྒཧིཏགྒཧཎེན ཙུདྡས། ཏེསཾ ཝསེན སཝིབྷཏྟིཀཱཝིབྷཏྟིཀརཱསིཝིདྷཱནཾ ཝེདིཏབྦཾ། ཨདྷིམོཀྑོ མནསིཀཱརོཏི དྭེཡེཝ ཡེཝཱཔནཀཱ།
427. Dvādasamassa samayavavatthāne uddhaccena sampayuttanti uddhaccasampayuttaṃ. Idañhi cittaṃ chasu ārammaṇesu vedanāvasena majjhattaṃ hutvā uddhataṃ hoti. Idha dhammuddese ‘vicikicchā’-ṭhāne ‘uddhaccaṃ hotī’ti āgataṃ. Padapaṭipāṭiyā aṭṭhavīsati padāni honti. Aggahitaggahaṇena cuddasa. Tesaṃ vasena savibhattikāvibhattikarāsividhānaṃ veditabbaṃ. Adhimokkho manasikāroti dveyeva yevāpanakā.
༤༢༩. ནིདྡེསཝཱརསྶ ཨུདྡྷཙྩནིདྡེསེ ཙིཏྟསྶཱཏི ན སཏྟསྶ, ན པོསསྶ། ཨུདྡྷཙྩནྟི ཨུདྡྷཏཱཀཱརོ། ན ཝཱུཔསམོཏི ཨཝཱུཔསམོ། ཙེཏོ ཝིཀྑིཔཏཱིཏི ཙེཏསོཝིཀྑེཔོ། བྷནྟཏྟཾ ཙིཏྟསྶཱཏི ཙིཏྟསྶ བྷནྟབྷཱཝོ, བྷནྟཡཱནབྷནྟགོཎཱདཱིནི ཝིཡ། ཨིམིནཱ ཨེཀཱརམྨཎསྨིཾཡེཝ ཝིཔྥནྡནཾ ཀཐིཏཾ། ཨུདྡྷཙྩཉྷི ཨེཀཱརམྨཎེ ཝིཔྥནྡཏི, ཝིཙིཀིཙྪཱ ནཱནཱརམྨཎེ། སེསཾ སབྦཝཱརེསུ ཧེཊྛཱ ཝུཏྟནཡེནེཝ ཝེདིཏབྦཾ།
429. Niddesavārassa uddhaccaniddese cittassāti na sattassa, na posassa. Uddhaccanti uddhatākāro. Na vūpasamoti avūpasamo. Ceto vikkhipatīti cetasovikkhepo. Bhantattaṃ cittassāti cittassa bhantabhāvo, bhantayānabhantagoṇādīni viya. Iminā ekārammaṇasmiṃyeva vipphandanaṃ kathitaṃ. Uddhaccañhi ekārammaṇe vipphandati, vicikicchā nānārammaṇe. Sesaṃ sabbavāresu heṭṭhā vuttanayeneva veditabbaṃ.
ཨིདཱནི ཨིམསྨིཾ ཙིཏྟདྭཡེ པཀིཎྞཀཝིནིཙྪཡོ ཧོཏི། ‘ཨཱརམྨཎེ པཝཊྚནཀཙིཏྟཱནི ནཱམ ཀཏཱི’ཏི? ཧི ཝུཏྟེ ‘ཨིམཱནེཝ དྭེ’ཏི ཝཏྟབྦཾ། ཏཏྠ ཝིཙིཀིཙྪཱསཧགཏཾ ཨེཀནྟེན པཝཊྚཏི, ཨུདྡྷཙྩསཧགཏཾ པན ལདྡྷཱདྷིམོཀྑཏྟཱ ལདྡྷཔཏིཊྛཾ པཝཊྚཏི། ཡཐཱ ཧི ཝཊྚཙཏུརསྶེསུ དྭཱིསུ མཎཱིསུ པབྦྷཱརཊྛཱནེ པཝཊྚེཏྭཱ ཝིསྶཊྛེསུ ཝཊྚམཎི ཨེཀནྟེནེཝ པཝཊྚཏི, ཙཏུརསྶོ པཏིཊྛཱཡ པཏིཊྛཱཡ པཝཊྚཏི, ཨེཝཾསམྤདམིདཾ ཝེདིཏབྦཾ། སབྦེསུཔི ཧཱིནཱདིབྷེདོ ན ཨུདྡྷཊོ, སབྦེསཾ ཨེཀནྟཧཱིནཏྟཱ། སཧཛཱཏཱདྷིཔཏི ལབྦྷམཱནོཔི ན ཨུདྡྷཊོ, ཧེཊྛཱ དསྶིཏནཡཏྟཱ། ཉཱཎཱབྷཱཝཏོ པནེཏྠ ཝཱིམཾསཱདྷིཔཏི ནཱམ ནཏྠི། པཙྪིམདྭཡེ སེསོཔི ནཏྠི ཨེཝ། ཀསྨཱ? ཀཉྩི དྷམྨཾ དྷུརཾ ཀཏྭཱ ཨནུཔྤཛྫནཏོ, པཊྛཱནེ ཙ པཊིསིདྡྷཏོ།
Idāni imasmiṃ cittadvaye pakiṇṇakavinicchayo hoti. ‘Ārammaṇe pavaṭṭanakacittāni nāma katī’ti? Hi vutte ‘imāneva dve’ti vattabbaṃ. Tattha vicikicchāsahagataṃ ekantena pavaṭṭati, uddhaccasahagataṃ pana laddhādhimokkhattā laddhapatiṭṭhaṃ pavaṭṭati. Yathā hi vaṭṭacaturassesu dvīsu maṇīsu pabbhāraṭṭhāne pavaṭṭetvā vissaṭṭhesu vaṭṭamaṇi ekanteneva pavaṭṭati, caturasso patiṭṭhāya patiṭṭhāya pavaṭṭati, evaṃsampadamidaṃ veditabbaṃ. Sabbesupi hīnādibhedo na uddhaṭo, sabbesaṃ ekantahīnattā. Sahajātādhipati labbhamānopi na uddhaṭo, heṭṭhā dassitanayattā. Ñāṇābhāvato panettha vīmaṃsādhipati nāma natthi. Pacchimadvaye sesopi natthi eva. Kasmā? Kañci dhammaṃ dhuraṃ katvā anuppajjanato, paṭṭhāne ca paṭisiddhato.
