Library / Tipiṭaka / তিপিটক • Tipiṭaka / খুদ্দকপাঠ-অট্ঠকথা • Khuddakapāṭha-aṭṭhakathā

    ৩. দ্ৰত্তিংসাকারৰণ্ণনা

    3. Dvattiṃsākāravaṇṇanā

    পদসম্বন্ধৰণ্ণনা

    Padasambandhavaṇṇanā

    ইদানি যদিদং এৰং দসহি সিক্খাপদেহি পরিসুদ্ধপযোগস্স সীলে পতিট্ঠিতস্স কুলপুত্তস্স আসযপরিসুদ্ধত্থং চিত্তভাৰনত্থঞ্চ অঞ্ঞত্র বুদ্ধুপ্পাদা অপ্পৰত্তপুব্বং সব্বতিত্থিযানং অৰিসযভূতং তেসু তেসু সুত্তন্তেসু –

    Idāni yadidaṃ evaṃ dasahi sikkhāpadehi parisuddhapayogassa sīle patiṭṭhitassa kulaputtassa āsayaparisuddhatthaṃ cittabhāvanatthañca aññatra buddhuppādā appavattapubbaṃ sabbatitthiyānaṃ avisayabhūtaṃ tesu tesu suttantesu –

    ‘‘একধম্মো, ভিক্খৰে, ভাৰিতো বহুলীকতো মহতো সংৰেগায সংৰত্ততি। মহতো অত্থায সংৰত্ততি। মহতো যোগক্খেমায সংৰত্ততি। মহতো সতিসম্পজঞ্ঞায সংৰত্ততি। ঞাণদস্সনপ্পটিলাভায সংৰত্ততি। দিট্ঠধম্মসুখৰিহারায সংৰত্ততি। ৰিজ্জাৰিমুত্তিফলসচ্ছিকিরিযায সংৰত্ততি। কতমো একধম্মো? কাযগতা সতি। অমতং তে, ভিক্খৰে, ন পরিভুঞ্জন্তি, যে কাযগতাসতিং ন পরিভুঞ্জন্তি। অমতং তে, ভিক্খৰে, পরিভুঞ্জন্তি, যে কাযগতাসতিং পরিভুঞ্জন্তি। অমতং তেসং, ভিক্খৰে, অপরিভুত্তং পরিভুত্তং, পরিহীনং অপরিহীনং, ৰিরদ্ধং আরদ্ধং, যেসং কাযগতা সতি আরদ্ধা’’তি। (অ॰ নি॰ ১.৫৬৪-৫৭০) –

    ‘‘Ekadhammo, bhikkhave, bhāvito bahulīkato mahato saṃvegāya saṃvattati. Mahato atthāya saṃvattati. Mahato yogakkhemāya saṃvattati. Mahato satisampajaññāya saṃvattati. Ñāṇadassanappaṭilābhāya saṃvattati. Diṭṭhadhammasukhavihārāya saṃvattati. Vijjāvimuttiphalasacchikiriyāya saṃvattati. Katamo ekadhammo? Kāyagatā sati. Amataṃ te, bhikkhave, na paribhuñjanti, ye kāyagatāsatiṃ na paribhuñjanti. Amataṃ te, bhikkhave, paribhuñjanti, ye kāyagatāsatiṃ paribhuñjanti. Amataṃ tesaṃ, bhikkhave, aparibhuttaṃ paribhuttaṃ, parihīnaṃ aparihīnaṃ, viraddhaṃ āraddhaṃ, yesaṃ kāyagatā sati āraddhā’’ti. (A. ni. 1.564-570) –

    এৰং ভগৰতা অনেকাকারেন পসংসিত্ৰা –

    Evaṃ bhagavatā anekākārena pasaṃsitvā –

    ‘‘কথং ভাৰিতা, ভিক্খৰে, কাযগতাসতি কথং বহুলীকতা মহব্বলা হোতি মহানিসংসা? ইধ, ভিক্খৰে, ভিক্খু অরঞ্ঞগতো ৰা’’তি (ম॰ নি॰ ৩.১৫৪) –

    ‘‘Kathaṃ bhāvitā, bhikkhave, kāyagatāsati kathaṃ bahulīkatā mahabbalā hoti mahānisaṃsā? Idha, bhikkhave, bhikkhu araññagato vā’’ti (ma. ni. 3.154) –

    আদিনা নযেন আনাপানপব্বং ইরিযাপথপব্বং চতুসম্পজঞ্ঞপব্বং পটিকূলমনসিকারপব্বং ধাতুমনসিকারপব্বং নৰ সিৰথিকপব্বানীতি ইমেসং চুদ্দসন্নং পব্বানং ৰসেন কাযগতাসতিকম্মট্ঠানং নিদ্দিট্ঠং। তস্স ভাৰনানিদ্দেসো অনুপ্পত্তো। তত্থ যস্মা ইরিযাপথপব্বং চতুসম্পজঞ্ঞপব্বং ধাতুমনসিকারপব্বন্তি ইমানি তীণি ৰিপস্সনাৰসেন ৰুত্তানি। নৰ সিৰথিকপব্বানি ৰিপস্সনাঞাণেসুযেৰ আদীনৰানুপস্সনাৰসেন ৰুত্তানি। যাপি চেত্থ উদ্ধুমাতকাদীসু সমাধিভাৰনা ইচ্ছেয্য, সা ৰিসুদ্ধিমগ্গে ৰিত্থারতো অসুভভাৰনানিদ্দেসে পকাসিতা এৰ। আনাপানপব্বং পন পটিকূলমনসিকারপব্বঞ্চেতি ইমানেত্থ দ্ৰে সমাধিৰসেন ৰুত্তানি। তেসু আনাপানপব্বং আনাপানস্সতিৰসেন ৰিসুং কম্মট্ঠানংযেৰ। যং পনেতং –

    Ādinā nayena ānāpānapabbaṃ iriyāpathapabbaṃ catusampajaññapabbaṃ paṭikūlamanasikārapabbaṃ dhātumanasikārapabbaṃ nava sivathikapabbānīti imesaṃ cuddasannaṃ pabbānaṃ vasena kāyagatāsatikammaṭṭhānaṃ niddiṭṭhaṃ. Tassa bhāvanāniddeso anuppatto. Tattha yasmā iriyāpathapabbaṃ catusampajaññapabbaṃ dhātumanasikārapabbanti imāni tīṇi vipassanāvasena vuttāni. Nava sivathikapabbāni vipassanāñāṇesuyeva ādīnavānupassanāvasena vuttāni. Yāpi cettha uddhumātakādīsu samādhibhāvanā iccheyya, sā visuddhimagge vitthārato asubhabhāvanāniddese pakāsitā eva. Ānāpānapabbaṃ pana paṭikūlamanasikārapabbañceti imānettha dve samādhivasena vuttāni. Tesu ānāpānapabbaṃ ānāpānassativasena visuṃ kammaṭṭhānaṃyeva. Yaṃ panetaṃ –

    ‘‘পুন চপরং, ভিক্খৰে, ভিক্খু ইমমেৰ কাযং উদ্ধং পাদতলা অধো কেসমত্থকা তচপরিযন্তং পূরং নানপ্পকারস্স অসুচিনো পচ্চৰেক্খতি ‘অত্থি ইমস্মিং কাযে কেসা, লোমা…পে॰… মুত্ত’’ন্তি (ম॰ নি॰ ৩.১৫৪)।

    ‘‘Puna caparaṃ, bhikkhave, bhikkhu imameva kāyaṃ uddhaṃ pādatalā adho kesamatthakā tacapariyantaṃ pūraṃ nānappakārassa asucino paccavekkhati ‘atthi imasmiṃ kāye kesā, lomā…pe… mutta’’nti (ma. ni. 3.154).

    এৰং তত্থ তত্থ মত্থলুঙ্গং অট্ঠিমিঞ্জেন সঙ্গহেত্ৰা দেসিতং কাযগতাসতিকোট্ঠাসভাৰনাপরিযাযং দ্ৰত্তিংসাকারকম্মট্ঠানং আরদ্ধং, তস্সাযং অত্থৰণ্ণনা –

    Evaṃ tattha tattha matthaluṅgaṃ aṭṭhimiñjena saṅgahetvā desitaṃ kāyagatāsatikoṭṭhāsabhāvanāpariyāyaṃ dvattiṃsākārakammaṭṭhānaṃ āraddhaṃ, tassāyaṃ atthavaṇṇanā –

    তত্থ অত্থীতি সংৰিজ্জন্তি। ইমস্মিন্তি য্ৰাযং উদ্ধং পাদতলা অধো কেসমত্থকা তচপরিযন্তো পূরো নানপ্পকারস্স অসুচিনোতি ৰুচ্চতি, তস্মিং । কাযেতি সরীরে। সরীরঞ্হি অসুচিসঞ্চযতো, কুচ্ছিতানং ৰা কেসাদীনঞ্চেৰ চক্খুরোগাদীনঞ্চ রোগসতানং আযভূততো কাযোতি ৰুচ্চতি। কেসা…পে॰… মুত্তন্তি এতে কেসাদযো দ্ৰত্তিংসাকারা, তত্থ ‘‘অত্থি ইমস্মিং কাযে কেসা অত্থি লোমা’’তি এৰং সম্বন্ধো ৰেদিতব্বো । তেন কিং কথিতং হোতি? ইমস্মিং পাদতলা পট্ঠায উপরি, কেসমত্থকা পট্ঠায হেট্ঠা, তচতো পট্ঠায পরিতোতি এত্তকে ব্যামমত্তে কল়েৰরে সব্বাকারেনাপি ৰিচিনন্তো ন কোচি কিঞ্চি মুত্তং ৰা মণিং ৰা ৰেল়ুরিযং ৰা অগরুং ৰা চন্দনং ৰা কুঙ্কুমং ৰা কপ্পূরং ৰা ৰাসচুণ্ণাদিং ৰা অণুমত্তম্পি সুচিভাৰং পস্সতি, অথ খো পরমদুগ্গন্ধজেগুচ্ছং অস্সিরিকদস্সনং নানপ্পকারং কেসলোমাদিভেদং অসুচিমেৰ পস্সতীতি।

    Tattha atthīti saṃvijjanti. Imasminti yvāyaṃ uddhaṃ pādatalā adho kesamatthakā tacapariyanto pūro nānappakārassa asucinoti vuccati, tasmiṃ . Kāyeti sarīre. Sarīrañhi asucisañcayato, kucchitānaṃ vā kesādīnañceva cakkhurogādīnañca rogasatānaṃ āyabhūtato kāyoti vuccati. Kesā…pe… muttanti ete kesādayo dvattiṃsākārā, tattha ‘‘atthi imasmiṃ kāye kesā atthi lomā’’ti evaṃ sambandho veditabbo . Tena kiṃ kathitaṃ hoti? Imasmiṃ pādatalā paṭṭhāya upari, kesamatthakā paṭṭhāya heṭṭhā, tacato paṭṭhāya paritoti ettake byāmamatte kaḷevare sabbākārenāpi vicinanto na koci kiñci muttaṃ vā maṇiṃ vā veḷuriyaṃ vā agaruṃ vā candanaṃ vā kuṅkumaṃ vā kappūraṃ vā vāsacuṇṇādiṃ vā aṇumattampi sucibhāvaṃ passati, atha kho paramaduggandhajegucchaṃ assirikadassanaṃ nānappakāraṃ kesalomādibhedaṃ asucimeva passatīti.

    অযং তাৰেত্থ পদসম্বন্ধতো ৰণ্ণনা।

    Ayaṃ tāvettha padasambandhato vaṇṇanā.

    অসুভভাৰনা

    Asubhabhāvanā

    অসুভভাৰনাৰসেন পনস্স এৰং ৰণ্ণনা ৰেদিতব্বা – এৰমেতস্মিং পাণাতিপাতাৰেরমণিসিক্খাপদাদিভেদে সীলে পতিট্ঠিতেন পযোগসুদ্ধেন আদিকম্মিকেন কুলপুত্তেন আসযসুদ্ধিযা অধিগমনত্থং দ্ৰত্তিংসাকারকম্মট্ঠানভাৰনানুযোগমনুযুঞ্জিতুকামেন পঠমং তাৰস্স আৰাসকুললাভগণকম্মদ্ধানঞাতিগন্থরোগইদ্ধিপলিবোধেন কিত্তিপলিবোধেন ৰা সহ দস পলিবোধা হোন্তি। অথানেন আৰাসকুললাভগণঞাতিকিত্তীসু সঙ্গপ্পহানেন, কম্মদ্ধানগন্থেসু অব্যাপারেন, রোগস্স তিকিচ্ছাযাতি এৰং তে দস পলিবোধা উপচ্ছিন্দিতব্বা, অথানেন উপচ্ছিন্নপলিবোধেন অনুপচ্ছিন্ননেক্খম্মাভিলাসেন কোটিপ্পত্তসল্লেখৰুত্তিতং পরিগ্গহেত্ৰা খুদ্দানুখুদ্দকম্পি ৰিনযাচারং অপ্পজহন্তেন আগমাধিগমসমন্নাগতো ততো অঞ্ঞতরঙ্গসমন্নাগতো ৰা কম্মট্ঠানদাযকো আচরিযো ৰিনযানুরূপেন ৰিধিনা উপগন্তব্বো, ৰত্তসম্পদায চ আরাধিতচিত্তস্স তস্স অত্তনো অধিপ্পাযো নিৰেদেতব্বো। তেন তস্স নিমিত্তজ্ঝাসযচরিযাধিমুত্তিভেদং ঞত্ৰা যদি এতং কম্মট্ঠানমনুরূপং, অথ যস্মিং ৰিহারে অত্তনা ৰসতি, যদি তস্মিংযেৰ সোপি ৰসিতুকামো হোতি, ততো সঙ্খেপতো কম্মট্ঠানং দাতব্বং। অথ অঞ্ঞত্র ৰসিতুকামো হোতি, ততো পহাতব্বপরিগ্গহেতব্বাদিকথনৰসেন সপুরেক্খারং রাগচরিতানুকুলাদিকথনৰসেন সপ্পভেদং ৰিত্থারেন কথেতব্বং। তেন তং সপুরেক্খারং সপ্পভেদং কম্মট্ঠানং উগ্গহেত্ৰা আচরিযং আপুচ্ছিত্ৰা যানি তানি –

    Asubhabhāvanāvasena panassa evaṃ vaṇṇanā veditabbā – evametasmiṃ pāṇātipātāveramaṇisikkhāpadādibhede sīle patiṭṭhitena payogasuddhena ādikammikena kulaputtena āsayasuddhiyā adhigamanatthaṃ dvattiṃsākārakammaṭṭhānabhāvanānuyogamanuyuñjitukāmena paṭhamaṃ tāvassa āvāsakulalābhagaṇakammaddhānañātigantharogaiddhipalibodhena kittipalibodhena vā saha dasa palibodhā honti. Athānena āvāsakulalābhagaṇañātikittīsu saṅgappahānena, kammaddhānaganthesu abyāpārena, rogassa tikicchāyāti evaṃ te dasa palibodhā upacchinditabbā, athānena upacchinnapalibodhena anupacchinnanekkhammābhilāsena koṭippattasallekhavuttitaṃ pariggahetvā khuddānukhuddakampi vinayācāraṃ appajahantena āgamādhigamasamannāgato tato aññataraṅgasamannāgato vā kammaṭṭhānadāyako ācariyo vinayānurūpena vidhinā upagantabbo, vattasampadāya ca ārādhitacittassa tassa attano adhippāyo nivedetabbo. Tena tassa nimittajjhāsayacariyādhimuttibhedaṃ ñatvā yadi etaṃ kammaṭṭhānamanurūpaṃ, atha yasmiṃ vihāre attanā vasati, yadi tasmiṃyeva sopi vasitukāmo hoti, tato saṅkhepato kammaṭṭhānaṃ dātabbaṃ. Atha aññatra vasitukāmo hoti, tato pahātabbapariggahetabbādikathanavasena sapurekkhāraṃ rāgacaritānukulādikathanavasena sappabhedaṃ vitthārena kathetabbaṃ. Tena taṃ sapurekkhāraṃ sappabhedaṃ kammaṭṭhānaṃ uggahetvā ācariyaṃ āpucchitvā yāni tāni –

    ‘‘মহাৰাসং নৰাৰাসং, জরাৰাসঞ্চ পন্থনিং।

    ‘‘Mahāvāsaṃ navāvāsaṃ, jarāvāsañca panthaniṃ;

    সোণ্ডিং পণ্ণঞ্চ পুপ্ফঞ্চ, ফলং পত্থিতমেৰ চ॥

    Soṇḍiṃ paṇṇañca pupphañca, phalaṃ patthitameva ca.

