| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
12. த்³வாத³ஸமஸிக்கா²பத³ங்
12. Dvādasamasikkhāpadaṃ
788. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிங் கத²ங் காதுங். அத² கோ² ராஜா பஸேனதி³ கோஸலோ உண்ஹகாலே மஹக்³க⁴ங் கோ²மங் பாருபித்வா யேன து²ல்லனந்தா³ பி⁴க்கு²னீ தேனுபஸங்கமி; உபஸங்கமித்வா து²ல்லனந்த³ங் பி⁴க்கு²னிங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ராஜானங் பஸேனதி³ங் கோஸலங் து²ல்லனந்தா³ பி⁴க்கு²னீ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² ராஜா பஸேனதி³ கோஸலோ து²ல்லனந்தா³ய பி⁴க்கு²னியா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ து²ல்லனந்த³ங் பி⁴க்கு²னிங் ஏதத³வோச – ‘‘வதெ³ய்யாஸி, அய்யே, யேன அத்தோ²’’தி . ‘‘ஸசே மே த்வங், மஹாராஜ, தா³துகாமோஸி, இமங் கோ²மங் தே³ஹீ’’தி. அத² கோ² ராஜா பஸேனதி³ கோஸலோ து²ல்லனந்தா³ய பி⁴க்கு²னியா கோ²மங் த³த்வா உட்டா²யாஸனா து²ல்லனந்த³ங் பி⁴க்கு²னிங் அபி⁴வாதெ³த்வா பத³க்கி²ணங் கத்வா பக்காமி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘மஹிச்சா² இமா பி⁴க்கு²னியோ அஸந்துட்டா². கத²ஞ்ஹி நாம ராஜானங் கோ²மங் விஞ்ஞாபெஸ்ஸந்தீ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ ராஜானங் கோ²மங் விஞ்ஞாபெஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ராஜானங் கோ²மங் விஞ்ஞாபேதீதி 1? ‘‘ஸச்சங், ப⁴க³வாதி’’. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ராஜானங் கோ²மங் விஞ்ஞாபெஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
788. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Atha kho rājā pasenadi kosalo uṇhakāle mahagghaṃ khomaṃ pārupitvā yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ abhivādetvā ekamantaṃ nisīdi. Ekamantaṃ nisinnaṃ kho rājānaṃ pasenadiṃ kosalaṃ thullanandā bhikkhunī dhammiyā kathāya sandassesi samādapesi samuttejesi sampahaṃsesi. Atha kho rājā pasenadi kosalo thullanandāya bhikkhuniyā dhammiyā kathāya sandassito samādapito samuttejito sampahaṃsito thullanandaṃ bhikkhuniṃ etadavoca – ‘‘vadeyyāsi, ayye, yena attho’’ti . ‘‘Sace me tvaṃ, mahārāja, dātukāmosi, imaṃ khomaṃ dehī’’ti. Atha kho rājā pasenadi kosalo thullanandāya bhikkhuniyā khomaṃ datvā uṭṭhāyāsanā thullanandaṃ bhikkhuniṃ abhivādetvā padakkhiṇaṃ katvā pakkāmi. Manussā ujjhāyanti khiyyanti vipācenti – ‘‘mahicchā imā bhikkhuniyo asantuṭṭhā. Kathañhi nāma rājānaṃ khomaṃ viññāpessantī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā rājānaṃ khomaṃ viññāpessatī’’ti…pe… saccaṃ kira, bhikkhave, thullanandā bhikkhunī rājānaṃ khomaṃ viññāpetīti 2? ‘‘Saccaṃ, bhagavāti’’. Vigarahi buddho bhagavā…pe… kathañhi nāma, bhikkhave, thullanandā bhikkhunī rājānaṃ khomaṃ viññāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
789. ‘‘லஹுபாவுரணங் பன பி⁴க்கு²னியா சேதாபெந்தியா அட்³ட⁴தெய்யகங்ஸபரமங் சேதாபேதப்³ப³ங். ததோ சே உத்தரி சேதாபெய்ய, நிஸ்ஸக்³கி³யங் பாசித்திய’’ந்தி.
789.‘‘Lahupāvuraṇaṃpana bhikkhuniyā cetāpentiyā aḍḍhateyyakaṃsaparamaṃ cetāpetabbaṃ. Tato ce uttari cetāpeyya, nissaggiyaṃ pācittiya’’nti.
790. லஹுபாவுரணங் நாம யங் கிஞ்சி உண்ஹகாலே பாவுரணங்.
790.Lahupāvuraṇaṃ nāma yaṃ kiñci uṇhakāle pāvuraṇaṃ.
சேதாபெந்தியாதி விஞ்ஞாபெந்தியா.
Cetāpentiyāti viññāpentiyā.
அட்³ட⁴தெய்யகங்ஸபரமங் சேதாபேதப்³ப³ந்தி த³ஸகஹாபணக்³க⁴னகங் சேதாபேதப்³ப³ங்.
