| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၁၂. ဒ္ဝာဒသမသိက္ခာပဒံ
12. Dvādasamasikkhāpadaṃ
၁၁၇၀. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ဘိက္ခုနိယော အနုဝသ္သံ ဝုဋ္ဌာပေန္တိ, ဥပသ္သယော န သမ္မတိ။ မနုသ္သာ 1 ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနိယော အနုဝသ္သံ ဝုဋ္ဌာပေသ္သန္တိ, ဥပသ္သယော န သမ္မတီ’’တိ! အသ္သောသုံ ခော ဘိက္ခုနိယော တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနိယော အနုဝသ္သံ ဝုဋ္ဌာပေသ္သန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အနုဝသ္သံ ဝုဋ္ဌာပေန္တီတိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနိယော အနုဝသ္သံ ဝုဋ္ဌာပေသ္သန္တိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
1170. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo anuvassaṃ vuṭṭhāpenti, upassayo na sammati. Manussā 2 ujjhāyanti khiyyanti vipācenti – ‘‘kathañhi nāma bhikkhuniyo anuvassaṃ vuṭṭhāpessanti, upassayo na sammatī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo anuvassaṃ vuṭṭhāpessantī’’ti…pe… saccaṃ kira, bhikkhave, bhikkhuniyo anuvassaṃ vuṭṭhāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo anuvassaṃ vuṭṭhāpessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၁၁၇၁. ‘‘ယာ ပန ဘိက္ခုနီ အနုဝသ္သံ ဝုဋ္ဌာပေယ္ယ, ပာစိတ္တိယ’’န္တိ။
1171.‘‘Yā pana bhikkhunī anuvassaṃ vuṭṭhāpeyya, pācittiya’’nti.
၁၁၇၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
1172.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
အနုဝသ္သန္တိ အနုသံဝစ္ဆရံ။ ဝုဋ္ဌာပေယ္ယာတိ ဥပသမ္ပာဒေယ္ယ။
Anuvassanti anusaṃvaccharaṃ. Vuṭṭhāpeyyāti upasampādeyya.
‘‘ဝုဋ္ဌာပေသ္သာမီ’’တိ ဂဏံ ဝာ အာစရိနိံ ဝာ ပတ္တံ ဝာ စီဝရံ ဝာ ပရိယေသတိ, သီမံ ဝာ သမ္မန္နတိ, အာပတ္တိ ဒုက္ကဋသ္သ။ ဉတ္တိယာ ဒုက္ကဋံ။ ဒ္ဝီဟိ ကမ္မဝာစာဟိ ဒုက္ကဋာ။ ကမ္မဝာစာပရိယောသာနေ ဥပဇ္ဈာယာယ အာပတ္တိ ပာစိတ္တိယသ္သ။ ဂဏသ္သ စ အာစရိနိယာ စ အာပတ္တိ ဒုက္ကဋသ္သ။
‘‘Vuṭṭhāpessāmī’’ti gaṇaṃ vā ācariniṃ vā pattaṃ vā cīvaraṃ vā pariyesati, sīmaṃ vā sammannati, āpatti dukkaṭassa. Ñattiyā dukkaṭaṃ. Dvīhi kammavācāhi dukkaṭā. Kammavācāpariyosāne upajjhāyāya āpatti pācittiyassa. Gaṇassa ca ācariniyā ca āpatti dukkaṭassa.
၁၁၇၃. အနာပတ္တိ ဧကန္တရိကံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။
1173. Anāpatti ekantarikaṃ vuṭṭhāpeti, ummattikāya, ādikammikāyāti.
ဒ္ဝာဒသမသိက္ခာပဒံ နိဋ္ဌိတံ။
Dvādasamasikkhāpadaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၁၂. ဒ္ဝာဒသမသိက္ခာပဒဝဏ္ဏနာ • 12. Dvādasamasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၂. ဒ္ဝာဒသမသိက္ခာပဒံ • 12. Dvādasamasikkhāpadaṃ