    ‘‘নগরং দারুনা খেত্তং, ৰিসভাগেন পট্টনং।

    ‘‘Nagaraṃ dārunā khettaṃ, visabhāgena paṭṭanaṃ;

    পচ্চন্তসীমাসপ্পাযং, যত্থ মিত্তো ন লব্ভতি॥

    Paccantasīmāsappāyaṃ, yattha mitto na labbhati.

    ‘‘অট্ঠারসেতানি ঠানানি, ইতি ৰিঞ্ঞায পণ্ডিতো।

    ‘‘Aṭṭhārasetāni ṭhānāni, iti viññāya paṇḍito;

    আরকা পরিৰজ্জেয্য, মগ্গং সপ্পটিভযং যথা’’তি॥ (ৰিসুদ্ধি॰ ১.৫২) –

    Ārakā parivajjeyya, maggaṃ sappaṭibhayaṃ yathā’’ti. (visuddhi. 1.52) –

    এৰং অট্ঠারস সেনাসনানি পরিৰজ্জেতব্বানীতি ৰুচ্চন্তি। তানি ৰজ্জেত্ৰা, যং তং –

    Evaṃ aṭṭhārasa senāsanāni parivajjetabbānīti vuccanti. Tāni vajjetvā, yaṃ taṃ –

    ‘‘কথঞ্চ, ভিক্খৰে, সেনাসনং পঞ্চঙ্গসমন্নাগতং হোতি? ইধ, ভিক্খৰে, সেনাসনং নাতিদূরং হোতি, নচ্চাসন্নং, গমনাগমনসম্পন্নং, দিৰা অপ্পাকিণ্ণং, রত্তিং অপ্পসদ্দং অপ্পনিগ্ঘোসং অপ্পডংসমকসৰাতাতপসরীসপসম্ফস্সং। তস্মিং খো পন সেনাসনে ৰিহরন্তস্স অপ্পকসিরেন উপ্পজ্জন্তি চীৰরপিণ্ডপাতসেনাসনগিলানপচ্চযভেসজ্জপরিক্খারা। তস্মিং খো পন সেনাসনে থেরা ভিক্খূ ৰিহরন্তি বহুস্সুতা আগতাগমা ধম্মধরা ৰিনযধরা মাতিকাধরা, তে কালেন কালং উপসঙ্কমিত্ৰা পরিপুচ্ছতি পরিপঞ্হতি ‘ইদং, ভন্তে, কথং, ইমস্স কো অত্থো’তি? তস্স, তে আযস্মন্তো অৰিৰটঞ্চেৰ ৰিৰরন্তি, অনুত্তানীকতঞ্চ উত্তানিং করোন্তি, অনেকৰিহিতেসু চ কঙ্খাঠানিযেসু ধম্মেসু কঙ্খং পটিৰিনোদেন্তি। এৰং খো, ভিক্খৰে, সেনাসনং পঞ্চঙ্গসমন্নাগতং হোতী’’তি (অ॰ নি॰ ১০.১১)। –

    ‘‘Kathañca, bhikkhave, senāsanaṃ pañcaṅgasamannāgataṃ hoti? Idha, bhikkhave, senāsanaṃ nātidūraṃ hoti, naccāsannaṃ, gamanāgamanasampannaṃ, divā appākiṇṇaṃ, rattiṃ appasaddaṃ appanigghosaṃ appaḍaṃsamakasavātātapasarīsapasamphassaṃ. Tasmiṃ kho pana senāsane viharantassa appakasirena uppajjanti cīvarapiṇḍapātasenāsanagilānapaccayabhesajjaparikkhārā. Tasmiṃ kho pana senāsane therā bhikkhū viharanti bahussutā āgatāgamā dhammadharā vinayadharā mātikādharā, te kālena kālaṃ upasaṅkamitvā paripucchati paripañhati ‘idaṃ, bhante, kathaṃ, imassa ko attho’ti? Tassa, te āyasmanto avivaṭañceva vivaranti, anuttānīkatañca uttāniṃ karonti, anekavihitesu ca kaṅkhāṭhāniyesu dhammesu kaṅkhaṃ paṭivinodenti. Evaṃ kho, bhikkhave, senāsanaṃ pañcaṅgasamannāgataṃ hotī’’ti (a. ni. 10.11). –

    এৰং পঞ্চঙ্গসমন্নাগতং সেনাসনং ৰুত্তং। তথারূপং সেনাসনং উপগম্ম কতসব্বকিচ্চেন কামেসু আদীনৰং, নেক্খম্মে চ আনিসংসং পচ্চৰেক্খিত্ৰা বুদ্ধসুবুদ্ধতায ধম্মসুধম্মতায সঙ্ঘসুপ্পটিপন্নতায চ অনুস্সরণেন চিত্তং পসাদেত্ৰা যং তং –

    Evaṃ pañcaṅgasamannāgataṃ senāsanaṃ vuttaṃ. Tathārūpaṃ senāsanaṃ upagamma katasabbakiccena kāmesu ādīnavaṃ, nekkhamme ca ānisaṃsaṃ paccavekkhitvā buddhasubuddhatāya dhammasudhammatāya saṅghasuppaṭipannatāya ca anussaraṇena cittaṃ pasādetvā yaṃ taṃ –

    ‘‘ৰচসা মনসা চেৰ, ৰণ্ণসণ্ঠানতো দিসা।

    ‘‘Vacasā manasā ceva, vaṇṇasaṇṭhānato disā;

    ওকাসতো পরিচ্ছেদা, সত্তধুগ্গহণং ৰিদূ’’তি॥ –

    Okāsato paricchedā, sattadhuggahaṇaṃ vidū’’ti. –

    এৰং সত্তৰিধং উগ্গহকোসল্লং; অনুপুব্বতো, নাতিসীঘতো, নাতিসণিকতো, ৰিক্খেপপ্পটিবাহনতো, পণ্ণত্তিসমতিক্কমতো, অনুপুব্বমুঞ্চনতো, অপ্পনাতো, তযো চ সুত্তন্তাতি এৰং দসৰিধং মনসিকারকোসল্লঞ্চ ৰুত্তং। তং অপরিচ্চজন্তেন দ্ৰত্তিংসাকারভাৰনা আরভিতব্বা। এৰঞ্হি আরভতো সব্বাকারেন দ্ৰত্তিংসাকারভাৰনা সম্পজ্জতি নো অঞ্ঞথা।

    Evaṃ sattavidhaṃ uggahakosallaṃ; anupubbato, nātisīghato, nātisaṇikato, vikkhepappaṭibāhanato, paṇṇattisamatikkamato, anupubbamuñcanato, appanāto, tayo ca suttantāti evaṃ dasavidhaṃ manasikārakosallañca vuttaṃ. Taṃ apariccajantena dvattiṃsākārabhāvanā ārabhitabbā. Evañhi ārabhato sabbākārena dvattiṃsākārabhāvanā sampajjati no aññathā.

    তত্থ আদিতোৰ তচপঞ্চকং তাৰ গহেত্ৰা অপি তেপিটকেন ‘‘কেসা লোমা’’তিআদিনা নযেন অনুলোমতো, তস্মিং পগুণীভূতে ‘‘তচো দন্তা’’তি এৰমাদিনা নযেন পটিলোমতো, তস্মিম্পি পগুণীভূতে তদুভযনযেনেৰ অনুলোমপ্পটিলোমতো বহি ৰিসটৰিতক্কৰিচ্ছেদনত্থং পাল়িপগুণীভাৰত্থঞ্চ ৰচসা কোট্ঠাসসভাৰপরিগ্গহত্থং মনসা চ অদ্ধমাসং ভাৰেতব্বং। ৰচসা হিস্স ভাৰনা বহি ৰিসটৰিতক্কে ৰিচ্ছিন্দিত্ৰা মনসা ভাৰনায পাল়িপগুণতায চ পচ্চযো হোতি, মনসা ভাৰনা অসুভৰণ্ণলক্খণানং অঞ্ঞতরৰসেন পরিগ্গহস্স, অথ তেনেৰ নযেন ৰক্কপঞ্চকং অদ্ধমাসং, ততো তদুভযমদ্ধমাসং, ততো পপ্ফাসপঞ্চকমদ্ধমাসং, ততো তং পঞ্চকত্তযম্পি অদ্ধমাসং, অথ অন্তে অৰুত্তম্পি মত্থলুঙ্গং পথৰীধাতুআকারেহি সদ্ধিং একতো ভাৰনত্থং ইধ পক্খিপিত্ৰা মত্থলুঙ্গপঞ্চকং অদ্ধমাসং, ততো পঞ্চকচতুক্কম্পি অদ্ধমাসং, অথ মেদছক্কমদ্ধমাসং, ততো মেদছক্কেন সহ পঞ্চকচতুক্কম্পি অদ্ধমাসং, অথ মুত্তছক্কমদ্ধমাসং, ততো সব্বমেৰ দ্ৰত্তিংসাকারমদ্ধমাসন্তি এৰং ছ মাসে ৰণ্ণসণ্ঠানদিসোকাসপরিচ্ছেদতো ৰৰত্থপেন্তেন ভাৰেতব্বং। এতং মজ্ঝিমপঞ্ঞং পুগ্গলং সন্ধায ৰুত্তং। মন্দপঞ্ঞেন তু যাৰজীৰং ভাৰেতব্বং তিক্খপঞ্ঞস্স ন চিরেনেৰ ভাৰনা সম্পজ্জতীতি।

    Tattha āditova tacapañcakaṃ tāva gahetvā api tepiṭakena ‘‘kesā lomā’’tiādinā nayena anulomato, tasmiṃ paguṇībhūte ‘‘taco dantā’’ti evamādinā nayena paṭilomato, tasmimpi paguṇībhūte tadubhayanayeneva anulomappaṭilomato bahi visaṭavitakkavicchedanatthaṃ pāḷipaguṇībhāvatthañca vacasā koṭṭhāsasabhāvapariggahatthaṃ manasā ca addhamāsaṃ bhāvetabbaṃ. Vacasā hissa bhāvanā bahi visaṭavitakke vicchinditvā manasā bhāvanāya pāḷipaguṇatāya ca paccayo hoti, manasā bhāvanā asubhavaṇṇalakkhaṇānaṃ aññataravasena pariggahassa, atha teneva nayena vakkapañcakaṃ addhamāsaṃ, tato tadubhayamaddhamāsaṃ, tato papphāsapañcakamaddhamāsaṃ, tato taṃ pañcakattayampi addhamāsaṃ, atha ante avuttampi matthaluṅgaṃ pathavīdhātuākārehi saddhiṃ ekato bhāvanatthaṃ idha pakkhipitvā matthaluṅgapañcakaṃ addhamāsaṃ, tato pañcakacatukkampi addhamāsaṃ, atha medachakkamaddhamāsaṃ, tato medachakkena saha pañcakacatukkampi addhamāsaṃ, atha muttachakkamaddhamāsaṃ, tato sabbameva dvattiṃsākāramaddhamāsanti evaṃ cha māse vaṇṇasaṇṭhānadisokāsaparicchedato vavatthapentena bhāvetabbaṃ. Etaṃ majjhimapaññaṃ puggalaṃ sandhāya vuttaṃ. Mandapaññena tu yāvajīvaṃ bhāvetabbaṃ tikkhapaññassa na cireneva bhāvanā sampajjatīti.

    এত্থাহ – ‘‘কথং পনাযমিমং দ্ৰত্তিংসাকারং ৰণ্ণাদিতো ৰৰত্থপেতী’’তি? অযঞ্হি ‘‘অত্থি ইমস্মিং কাযে কেসা’’তি এৰমাদিনা নযেন তচপঞ্চকাদিৰিভাগতো দ্ৰত্তিংসাকারং ভাৰেন্তো কেসা তাৰ ৰণ্ণতো কাল়কাতি ৰৰত্থপেতি, যাদিসকা ৰানেন দিট্ঠা হোন্তি। সণ্ঠানতো দীঘৰট্টলিকা তুলাদণ্ডমিৰাতি ৰৰত্থপেতি। দিসতো পন যস্মা ইমস্মিং কাযে নাভিতো উদ্ধং উপরিমা দিসা অধো হেট্ঠিমাতি ৰুচ্চতি, তস্মা ইমস্স কাযস্স উপরিমায দিসায জাতাতি ৰৰত্থপেতি। ওকাসতো নলাটন্তকণ্ণচূল়িকগলৰাটকপরিচ্ছিন্নে সীসচম্মে জাতাতি। তত্থ যথা ৰম্মিকমত্থকে জাতানি কুণ্ঠতিণানি ন জানন্তি ‘‘মযং ৰম্মিকমত্থকে জাতানী’’তি; নপি ৰম্মিকমত্থকো জানাতি ‘‘মযি কুণ্ঠতিণানি জাতানী’’তি; এৰমেৰ ন কেসা জানন্তি ‘‘মযং সীসচম্মে জাতা’’তি, নপি সীসচম্মং জানাতি ‘‘মযি কেসা জাতা’’তি। আভোগপচ্চৰেক্খণৰিরহিতা হি এতে ধম্মা অচেতনা অব্যাকতা সুঞ্ঞা পরমদুগ্গন্ধজেগুচ্ছপ্পটিকূলা, ন সত্তো ন পুগ্গলোতি ৰৰত্থপেতি। পরিচ্ছেদতোতি দুৰিধো পরিচ্ছেদো সভাগৰিসভাগৰসেন। তত্থ কেসা হেট্ঠা পতিট্ঠিতচম্মতলেন তত্থ ৰীহগ্গমত্তং পৰিসিত্ৰা পতিট্ঠিতেন অত্তনো মূলতলেন চ উপরি আকাসেন তিরিযং অঞ্ঞমঞ্ঞেন পরিচ্ছিন্নাতি এৰং সভাগপরিচ্ছেদতো, কেসা ন অৰসেসএকতিংসাকারা। অৰসেসা একতিংসা ন কেসাতি এৰং ৰিসভাগপরিচ্ছেদতো চ ৰৰত্থপেতি। এৰং তাৰ কেসে ৰণ্ণাদিতো ৰৰত্থপেতি।

    Etthāha – ‘‘kathaṃ panāyamimaṃ dvattiṃsākāraṃ vaṇṇādito vavatthapetī’’ti? Ayañhi ‘‘atthi imasmiṃ kāye kesā’’ti evamādinā nayena tacapañcakādivibhāgato dvattiṃsākāraṃ bhāvento kesā tāva vaṇṇato kāḷakāti vavatthapeti, yādisakā vānena diṭṭhā honti. Saṇṭhānato dīghavaṭṭalikā tulādaṇḍamivāti vavatthapeti. Disato pana yasmā imasmiṃ kāye nābhito uddhaṃ uparimā disā adho heṭṭhimāti vuccati, tasmā imassa kāyassa uparimāya disāya jātāti vavatthapeti. Okāsato nalāṭantakaṇṇacūḷikagalavāṭakaparicchinne sīsacamme jātāti. Tattha yathā vammikamatthake jātāni kuṇṭhatiṇāni na jānanti ‘‘mayaṃ vammikamatthake jātānī’’ti; napi vammikamatthako jānāti ‘‘mayi kuṇṭhatiṇāni jātānī’’ti; evameva na kesā jānanti ‘‘mayaṃ sīsacamme jātā’’ti, napi sīsacammaṃ jānāti ‘‘mayi kesā jātā’’ti. Ābhogapaccavekkhaṇavirahitā hi ete dhammā acetanā abyākatā suññā paramaduggandhajegucchappaṭikūlā, na satto na puggaloti vavatthapeti. Paricchedatoti duvidho paricchedo sabhāgavisabhāgavasena. Tattha kesā heṭṭhā patiṭṭhitacammatalena tattha vīhaggamattaṃ pavisitvā patiṭṭhitena attano mūlatalena ca upari ākāsena tiriyaṃ aññamaññena paricchinnāti evaṃ sabhāgaparicchedato, kesā na avasesaekatiṃsākārā. Avasesā ekatiṃsā na kesāti evaṃ visabhāgaparicchedato ca vavatthapeti. Evaṃ tāva kese vaṇṇādito vavatthapeti.

