| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
12. ද්‌වාදසමසික්‌ඛාපදං
12. Dvādasamasikkhāpadaṃ
788. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී බහුස්‌සුතා හොති භාණිකා විසාරදා පට්‌ටා ධම්‌මිං කථං කාතුං. අථ ඛො රාජා පසෙනදි කොසලො උණ්‌හකාලෙ මහග්‌ඝං ඛොමං පාරුපිත්‌වා යෙන ථුල්‌ලනන්‌දා භික්‌ඛුනී තෙනුපසඞ්‌කමි; උපසඞ්‌කමිත්‌වා ථුල්‌ලනන්‌දං භික්‌ඛුනිං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො රාජානං පසෙනදිං කොසලං ථුල්‌ලනන්‌දා භික්‌ඛුනී ධම්‌මියා කථාය සන්‌දස්‌සෙසි සමාදපෙසි සමුත්‌තෙජෙසි සම්‌පහංසෙසි. අථ ඛො රාජා පසෙනදි කොසලො ථුල්‌ලනන්‌දාය භික්‌ඛුනියා ධම්‌මියා කථාය සන්‌දස්‌සිතො සමාදපිතො සමුත්‌තෙජිතො සම්‌පහංසිතො ථුල්‌ලනන්‌දං භික්‌ඛුනිං එතදවොච – ‘‘වදෙය්‍යාසි, අය්‍යෙ, යෙන අත්‌ථො’’ති . ‘‘සචෙ මෙ ත්‌වං, මහාරාජ, දාතුකාමොසි, ඉමං ඛොමං දෙහී’’ති. අථ ඛො රාජා පසෙනදි කොසලො ථුල්‌ලනන්‌දාය භික්‌ඛුනියා ඛොමං දත්‌වා උට්‌ඨායාසනා ථුල්‌ලනන්‌දං භික්‌ඛුනිං අභිවාදෙත්‌වා පදක්‌ඛිණං කත්‌වා පක්‌කාමි. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘මහිච්‌ඡා ඉමා භික්‌ඛුනියො අසන්‌තුට්‌ඨා. කථඤ්‌හි නාම රාජානං ඛොමං විඤ්‌ඤාපෙස්‌සන්‌තී’’ති! අස්‌සොසුං ඛො භික්‌ඛුනියො තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා රාජානං ඛොමං විඤ්‌ඤාපෙස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී රාජානං ඛොමං විඤ්‌ඤාපෙතීති 1? ‘‘සච්‌චං, භගවාති’’. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී රාජානං ඛොමං විඤ්‌ඤාපෙස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
788. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Atha kho rājā pasenadi kosalo uṇhakāle mahagghaṃ khomaṃ pārupitvā yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ abhivādetvā ekamantaṃ nisīdi. Ekamantaṃ nisinnaṃ kho rājānaṃ pasenadiṃ kosalaṃ thullanandā bhikkhunī dhammiyā kathāya sandassesi samādapesi samuttejesi sampahaṃsesi. Atha kho rājā pasenadi kosalo thullanandāya bhikkhuniyā dhammiyā kathāya sandassito samādapito samuttejito sampahaṃsito thullanandaṃ bhikkhuniṃ etadavoca – ‘‘vadeyyāsi, ayye, yena attho’’ti . ‘‘Sace me tvaṃ, mahārāja, dātukāmosi, imaṃ khomaṃ dehī’’ti. Atha kho rājā pasenadi kosalo thullanandāya bhikkhuniyā khomaṃ datvā uṭṭhāyāsanā thullanandaṃ bhikkhuniṃ abhivādetvā padakkhiṇaṃ katvā pakkāmi. Manussā ujjhāyanti khiyyanti vipācenti – ‘‘mahicchā imā bhikkhuniyo asantuṭṭhā. Kathañhi nāma rājānaṃ khomaṃ viññāpessantī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā rājānaṃ khomaṃ viññāpessatī’’ti…pe… saccaṃ kira, bhikkhave, thullanandā bhikkhunī rājānaṃ khomaṃ viññāpetīti 2? ‘‘Saccaṃ, bhagavāti’’. Vigarahi buddho bhagavā…pe… kathañhi nāma, bhikkhave, thullanandā bhikkhunī rājānaṃ khomaṃ viññāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
789. ‘‘ලහුපාවුරණං පන භික්‌ඛුනියා චෙතාපෙන්‌තියා අඩ්‌ඪතෙය්‍යකංසපරමං චෙතාපෙතබ්‌බං. තතො චෙ උත්‌තරි චෙතාපෙය්‍ය, නිස්‌සග්‌ගියං පාචිත්‌තිය’’න්‌ති.
