| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
১২. দ্ৰাদসমসিক্খাপদং
12. Dvādasamasikkhāpadaṃ
৭৮৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৰিসারদা পট্টা ধম্মিং কথং কাতুং। অথ খো রাজা পসেনদি কোসলো উণ্হকালে মহগ্ঘং খোমং পারুপিত্ৰা যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৰা থুল্লনন্দং ভিক্খুনিং অভিৰাদেত্ৰা একমন্তং নিসীদি। একমন্তং নিসিন্নং খো রাজানং পসেনদিং কোসলং থুল্লনন্দা ভিক্খুনী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো রাজা পসেনদি কোসলো থুল্লনন্দায ভিক্খুনিযা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো থুল্লনন্দং ভিক্খুনিং এতদৰোচ – ‘‘ৰদেয্যাসি, অয্যে, যেন অত্থো’’তি । ‘‘সচে মে ত্ৰং, মহারাজ, দাতুকামোসি, ইমং খোমং দেহী’’তি। অথ খো রাজা পসেনদি কোসলো থুল্লনন্দায ভিক্খুনিযা খোমং দত্ৰা উট্ঠাযাসনা থুল্লনন্দং ভিক্খুনিং অভিৰাদেত্ৰা পদক্খিণং কত্ৰা পক্কামি। মনুস্সা উজ্ঝাযন্তি খিয্যন্তি ৰিপাচেন্তি – ‘‘মহিচ্ছা ইমা ভিক্খুনিযো অসন্তুট্ঠা। কথঞ্হি নাম রাজানং খোমং ৰিঞ্ঞাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা রাজানং খোমং ৰিঞ্ঞাপেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী রাজানং খোমং ৰিঞ্ঞাপেতীতি 1? ‘‘সচ্চং, ভগৰাতি’’। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী রাজানং খোমং ৰিঞ্ঞাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
788. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Atha kho rājā pasenadi kosalo uṇhakāle mahagghaṃ khomaṃ pārupitvā yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ abhivādetvā ekamantaṃ nisīdi. Ekamantaṃ nisinnaṃ kho rājānaṃ pasenadiṃ kosalaṃ thullanandā bhikkhunī dhammiyā kathāya sandassesi samādapesi samuttejesi sampahaṃsesi. Atha kho rājā pasenadi kosalo thullanandāya bhikkhuniyā dhammiyā kathāya sandassito samādapito samuttejito sampahaṃsito thullanandaṃ bhikkhuniṃ etadavoca – ‘‘vadeyyāsi, ayye, yena attho’’ti . ‘‘Sace me tvaṃ, mahārāja, dātukāmosi, imaṃ khomaṃ dehī’’ti. Atha kho rājā pasenadi kosalo thullanandāya bhikkhuniyā khomaṃ datvā uṭṭhāyāsanā thullanandaṃ bhikkhuniṃ abhivādetvā padakkhiṇaṃ katvā pakkāmi. Manussā ujjhāyanti khiyyanti vipācenti – ‘‘mahicchā imā bhikkhuniyo asantuṭṭhā. Kathañhi nāma rājānaṃ khomaṃ viññāpessantī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā rājānaṃ khomaṃ viññāpessatī’’ti…pe… saccaṃ kira, bhikkhave, thullanandā bhikkhunī rājānaṃ khomaṃ viññāpetīti 2? ‘‘Saccaṃ, bhagavāti’’. Vigarahi buddho bhagavā…pe… kathañhi nāma, bhikkhave, thullanandā bhikkhunī rājānaṃ khomaṃ viññāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৭৮৯. ‘‘লহুপাৰুরণং পন ভিক্খুনিযা চেতাপেন্তিযা অড্ঢতেয্যকংসপরমং চেতাপেতব্বং। ততো চে উত্তরি চেতাপেয্য, নিস্সগ্গিযং পাচিত্তিয’’ন্তি।
789.‘‘Lahupāvuraṇaṃpana bhikkhuniyā cetāpentiyā aḍḍhateyyakaṃsaparamaṃ cetāpetabbaṃ. Tato ce uttari cetāpeyya, nissaggiyaṃ pācittiya’’nti.
৭৯০. লহুপাৰুরণং নাম যং কিঞ্চি উণ্হকালে পাৰুরণং।
790.Lahupāvuraṇaṃ nāma yaṃ kiñci uṇhakāle pāvuraṇaṃ.
চেতাপেন্তিযাতি ৰিঞ্ঞাপেন্তিযা।
Cetāpentiyāti viññāpentiyā.