    অৰসেসেসু লোমা ৰণ্ণতো যেভুয্যেন নীলৰণ্ণাতি ৰৰত্থপেতি, যাদিসকা ৰানেন দিট্ঠা হোন্তি। সণ্ঠানতো ওণতচাপসণ্ঠানা, উপরি ৰঙ্কতালহীরসণ্ঠানা ৰা, দিসতো দ্ৰীসু দিসাসু জাতা, ওকাসতো হত্থতলপাদতলে ঠপেত্ৰা যেভুয্যেন অৰসেসসরীরচম্মে জাতাতি।

    Avasesesu lomā vaṇṇato yebhuyyena nīlavaṇṇāti vavatthapeti, yādisakā vānena diṭṭhā honti. Saṇṭhānato oṇatacāpasaṇṭhānā, upari vaṅkatālahīrasaṇṭhānā vā, disato dvīsu disāsu jātā, okāsato hatthatalapādatale ṭhapetvā yebhuyyena avasesasarīracamme jātāti.

    তত্থ যথা পুরাণগামট্ঠানে জাতানি দব্বতিণানি ন জানন্তি ‘‘মযং পুরাণগামট্ঠানে জাতানী’’তি, ন চ পুরাণগামট্ঠানং জানাতি ‘‘মযি দব্বতিণানি জাতানী’’তি, এৰমেৰ ন লোমা জানন্তি ‘‘মযং সরীরচম্মে জাতা’’তি, নপি সরীরচম্মং জানাতি ‘‘মযি লোমা জাতা’’তি। আভোগপচ্চৰেক্খণৰিরহিতা হি এতে ধম্মা অচেতনা অব্যাকতা সুঞ্ঞা পরমদুগ্গন্ধজেগুচ্ছপটিকূলা, ন সত্তো ন পুগ্গলোতি ৰৰত্থপেতি। পরিচ্ছেদতো হেট্ঠা পতিট্ঠিতচম্মতলেন তত্থ লিক্খামত্তং পৰিসিত্ৰা পতিট্ঠিতেন অত্তনো মূলেন চ উপরি আকাসেন তিরিযং অঞ্ঞমঞ্ঞেন পরিচ্ছিন্নাতি ৰৰত্থপেতি। অযমেতেসং সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং লোমে ৰণ্ণাদিতো ৰৰত্থপেতি।

    Tattha yathā purāṇagāmaṭṭhāne jātāni dabbatiṇāni na jānanti ‘‘mayaṃ purāṇagāmaṭṭhāne jātānī’’ti, na ca purāṇagāmaṭṭhānaṃ jānāti ‘‘mayi dabbatiṇāni jātānī’’ti, evameva na lomā jānanti ‘‘mayaṃ sarīracamme jātā’’ti, napi sarīracammaṃ jānāti ‘‘mayi lomā jātā’’ti. Ābhogapaccavekkhaṇavirahitā hi ete dhammā acetanā abyākatā suññā paramaduggandhajegucchapaṭikūlā, na satto na puggaloti vavatthapeti. Paricchedato heṭṭhā patiṭṭhitacammatalena tattha likkhāmattaṃ pavisitvā patiṭṭhitena attano mūlena ca upari ākāsena tiriyaṃ aññamaññena paricchinnāti vavatthapeti. Ayametesaṃ sabhāgaparicchedo, visabhāgaparicchedo pana kesasadiso evāti evaṃ lome vaṇṇādito vavatthapeti.

    ততো পরং নখা যস্স পরিপুণ্ণা, তস্স ৰীসতি। তে সব্বেপি ৰণ্ণতো মংসৰিনিমুত্তোকাসে সেতা, মংসসম্বন্ধে তম্বৰণ্ণাতি ৰৰত্থপেতি। সণ্ঠানতো যথাসকপতিট্ঠিতোকাসসণ্ঠানা, যেভুয্যেন মধুকফলট্ঠিকসণ্ঠানা, মচ্ছসকলিকসণ্ঠানা ৰাতি ৰৰত্থপেতি। দিসতো দ্ৰীসু দিসাসু জাতা, ওকাসতো অঙ্গুলীনং অগ্গেসু পতিট্ঠিতাতি।

    Tato paraṃ nakhā yassa paripuṇṇā, tassa vīsati. Te sabbepi vaṇṇato maṃsavinimuttokāse setā, maṃsasambandhe tambavaṇṇāti vavatthapeti. Saṇṭhānato yathāsakapatiṭṭhitokāsasaṇṭhānā, yebhuyyena madhukaphalaṭṭhikasaṇṭhānā, macchasakalikasaṇṭhānā vāti vavatthapeti. Disato dvīsu disāsu jātā, okāsato aṅgulīnaṃ aggesu patiṭṭhitāti.

    তত্থ যথা নাম গামদারকেহি দণ্ডকগ্গেসু মধুকফলট্ঠিকা ঠপিতা ন জানন্তি ‘‘মযং দণ্ডকগ্গেসু ঠপিতা’’তি, নপি দণ্ডকা জানন্তি ‘‘অম্হেসু মধুকফলট্ঠিকা ঠপিতা’’তি; এৰমেৰ নখা ন জানন্তি ‘‘মযং অঙ্গুলীনং অগ্গেসু পতিট্ঠিতা’’তি, নপি অঙ্গুলিযো জানন্তি ‘‘অম্হাকং অগ্গেসু নখা পতিট্ঠিতা’’তি। আভোগপচ্চৰেক্খণৰিরহিতা হি এতে ধম্মা অচেতনা…পে॰… ন পুগ্গলোতি ৰৰত্থপেতি। পরিচ্ছেদতো হেট্ঠা মূলে চ অঙ্গুলিমংসেন, তত্থ পতিট্ঠিততলেন ৰা উপরি অগ্গে চ আকাসেন, উভতোপস্সেসু অঙ্গুলীনং উভতোকোটিচম্মেন পরিচ্ছিন্নাতি ৰৰত্থপেতি। অযমেতেসং সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং নখে ৰণ্ণাদিতো ৰৰত্থপেতি।

    Tattha yathā nāma gāmadārakehi daṇḍakaggesu madhukaphalaṭṭhikā ṭhapitā na jānanti ‘‘mayaṃ daṇḍakaggesu ṭhapitā’’ti, napi daṇḍakā jānanti ‘‘amhesu madhukaphalaṭṭhikā ṭhapitā’’ti; evameva nakhā na jānanti ‘‘mayaṃ aṅgulīnaṃ aggesu patiṭṭhitā’’ti, napi aṅguliyo jānanti ‘‘amhākaṃ aggesu nakhā patiṭṭhitā’’ti. Ābhogapaccavekkhaṇavirahitā hi ete dhammā acetanā…pe… na puggaloti vavatthapeti. Paricchedato heṭṭhā mūle ca aṅgulimaṃsena, tattha patiṭṭhitatalena vā upari agge ca ākāsena, ubhatopassesu aṅgulīnaṃ ubhatokoṭicammena paricchinnāti vavatthapeti. Ayametesaṃ sabhāgaparicchedo, visabhāgaparicchedo pana kesasadiso evāti evaṃ nakhe vaṇṇādito vavatthapeti.

    ততো পরং দন্তা যস্স পরিপুণ্ণা, তস্স দ্ৰত্তিংস। তে সব্বেপি ৰণ্ণতো সেতৰণ্ণাতি ৰৰত্থপেতি। যস্স সমসণ্ঠিতা হোন্তি, তস্স খরপত্তচ্ছিন্নসঙ্খপটলমিৰ সমগন্থিতসেতকুসুমমকুল়মালা ৰিয চ খাযন্তি। যস্স ৰিসমসণ্ঠিতা, তস্স জিণ্ণআসনসালাপীঠকপটিপাটি ৰিয নানাসণ্ঠানাতি সণ্ঠানতো ৰৰত্থপেতি। তেসঞ্হি উভযদন্তপন্তিপরিযোসানেসু হেট্ঠতো উপরিতো চ দ্ৰে দ্ৰে কত্ৰা অট্ঠ দন্তা চতুকোটিকা চতুমূলিকা আসন্দিকসণ্ঠানা, তেসং ওরতো তেনেৰ কমেন সন্নিৰিট্ঠা অট্ঠ দন্তা তিকোটিকা তিমূলিকা সিঙ্ঘাটকসণ্ঠানা। তেসম্পি ওরতো তেনেৰ কমেন হেট্ঠতো উপরিতো চ একমেকং কত্ৰা চত্তারো দন্তা দ্ৰিকোটিকা দ্ৰিমূলিকা যানকূপত্থম্ভিনীসণ্ঠানা। তেসম্পি ওরতো তেনেৰ কমেন সন্নিৰিট্ঠা চত্তারো দাঠাদন্তা এককোটিকা একমূলিকা মল্লিকামকুল়সণ্ঠানা। ততো উভযদন্তপন্তিৰেমজ্ঝে হেট্ঠা চত্তারো উপরি চত্তারো কত্ৰা অট্ঠ দন্তা এককোটিকা একমূলিকা তুম্ববীজসণ্ঠানা। দিসতো উপরিমায দিসায জাতা। ওকাসতো উপরিমা উপরিমহনুকট্ঠিকে অধোকোটিকা, হেট্ঠিমা হেট্ঠিমহনুকট্ঠিকে উদ্ধংকোটিকা হুত্ৰা পতিট্ঠিতাতি।

    Tato paraṃ dantā yassa paripuṇṇā, tassa dvattiṃsa. Te sabbepi vaṇṇato setavaṇṇāti vavatthapeti. Yassa samasaṇṭhitā honti, tassa kharapattacchinnasaṅkhapaṭalamiva samaganthitasetakusumamakuḷamālā viya ca khāyanti. Yassa visamasaṇṭhitā, tassa jiṇṇaāsanasālāpīṭhakapaṭipāṭi viya nānāsaṇṭhānāti saṇṭhānato vavatthapeti. Tesañhi ubhayadantapantipariyosānesu heṭṭhato uparito ca dve dve katvā aṭṭha dantā catukoṭikā catumūlikā āsandikasaṇṭhānā, tesaṃ orato teneva kamena sanniviṭṭhā aṭṭha dantā tikoṭikā timūlikā siṅghāṭakasaṇṭhānā. Tesampi orato teneva kamena heṭṭhato uparito ca ekamekaṃ katvā cattāro dantā dvikoṭikā dvimūlikā yānakūpatthambhinīsaṇṭhānā. Tesampi orato teneva kamena sanniviṭṭhā cattāro dāṭhādantā ekakoṭikā ekamūlikā mallikāmakuḷasaṇṭhānā. Tato ubhayadantapantivemajjhe heṭṭhā cattāro upari cattāro katvā aṭṭha dantā ekakoṭikā ekamūlikā tumbabījasaṇṭhānā. Disato uparimāya disāya jātā. Okāsato uparimā uparimahanukaṭṭhike adhokoṭikā, heṭṭhimā heṭṭhimahanukaṭṭhike uddhaṃkoṭikā hutvā patiṭṭhitāti.

    তত্থ যথা নৰকম্মিকপুরিসেন হেট্ঠা সিলাতলে পতিট্ঠাপিতা উপরিমতলে পৰেসিতা থম্ভা ন জানন্তি ‘‘মযং হেট্ঠাসিলাতলে পতিট্ঠাপিতা, উপরিমতলে পৰেসিতা’’তি, ন হেট্ঠাসিলাতলং জানাতি ‘‘মযি থম্ভা পতিট্ঠাপিতা’’তি, ন উপরিমতলং জানাতি ‘‘মযি থম্ভা পৰিট্ঠা’’তি; এৰমেৰ দন্তা ন জানন্তি ‘‘মযং হেট্ঠাহনুকট্ঠিকে পতিট্ঠিতা, উপরিমহনুকট্ঠিকে পৰিট্ঠা’’তি, নাপি হেট্ঠাহনুকট্ঠিকং জানাতি ‘‘মযি দন্তা পতিট্ঠিতা’’তি, ন উপরিমহনুকট্ঠিকং জানাতি ‘‘মযি দন্তা পৰিট্ঠা’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো হেট্ঠা হনুকট্ঠিকূপেন হনুকট্ঠিকং পৰিসিত্ৰা পতিট্ঠিতেন অত্তনো মূলতলেন চ উপরি আকাসেন তিরিযং অঞ্ঞমঞ্ঞেন পরিচ্ছিন্নাতি ৰৰত্থপেতি। অযমেতেসং সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং দন্তে ৰণ্ণাদিতো ৰৰত্থপেতি ।

    Tattha yathā navakammikapurisena heṭṭhā silātale patiṭṭhāpitā uparimatale pavesitā thambhā na jānanti ‘‘mayaṃ heṭṭhāsilātale patiṭṭhāpitā, uparimatale pavesitā’’ti, na heṭṭhāsilātalaṃ jānāti ‘‘mayi thambhā patiṭṭhāpitā’’ti, na uparimatalaṃ jānāti ‘‘mayi thambhā paviṭṭhā’’ti; evameva dantā na jānanti ‘‘mayaṃ heṭṭhāhanukaṭṭhike patiṭṭhitā, uparimahanukaṭṭhike paviṭṭhā’’ti, nāpi heṭṭhāhanukaṭṭhikaṃ jānāti ‘‘mayi dantā patiṭṭhitā’’ti, na uparimahanukaṭṭhikaṃ jānāti ‘‘mayi dantā paviṭṭhā’’ti. Ābhogapaccavekkhaṇavirahitā hi ete dhammā…pe… na puggaloti. Paricchedato heṭṭhā hanukaṭṭhikūpena hanukaṭṭhikaṃ pavisitvā patiṭṭhitena attano mūlatalena ca upari ākāsena tiriyaṃ aññamaññena paricchinnāti vavatthapeti. Ayametesaṃ sabhāgaparicchedo, visabhāgaparicchedo pana kesasadiso evāti evaṃ dante vaṇṇādito vavatthapeti .

    ততো পরং অন্তোসরীরে নানাকুণপসঞ্চযপ্পটিচ্ছাদকং তচো ৰণ্ণতো সেতোতি ৰৰত্থপেতি। সো হি যদিপি ছৰিরাগরঞ্জিতত্তা কাল়কোদাতাদিৰণ্ণৰসেন নানাৰণ্ণো ৰিয দিস্সতি, তথাপি সভাগৰণ্ণেন সেতো এৰ। সো পনস্স সেতভাৰো অগ্গিজালাভিঘাতপহরণপহারাদীহি ৰিদ্ধংসিতায ছৰিযা পাকটো হোতি। সণ্ঠানতো সঙ্খেপেন কঞ্চুকসণ্ঠানো, ৰিত্থারেন নানাসণ্ঠানোতি। তথা হি পাদঙ্গুলিত্তচো কোসকারককোসসণ্ঠানো, পিট্ঠিপাদত্তচো পুটবদ্ধূপাহনসণ্ঠানো, জঙ্ঘত্তচো ভত্তপুটকতালপণ্ণসণ্ঠানো , ঊরুত্তচো তণ্ডুলভরিতদীঘত্থৰিকসণ্ঠানো, আনিসদত্তচো উদকপূরিতপটপরিস্সাৰনসণ্ঠানো, পিট্ঠিত্তচো ফলকোনদ্ধচম্মসণ্ঠানো, কুচ্ছিত্তচো ৰীণাদোণিকোনদ্ধচম্মসণ্ঠানো, উরত্তচো যেভুয্যেন চতুরস্সসণ্ঠানো, দ্ৰিবাহুত্তচো তূণীরোনদ্ধচম্মসণ্ঠানো, পিট্ঠিহত্থত্তচো খুরকোসসণ্ঠানো ফণকত্থৰিকসণ্ঠানো ৰা, হত্থঙ্গুলিত্তচো কুঞ্চিকাকোসসণ্ঠানো, গীৰত্তচো গলকঞ্চুকসণ্ঠানো, মুখত্তচো ছিদ্দাৰছিদ্দকিমিকুলাৰকসণ্ঠানো, সীসত্তচো পত্তত্থৰিকসণ্ঠানোতি।

    Tato paraṃ antosarīre nānākuṇapasañcayappaṭicchādakaṃ taco vaṇṇato setoti vavatthapeti. So hi yadipi chavirāgarañjitattā kāḷakodātādivaṇṇavasena nānāvaṇṇo viya dissati, tathāpi sabhāgavaṇṇena seto eva. So panassa setabhāvo aggijālābhighātapaharaṇapahārādīhi viddhaṃsitāya chaviyā pākaṭo hoti. Saṇṭhānato saṅkhepena kañcukasaṇṭhāno, vitthārena nānāsaṇṭhānoti. Tathā hi pādaṅgulittaco kosakārakakosasaṇṭhāno, piṭṭhipādattaco puṭabaddhūpāhanasaṇṭhāno, jaṅghattaco bhattapuṭakatālapaṇṇasaṇṭhāno , ūruttaco taṇḍulabharitadīghatthavikasaṇṭhāno, ānisadattaco udakapūritapaṭaparissāvanasaṇṭhāno, piṭṭhittaco phalakonaddhacammasaṇṭhāno, kucchittaco vīṇādoṇikonaddhacammasaṇṭhāno, urattaco yebhuyyena caturassasaṇṭhāno, dvibāhuttaco tūṇīronaddhacammasaṇṭhāno, piṭṭhihatthattaco khurakosasaṇṭhāno phaṇakatthavikasaṇṭhāno vā, hatthaṅgulittaco kuñcikākosasaṇṭhāno, gīvattaco galakañcukasaṇṭhāno, mukhattaco chiddāvachiddakimikulāvakasaṇṭhāno, sīsattaco pattatthavikasaṇṭhānoti.

