| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā |
ဒ္ဝာဒသမနိသ္သဂ္ဂိယပာစိတ္တိယသိက္ခာပဒဝဏ္ဏနာ
Dvādasamanissaggiyapācittiyasikkhāpadavaṇṇanā
၇၈၉. ဒ္ဝာဒသမေ – လဟုပာဝုရဏန္တိ ဥဏ္ဟကာလေ ပာဝုရဏံ။ သေသံ သိက္ခာပဒဒ္ဝယေပိ ဥတ္တာနမေဝ။
789. Dvādasame – lahupāvuraṇanti uṇhakāle pāvuraṇaṃ. Sesaṃ sikkhāpadadvayepi uttānameva.
ဆသမုဋ္ဌာနံ – ကိရိယံ, နောသညာဝိမောက္ခံ, အစိတ္တကံ, ပဏ္ဏတ္တိဝဇ္ဇံ, ကာယကမ္မံ, ဝစီကမ္မံ, တိစိတ္တံ, တိဝေဒနန္တိ။
Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ဒ္ဝာဒသမသိက္ခာပဒံ။
Dvādasamasikkhāpadaṃ.
ဥဒ္ဒိဋ္ဌာ ခော အယ္ယာယော တိံသ နိသ္သဂ္ဂိယာ ပာစိတ္တိယာ ဓမ္မာတိ ဧတ္ထ မဟာဝိဘင္ဂေ စီဝရဝဂ္ဂတော ဓောဝနဉ္စ ပဋိဂ္ဂဟဏဉ္စာတိ ဒ္ဝေ သိက္ခာပဒာနိ အပနေတ္ဝာ အကာလစီဝရံ ကာလစီဝရန္တိ အဓိဋ္ဌဟိတ္ဝာ ဘာဇိတသိက္ခာပဒေန စ ပရိဝတ္တေတ္ဝာ အစ္ဆိန္နစီဝရေန စ ပဌမဝဂ္ဂော ပူရေတဗ္ဗော။ ပုန ဧဠကလောမဝဂ္ဂသ္သ အာဒိတော သတ္တ သိက္ခာပဒာနိ အပနေတ္ဝာ သတ္တ အညဒတ္ထိကာနိ ပက္ခိပိတ္ဝာ ဒုတိယဝဂ္ဂော ပူရေတဗ္ဗော။ တတိယဝဂ္ဂတော ပဌမပတ္တံ ဝသ္သိကသာဋိကံ အာရညကသိက္ခာပဒန္တိ ဣမာနိ တီဏိ အပနေတ္ဝာ ပတ္တသန္နိစယဂရုပာဝုရဏလဟုပာဝုရဏသိက္ခာပဒေဟိ တတိယဝဂ္ဂော ပူရေတဗ္ဗော။ ဣတိ ဘိက္ခုနီနံ ဒ္ဝာဒသ သိက္ခာပဒာနိ ဧကတောပညတ္တာနိ, အဋ္ဌာရသ ဥဘတောပညတ္တာနီတိ ဧဝံ သဗ္ဗေပိ ပာတိမောက္ခုဒ္ဒေသမဂ္ဂေန ‘‘ဥဒ္ဒိဋ္ဌာ ခော အယ္ယာယော တိံသ နိသ္သဂ္ဂိယာ ပာစိတ္တိယာ ဓမ္မာ’’တိ ဧဝမေတ္ထ အတ္ထော ဒဋ္ဌဗ္ဗော။ သေသံ ဝုတ္တနယမေဝာတိ။
Uddiṭṭhā kho ayyāyo tiṃsa nissaggiyā pācittiyā dhammāti ettha mahāvibhaṅge cīvaravaggato dhovanañca paṭiggahaṇañcāti dve sikkhāpadāni apanetvā akālacīvaraṃ kālacīvaranti adhiṭṭhahitvā bhājitasikkhāpadena ca parivattetvā acchinnacīvarena ca paṭhamavaggo pūretabbo. Puna eḷakalomavaggassa ādito satta sikkhāpadāni apanetvā satta aññadatthikāni pakkhipitvā dutiyavaggo pūretabbo. Tatiyavaggato paṭhamapattaṃ vassikasāṭikaṃ āraññakasikkhāpadanti imāni tīṇi apanetvā pattasannicayagarupāvuraṇalahupāvuraṇasikkhāpadehi tatiyavaggo pūretabbo. Iti bhikkhunīnaṃ dvādasa sikkhāpadāni ekatopaññattāni, aṭṭhārasa ubhatopaññattānīti evaṃ sabbepi pātimokkhuddesamaggena ‘‘uddiṭṭhā kho ayyāyo tiṃsa nissaggiyā pācittiyā dhammā’’ti evamettha attho daṭṭhabbo. Sesaṃ vuttanayamevāti.
သမန္တပာသာဒိကာယ ဝိနယသံဝဏ္ဏနာယ ဘိက္ခုနီဝိဘင္ဂေ
Samantapāsādikāya vinayasaṃvaṇṇanāya bhikkhunīvibhaṅge
တိံသကဝဏ္ဏနာ နိဋ္ဌိတာ။
Tiṃsakavaṇṇanā niṭṭhitā.
နိသ္သဂ္ဂိယကဏ္ဍံ နိဋ္ဌိတံ။
Nissaggiyakaṇḍaṃ niṭṭhitaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ဘိက္ခုနီဝိဘင္ဂ • Bhikkhunīvibhaṅga / ၁၂. ဒ္ဝာဒသမသိက္ခာပဒံ • 12. Dvādasamasikkhāpadaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. ဒုတိယနိသ္သဂ္ဂိယာဒိပာစိတ္တိယသိက္ခာပဒဝဏ္ဏနာ • 2. Dutiyanissaggiyādipācittiyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၂. ဒ္ဝာဒသမနိသ္သဂ္ဂိယပာစိတ္တိယသိက္ခာပဒံ • 12. Dvādasamanissaggiyapācittiyasikkhāpadaṃ