অড্ঢতেয্যকংসপরমং চেতাপেতব্বন্তি দসকহাপণগ্ঘনকং চেতাপেতব্বং।
Aḍḍhateyyakaṃsaparamaṃ cetāpetabbanti dasakahāpaṇagghanakaṃ cetāpetabbaṃ.
ততো চে উত্তরি চেতাপেয্যাতি ততুত্তরি ৰিঞ্ঞাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ইদং মে, অয্যে, লহুপাৰুরণং অতিরেকঅড্ঢতেয্যকংসপরমং চেতাপিতং নিস্সগ্গিযং, ইমাহং সঙ্ঘস্স নিস্সজ্জামীতি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি।
Tato ce uttari cetāpeyyāti tatuttari viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… idaṃ me, ayye, lahupāvuraṇaṃ atirekaaḍḍhateyyakaṃsaparamaṃ cetāpitaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… ayyāya dammīti.
৭৯১. অতিরেকঅড্ঢতেয্যকংসে অতিরেকসঞ্ঞা চেতাপেতি, নিস্সগ্গিযং পাচিত্তিযং। অতিরেকঅড্ঢতেয্যকংসে ৰেমতিকা চেতাপেতি, নিস্সগ্গিযং পাচিত্তিযং। অতিরেকঅড্ঢতেয্যকংসে ঊনকসঞ্ঞা চেতাপেতি, নিস্সগ্গিযং পাচিত্তিযং।
791. Atirekaaḍḍhateyyakaṃse atirekasaññā cetāpeti, nissaggiyaṃ pācittiyaṃ. Atirekaaḍḍhateyyakaṃse vematikā cetāpeti, nissaggiyaṃ pācittiyaṃ. Atirekaaḍḍhateyyakaṃse ūnakasaññā cetāpeti, nissaggiyaṃ pācittiyaṃ.
ঊনকঅড্ঢতেয্যকংসে অতিরেকসঞ্ঞা, আপত্তি দুক্কটস্স। ঊনকঅড্ঢতেয্যকংসে ৰেমতিকা, আপত্তি দুক্কটস্স। ঊনকঅড্ঢতেয্যকংসে ঊনকসঞ্ঞা , অনাপত্তি।
Ūnakaaḍḍhateyyakaṃse atirekasaññā, āpatti dukkaṭassa. Ūnakaaḍḍhateyyakaṃse vematikā, āpatti dukkaṭassa. Ūnakaaḍḍhateyyakaṃse ūnakasaññā , anāpatti.
৭৯২. অনাপত্তি অড্ঢতেয্যকংসপরমং চেতাপেতি, ঊনকঅড্ঢতেয্যকংসপরমং চেতাপেতি, ঞাতকানং, পৰারিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামস্স অপ্পগ্ঘং চেতাপেতি, উম্মত্তিকায, আদিকম্মিকাযাতি।
792. Anāpatti aḍḍhateyyakaṃsaparamaṃ cetāpeti, ūnakaaḍḍhateyyakaṃsaparamaṃ cetāpeti, ñātakānaṃ, pavāritānaṃ, aññassatthāya, attano dhanena, mahagghaṃ cetāpetukāmassa appagghaṃ cetāpeti, ummattikāya, ādikammikāyāti.
দ্ৰাদসমসিক্খাপদং নিট্ঠিতং।
Dvādasamasikkhāpadaṃ niṭṭhitaṃ.
উদ্দিট্ঠা খো, অয্যাযো, তিংস নিস্সগ্গিযা পাচিত্তিযা ধম্মা। তত্থায্যাযো পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থায্যাযো, তস্মা তুণ্হী, এৰমেতং ধারযামীতি।
Uddiṭṭhā kho, ayyāyo, tiṃsa nissaggiyā pācittiyā dhammā. Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
ভিক্খুনিৰিভঙ্গে নিস্সগ্গিযকণ্ডং নিট্ঠিতং।
Bhikkhunivibhaṅge nissaggiyakaṇḍaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / দ্ৰাদসমনিস্সগ্গিযপাচিত্তিযসিক্খাপদৰণ্ণনা • Dvādasamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. নিস্সগ্গিযকণ্ডং (ভিক্খুনীৰিভঙ্গৰণ্ণনা) • 3. Nissaggiyakaṇḍaṃ (bhikkhunīvibhaṅgavaṇṇanā)
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযনিস্সগ্গিযাদিপাচিত্তিযসিক্খাপদৰণ্ণনা • 2. Dutiyanissaggiyādipācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১২. দ্ৰাদসমনিস্সগ্গিযপাচিত্তিযসিক্খাপদং • 12. Dvādasamanissaggiyapācittiyasikkhāpadaṃ