    তচপরিগ্গণ্হকেন চ যোগাৰচরেন উত্তরোট্ঠতো পট্ঠায তচস্স মংসস্স চ অন্তরেন চিত্তং পেসেন্তেন পঠমং তাৰ মুখত্তচো ৰৰত্থপেতব্বো, ততো সীসত্তচো, অথ বহিগীৰত্তচো, ততো অনুলোমেন পটিলোমেন চ দক্খিণহত্থত্তচো। অথ তেনেৰ কমেন ৰামহত্থত্তচো, ততো পিট্ঠিত্তচো, অথ আনিসদত্তচো, ততো অনুলোমেন পটিলোমেন চ দক্খিণপাদত্তচো, অথ ৰামপাদত্তচো, ততো ৰত্থিউদরহদযঅব্ভন্তরগীৰত্তচো, ততো হেট্ঠিমহনুকত্তচো, অথ অধরোট্ঠত্তচো। এৰং যাৰ পুন উপরি ওট্ঠত্তচোতি । দিসতো দ্ৰীসু দিসাসু জাতো। ওকাসতো সকলসরীরং পরিযোনন্ধিত্ৰা ঠিতোতি।

    Tacapariggaṇhakena ca yogāvacarena uttaroṭṭhato paṭṭhāya tacassa maṃsassa ca antarena cittaṃ pesentena paṭhamaṃ tāva mukhattaco vavatthapetabbo, tato sīsattaco, atha bahigīvattaco, tato anulomena paṭilomena ca dakkhiṇahatthattaco. Atha teneva kamena vāmahatthattaco, tato piṭṭhittaco, atha ānisadattaco, tato anulomena paṭilomena ca dakkhiṇapādattaco, atha vāmapādattaco, tato vatthiudarahadayaabbhantaragīvattaco, tato heṭṭhimahanukattaco, atha adharoṭṭhattaco. Evaṃ yāva puna upari oṭṭhattacoti . Disato dvīsu disāsu jāto. Okāsato sakalasarīraṃ pariyonandhitvā ṭhitoti.

    তত্থ যথা অল্লচম্মপরিযোনদ্ধায পেল়ায ন অল্লচম্মং জানাতি ‘‘মযা পেল়া পরিযোনদ্ধা’’তি, নপি পেল়া জানাতি ‘‘অহং অল্লচম্মেন পরিযোনদ্ধা’’তি; এৰমেৰ ন তচো জানাতি ‘‘মযা ইদং চাতুমহাভূতিকং সরীরং ওনদ্ধ’’ন্তি, নপি ইদং চাতুমহাভূতিকং সরীরং জানাতি ‘‘অহং তচেন ওনদ্ধ’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। কেৰলং তু –

    Tattha yathā allacammapariyonaddhāya peḷāya na allacammaṃ jānāti ‘‘mayā peḷā pariyonaddhā’’ti, napi peḷā jānāti ‘‘ahaṃ allacammena pariyonaddhā’’ti; evameva na taco jānāti ‘‘mayā idaṃ cātumahābhūtikaṃ sarīraṃ onaddha’’nti, napi idaṃ cātumahābhūtikaṃ sarīraṃ jānāti ‘‘ahaṃ tacena onaddha’’nti. Ābhogapaccavekkhaṇavirahitā hi ete dhammā…pe… na puggaloti. Kevalaṃ tu –

    ‘‘অল্লচম্মপটিচ্ছন্নো, নৰদ্ৰারো মহাৰণো।

    ‘‘Allacammapaṭicchanno, navadvāro mahāvaṇo;

    সমন্ততো পগ্ঘরতি, অসুচিপূতিগন্ধিযো’’তি॥

    Samantato paggharati, asucipūtigandhiyo’’ti.

    পরিচ্ছেদতো হেট্ঠা মংসেন তত্থ পতিট্ঠিততলেন ৰা উপরি ছৰিযা পরিচ্ছিন্নোতি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং তচং ৰণ্ণাদিতো ৰৰত্থপেতি।

    Paricchedato heṭṭhā maṃsena tattha patiṭṭhitatalena vā upari chaviyā paricchinnoti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ tacaṃ vaṇṇādito vavatthapeti.

    ততো পরং সরীরে নৰপেসিসতপ্পভেদং মংসং ৰণ্ণতো রত্তং পালিভদ্দকপুপ্ফসন্নিভন্তি ৰৰত্থপেতি। সণ্ঠানতো নানাসণ্ঠানন্তি। তথা হি তত্থ জঙ্ঘমংসং তালপত্তপুটভত্তসণ্ঠানং, অৰিকসিতকেতকীমকুল়সণ্ঠানন্তিপি কেচি। ঊরুমংসং সুধাপিসননিসদপোতকসণ্ঠানং, আনিসদমংসং উদ্ধনকোটিসণ্ঠানং, পিট্ঠিমংসং তালগুল়পটলসণ্ঠানং, ফাসুকদ্ৰযমংসং ৰংসমযকোট্ঠকুচ্ছিপদেসম্হি তনুমত্তিকালেপসণ্ঠানং, থনমংসং ৰট্টেত্ৰা অৰক্খিত্তদ্ধমত্তিকাপিণ্ডসণ্ঠানং, দ্ৰেবাহুমংসং নঙ্গুট্ঠসীসপাদে ছেত্ৰা নিচ্চম্মং কত্ৰা ঠপিতমহামূসিকসণ্ঠানং, মংসসূনকসণ্ঠানন্তিপি একে। গণ্ডমংসং গণ্ডপ্পদেসে ঠপিতকরঞ্জবীজসণ্ঠানং, মণ্ডূকসণ্ঠানন্তিপি একে। জিৰ্হামংসং নুহীপত্তসণ্ঠানং, নাসামংসং ওমুখনিক্খিত্তপণ্ণকোসসণ্ঠানং, ০.অক্খিকূপমংসং অদ্ধপক্কউদুম্বরসণ্ঠানং, সীসমংসং পত্তপচনকটাহতনুলেপসণ্ঠানন্তি । মংসপরিগ্গণ্হকেন চ যোগাৰচরেন এতানেৰ ওল়ারিকমংসানি সণ্ঠানতো ৰৰত্থপেতব্বানি। এৰঞ্হি ৰৰত্থাপযতো সুখুমানি মংসানি ঞাণস্স আপাথং আগচ্ছন্তীতি। দিসতো দ্ৰীসু দিসাসু জাতং। ওকাসতো সাধিকানি তীণি অট্ঠিসতানি অনুলিম্পিত্ৰা ঠিতন্তি।

    Tato paraṃ sarīre navapesisatappabhedaṃ maṃsaṃ vaṇṇato rattaṃ pālibhaddakapupphasannibhanti vavatthapeti. Saṇṭhānato nānāsaṇṭhānanti. Tathā hi tattha jaṅghamaṃsaṃ tālapattapuṭabhattasaṇṭhānaṃ, avikasitaketakīmakuḷasaṇṭhānantipi keci. Ūrumaṃsaṃ sudhāpisananisadapotakasaṇṭhānaṃ, ānisadamaṃsaṃ uddhanakoṭisaṇṭhānaṃ, piṭṭhimaṃsaṃ tālaguḷapaṭalasaṇṭhānaṃ, phāsukadvayamaṃsaṃ vaṃsamayakoṭṭhakucchipadesamhi tanumattikālepasaṇṭhānaṃ, thanamaṃsaṃ vaṭṭetvā avakkhittaddhamattikāpiṇḍasaṇṭhānaṃ, dvebāhumaṃsaṃ naṅguṭṭhasīsapāde chetvā niccammaṃ katvā ṭhapitamahāmūsikasaṇṭhānaṃ, maṃsasūnakasaṇṭhānantipi eke. Gaṇḍamaṃsaṃ gaṇḍappadese ṭhapitakarañjabījasaṇṭhānaṃ, maṇḍūkasaṇṭhānantipi eke. Jivhāmaṃsaṃ nuhīpattasaṇṭhānaṃ, nāsāmaṃsaṃ omukhanikkhittapaṇṇakosasaṇṭhānaṃ, 0.akkhikūpamaṃsaṃ addhapakkaudumbarasaṇṭhānaṃ, sīsamaṃsaṃ pattapacanakaṭāhatanulepasaṇṭhānanti . Maṃsapariggaṇhakena ca yogāvacarena etāneva oḷārikamaṃsāni saṇṭhānato vavatthapetabbāni. Evañhi vavatthāpayato sukhumāni maṃsāni ñāṇassa āpāthaṃ āgacchantīti. Disato dvīsu disāsu jātaṃ. Okāsato sādhikāni tīṇi aṭṭhisatāni anulimpitvā ṭhitanti.

    তত্থ যথা থূলমত্তিকানুলিত্তায ভিত্তিযা ন থূলমত্তিকা জানাতি ‘‘মযা ভিত্তি অনুলিত্তা’’তি, নপি ভিত্তি জানাতি ‘‘অহং থূলমত্তিকায অনুলিত্তা’’তি, এৰমেৰং ন নৰপেসিসতপ্পভেদং মংসং জানাতি ‘‘মযা অট্ঠিসতত্তযং অনুলিত্ত’’ন্তি, নপি অট্ঠিসতত্তযং জানাতি ‘‘অহং নৰপেসিসতপ্পভেদেন মংসেন অনুলিত্ত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। কেৰলং তু –

    Tattha yathā thūlamattikānulittāya bhittiyā na thūlamattikā jānāti ‘‘mayā bhitti anulittā’’ti, napi bhitti jānāti ‘‘ahaṃ thūlamattikāya anulittā’’ti, evamevaṃ na navapesisatappabhedaṃ maṃsaṃ jānāti ‘‘mayā aṭṭhisatattayaṃ anulitta’’nti, napi aṭṭhisatattayaṃ jānāti ‘‘ahaṃ navapesisatappabhedena maṃsena anulitta’’nti. Ābhogapaccavekkhaṇavirahitā hi ete dhammā…pe… na puggaloti. Kevalaṃ tu –

    ‘‘নৰপেসিসতা মংসা, অনুলিত্তা কল়েৰরং।

    ‘‘Navapesisatā maṃsā, anulittā kaḷevaraṃ;

    নানাকিমিকুলাকিণ্ণং, মীল়্হট্ঠানংৰ পূতিক’’ন্তি॥

    Nānākimikulākiṇṇaṃ, mīḷhaṭṭhānaṃva pūtika’’nti.

    পরিচ্ছেদতো হেট্ঠা অট্ঠিসঙ্ঘাটেন তত্থ পতিট্ঠিততলেন ৰা উপরি তচেন তিরিযং অঞ্ঞমঞ্ঞেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং মংসং ৰণ্ণাদিতো ৰৰত্থপেতি।

    Paricchedato heṭṭhā aṭṭhisaṅghāṭena tattha patiṭṭhitatalena vā upari tacena tiriyaṃ aññamaññena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ maṃsaṃ vaṇṇādito vavatthapeti.

    ততো পরং সরীরে নৰসতপ্পভেদা ন্হারূ ৰণ্ণতো সেতাতি ৰৰত্থপেতি, মধুৰণ্ণাতিপি একে। সণ্ঠানতো নানাসণ্ঠানাতি। তথা হি তত্থ মহন্তা মহন্তা ন্হারূ কন্দলমকুল়সণ্ঠানা, ততো সুখুমতরা সূকরৰাগুররজ্জুসণ্ঠানা, ততো অণুকতরা পূতিলতাসণ্ঠানা, ততো অণুকতরা সীহল়মহাৰীণাতন্তিসণ্ঠানা, ততো অণুকতরা থূলসুত্তকসণ্ঠানা, হত্থপিট্ঠিপাদপিট্ঠীসু ন্হারূ সকুণপাদসণ্ঠানা, সীসে ন্হারূ গামদারকানং সীসে ঠপিতৰিরল়তরদুকূলসণ্ঠানা, পিট্ঠিযা ন্হারূ তেমেত্ৰা আতপে পসারিতমচ্ছজালসণ্ঠানা, অৰসেসা ইমস্মিং সরীরে তংতংঅঙ্গপচ্চঙ্গানুগতা ন্হারূ সরীরে পটিমুক্কজালকঞ্চুকসণ্ঠানাতি। দিসতো দ্ৰীসু দিসাসু জাতা। তেসু চ দক্খিণকণ্ণচূল়িকতো পট্ঠায পঞ্চ কণ্ডরনামকা মহান্হারূ পুরতো চ পচ্ছতো চ ৰিনন্ধমানা ৰামপস্সং গতা, ৰামকণ্ণচূল়িকতো পট্ঠায পঞ্চ পুরতো চ পচ্ছতো চ ৰিনন্ধমানা দক্খিণপস্সং গতা, দক্খিণগলৰাটকতো পট্ঠায পঞ্চ পুরতো চ পচ্ছতো চ ৰিনন্ধমানা ৰামপস্সং গতা, ৰামগলৰাটকতো পট্ঠায পঞ্চ পুরতো চ পচ্ছতো চ ৰিনন্ধমানা দক্খিণপস্সং গতা, দক্খিণহত্থং ৰিনন্ধমানা পুরতো চ পচ্ছতো চ পঞ্চ পঞ্চাতি দস কণ্ডরনামকা এৰ মহান্হারূ আরুল়্হা। তথা ৰামহত্থং, দক্খিণপাদং, ৰামপাদঞ্চাতি এৰমেতে সট্ঠি মহান্হারূ সরীরধারকা সরীরনিযামকাতিপি ৰৰত্থপেতি। ওকাসতো সকলসরীরে অট্ঠিচম্মানং অট্ঠিমংসানঞ্চ অন্তরে অট্ঠীনি আবন্ধমানা ঠিতাতি।

    Tato paraṃ sarīre navasatappabhedā nhārū vaṇṇato setāti vavatthapeti, madhuvaṇṇātipi eke. Saṇṭhānato nānāsaṇṭhānāti. Tathā hi tattha mahantā mahantā nhārū kandalamakuḷasaṇṭhānā, tato sukhumatarā sūkaravāgurarajjusaṇṭhānā, tato aṇukatarā pūtilatāsaṇṭhānā, tato aṇukatarā sīhaḷamahāvīṇātantisaṇṭhānā, tato aṇukatarā thūlasuttakasaṇṭhānā, hatthapiṭṭhipādapiṭṭhīsu nhārū sakuṇapādasaṇṭhānā, sīse nhārū gāmadārakānaṃ sīse ṭhapitaviraḷataradukūlasaṇṭhānā, piṭṭhiyā nhārū temetvā ātape pasāritamacchajālasaṇṭhānā, avasesā imasmiṃ sarīre taṃtaṃaṅgapaccaṅgānugatā nhārū sarīre paṭimukkajālakañcukasaṇṭhānāti. Disato dvīsu disāsu jātā. Tesu ca dakkhiṇakaṇṇacūḷikato paṭṭhāya pañca kaṇḍaranāmakā mahānhārū purato ca pacchato ca vinandhamānā vāmapassaṃ gatā, vāmakaṇṇacūḷikato paṭṭhāya pañca purato ca pacchato ca vinandhamānā dakkhiṇapassaṃ gatā, dakkhiṇagalavāṭakato paṭṭhāya pañca purato ca pacchato ca vinandhamānā vāmapassaṃ gatā, vāmagalavāṭakato paṭṭhāya pañca purato ca pacchato ca vinandhamānā dakkhiṇapassaṃ gatā, dakkhiṇahatthaṃ vinandhamānā purato ca pacchato ca pañca pañcāti dasa kaṇḍaranāmakā eva mahānhārū āruḷhā. Tathā vāmahatthaṃ, dakkhiṇapādaṃ, vāmapādañcāti evamete saṭṭhi mahānhārū sarīradhārakā sarīraniyāmakātipi vavatthapeti. Okāsato sakalasarīre aṭṭhicammānaṃ aṭṭhimaṃsānañca antare aṭṭhīni ābandhamānā ṭhitāti.