789.‘‘Lahupāvuraṇaṃpana bhikkhuniyā cetāpentiyā aḍḍhateyyakaṃsaparamaṃ cetāpetabbaṃ. Tato ce uttari cetāpeyya, nissaggiyaṃ pācittiya’’nti.
790. ලහුපාවුරණං නාම යං කිඤ්‌චි උණ්‌හකාලෙ පාවුරණං.
790.Lahupāvuraṇaṃ nāma yaṃ kiñci uṇhakāle pāvuraṇaṃ.
චෙතාපෙන්‌තියාති විඤ්‌ඤාපෙන්‌තියා.
Cetāpentiyāti viññāpentiyā.
අඩ්‌ඪතෙය්‍යකංසපරමං චෙතාපෙතබ්‌බන්‌ති දසකහාපණග්‌ඝනකං චෙතාපෙතබ්‌බං.
Aḍḍhateyyakaṃsaparamaṃ cetāpetabbanti dasakahāpaṇagghanakaṃ cetāpetabbaṃ.
තතො චෙ උත්‌තරි චෙතාපෙය්‍යාති තතුත්‌තරි විඤ්‌ඤාපෙති, පයොගෙ දුක්‌කටං. පටිලාභෙන නිස්‌සග්‌ගියං හොති. නිස්‌සජ්‌ජිතබ්‌බං සඞ්‌ඝස්‌ස වා ගණස්‌ස වා එකභික්‌ඛුනියා වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බං…පෙ.… ඉදං මෙ, අය්‍යෙ, ලහුපාවුරණං අතිරෙකඅඩ්‌ඪතෙය්‍යකංසපරමං චෙතාපිතං නිස්‌සග්‌ගියං, ඉමාහං සඞ්‌ඝස්‌ස නිස්‌සජ්‌ජාමීති…පෙ.… දදෙය්‍යාති…පෙ.… දදෙය්‍යුන්‌ති…පෙ.… අය්‍යාය දම්‌මීති.
Tato ce uttari cetāpeyyāti tatuttari viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… idaṃ me, ayye, lahupāvuraṇaṃ atirekaaḍḍhateyyakaṃsaparamaṃ cetāpitaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… ayyāya dammīti.
791. අතිරෙකඅඩ්‌ඪතෙය්‍යකංසෙ අතිරෙකසඤ්‌ඤා චෙතාපෙති, නිස්‌සග්‌ගියං පාචිත්‌තියං. අතිරෙකඅඩ්‌ඪතෙය්‍යකංසෙ වෙමතිකා චෙතාපෙති, නිස්‌සග්‌ගියං පාචිත්‌තියං. අතිරෙකඅඩ්‌ඪතෙය්‍යකංසෙ ඌනකසඤ්‌ඤා චෙතාපෙති, නිස්‌සග්‌ගියං පාචිත්‌තියං.
791. Atirekaaḍḍhateyyakaṃse atirekasaññā cetāpeti, nissaggiyaṃ pācittiyaṃ. Atirekaaḍḍhateyyakaṃse vematikā cetāpeti, nissaggiyaṃ pācittiyaṃ. Atirekaaḍḍhateyyakaṃse ūnakasaññā cetāpeti, nissaggiyaṃ pācittiyaṃ.