ཨིམེཧི པན དྭཱདསཧིཔི ཨཀུསལཙིཏྟེཧི ཀམྨེ ཨཱཡཱུཧིཏེ, ཋཔེཏྭཱ ཨུདྡྷཙྩསཧགཏཾ, སེསཱནི ཨེཀཱདསེཝ པཊིསནྡྷིཾ ཨཱཀཌྜྷནྟི། ཝིཙིཀིཙྪཱསཧགཏེ ཨལདྡྷཱདྷིམོཀྑེ དུབྦལེཔི པཊིསནྡྷིཾ ཨཱཀཌྜྷམཱནེ ཨུདྡྷཙྩསཧགཏཾ ལདྡྷཱདྷིམོཀྑཾ བལཝཾ ཀསྨཱ ནཱཀཌྜྷཏཱིཏི? དསྶནེན པཧཱཏབྦཱབྷཱཝཏོ། ཡདི ཧི ཨཱཀཌྜྷེཡྻ ‘དསྶནེནཔཧཱཏབྦ’-པདཝིབྷངྒེ ཨཱགཙྪེཡྻ, ཏསྨཱ, ཋཔེཏྭཱ ཏཾ, སེསཱནི ཨེཀཱདས ཨཱཀཌྜྷནྟི། ཏེསུ ཧི ཡེན ཀེནཙི ཀམྨེ ཨཱཡཱུཧིཏེ ཏཱཡ ཙེཏནཱཡ ཙཏཱུསུ ཨཔཱཡེསུ པཊིསནྡྷི ཧོཏི། ཨཀུསལཝིཔཱཀེསུ ཨཧེཏུཀམནོཝིཉྙཱཎདྷཱཏུཨུཔེཀྑཱསཧགཏཱཡ པཊིསནྡྷིཾ གཎྷཱཏི། ཨིཏརསྶཱཔི ཨེཏྠེཝ པཊིསནྡྷིདཱནཾ བྷཝེཡྻ། ཡསྨཱ པནེཏཾ ནཏྠི, ཏསྨཱ ‘དསྶནེནཔཧཱཏབྦ’-པདཝིབྷངྒེ ནཱགཏནྟི།
Imehi pana dvādasahipi akusalacittehi kamme āyūhite, ṭhapetvā uddhaccasahagataṃ, sesāni ekādaseva paṭisandhiṃ ākaḍḍhanti. Vicikicchāsahagate aladdhādhimokkhe dubbalepi paṭisandhiṃ ākaḍḍhamāne uddhaccasahagataṃ laddhādhimokkhaṃ balavaṃ kasmā nākaḍḍhatīti? Dassanena pahātabbābhāvato. Yadi hi ākaḍḍheyya ‘dassanenapahātabba’-padavibhaṅge āgaccheyya, tasmā, ṭhapetvā taṃ, sesāni ekādasa ākaḍḍhanti. Tesu hi yena kenaci kamme āyūhite tāya cetanāya catūsu apāyesu paṭisandhi hoti. Akusalavipākesu ahetukamanoviññāṇadhātuupekkhāsahagatāya paṭisandhiṃ gaṇhāti. Itarassāpi ettheva paṭisandhidānaṃ bhaveyya. Yasmā panetaṃ natthi, tasmā ‘dassanenapahātabba’-padavibhaṅge nāgatanti.
ཨཀུསལཱ དྷམྨཱཏིཔདསྶ ཝཎྞནཱ ནིཊྛིཏཱ།
Akusalā dhammātipadassa vaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / དྷམྨསངྒཎཱིཔཱལི༹ • Dhammasaṅgaṇīpāḷi / དྭཱདས ཨཀུསལཱནི • Dvādasa akusalāni
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / དྷམྨསངྒཎཱི-མཱུལཊཱིཀཱ • Dhammasaṅgaṇī-mūlaṭīkā / དྭཱདསམཙིཏྟཝཎྞནཱ • Dvādasamacittavaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / དྷམྨསངྒཎཱི-ཨནུཊཱིཀཱ • Dhammasaṅgaṇī-anuṭīkā / དྭཱདསམཙིཏྟཝཎྞནཱ • Dvādasamacittavaṇṇanā