    তত্থ যথা ৰল্লিসন্তানবদ্ধেসু কুট্টদারূসু ন ৰল্লিসন্তানা জানন্তি ‘‘অম্হেহি কুট্টদারূনি আবদ্ধানী’’তি, নপি কুট্টদারূনি জানন্তি ‘‘মযং ৰল্লিসন্তানেহি আবদ্ধানী’’তি; এৰমেৰ ন ন্হারূ জানন্তি ‘‘অম্হেহি তীণি অট্ঠিসতানি আবদ্ধানী’’তি, নপি তীণি অট্ঠিসতানি জানন্তি ‘‘মযং ন্হারূহি আবদ্ধানী’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। কেৰলং তু –

    Tattha yathā vallisantānabaddhesu kuṭṭadārūsu na vallisantānā jānanti ‘‘amhehi kuṭṭadārūni ābaddhānī’’ti, napi kuṭṭadārūni jānanti ‘‘mayaṃ vallisantānehi ābaddhānī’’ti; evameva na nhārū jānanti ‘‘amhehi tīṇi aṭṭhisatāni ābaddhānī’’ti, napi tīṇi aṭṭhisatāni jānanti ‘‘mayaṃ nhārūhi ābaddhānī’’ti. Ābhogapaccavekkhaṇavirahitā hi ete dhammā…pe… na puggaloti. Kevalaṃ tu –

    ‘‘নৰন্হারুসতা হোন্তি, ব্যামমত্তে কল়েৰরে।

    ‘‘Navanhārusatā honti, byāmamatte kaḷevare;

    বন্ধন্তি অট্ঠিসঙ্ঘাটং, অগারমিৰ ৰল্লিযো’’তি॥

    Bandhanti aṭṭhisaṅghāṭaṃ, agāramiva valliyo’’ti.

    পরিচ্ছেদতো হেট্ঠা তীহি অট্ঠিসতেহি তত্থ পতিট্ঠিততলেহি ৰা উপরি তচমংসেহি তিরিযং অঞ্ঞমঞ্ঞেন পরিচ্ছিন্নাতি ৰৰত্থপেতি। অযমেতেসং সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং ন্হারূ ৰণ্ণাদিতো ৰৰত্থপেতি।

    Paricchedato heṭṭhā tīhi aṭṭhisatehi tattha patiṭṭhitatalehi vā upari tacamaṃsehi tiriyaṃ aññamaññena paricchinnāti vavatthapeti. Ayametesaṃ sabhāgaparicchedo, visabhāgaparicchedo pana kesasadiso evāti evaṃ nhārū vaṇṇādito vavatthapeti.

    ততো পরং সরীরে দ্ৰত্তিংসদন্তট্ঠিকানং ৰিসুং গহিতত্তা সেসানি চতুসট্ঠি হত্থট্ঠিকানি চতুসট্ঠি পাদট্ঠিকানি চতুসট্ঠি মুদুকট্ঠিকানি মংসনিস্সিতানি দ্ৰে পণ্হিকট্ঠীনি একেকস্মিং পাদে দ্ৰে দ্ৰে গোপ্ফকট্ঠিকানি দ্ৰে জঙ্ঘট্ঠিকানি একং জণ্ণুকট্ঠি একং ঊরুট্ঠি দ্ৰে কটিট্ঠীনি অট্ঠারস পিট্ঠিকণ্টকট্ঠীনি চতুৰীসতি ফাসুকট্ঠীনি চুদ্দস উরট্ঠীনি একং হদযট্ঠি দ্ৰে অক্খকট্ঠীনি দ্ৰে পিট্ঠিবাহট্ঠীনি দ্ৰে বাহট্ঠীনি দ্ৰে দ্ৰে অগ্গবাহট্ঠীনি সত্ত গীৰট্ঠীনি দ্ৰে হনুকট্ঠীনি একং নাসিকট্ঠি দ্ৰে অক্খিট্ঠীনি দ্ৰে কণ্ণট্ঠীনি একং নলাটট্ঠি একং মুদ্ধট্ঠি নৰ সীসকপালট্ঠীনীতি এৰমাদিনা নযেন ৰুত্তপ্পভেদানি অট্ঠীনি সব্বানেৰ ৰণ্ণতো সেতানীতি ৰৰত্থপেতি।

    Tato paraṃ sarīre dvattiṃsadantaṭṭhikānaṃ visuṃ gahitattā sesāni catusaṭṭhi hatthaṭṭhikāni catusaṭṭhi pādaṭṭhikāni catusaṭṭhi mudukaṭṭhikāni maṃsanissitāni dve paṇhikaṭṭhīni ekekasmiṃ pāde dve dve gopphakaṭṭhikāni dve jaṅghaṭṭhikāni ekaṃ jaṇṇukaṭṭhi ekaṃ ūruṭṭhi dve kaṭiṭṭhīni aṭṭhārasa piṭṭhikaṇṭakaṭṭhīni catuvīsati phāsukaṭṭhīni cuddasa uraṭṭhīni ekaṃ hadayaṭṭhi dve akkhakaṭṭhīni dve piṭṭhibāhaṭṭhīni dve bāhaṭṭhīni dve dve aggabāhaṭṭhīni satta gīvaṭṭhīni dve hanukaṭṭhīni ekaṃ nāsikaṭṭhi dve akkhiṭṭhīni dve kaṇṇaṭṭhīni ekaṃ nalāṭaṭṭhi ekaṃ muddhaṭṭhi nava sīsakapālaṭṭhīnīti evamādinā nayena vuttappabhedāni aṭṭhīni sabbāneva vaṇṇato setānīti vavatthapeti.

    সণ্ঠানতো নানাসণ্ঠানানি। তথা হি তত্থ অগ্গপাদঙ্গুলিযট্ঠীনি কতকবীজসণ্ঠানানি, তদনন্তরানি অঙ্গুলীনং মজ্ঝপব্বট্ঠীনি অপরিপুণ্ণপনসট্ঠিসণ্ঠানানি, মূলপব্বট্ঠীনি পণৰসণ্ঠানানি, মোরসকলিসণ্ঠানানীতিপি একে। পিট্ঠিপাদট্ঠীনি কোট্টিতকন্দলকন্দরাসিসণ্ঠানানি পণ্হিকট্ঠীনি একট্ঠিতালফলবীজসণ্ঠানানি, গোপ্ফকট্ঠীনি একতোবদ্ধকীল়াগোল়কসণ্ঠানানি, জঙ্ঘট্ঠিকেসু খুদ্দকং ধনুদণ্ডসণ্ঠানং, মহন্তং খুপ্পিপাসামিলাতধমনিপিট্ঠিসণ্ঠানং, জঙ্ঘট্ঠিকস্স গোপ্ফকট্ঠিকেসু পতিট্ঠিতট্ঠানং অপনীততচখজ্জূরীকল়ীরসণ্ঠানং, জঙ্ঘট্ঠিকস্স জণ্ণুকট্ঠিকে পতিট্ঠিতট্ঠানং মুদিঙ্গমত্থকসণ্ঠানং জণ্ণুকট্ঠি একপস্সতো ঘট্টিতফেণসণ্ঠানং, ঊরুট্ঠীনি দুত্তচ্ছিতৰাসিফরসুদণ্ডসণ্ঠানানি, ঊরুট্ঠিকস্স কটট্ঠিকে পতিট্ঠিতট্ঠানং সুৰণ্ণকারানং অগ্গিজালনকসলাকাবুন্দিসণ্ঠানং , তপ্পতিট্ঠিতোকাসো অগ্গচ্ছিন্নপুন্নাগফলসণ্ঠানো, কটিট্ঠীনি দ্ৰেপি একাবদ্ধানি হুত্ৰা কুম্ভকারেহি কতচুল্লিসণ্ঠানানি, তাপসভিসিকাসণ্ঠানানীতিপি একে। আনিসদট্ঠীনি হেট্ঠামুখঠপিতসপ্পফণসণ্ঠানানি, সত্তট্ঠট্ঠানেসু ছিদ্দাৰছিদ্দানি অট্ঠারস পিট্ঠিকণ্টকট্ঠীনি অব্ভন্তরতো উপরূপরি ঠপিতসীসকপট্টৰেঠকসণ্ঠানানি, বাহিরতো ৰট্টনাৰলিসণ্ঠানানি, তেসং অন্তরন্তরা ককচদন্তসদিসানি দ্ৰে তীণি কণ্টকানি হোন্তি, চতুৰীসতিযা ফাসুকট্ঠীসু পরিপুণ্ণানি পরিপুণ্ণসীহল়দাত্তসণ্ঠানানি , অপরিপুণ্ণানি অপরিপুণ্ণসীহল়দাত্তসণ্ঠানানি, সব্বানেৰ ওদাতকুক্কুটস্স পসারিতপক্খদ্ৰযসণ্ঠানানীতিপি একে। চুদ্দস উরট্ঠীনি জিণ্ণসন্দমানিকফলকপন্তিসণ্ঠানানি, হদযট্ঠি দব্বিফণসণ্ঠানং, অক্খকট্ঠীনি খুদ্দকলোহৰাসিদণ্ডসণ্ঠানানি, তেসং হেট্ঠা অট্ঠি অদ্ধচন্দসণ্ঠানং, পিট্ঠিবাহট্ঠীনি ফরসুফণসণ্ঠানানি, উপড্ঢচ্ছিন্নসীহল়কুদালসণ্ঠানানীতিপি একে। বাহট্ঠীনি আদাসদণ্ডসণ্ঠানানি, মহাৰাসিদণ্ডসণ্ঠানানীতিপি একে। অগ্গবাহট্ঠীনি যমকতালকন্দসণ্ঠানানি, মণিবন্ধট্ঠীনি একতো অল্লিযাপেত্ৰা ঠপিতসীসকপট্টৰেঠকসণ্ঠানানি, পিট্ঠিহত্থট্ঠীনি কোট্টিতকন্দলকন্দরাসিসণ্ঠানানি, হত্থঙ্গুলিমূলপব্বট্ঠীনি পণৰসণ্ঠানানি, মজ্ঝপব্বট্ঠীনি অপরিপুণ্ণপনসট্ঠিসণ্ঠানানি, অগ্গপব্বট্ঠীনি কতকবীজসণ্ঠানানি, সত্ত গীৰট্ঠীনি দণ্ডে ৰিজ্ঝিত্ৰা পটিপাটিযা ঠপিতৰংসকল়ীরখণ্ডসণ্ঠানানি, হেট্ঠিমহনুকট্ঠি কম্মারানং অযোকূটযোত্তকসণ্ঠানং, উপরিমহনুকট্ঠি অৰলেখনসত্থকসণ্ঠানং, অক্খিনাসকূপট্ঠীনি অপনীতমিঞ্জতরুণতালট্ঠিসণ্ঠানানি , নলাটট্ঠি অধোমুখঠপিতভিন্নসঙ্খকপালসণ্ঠানং, কণ্ণচূল়িকট্ঠীনি ন্হাপিতখুরকোসসণ্ঠানানি, নলাটকণ্ণচূল়িকানং উপরি পট্টবন্ধনোকাসে অট্ঠিবহলঘটপুণ্ণপটপিলোতিকখণ্ডসণ্ঠানং, মুদ্ধনট্ঠি মুখচ্ছিন্নৰঙ্কনাল়িকেরসণ্ঠানং, সীসট্ঠীনি সিব্বেত্ৰা ঠপিতজজ্জরালাবুকটাহসণ্ঠানানীতি। দিসতো দ্ৰীসু দিসাসু জাতানি।

    Saṇṭhānato nānāsaṇṭhānāni. Tathā hi tattha aggapādaṅguliyaṭṭhīni katakabījasaṇṭhānāni, tadanantarāni aṅgulīnaṃ majjhapabbaṭṭhīni aparipuṇṇapanasaṭṭhisaṇṭhānāni, mūlapabbaṭṭhīni paṇavasaṇṭhānāni, morasakalisaṇṭhānānītipi eke. Piṭṭhipādaṭṭhīni koṭṭitakandalakandarāsisaṇṭhānāni paṇhikaṭṭhīni ekaṭṭhitālaphalabījasaṇṭhānāni, gopphakaṭṭhīni ekatobaddhakīḷāgoḷakasaṇṭhānāni, jaṅghaṭṭhikesu khuddakaṃ dhanudaṇḍasaṇṭhānaṃ, mahantaṃ khuppipāsāmilātadhamanipiṭṭhisaṇṭhānaṃ, jaṅghaṭṭhikassa gopphakaṭṭhikesu patiṭṭhitaṭṭhānaṃ apanītatacakhajjūrīkaḷīrasaṇṭhānaṃ, jaṅghaṭṭhikassa jaṇṇukaṭṭhike patiṭṭhitaṭṭhānaṃ mudiṅgamatthakasaṇṭhānaṃ jaṇṇukaṭṭhi ekapassato ghaṭṭitapheṇasaṇṭhānaṃ, ūruṭṭhīni duttacchitavāsipharasudaṇḍasaṇṭhānāni, ūruṭṭhikassa kaṭaṭṭhike patiṭṭhitaṭṭhānaṃ suvaṇṇakārānaṃ aggijālanakasalākābundisaṇṭhānaṃ , tappatiṭṭhitokāso aggacchinnapunnāgaphalasaṇṭhāno, kaṭiṭṭhīni dvepi ekābaddhāni hutvā kumbhakārehi katacullisaṇṭhānāni, tāpasabhisikāsaṇṭhānānītipi eke. Ānisadaṭṭhīni heṭṭhāmukhaṭhapitasappaphaṇasaṇṭhānāni, sattaṭṭhaṭṭhānesu chiddāvachiddāni aṭṭhārasa piṭṭhikaṇṭakaṭṭhīni abbhantarato uparūpari ṭhapitasīsakapaṭṭaveṭhakasaṇṭhānāni, bāhirato vaṭṭanāvalisaṇṭhānāni, tesaṃ antarantarā kakacadantasadisāni dve tīṇi kaṇṭakāni honti, catuvīsatiyā phāsukaṭṭhīsu paripuṇṇāni paripuṇṇasīhaḷadāttasaṇṭhānāni , aparipuṇṇāni aparipuṇṇasīhaḷadāttasaṇṭhānāni, sabbāneva odātakukkuṭassa pasāritapakkhadvayasaṇṭhānānītipi eke. Cuddasa uraṭṭhīni jiṇṇasandamānikaphalakapantisaṇṭhānāni, hadayaṭṭhi dabbiphaṇasaṇṭhānaṃ, akkhakaṭṭhīni khuddakalohavāsidaṇḍasaṇṭhānāni, tesaṃ heṭṭhā aṭṭhi addhacandasaṇṭhānaṃ, piṭṭhibāhaṭṭhīni pharasuphaṇasaṇṭhānāni, upaḍḍhacchinnasīhaḷakudālasaṇṭhānānītipi eke. Bāhaṭṭhīni ādāsadaṇḍasaṇṭhānāni, mahāvāsidaṇḍasaṇṭhānānītipi eke. Aggabāhaṭṭhīni yamakatālakandasaṇṭhānāni, maṇibandhaṭṭhīni ekato alliyāpetvā ṭhapitasīsakapaṭṭaveṭhakasaṇṭhānāni, piṭṭhihatthaṭṭhīni koṭṭitakandalakandarāsisaṇṭhānāni, hatthaṅgulimūlapabbaṭṭhīni paṇavasaṇṭhānāni, majjhapabbaṭṭhīni aparipuṇṇapanasaṭṭhisaṇṭhānāni, aggapabbaṭṭhīni katakabījasaṇṭhānāni, satta gīvaṭṭhīni daṇḍe vijjhitvā paṭipāṭiyā ṭhapitavaṃsakaḷīrakhaṇḍasaṇṭhānāni, heṭṭhimahanukaṭṭhi kammārānaṃ ayokūṭayottakasaṇṭhānaṃ, uparimahanukaṭṭhi avalekhanasatthakasaṇṭhānaṃ, akkhināsakūpaṭṭhīni apanītamiñjataruṇatālaṭṭhisaṇṭhānāni , nalāṭaṭṭhi adhomukhaṭhapitabhinnasaṅkhakapālasaṇṭhānaṃ, kaṇṇacūḷikaṭṭhīni nhāpitakhurakosasaṇṭhānāni, nalāṭakaṇṇacūḷikānaṃ upari paṭṭabandhanokāse aṭṭhibahalaghaṭapuṇṇapaṭapilotikakhaṇḍasaṇṭhānaṃ, muddhanaṭṭhi mukhacchinnavaṅkanāḷikerasaṇṭhānaṃ, sīsaṭṭhīni sibbetvā ṭhapitajajjarālābukaṭāhasaṇṭhānānīti. Disato dvīsu disāsu jātāni.