ඌනකඅඩ්‌ඪතෙය්‍යකංසෙ අතිරෙකසඤ්‌ඤා, ආපත්‌ති දුක්‌කටස්‌ස. ඌනකඅඩ්‌ඪතෙය්‍යකංසෙ වෙමතිකා, ආපත්‌ති දුක්‌කටස්‌ස. ඌනකඅඩ්‌ඪතෙය්‍යකංසෙ ඌනකසඤ්‌ඤා , අනාපත්‌ති.
Ūnakaaḍḍhateyyakaṃse atirekasaññā, āpatti dukkaṭassa. Ūnakaaḍḍhateyyakaṃse vematikā, āpatti dukkaṭassa. Ūnakaaḍḍhateyyakaṃse ūnakasaññā , anāpatti.
792. අනාපත්‌ති අඩ්‌ඪතෙය්‍යකංසපරමං චෙතාපෙති, ඌනකඅඩ්‌ඪතෙය්‍යකංසපරමං චෙතාපෙති, ඤාතකානං, පවාරිතානං, අඤ්‌ඤස්‌සත්‌ථාය, අත්‌තනො ධනෙන, මහග්‌ඝං චෙතාපෙතුකාමස්‌ස අප්‌පග්‌ඝං චෙතාපෙති, උම්‌මත්‌තිකාය, ආදිකම්‌මිකායාති.
792. Anāpatti aḍḍhateyyakaṃsaparamaṃ cetāpeti, ūnakaaḍḍhateyyakaṃsaparamaṃ cetāpeti, ñātakānaṃ, pavāritānaṃ, aññassatthāya, attano dhanena, mahagghaṃ cetāpetukāmassa appagghaṃ cetāpeti, ummattikāya, ādikammikāyāti.
ද්‌වාදසමසික්‌ඛාපදං නිට්‌ඨිතං.
Dvādasamasikkhāpadaṃ niṭṭhitaṃ.
උද්‌දිට්‌ඨා ඛො, අය්‍යායො, තිංස නිස්‌සග්‌ගියා පාචිත්‌තියා ධම්‌මා. තත්‌ථාය්‍යායො පුච්‌ඡාමි – ‘‘කච්‌චිත්‌ථ පරිසුද්‌ධා’’? දුතියම්‌පි පුච්‌ඡාමි – ‘‘කච්‌චිත්‌ථ පරිසුද්‌ධා’’? තතියම්‌පි පුච්‌ඡාමි – ‘‘කච්‌චිත්‌ථ පරිසුද්‌ධා’’? පරිසුද්‌ධෙත්‌ථාය්‍යායො, තස්‌මා තුණ්‌හී, එවමෙතං ධාරයාමීති.
Uddiṭṭhā kho, ayyāyo, tiṃsa nissaggiyā pācittiyā dhammā. Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
භික්‌ඛුනිවිභඞ්‌ගෙ නිස්‌සග්‌ගියකණ්‌ඩං නිට්‌ඨිතං.
Bhikkhunivibhaṅge nissaggiyakaṇḍaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / ද්‌වාදසමනිස්‌සග්‌ගියපාචිත්‌තියසික්‌ඛාපදවණ්‌ණනා • Dvādasamanissaggiyapācittiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. නිස්‌සග්‌ගියකණ්‌ඩං (භික්‌ඛුනීවිභඞ්‌ගවණ්‌ණනා) • 3. Nissaggiyakaṇḍaṃ (bhikkhunīvibhaṅgavaṇṇanā)
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 2. දුතියනිස්‌සග්‌ගියාදිපාචිත්‌තියසික්‌ඛාපදවණ්‌ණනා • 2. Dutiyanissaggiyādipācittiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 12. ද්‌වාදසමනිස්‌සග්‌ගියපාචිත්‌තියසික්‌ඛාපදං • 12. Dvādasamanissaggiyapācittiyasikkhāpadaṃ
