| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༡༢. དྭཱདསམསིཀྑཱཔདཾ
12. Dvādasamasikkhāpadaṃ
༡༢༡༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན བྷིཀྑུནིཡོ ཨནོཀཱསཀཏཾ བྷིཀྑུཾ པཉྷཾ པུཙྪནྟི། བྷིཀྑཱུ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནིཡོ ཨནོཀཱསཀཏཾ བྷིཀྑུཾ པཉྷཾ པུཙྪིསྶནྟཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནིཡོ ཨནོཀཱསཀཏཾ བྷིཀྑུཾ པཉྷཾ པུཙྪནྟཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནིཡོ ཨནོཀཱསཀཏཾ བྷིཀྑུཾ པཉྷཾ པུཙྪིསྶནྟི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
1219. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo anokāsakataṃ bhikkhuṃ pañhaṃ pucchanti. Bhikkhū ujjhāyanti khiyyanti vipācenti – ‘‘kathañhi nāma bhikkhuniyo anokāsakataṃ bhikkhuṃ pañhaṃ pucchissantī’’ti…pe… saccaṃ kira, bhikkhave, bhikkhuniyo anokāsakataṃ bhikkhuṃ pañhaṃ pucchantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo anokāsakataṃ bhikkhuṃ pañhaṃ pucchissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༡༢༢༠. ‘‘ཡཱ པན བྷིཀྑུནཱི ཨནོཀཱསཀཏཾ བྷིཀྑུཾ པཉྷཾ པུཙྪེཡྻ, པཱཙིཏྟིཡ’’ནྟི།
1220.‘‘Yā pana bhikkhunī anokāsakataṃ bhikkhuṃ pañhaṃ puccheyya, pācittiya’’nti.
༡༢༢༡. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
1221.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཨནོཀཱསཀཏནྟི ཨནཱཔུཙྪཱ། བྷིཀྑུནྟི ཨུཔསམྤནྣཾ། པཉྷཾ པུཙྪེཡྻཱཏི སུཏྟནྟེ ཨོཀཱསཾ ཀཱརཱཔེཏྭཱ ཝིནཡཾ ཝཱ ཨབྷིདྷམྨཾ ཝཱ པུཙྪཏི, ཨཱཔཏྟི པཱཙིཏྟིཡསྶ། ཝིནཡེ ཨོཀཱསཾ ཀཱརཱཔེཏྭཱ སུཏྟནྟཾ ཝཱ ཨབྷིདྷམྨཾ ཝཱ པུཙྪཏི, ཨཱཔཏྟི པཱཙིཏྟིཡསྶ། ཨབྷིདྷམྨེ ཨོཀཱསཾ ཀཱརཱཔེཏྭཱ སུཏྟནྟཾ ཝཱ ཝིནཡཾ ཝཱ པུཙྪཏི, ཨཱཔཏྟི པཱཙིཏྟིཡསྶ།
Anokāsakatanti anāpucchā. Bhikkhunti upasampannaṃ. Pañhaṃ puccheyyāti suttante okāsaṃ kārāpetvā vinayaṃ vā abhidhammaṃ vā pucchati, āpatti pācittiyassa. Vinaye okāsaṃ kārāpetvā suttantaṃ vā abhidhammaṃ vā pucchati, āpatti pācittiyassa. Abhidhamme okāsaṃ kārāpetvā suttantaṃ vā vinayaṃ vā pucchati, āpatti pācittiyassa.
༡༢༢༢. ཨནཱཔུཙྪིཏེ ཨནཱཔུཙྪིཏསཉྙཱ པཉྷཾ པུཙྪཏི, ཨཱཔཏྟི པཱཙིཏྟིཡསྶ། ཨནཱཔུཙྪིཏེ ཝེམཏིཀཱ པཉྷཾ པུཙྪཏི, ཨཱཔཏྟི པཱཙིཏྟིཡསྶ། ཨནཱཔུཙྪིཏེ ཨཱཔུཙྪིཏསཉྙཱ པཉྷཾ པུཙྪཏི, ཨཱཔཏྟི པཱཙིཏྟིཡསྶ།
1222. Anāpucchite anāpucchitasaññā pañhaṃ pucchati, āpatti pācittiyassa. Anāpucchite vematikā pañhaṃ pucchati, āpatti pācittiyassa. Anāpucchite āpucchitasaññā pañhaṃ pucchati, āpatti pācittiyassa.
ཨཱཔུཙྪིཏེ ཨནཱཔུཙྪིཏསཉྙཱ, ཨཱཔཏྟི དུཀྐཊསྶ། ཨཱཔུཙྪིཏེ ཝེམཏིཀཱ, ཨཱཔཏྟི དུཀྐཊསྶ། ཨཱཔུཙྪིཏེ ཨཱཔུཙྪིཏསཉྙཱ, ཨནཱཔཏྟི།
Āpucchite anāpucchitasaññā, āpatti dukkaṭassa. Āpucchite vematikā, āpatti dukkaṭassa. Āpucchite āpucchitasaññā, anāpatti.
༡༢༢༣. ཨནཱཔཏྟི ཨོཀཱསཾ ཀཱརཱཔེཏྭཱ པུཙྪཏི, ཨནོདིསྶ ཨོཀཱསཾ ཀཱརཱཔེཏྭཱ ཡཏྠ ཀཏྠཙི པུཙྪཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
1223. Anāpatti okāsaṃ kārāpetvā pucchati, anodissa okāsaṃ kārāpetvā yattha katthaci pucchati, ummattikāya, ādikammikāyāti.
དྭཱདསམསིཀྑཱཔདཾ ནིཊྛིཏཾ།
Dvādasamasikkhāpadaṃ niṭṭhitaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༡༢. དྭཱདསམསིཀྑཱཔདཝཎྞནཱ • 12. Dvādasamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡༡. ཨེཀཱདསམཱདིསིཀྑཱཔདཝཎྞནཱ • 11. Ekādasamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༢. དྭཱདསམསིཀྑཱཔདཾ • 12. Dvādasamasikkhāpadaṃ