    ওকাসতো অৰিসেসেন সকলসরীরে ঠিতানি, ৰিসেসেন তু সীসট্ঠীনি গীৰট্ঠিকেসু পতিট্ঠিতানি, গীৰট্ঠীনি পিট্ঠিকণ্টকট্ঠীসু পতিট্ঠিতানি, পিট্ঠিকণ্টকট্ঠীনি কটিট্ঠীসু পতিট্ঠিতানি, কটিট্ঠীনি ঊরুট্ঠিকেসু পতিট্ঠিতানি, উরুট্ঠীনি জণ্ণুকট্ঠিকেসু, জণ্ণুকট্ঠীনি জঙ্ঘট্ঠিকেসু, জঙ্ঘট্ঠীনি গোপ্ফকট্ঠিকেসু, গোপ্ফকট্ঠীনি পিট্ঠিপাদট্ঠিকেসু পতিট্ঠিতানি, পিট্ঠিপাদট্ঠিকানি চ গোপ্ফকট্ঠীনি উক্খিপিত্ৰা ঠিতানি, গোপ্ফকট্ঠীনি জঙ্ঘট্ঠীনি…পে॰… গীৰট্ঠীনি সীসট্ঠীনি উক্খিপিত্ৰা ঠিতানীতি এতেনানুসারেন অৰসেসানিপি অট্ঠীনি ৰেদিতব্বানি।

    Okāsato avisesena sakalasarīre ṭhitāni, visesena tu sīsaṭṭhīni gīvaṭṭhikesu patiṭṭhitāni, gīvaṭṭhīni piṭṭhikaṇṭakaṭṭhīsu patiṭṭhitāni, piṭṭhikaṇṭakaṭṭhīni kaṭiṭṭhīsu patiṭṭhitāni, kaṭiṭṭhīni ūruṭṭhikesu patiṭṭhitāni, uruṭṭhīni jaṇṇukaṭṭhikesu, jaṇṇukaṭṭhīni jaṅghaṭṭhikesu, jaṅghaṭṭhīni gopphakaṭṭhikesu, gopphakaṭṭhīni piṭṭhipādaṭṭhikesu patiṭṭhitāni, piṭṭhipādaṭṭhikāni ca gopphakaṭṭhīni ukkhipitvā ṭhitāni, gopphakaṭṭhīni jaṅghaṭṭhīni…pe… gīvaṭṭhīni sīsaṭṭhīni ukkhipitvā ṭhitānīti etenānusārena avasesānipi aṭṭhīni veditabbāni.

    তত্থ যথা ইট্ঠকগোপানসিচযাদীসু ন উপরিমা ইট্ঠকাদযো জানন্তি ‘‘মযং হেট্ঠিমেসু পতিট্ঠিতা’’তি, নপি হেট্ঠিমা জানন্তি ‘‘মযং উপরিমানি উক্খিপিত্ৰা ঠিতা’’তি; এৰমেৰ ন সীসট্ঠিকানি জানন্তি ‘‘মযং গীৰট্ঠিকেসু পতিট্ঠিতানী’’তি…পে॰… ন গোপ্ফকট্ঠিকানি জানন্তি ‘‘মযং পিট্ঠিপাদট্ঠিকেসু পতিট্ঠিতানী’’তি, নপি পিট্ঠিপাদট্ঠিকানি জানন্তি ‘‘মযং গোপ্ফকট্ঠীনি উক্খিপিত্ৰা ঠিতানী’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। কেৰলং তু ইমানি সাধিকানি তীণি অট্ঠিসতানি নৰহি ন্হারুসতেহি নৰহি চ মংসপেসিসতেহি আবদ্ধানুলিত্তানি, একঘনচম্মপরিযোনদ্ধানি, সত্তরসহরণীসহস্সানুগতসিনেহসিনেহিতানি, নৰনৰুতিলোমকূপসহস্সপরিস্সৰমানসেদজল্লিকানি অসীতিকিমিকুলানি, কাযোত্ৰেৰ সঙ্খ্যং গতানি, যং সভাৰতো উপপরিক্খন্তো যোগাৰচরো ন কিঞ্চি গয্হূপগং পস্সতি, কেৰলং তু ন্হারুসম্বন্ধং নানাকুণপসঙ্কিণ্ণং অট্ঠিসঙ্ঘাটমেৰ পস্সতি। যং দিস্ৰা দসবলস্স পুত্তভাৰং উপেতি। যথাহ –

    Tattha yathā iṭṭhakagopānasicayādīsu na uparimā iṭṭhakādayo jānanti ‘‘mayaṃ heṭṭhimesu patiṭṭhitā’’ti, napi heṭṭhimā jānanti ‘‘mayaṃ uparimāni ukkhipitvā ṭhitā’’ti; evameva na sīsaṭṭhikāni jānanti ‘‘mayaṃ gīvaṭṭhikesu patiṭṭhitānī’’ti…pe… na gopphakaṭṭhikāni jānanti ‘‘mayaṃ piṭṭhipādaṭṭhikesu patiṭṭhitānī’’ti, napi piṭṭhipādaṭṭhikāni jānanti ‘‘mayaṃ gopphakaṭṭhīni ukkhipitvā ṭhitānī’’ti. Ābhogapaccavekkhaṇavirahitā hi ete dhammā…pe… na puggaloti. Kevalaṃ tu imāni sādhikāni tīṇi aṭṭhisatāni navahi nhārusatehi navahi ca maṃsapesisatehi ābaddhānulittāni, ekaghanacammapariyonaddhāni, sattarasaharaṇīsahassānugatasinehasinehitāni, navanavutilomakūpasahassaparissavamānasedajallikāni asītikimikulāni, kāyotveva saṅkhyaṃ gatāni, yaṃ sabhāvato upaparikkhanto yogāvacaro na kiñci gayhūpagaṃ passati, kevalaṃ tu nhārusambandhaṃ nānākuṇapasaṅkiṇṇaṃ aṭṭhisaṅghāṭameva passati. Yaṃ disvā dasabalassa puttabhāvaṃ upeti. Yathāha –

    ‘‘পটিপাটিযট্ঠীনি ঠিতানি কোটিযা,

    ‘‘Paṭipāṭiyaṭṭhīni ṭhitāni koṭiyā,

    অনেকসন্ধিযমিতো ন কেহিচি।

    Anekasandhiyamito na kehici;

    বদ্ধো নহারূহি জরায চোদিতো,

    Baddho nahārūhi jarāya codito,

    অচেতনো কট্ঠকলিঙ্গরূপমো॥

    Acetano kaṭṭhakaliṅgarūpamo.

    ‘‘কুণপং কুণপে জাতং, অসুচিম্হি চ পূতিনি।

    ‘‘Kuṇapaṃ kuṇape jātaṃ, asucimhi ca pūtini;

    দুগ্গন্ধে চাপি দুগ্গন্ধং, ভেদনম্হি চ ৰযধম্মং॥

    Duggandhe cāpi duggandhaṃ, bhedanamhi ca vayadhammaṃ.

    ‘‘অট্ঠিপুটে অট্ঠিপুটো, নিব্বত্তো পূতিনি পূতিকাযম্হি।

    ‘‘Aṭṭhipuṭe aṭṭhipuṭo, nibbatto pūtini pūtikāyamhi;

    তম্হি চ ৰিনেথ ছন্দং, হেস্সথ পুত্তা দসবলস্সা’’তি চ॥

    Tamhi ca vinetha chandaṃ, hessatha puttā dasabalassā’’ti ca.

    পরিচ্ছেদতো অন্তো অট্ঠিমিঞ্জেন উপরিতো মংসেন অগ্গে মূলে চ অঞ্ঞমঞ্ঞেন পরিচ্ছিন্নানীতি ৰৰত্থপেতি। অযমেতেসং সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং অট্ঠীনি ৰণ্ণাদিতো ৰৰত্থপেতি।

    Paricchedato anto aṭṭhimiñjena uparito maṃsena agge mūle ca aññamaññena paricchinnānīti vavatthapeti. Ayametesaṃ sabhāgaparicchedo, visabhāgaparicchedo pana kesasadiso evāti evaṃ aṭṭhīni vaṇṇādito vavatthapeti.

    ততো পরং সরীরে যথাৰুত্তপ্পভেদানং অট্ঠীনং অব্ভন্তরগতং অট্ঠিমিঞ্জং ৰণ্ণতো সেতন্তি ৰৰত্থপেতি। সণ্ঠানতো অত্তনো ওকাসসণ্ঠানন্তি। সেয্যথিদং – মহন্তমহন্তানং অট্ঠীনং অব্ভন্তরগতং সেদেত্ৰা ৰট্টেত্ৰা মহন্তেসু ৰংসনল়কপব্বেসু পক্খিত্তমহাৰেত্তঙ্কুরসণ্ঠানং, খুদ্দানুখুদ্দকানং অব্ভন্তরগতং সেদেত্ৰা ৰট্টেত্ৰা খুদ্দানুখুদ্দকেসু ৰংসনল়কপব্বেসু পক্খিত্ততনুৰেত্তঙ্কুরসণ্ঠানন্তি। দিসতো দ্ৰীসু দিসাসু জাতং। ওকাসতো অট্ঠীনং অব্ভন্তরে পতিট্ঠিতন্তি।

    Tato paraṃ sarīre yathāvuttappabhedānaṃ aṭṭhīnaṃ abbhantaragataṃ aṭṭhimiñjaṃ vaṇṇato setanti vavatthapeti. Saṇṭhānato attano okāsasaṇṭhānanti. Seyyathidaṃ – mahantamahantānaṃ aṭṭhīnaṃ abbhantaragataṃ sedetvā vaṭṭetvā mahantesu vaṃsanaḷakapabbesu pakkhittamahāvettaṅkurasaṇṭhānaṃ, khuddānukhuddakānaṃ abbhantaragataṃ sedetvā vaṭṭetvā khuddānukhuddakesu vaṃsanaḷakapabbesu pakkhittatanuvettaṅkurasaṇṭhānanti. Disato dvīsu disāsu jātaṃ. Okāsato aṭṭhīnaṃ abbhantare patiṭṭhitanti.

    তত্থ যথা ৰেল়ুনল়কাদীনং অন্তোগতানি দধিফাণিতানি ন জানন্তি ‘‘মযং ৰেল়ুনল়কাদীনং অন্তোগতানী’’তি, নপি ৰেল়ুনল়কাদযো জানন্তি ‘‘দধিফাণিতানি অম্হাকং অন্তোগতানী’’তি; এৰমেৰ ন অট্ঠিমিঞ্জং জানাতি ‘‘অহং অট্ঠীনং অন্তোগত’’ন্তি, নপি অট্ঠীনি জানন্তি ‘‘অট্ঠিমিঞ্জং অম্হাকং অন্তোগত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো অট্ঠীনং অব্ভন্তরতলেহি অট্ঠিমিঞ্জভাগেন চ পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং অট্ঠিমিঞ্জং ৰণ্ণাদিতো ৰৰত্থপেতি।

    Tattha yathā veḷunaḷakādīnaṃ antogatāni dadhiphāṇitāni na jānanti ‘‘mayaṃ veḷunaḷakādīnaṃ antogatānī’’ti, napi veḷunaḷakādayo jānanti ‘‘dadhiphāṇitāni amhākaṃ antogatānī’’ti; evameva na aṭṭhimiñjaṃ jānāti ‘‘ahaṃ aṭṭhīnaṃ antogata’’nti, napi aṭṭhīni jānanti ‘‘aṭṭhimiñjaṃ amhākaṃ antogata’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato aṭṭhīnaṃ abbhantaratalehi aṭṭhimiñjabhāgena ca paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ aṭṭhimiñjaṃ vaṇṇādito vavatthapeti.

    ততো পরং সরীরস্স অব্ভন্তরে দ্ৰিগোল়কপ্পভেদং ৰক্কং ৰণ্ণতো মন্দরত্তং পাল়িভদ্দকট্ঠিৰণ্ণন্তি ৰৰত্থপেতি। সণ্ঠানতো গামদারকানং সুত্তাৰুতকীল়াগোল়কসণ্ঠানং, একৰণ্টসহকারদ্ৰযসণ্ঠানন্তিপি একে। দিসতো উপরিমায দিসায জাতং। ওকাসতো গলৰাটকা ৰিনিক্খন্তেন একমূলেন থোকং গন্ত্ৰা দ্ৰিধা ভিন্নেন থূলন্হারুনা ৰিনিবদ্ধং হুত্ৰা হদযমংসং পরিক্খিপিত্ৰা ঠিতন্তি।

    Tato paraṃ sarīrassa abbhantare dvigoḷakappabhedaṃ vakkaṃ vaṇṇato mandarattaṃ pāḷibhaddakaṭṭhivaṇṇanti vavatthapeti. Saṇṭhānato gāmadārakānaṃ suttāvutakīḷāgoḷakasaṇṭhānaṃ, ekavaṇṭasahakāradvayasaṇṭhānantipi eke. Disato uparimāya disāya jātaṃ. Okāsato galavāṭakā vinikkhantena ekamūlena thokaṃ gantvā dvidhā bhinnena thūlanhārunā vinibaddhaṃ hutvā hadayamaṃsaṃ parikkhipitvā ṭhitanti.

    তত্থ যথা ৰণ্টূপনিবদ্ধং সহকারদ্ৰযং ন জানাতি ‘‘অহং ৰণ্টেন উপনিবদ্ধ’’ন্তি, নপি ৰণ্টং জানাতি ‘‘মযা সহকারদ্ৰযং উপনিবদ্ধ’’ন্তি; এৰমেৰ ন ৰক্কং জানাতি ‘‘অহং থূলন্হারুনা উপনিবদ্ধ’’ন্তি, নপি থূলন্হারু জানাতি ‘‘মযা ৰক্কং উপনিবদ্ধ’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো ৰক্কং ৰক্কভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং ৰক্কং ৰণ্ণাদিতো ৰৰত্থপেতি।

    Tattha yathā vaṇṭūpanibaddhaṃ sahakāradvayaṃ na jānāti ‘‘ahaṃ vaṇṭena upanibaddha’’nti, napi vaṇṭaṃ jānāti ‘‘mayā sahakāradvayaṃ upanibaddha’’nti; evameva na vakkaṃ jānāti ‘‘ahaṃ thūlanhārunā upanibaddha’’nti, napi thūlanhāru jānāti ‘‘mayā vakkaṃ upanibaddha’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato vakkaṃ vakkabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ vakkaṃ vaṇṇādito vavatthapeti.

