| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
12. த்³வாத³ஸமஸிக்கா²பத³ங்
12. Dvādasamasikkhāpadaṃ
1219. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ அனோகாஸகதங் பி⁴க்கு²ங் பஞ்ஹங் புச்ச²ந்தி. பி⁴க்கூ² உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ அனோகாஸகதங் பி⁴க்கு²ங் பஞ்ஹங் புச்சி²ஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ அனோகாஸகதங் பி⁴க்கு²ங் பஞ்ஹங் புச்ச²ந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ அனோகாஸகதங் பி⁴க்கு²ங் பஞ்ஹங் புச்சி²ஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1219. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo anokāsakataṃ bhikkhuṃ pañhaṃ pucchanti. Bhikkhū ujjhāyanti khiyyanti vipācenti – ‘‘kathañhi nāma bhikkhuniyo anokāsakataṃ bhikkhuṃ pañhaṃ pucchissantī’’ti…pe… saccaṃ kira, bhikkhave, bhikkhuniyo anokāsakataṃ bhikkhuṃ pañhaṃ pucchantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo anokāsakataṃ bhikkhuṃ pañhaṃ pucchissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1220. ‘‘யா பன பி⁴க்கு²னீ அனோகாஸகதங் பி⁴க்கு²ங் பஞ்ஹங் புச்செ²ய்ய, பாசித்திய’’ந்தி.
1220.‘‘Yā pana bhikkhunī anokāsakataṃ bhikkhuṃ pañhaṃ puccheyya, pācittiya’’nti.
1221. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1221.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அனோகாஸகதந்தி அனாபுச்சா². பி⁴க்கு²ந்தி உபஸம்பன்னங். பஞ்ஹங் புச்செ²ய்யாதி ஸுத்தந்தே ஓகாஸங் காராபெத்வா வினயங் வா அபி⁴த⁴ம்மங் வா புச்ச²தி, ஆபத்தி பாசித்தியஸ்ஸ. வினயே ஓகாஸங் காராபெத்வா ஸுத்தந்தங் வா அபி⁴த⁴ம்மங் வா புச்ச²தி, ஆபத்தி பாசித்தியஸ்ஸ. அபி⁴த⁴ம்மே ஓகாஸங் காராபெத்வா ஸுத்தந்தங் வா வினயங் வா புச்ச²தி, ஆபத்தி பாசித்தியஸ்ஸ.
Anokāsakatanti anāpucchā. Bhikkhunti upasampannaṃ. Pañhaṃ puccheyyāti suttante okāsaṃ kārāpetvā vinayaṃ vā abhidhammaṃ vā pucchati, āpatti pācittiyassa. Vinaye okāsaṃ kārāpetvā suttantaṃ vā abhidhammaṃ vā pucchati, āpatti pācittiyassa. Abhidhamme okāsaṃ kārāpetvā suttantaṃ vā vinayaṃ vā pucchati, āpatti pācittiyassa.
1222. அனாபுச்சி²தே அனாபுச்சி²தஸஞ்ஞா பஞ்ஹங் புச்ச²தி, ஆபத்தி பாசித்தியஸ்ஸ. அனாபுச்சி²தே வேமதிகா பஞ்ஹங் புச்ச²தி, ஆபத்தி பாசித்தியஸ்ஸ. அனாபுச்சி²தே ஆபுச்சி²தஸஞ்ஞா பஞ்ஹங் புச்ச²தி, ஆபத்தி பாசித்தியஸ்ஸ.
1222. Anāpucchite anāpucchitasaññā pañhaṃ pucchati, āpatti pācittiyassa. Anāpucchite vematikā pañhaṃ pucchati, āpatti pācittiyassa. Anāpucchite āpucchitasaññā pañhaṃ pucchati, āpatti pācittiyassa.
ஆபுச்சி²தே அனாபுச்சி²தஸஞ்ஞா, ஆபத்தி து³க்கடஸ்ஸ. ஆபுச்சி²தே வேமதிகா, ஆபத்தி து³க்கடஸ்ஸ. ஆபுச்சி²தே ஆபுச்சி²தஸஞ்ஞா, அனாபத்தி.
Āpucchite anāpucchitasaññā, āpatti dukkaṭassa. Āpucchite vematikā, āpatti dukkaṭassa. Āpucchite āpucchitasaññā, anāpatti.
1223. அனாபத்தி ஓகாஸங் காராபெத்வா புச்ச²தி, அனோதி³ஸ்ஸ ஓகாஸங் காராபெத்வா யத்த² கத்த²சி புச்ச²தி, உம்மத்திகாய, ஆதி³கம்மிகாயாதி.
1223. Anāpatti okāsaṃ kārāpetvā pucchati, anodissa okāsaṃ kārāpetvā yattha katthaci pucchati, ummattikāya, ādikammikāyāti.
த்³வாத³ஸமஸிக்கா²பத³ங் நிட்டி²தங்.
Dvādasamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 12. த்³வாத³ஸமஸிக்கா²பத³வண்ணனா • 12. Dvādasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 11. ஏகாத³ஸமாதி³ஸிக்கா²பத³வண்ணனா • 11. Ekādasamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 12. த்³வாத³ஸமஸிக்கா²பத³ங் • 12. Dvādasamasikkhāpadaṃ