Aḍḍhateyyakaṃsaparamaṃ cetāpetabbanti dasakahāpaṇagghanakaṃ cetāpetabbaṃ.
ததோ சே உத்தரி சேதாபெய்யாதி ததுத்தரி விஞ்ஞாபேதி, பயோகே³ து³க்கடங். படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, அய்யே, லஹுபாவுரணங் அதிரேகஅட்³ட⁴தெய்யகங்ஸபரமங் சேதாபிதங் நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… அய்யாய த³ம்மீதி.
Tato ce uttari cetāpeyyāti tatuttari viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… idaṃ me, ayye, lahupāvuraṇaṃ atirekaaḍḍhateyyakaṃsaparamaṃ cetāpitaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… ayyāya dammīti.
791. அதிரேகஅட்³ட⁴தெய்யகங்ஸே அதிரேகஸஞ்ஞா சேதாபேதி, நிஸ்ஸக்³கி³யங் பாசித்தியங். அதிரேகஅட்³ட⁴தெய்யகங்ஸே வேமதிகா சேதாபேதி, நிஸ்ஸக்³கி³யங் பாசித்தியங். அதிரேகஅட்³ட⁴தெய்யகங்ஸே ஊனகஸஞ்ஞா சேதாபேதி, நிஸ்ஸக்³கி³யங் பாசித்தியங்.
791. Atirekaaḍḍhateyyakaṃse atirekasaññā cetāpeti, nissaggiyaṃ pācittiyaṃ. Atirekaaḍḍhateyyakaṃse vematikā cetāpeti, nissaggiyaṃ pācittiyaṃ. Atirekaaḍḍhateyyakaṃse ūnakasaññā cetāpeti, nissaggiyaṃ pācittiyaṃ.
ஊனகஅட்³ட⁴தெய்யகங்ஸே அதிரேகஸஞ்ஞா, ஆபத்தி து³க்கடஸ்ஸ. ஊனகஅட்³ட⁴தெய்யகங்ஸே வேமதிகா, ஆபத்தி து³க்கடஸ்ஸ. ஊனகஅட்³ட⁴தெய்யகங்ஸே ஊனகஸஞ்ஞா , அனாபத்தி.
Ūnakaaḍḍhateyyakaṃse atirekasaññā, āpatti dukkaṭassa. Ūnakaaḍḍhateyyakaṃse vematikā, āpatti dukkaṭassa. Ūnakaaḍḍhateyyakaṃse ūnakasaññā , anāpatti.
792. அனாபத்தி அட்³ட⁴தெய்யகங்ஸபரமங் சேதாபேதி, ஊனகஅட்³ட⁴தெய்யகங்ஸபரமங் சேதாபேதி, ஞாதகானங், பவாரிதானங், அஞ்ஞஸ்ஸத்தா²ய, அத்தனோ த⁴னேன, மஹக்³க⁴ங் சேதாபேதுகாமஸ்ஸ அப்பக்³க⁴ங் சேதாபேதி, உம்மத்திகாய, ஆதி³கம்மிகாயாதி.
792. Anāpatti aḍḍhateyyakaṃsaparamaṃ cetāpeti, ūnakaaḍḍhateyyakaṃsaparamaṃ cetāpeti, ñātakānaṃ, pavāritānaṃ, aññassatthāya, attano dhanena, mahagghaṃ cetāpetukāmassa appagghaṃ cetāpeti, ummattikāya, ādikammikāyāti.
த்³வாத³ஸமஸிக்கா²பத³ங் நிட்டி²தங்.
Dvādasamasikkhāpadaṃ niṭṭhitaṃ.
உத்³தி³ட்டா² கோ², அய்யாயோ, திங்ஸ நிஸ்ஸக்³கி³யா பாசித்தியா த⁴ம்மா. தத்தா²ய்யாயோ புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தெ⁴த்தா²ய்யாயோ, தஸ்மா துண்ஹீ, ஏவமேதங் தா⁴ரயாமீதி.
Uddiṭṭhā kho, ayyāyo, tiṃsa nissaggiyā pācittiyā dhammā. Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
பி⁴க்கு²னிவிப⁴ங்கே³ நிஸ்ஸக்³கி³யகண்ட³ங் நிட்டி²தங்.
Bhikkhunivibhaṅge nissaggiyakaṇḍaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / த்³வாத³ஸமனிஸ்ஸக்³கி³யபாசித்தியஸிக்கா²பத³வண்ணனா • Dvādasamanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நிஸ்ஸக்³கி³யகண்ட³ங் (பி⁴க்கு²னீவிப⁴ங்க³வண்ணனா) • 3. Nissaggiyakaṇḍaṃ (bhikkhunīvibhaṅgavaṇṇanā)
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியனிஸ்ஸக்³கி³யாதி³பாசித்தியஸிக்கா²பத³வண்ணனா • 2. Dutiyanissaggiyādipācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 12. த்³வாத³ஸமனிஸ்ஸக்³கி³யபாசித்தியஸிக்கா²பத³ங் • 12. Dvādasamanissaggiyapācittiyasikkhāpadaṃ