    ততো পরং সরীরস্স অব্ভন্তরে হদযং ৰণ্ণতো রত্তং রত্তপদুমপত্তপিট্ঠিৰণ্ণন্তি ৰৰত্থপেতি। সণ্ঠানতো বাহিরপত্তানি অপনেত্ৰা অধোমুখঠপিতপদুমমকুল়সণ্ঠানং, তঞ্চ অগ্গচ্ছিন্নপুন্নাগফলমিৰ ৰিৰটেকপস্সং বহি মট্ঠং অন্তো কোসাতকীফলস্স অব্ভন্তরসদিসং। পঞ্ঞাবহুলানং থোকং ৰিকসিতং, মন্দপঞ্ঞানং মকুল়িতমেৰ। যং রূপং নিস্সায মনোধাতু চ মনোৰিঞ্ঞাণধাতু চ পৰত্তন্তি, তং অপনেত্ৰা অৰসেসমংসপিণ্ডসঙ্খাতহদযব্ভন্তরে অদ্ধপসতমত্তং লোহিতং সণ্ঠাতি, তং রাগচরিতস্স রত্তং, দোসচরিতস্স কাল়কং, মোহচরিতস্স মংসধোৰনোদকসদিসং, ৰিতক্কচরিতস্স কুলত্থযূসৰণ্ণং, সদ্ধাচরিতস্স কণিকারপুপ্ফৰণ্ণং, পঞ্ঞাচরিতস্স অচ্ছং ৰিপ্পসন্নমনাৰিলং, নিদ্ধোতজাতিমণি ৰিয জুতিমন্তং খাযতি। দিসতো উপরিমায দিসায জাতং। ওকাসতো সরীরব্ভন্তরে দ্ৰিন্নং থনানং মজ্ঝে পতিট্ঠিতন্তি।

    Tato paraṃ sarīrassa abbhantare hadayaṃ vaṇṇato rattaṃ rattapadumapattapiṭṭhivaṇṇanti vavatthapeti. Saṇṭhānato bāhirapattāni apanetvā adhomukhaṭhapitapadumamakuḷasaṇṭhānaṃ, tañca aggacchinnapunnāgaphalamiva vivaṭekapassaṃ bahi maṭṭhaṃ anto kosātakīphalassa abbhantarasadisaṃ. Paññābahulānaṃ thokaṃ vikasitaṃ, mandapaññānaṃ makuḷitameva. Yaṃ rūpaṃ nissāya manodhātu ca manoviññāṇadhātu ca pavattanti, taṃ apanetvā avasesamaṃsapiṇḍasaṅkhātahadayabbhantare addhapasatamattaṃ lohitaṃ saṇṭhāti, taṃ rāgacaritassa rattaṃ, dosacaritassa kāḷakaṃ, mohacaritassa maṃsadhovanodakasadisaṃ, vitakkacaritassa kulatthayūsavaṇṇaṃ, saddhācaritassa kaṇikārapupphavaṇṇaṃ, paññācaritassa acchaṃ vippasannamanāvilaṃ, niddhotajātimaṇi viya jutimantaṃ khāyati. Disato uparimāya disāya jātaṃ. Okāsato sarīrabbhantare dvinnaṃ thanānaṃ majjhe patiṭṭhitanti.

    তত্থ যথা দ্ৰিন্নং ৰাতপানকৰাটকানং মজ্ঝে ঠিতো অগ্গল়ত্থম্ভকো ন জানাতি ‘‘অহং দ্ৰিন্নং ৰাতপানকৰাটকানং মজ্ঝে ঠিতো’’তি, নপি ৰাতপানকৰাটকানি জানন্তি ‘‘অম্হাকং মজ্ঝে অগ্গল়ত্থম্ভকো ঠিতো’’তি; এৰমেৰং ন হদযং জানাতি ‘‘অহং দ্ৰিন্নং থনানং মজ্ঝে ঠিত’’ন্তি, নপি থনানি জানন্তি ‘‘হদযং অম্হাকং মজ্ঝে ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো হদযং হদযভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং হদযং ৰণ্ণাদিতো ৰৰত্থপেতি।

    Tattha yathā dvinnaṃ vātapānakavāṭakānaṃ majjhe ṭhito aggaḷatthambhako na jānāti ‘‘ahaṃ dvinnaṃ vātapānakavāṭakānaṃ majjhe ṭhito’’ti, napi vātapānakavāṭakāni jānanti ‘‘amhākaṃ majjhe aggaḷatthambhako ṭhito’’ti; evamevaṃ na hadayaṃ jānāti ‘‘ahaṃ dvinnaṃ thanānaṃ majjhe ṭhita’’nti, napi thanāni jānanti ‘‘hadayaṃ amhākaṃ majjhe ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato hadayaṃ hadayabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ hadayaṃ vaṇṇādito vavatthapeti.

    ততো পরং সরীরস্স অব্ভন্তরে যকনসঞ্ঞিতং যমকমংসপিণ্ডং ৰণ্ণতো রত্তং রত্তকুমুদবাহিরপত্তপিট্ঠিৰণ্ণন্তি ৰৰত্থপেতি। সণ্ঠানতো একমূলং হুত্ৰা অগ্গে যমকং কোৰিল়ারপত্তসণ্ঠানং, তঞ্চ দন্ধানং একংযেৰ হোতি মহন্তং, পঞ্ঞৰন্তানং দ্ৰে ৰা তীণি ৰা খুদ্দকানীতি। দিসতো উপরিমায দিসায জাতং। ওকাসতো দ্ৰিন্নং থনানং অব্ভন্তরে দক্খিণপস্সং নিস্সায ঠিতন্তি।

    Tato paraṃ sarīrassa abbhantare yakanasaññitaṃ yamakamaṃsapiṇḍaṃ vaṇṇato rattaṃ rattakumudabāhirapattapiṭṭhivaṇṇanti vavatthapeti. Saṇṭhānato ekamūlaṃ hutvā agge yamakaṃ koviḷārapattasaṇṭhānaṃ, tañca dandhānaṃ ekaṃyeva hoti mahantaṃ, paññavantānaṃ dve vā tīṇi vā khuddakānīti. Disato uparimāya disāya jātaṃ. Okāsato dvinnaṃ thanānaṃ abbhantare dakkhiṇapassaṃ nissāya ṭhitanti.

    তত্থ যথা পিঠরকপস্সে লগ্গা মংসপেসি ন জানাতি ‘‘অহং পিঠরকপস্সে লগ্গা’’তি, নপি পিঠরকপস্সং জানাতি ‘‘মযি মংসপেসি লগ্গা’’তি; এৰমেৰ ন যকনং জানাতি ‘‘অহং দ্ৰিন্নং থনানং অব্ভন্তরে দক্খিণপস্সং নিস্সায ঠিত’’ন্তি, নপি থনানং অব্ভন্তরে দক্খিণপস্সং জানাতি ‘‘মং নিস্সায যকনং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো পন যকনং যকনভাগেন পরিচ্ছিন্নন্তি ৰৰত্থপেতি । অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং যকনং ৰণ্ণাদিতো ৰৰত্থপেতি।

    Tattha yathā piṭharakapasse laggā maṃsapesi na jānāti ‘‘ahaṃ piṭharakapasse laggā’’ti, napi piṭharakapassaṃ jānāti ‘‘mayi maṃsapesi laggā’’ti; evameva na yakanaṃ jānāti ‘‘ahaṃ dvinnaṃ thanānaṃ abbhantare dakkhiṇapassaṃ nissāya ṭhita’’nti, napi thanānaṃ abbhantare dakkhiṇapassaṃ jānāti ‘‘maṃ nissāya yakanaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato pana yakanaṃ yakanabhāgena paricchinnanti vavatthapeti . Ayametassa sabhāgaparicchedo, visabhāgaparicchedo pana kesasadiso evāti evaṃ yakanaṃ vaṇṇādito vavatthapeti.

    ততো পরং সরীরে পটিচ্ছন্নাপটিচ্ছন্নভেদতো দুৰিধং কিলোমকং ৰণ্ণতো সেতং দুকূলপিলোতিকৰণ্ণন্তি ৰৰত্থপেতি। সণ্ঠানতো অত্তনো ওকাসসণ্ঠানং। দিসতো দ্ৰীসু দিসাসু জাতং। ওকাসতো পটিচ্ছন্নকিলোমকং হদযঞ্চ ৰক্কঞ্চ পরিৰারেত্ৰা, অপ্পটিচ্ছন্নকিলোমকং সকলসরীরে চম্মস্স হেট্ঠতো মংসং পরিযোনন্ধিত্ৰা ঠিতন্তি।

    Tato paraṃ sarīre paṭicchannāpaṭicchannabhedato duvidhaṃ kilomakaṃ vaṇṇato setaṃ dukūlapilotikavaṇṇanti vavatthapeti. Saṇṭhānato attano okāsasaṇṭhānaṃ. Disato dvīsu disāsu jātaṃ. Okāsato paṭicchannakilomakaṃ hadayañca vakkañca parivāretvā, appaṭicchannakilomakaṃ sakalasarīre cammassa heṭṭhato maṃsaṃ pariyonandhitvā ṭhitanti.

    তত্থ যথা পিলোতিকায পলিৰেঠিতে মংসে ন পিলোতিকা জানাতি ‘‘মযা মংসং পলিৰেঠিত’’ন্তি, নপি মংসং জানাতি ‘‘অহং পিলোতিকায পলিৰেঠিত’’ন্তি; এৰমেৰ ন কিলোমকং জানাতি ‘‘মযা হদযৰক্কানি সকলসরীরে চ চম্মস্স হেট্ঠতো মংসং পলিৰেঠিত’’ন্তি। নপি হদযৰক্কানি সকলসরীরে চ মংসং জানাতি ‘‘অহং কিলোমকেন পলিৰেঠিত’’ন্তি । আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো হেট্ঠা মংসেন উপরি চম্মেন তিরিযং কিলোমকভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং কিলোমকং ৰণ্ণাদিতো ৰৰত্থপেতি।

    Tattha yathā pilotikāya paliveṭhite maṃse na pilotikā jānāti ‘‘mayā maṃsaṃ paliveṭhita’’nti, napi maṃsaṃ jānāti ‘‘ahaṃ pilotikāya paliveṭhita’’nti; evameva na kilomakaṃ jānāti ‘‘mayā hadayavakkāni sakalasarīre ca cammassa heṭṭhato maṃsaṃ paliveṭhita’’nti. Napi hadayavakkāni sakalasarīre ca maṃsaṃ jānāti ‘‘ahaṃ kilomakena paliveṭhita’’nti . Ābhogapaccavekkhaṇavirahitā hi ete dhammā…pe… na puggaloti. Paricchedato heṭṭhā maṃsena upari cammena tiriyaṃ kilomakabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ kilomakaṃ vaṇṇādito vavatthapeti.

    ততো পরং সরীরস্স অব্ভন্তরে পিহকং ৰণ্ণতো নীলং মীলাতনিগ্গুণ্ডীপুপ্ফৰণ্ণন্তি ৰৰত্থপেতি। সণ্ঠানতো যেভুয্যেন সত্তঙ্গুলপ্পমাণং অবন্ধনং কাল়ৰচ্ছকজিৰ্হাসণ্ঠানং। দিসতো উপরিমায দিসায জাতং। ওকাসতো হদযস্স ৰামপস্সে উদরপটলস্স মত্থকপস্সং নিস্সায ঠিতং, যম্হি পহরণপহারেন বহি নিক্খন্তে সত্তানং জীৰিতক্খযো হোতীতি।

    Tato paraṃ sarīrassa abbhantare pihakaṃ vaṇṇato nīlaṃ mīlātanigguṇḍīpupphavaṇṇanti vavatthapeti. Saṇṭhānato yebhuyyena sattaṅgulappamāṇaṃ abandhanaṃ kāḷavacchakajivhāsaṇṭhānaṃ. Disato uparimāya disāya jātaṃ. Okāsato hadayassa vāmapasse udarapaṭalassa matthakapassaṃ nissāya ṭhitaṃ, yamhi paharaṇapahārena bahi nikkhante sattānaṃ jīvitakkhayo hotīti.

    তত্থ যথা কোট্ঠকমত্থকপস্সং নিস্সায ঠিতা ন গোমযপিণ্ডি জানাতি ‘‘অহং কোট্ঠকমত্থকপস্সং নিস্সায ঠিতা’’তি, নপি কোট্ঠকমত্থকপস্সং জানাতি ‘‘গোমযপিণ্ডি মং নিস্সায ঠিতা’’তি; এৰমেৰ ন পিহকং জানাতি ‘‘অহং উদরপটলস্স মত্থকপস্সং নিস্সায ঠিত’’ন্তি, নপি উদরপটলস্স মত্থকপস্সং জানাতি ‘‘পিহকং মং নিস্সায ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো পিহকং পিহকভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং পিহকং ৰণ্ণাদিতো ৰৰত্থপেতি।

    Tattha yathā koṭṭhakamatthakapassaṃ nissāya ṭhitā na gomayapiṇḍi jānāti ‘‘ahaṃ koṭṭhakamatthakapassaṃ nissāya ṭhitā’’ti, napi koṭṭhakamatthakapassaṃ jānāti ‘‘gomayapiṇḍi maṃ nissāya ṭhitā’’ti; evameva na pihakaṃ jānāti ‘‘ahaṃ udarapaṭalassa matthakapassaṃ nissāya ṭhita’’nti, napi udarapaṭalassa matthakapassaṃ jānāti ‘‘pihakaṃ maṃ nissāya ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato pihakaṃ pihakabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ pihakaṃ vaṇṇādito vavatthapeti.

    ততো পরং সরীরস্স অব্ভন্তরে দ্ৰত্তিংসমংসখণ্ডপ্পভেদং পপ্ফাসং ৰণ্ণতো রত্তং নাতিপরিপক্কউদুম্বরৰণ্ণন্তি ৰৰত্থপেতি। সণ্ঠানতো ৰিসমচ্ছিন্নপূৰসণ্ঠানং, ছদনিট্ঠকখণ্ডপুঞ্জসণ্ঠানন্তিপি একে। তদেতং অব্ভন্তরে অসিতপীতাদীনং অভাৰে উগ্গতেন কম্মজতেজুস্মনা অব্ভাহতত্তা সঙ্খাদিতপলালপিণ্ডমিৰ নিরসং নিরোজং হোতি। দিসতো উপরিমায দিসায জাতং। ওকাসতো সরীরব্ভন্তরে দ্ৰিন্নং থনানং অব্ভন্তরে হদযঞ্চ যকনঞ্চ উপরি ছাদেত্ৰা ওলম্বন্তং ঠিতন্তি।

    Tato paraṃ sarīrassa abbhantare dvattiṃsamaṃsakhaṇḍappabhedaṃ papphāsaṃ vaṇṇato rattaṃ nātiparipakkaudumbaravaṇṇanti vavatthapeti. Saṇṭhānato visamacchinnapūvasaṇṭhānaṃ, chadaniṭṭhakakhaṇḍapuñjasaṇṭhānantipi eke. Tadetaṃ abbhantare asitapītādīnaṃ abhāve uggatena kammajatejusmanā abbhāhatattā saṅkhāditapalālapiṇḍamiva nirasaṃ nirojaṃ hoti. Disato uparimāya disāya jātaṃ. Okāsato sarīrabbhantare dvinnaṃ thanānaṃ abbhantare hadayañca yakanañca upari chādetvā olambantaṃ ṭhitanti.

    তত্থ যথা জিণ্ণকোট্ঠব্ভন্তরে লম্বমানো সকুণকুলাৰকো ন জানাতি ‘‘অহং জিণ্ণকোট্ঠব্ভন্তরে লম্বমানো ঠিতো’’তি, নপি জিণ্ণকোট্ঠব্ভন্তরং জানাতি ‘‘সকুণকুলাৰকো মযি লম্বমানো ঠিতো’’তি; এৰমেৰ ন পপ্ফাসং জানাতি ‘‘অহং সরীরব্ভন্তরে দ্ৰিন্নং থনানং অন্তরে লম্বমানং ঠিত’’ন্তি, নপি সরীরব্ভন্তরে দ্ৰিন্নং থনানং অন্তরং জানাতি ‘‘মযি পপ্ফাসং লম্বমানং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো পপ্ফাসং পপ্ফাসভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং পপ্ফাসং ৰণ্ণাদিতো ৰৰত্থপেতি।

    Tattha yathā jiṇṇakoṭṭhabbhantare lambamāno sakuṇakulāvako na jānāti ‘‘ahaṃ jiṇṇakoṭṭhabbhantare lambamāno ṭhito’’ti, napi jiṇṇakoṭṭhabbhantaraṃ jānāti ‘‘sakuṇakulāvako mayi lambamāno ṭhito’’ti; evameva na papphāsaṃ jānāti ‘‘ahaṃ sarīrabbhantare dvinnaṃ thanānaṃ antare lambamānaṃ ṭhita’’nti, napi sarīrabbhantare dvinnaṃ thanānaṃ antaraṃ jānāti ‘‘mayi papphāsaṃ lambamānaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato papphāsaṃ papphāsabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ papphāsaṃ vaṇṇādito vavatthapeti.

    ততো পরং অন্তোসরীরে পুরিসস্স দ্ৰত্তিংসহত্থং, ইত্থিযা অট্ঠৰীসতিহত্থং, একৰীসতিযা ঠানেসু ওভগ্গং অন্তং ৰণ্ণতো সেতং সক্খরসুধাৰণ্ণন্তি ৰৰত্থপেতি। সণ্ঠানতো সীসং ছিন্দিত্ৰা লোহিতদোণিযং সংৰেল্লেত্ৰা ঠপিতধম্মনিসণ্ঠানং। দিসতো দ্ৰীসু দিসাসু জাতং। ওকাসতো উপরি গলৰাটকে হেট্ঠা চ করীসমগ্গে ৰিনিবন্ধত্তা গলৰাটককরীসমগ্গপরিযন্তে সরীরব্ভন্তরে ঠিতন্তি।

    Tato paraṃ antosarīre purisassa dvattiṃsahatthaṃ, itthiyā aṭṭhavīsatihatthaṃ, ekavīsatiyā ṭhānesu obhaggaṃ antaṃ vaṇṇato setaṃ sakkharasudhāvaṇṇanti vavatthapeti. Saṇṭhānato sīsaṃ chinditvā lohitadoṇiyaṃ saṃvelletvā ṭhapitadhammanisaṇṭhānaṃ. Disato dvīsu disāsu jātaṃ. Okāsato upari galavāṭake heṭṭhā ca karīsamagge vinibandhattā galavāṭakakarīsamaggapariyante sarīrabbhantare ṭhitanti.

    তত্থ যথা লোহিতদোণিযং ঠপিতং ছিন্নসীসং ধম্মনিকল়েৰরং ন জানাতি ‘‘অহং লোহিতদোণিযং ঠিত’’ন্তি, নপি লোহিতদোণি জানাতি ‘‘মযি ছিন্নসীসং ধম্মনিকল়েৰরং ঠিত’’ন্তি; এৰমেৰ ন অন্তং জানাতি ‘‘অহং সরীরব্ভন্তরে ঠিত’’ন্তি, নপি সরীরব্ভন্তরং জানাতি ‘‘মযি অন্তং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো অন্তং অন্তভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং অন্তং ৰণ্ণাদিতো ৰৰত্থপেতি।

    Tattha yathā lohitadoṇiyaṃ ṭhapitaṃ chinnasīsaṃ dhammanikaḷevaraṃ na jānāti ‘‘ahaṃ lohitadoṇiyaṃ ṭhita’’nti, napi lohitadoṇi jānāti ‘‘mayi chinnasīsaṃ dhammanikaḷevaraṃ ṭhita’’nti; evameva na antaṃ jānāti ‘‘ahaṃ sarīrabbhantare ṭhita’’nti, napi sarīrabbhantaraṃ jānāti ‘‘mayi antaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato antaṃ antabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ antaṃ vaṇṇādito vavatthapeti.

    ততো পরং অন্তোসরীরে অন্তন্তরে অন্তগুণং ৰণ্ণতো সেতং দকসীতলিকমূলৰণ্ণন্তি ৰৰত্থপেতি। সণ্ঠানতো দকসীতলিকমূলসণ্ঠানমেৰাতি, গোমুত্তসণ্ঠানন্তিপি একে। দিসতো দ্ৰীসু দিসাসু জাতং। ওকাসতো কুদালফরসুকম্মাদীনি করোন্তানং যন্তাকড্ঢনকালে যন্তসুত্তকমিৰ যন্তফলকানি অন্তভোগে একতো অগ্গল়ন্তে আবন্ধিত্ৰা পাদপুঞ্ছনরজ্জুমণ্ডলকস্স অন্তরা তং সিব্বিত্ৰা ঠিতরজ্জুকা ৰিয একৰীসতিযা অন্তভোগানং অন্তরা ঠিতন্তি।

    Tato paraṃ antosarīre antantare antaguṇaṃ vaṇṇato setaṃ dakasītalikamūlavaṇṇanti vavatthapeti. Saṇṭhānato dakasītalikamūlasaṇṭhānamevāti, gomuttasaṇṭhānantipi eke. Disato dvīsu disāsu jātaṃ. Okāsato kudālapharasukammādīni karontānaṃ yantākaḍḍhanakāle yantasuttakamiva yantaphalakāni antabhoge ekato aggaḷante ābandhitvā pādapuñchanarajjumaṇḍalakassa antarā taṃ sibbitvā ṭhitarajjukā viya ekavīsatiyā antabhogānaṃ antarā ṭhitanti.

    তত্থ যথা পাদপুঞ্ছনরজ্জুমণ্ডলকং সিব্বিত্ৰা ঠিতরজ্জুকা ন জানাতি ‘‘মযা পাদপুঞ্ছনরজ্জুমণ্ডলকং সিব্বিত’’ন্তি, নপি পাদপুঞ্ছনরজ্জুমণ্ডলকং জানাতি ‘‘রজ্জুকা মং সিব্বিত্ৰা ঠিতা’’তি, এৰমেৰ অন্তগুণং ন জানাতি ‘‘অহং অন্তং একৰীসতিভোগব্ভন্তরে আবন্ধিত্ৰা ঠিত’’ন্তি, নপি অন্তং জানাতি ‘‘অন্তগুণং মং আবন্ধিত্ৰা ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো অন্তগুণং অন্তগুণভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং অন্তগুণং ৰণ্ণাদিতো ৰৰত্থপেতি।

    Tattha yathā pādapuñchanarajjumaṇḍalakaṃ sibbitvā ṭhitarajjukā na jānāti ‘‘mayā pādapuñchanarajjumaṇḍalakaṃ sibbita’’nti, napi pādapuñchanarajjumaṇḍalakaṃ jānāti ‘‘rajjukā maṃ sibbitvā ṭhitā’’ti, evameva antaguṇaṃ na jānāti ‘‘ahaṃ antaṃ ekavīsatibhogabbhantare ābandhitvā ṭhita’’nti, napi antaṃ jānāti ‘‘antaguṇaṃ maṃ ābandhitvā ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato antaguṇaṃ antaguṇabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ antaguṇaṃ vaṇṇādito vavatthapeti.

    ততো পরং অন্তোসরীরে উদরিযং ৰণ্ণতো অজ্ঝোহটাহারৰণ্ণন্তি ৰৰত্থপেতি। সণ্ঠানতো পরিস্সাৰনে সিথিলবদ্ধতণ্ডুলসণ্ঠানং। দিসতো উপরিমায দিসায জাতং। ওকাসতো উদরে ঠিতন্তি । উদরং নাম উভতো নিপ্পীল়িযমানস্স অল্লসাটকস্স মজ্ঝে সঞ্জাতফোটকসদিসং অন্তপটলং, বহি মট্ঠং, অন্তো মংসকসম্বুপলিৰেঠিতং, কিলিট্ঠপাৰারপুপ্ফসদিসং, কুথিতপনসফলস্স অব্ভন্তরসদিসন্তিপি একে। তত্থ তক্কোলকা গণ্ডুপ্পাদকাতালহীরকাসূচিমুখকাপটতন্তুসুত্তকাতি এৰমাদিদ্ৰত্তিংসকুলপ্পভেদা কিমযো আকুলব্যাকুলা সণ্ডসণ্ডচারিনো হুত্ৰা নিৰসন্তি, যে পানভোজনাদিম্হি অৰিজ্জমানে উল্লঙ্ঘিত্ৰা ৰিরৰন্তা হদযমংসং অভিতুদন্তি পানভোজনাদীনি অজ্ঝোহরণৰেলাযঞ্চ উদ্ধংমুখা হুত্ৰা পঠমজ্ঝোহটে দ্ৰে তযো আলোপে তুরিততুরিতা ৰিলুম্পন্তি। যং এতেসং কিমীনং পসূতিঘরং ৰচ্চকুটি গিলানসালা সুসানঞ্চ হোতি, যত্থ সেয্যথাপি নাম চণ্ডালগামদ্ৰারে চন্দনিকায সরদসমযে থূলফুসিতকে দেৰে ৰস্সন্তে উদকেন আৰূল়্হং মুত্তকরীসচম্মট্ঠিন্হারুখণ্ডখেল়সিঙ্ঘাণিকালোহিতপ্পভুতিনানাকুণপজাতং নিপতিত্ৰা কদ্দমোদকালুল়িতং সঞ্জাতকিমিকুলাকুলং হুত্ৰা দ্ৰীহতীহচ্চযেন সূরিযাতপসন্তাপৰেগকুথিতং উপরি ফেণপুপ্ফুল়কে মুঞ্চন্তং অভিনীলৰণ্ণং পরমদুগ্গন্ধজেগুচ্ছং উপগন্তুং ৰা দট্ঠুং ৰা অনরহরূপতং আপজ্জিত্ৰা তিট্ঠতি, পগেৰ ঘাযিতুং ৰা সাযিতুং ৰা; এৰমেৰ নানপ্পকারপানভোজনাদি দন্তমুসলসংচুণ্ণিতং জিৰ্হাহত্থসম্পরিৰত্তিতং খেল়লালাপলিবুদ্ধং তঙ্খণৰিগতৰণ্ণগন্ধরসাদিসম্পদং কোলিযখলিসুৰানৰমথুসদিসং নিপতিত্ৰা পিত্তসেম্হৰাতপলিৰেঠিতং হুত্ৰা উদরগ্গিসন্তাপৰেগকুথিতং কিমিকুলাকুলং উপরূপরি ফেণপুপ্ফুল়কানি মুঞ্চন্তং পরমকসম্বুদুগ্গন্ধজেগুচ্ছভাৰমাপজ্জিত্ৰা তিট্ঠতি। যং সুত্ৰাপি পানভোজনাদীসু অমনুঞ্ঞতা সণ্ঠাতি, পগেৰ পঞ্ঞাচক্খুনা ওলোকেত্ৰা। যত্থ চ পতিতং পানভোজনাদি পঞ্চধা ৰিৰেকং গচ্ছতি, একং ভাগং পাণকা খাদন্তি, একং ভাগং উদরগ্গি ঝাপেতি, একো ভাগো মুত্তং হোতি, একো ভাগো করীসং হোতি, একো ভাগো রসভাৰং আপজ্জিত্ৰা সোণিতমংসাদীনি উপব্রূহযতীতি।

    Tato paraṃ antosarīre udariyaṃ vaṇṇato ajjhohaṭāhāravaṇṇanti vavatthapeti. Saṇṭhānato parissāvane sithilabaddhataṇḍulasaṇṭhānaṃ. Disato uparimāya disāya jātaṃ. Okāsato udare ṭhitanti . Udaraṃ nāma ubhato nippīḷiyamānassa allasāṭakassa majjhe sañjātaphoṭakasadisaṃ antapaṭalaṃ, bahi maṭṭhaṃ, anto maṃsakasambupaliveṭhitaṃ, kiliṭṭhapāvārapupphasadisaṃ, kuthitapanasaphalassa abbhantarasadisantipi eke. Tattha takkolakā gaṇḍuppādakātālahīrakāsūcimukhakāpaṭatantusuttakāti evamādidvattiṃsakulappabhedā kimayo ākulabyākulā saṇḍasaṇḍacārino hutvā nivasanti, ye pānabhojanādimhi avijjamāne ullaṅghitvā viravantā hadayamaṃsaṃ abhitudanti pānabhojanādīni ajjhoharaṇavelāyañca uddhaṃmukhā hutvā paṭhamajjhohaṭe dve tayo ālope turitaturitā vilumpanti. Yaṃ etesaṃ kimīnaṃ pasūtigharaṃ vaccakuṭi gilānasālā susānañca hoti, yattha seyyathāpi nāma caṇḍālagāmadvāre candanikāya saradasamaye thūlaphusitake deve vassante udakena āvūḷhaṃ muttakarīsacammaṭṭhinhārukhaṇḍakheḷasiṅghāṇikālohitappabhutinānākuṇapajātaṃ nipatitvā kaddamodakāluḷitaṃ sañjātakimikulākulaṃ hutvā dvīhatīhaccayena sūriyātapasantāpavegakuthitaṃ upari pheṇapupphuḷake muñcantaṃ abhinīlavaṇṇaṃ paramaduggandhajegucchaṃ upagantuṃ vā daṭṭhuṃ vā anaraharūpataṃ āpajjitvā tiṭṭhati, pageva ghāyituṃ vā sāyituṃ vā; evameva nānappakārapānabhojanādi dantamusalasaṃcuṇṇitaṃ jivhāhatthasamparivattitaṃ kheḷalālāpalibuddhaṃ taṅkhaṇavigatavaṇṇagandharasādisampadaṃ koliyakhalisuvānavamathusadisaṃ nipatitvā pittasemhavātapaliveṭhitaṃ hutvā udaraggisantāpavegakuthitaṃ kimikulākulaṃ uparūpari pheṇapupphuḷakāni muñcantaṃ paramakasambuduggandhajegucchabhāvamāpajjitvā tiṭṭhati. Yaṃ sutvāpi pānabhojanādīsu amanuññatā saṇṭhāti, pageva paññācakkhunā oloketvā. Yattha ca patitaṃ pānabhojanādi pañcadhā vivekaṃ gacchati, ekaṃ bhāgaṃ pāṇakā khādanti, ekaṃ bhāgaṃ udaraggi jhāpeti, eko bhāgo muttaṃ hoti, eko bhāgo karīsaṃ hoti, eko bhāgo rasabhāvaṃ āpajjitvā soṇitamaṃsādīni upabrūhayatīti.

    তত্থ যথা পরমজেগুচ্ছায সুৰানদোণিযা ঠিতো সুৰানৰমথু ন জানাতি ‘‘অহং সুৰানদোণিযা ঠিতো’’তি; নপি সুৰানদোণি জানাতি ‘‘মযি সুৰানৰমথু ঠিতো’’তি। এৰমেৰ ন উদরিযং জানাতি ‘‘অহং ইমস্মিং পরমদুগ্গন্ধজেগুচ্ছে উদরে ঠিত’’ন্তি; নপি উদরং জানাতি ‘‘মযি উদরিযং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি । পরিচ্ছেদতো উদরিযং উদরিযভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং উদরিযং ৰণ্ণাদিতো ৰৰত্থপেতি।

    Tattha yathā paramajegucchāya suvānadoṇiyā ṭhito suvānavamathu na jānāti ‘‘ahaṃ suvānadoṇiyā ṭhito’’ti; napi suvānadoṇi jānāti ‘‘mayi suvānavamathu ṭhito’’ti. Evameva na udariyaṃ jānāti ‘‘ahaṃ imasmiṃ paramaduggandhajegucche udare ṭhita’’nti; napi udaraṃ jānāti ‘‘mayi udariyaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti . Paricchedato udariyaṃ udariyabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ udariyaṃ vaṇṇādito vavatthapeti.

    ততো পরং অন্তোসরীরে করীসং ৰণ্ণতো যেভুয্যেন অজ্ঝোহটাহারৰণ্ণন্তি ৰৰত্থপেতি। সণ্ঠানতো ওকাসসণ্ঠানং, দিসতো হেট্ঠিমায দিসায জাতং, ওকাসতো পক্কাসযে ঠিতন্তি। পক্কাসযো নাম হেট্ঠা নাভিপিট্ঠিকণ্টকমূলানং অন্তরে অন্তাৰসানে উব্বেধেন অট্ঠঙ্গুলমত্তো ৰংসনল়কব্ভন্তরসদিসো পদেসো, যত্থ সেয্যথাপি নাম উপরিভূমিভাগে পতিতং ৰস্সোদকং ওগল়িত্ৰা হেট্ঠাভূমিভাগং পূরেত্ৰা তিট্ঠতি, এৰমেৰ যংকিঞ্চি আমাসযে পতিতং পানভোজনাদিকং উদরগ্গিনা ফেণুদ্দেহকং পক্কং পক্কং সণ্হকরণিযা পিট্ঠমিৰ সণ্হভাৰং আপজ্জিত্ৰা অন্তবিলেন ওগল়িত্ৰা ওমদ্দিত্ৰা ৰংসনল়কে পক্খিত্তপণ্ডুমত্তিকা ৰিয সন্নিচিতং হুত্ৰা তিট্ঠতি।

    Tato paraṃ antosarīre karīsaṃ vaṇṇato yebhuyyena ajjhohaṭāhāravaṇṇanti vavatthapeti. Saṇṭhānato okāsasaṇṭhānaṃ, disato heṭṭhimāya disāya jātaṃ, okāsato pakkāsaye ṭhitanti. Pakkāsayo nāma heṭṭhā nābhipiṭṭhikaṇṭakamūlānaṃ antare antāvasāne ubbedhena aṭṭhaṅgulamatto vaṃsanaḷakabbhantarasadiso padeso, yattha seyyathāpi nāma uparibhūmibhāge patitaṃ vassodakaṃ ogaḷitvā heṭṭhābhūmibhāgaṃ pūretvā tiṭṭhati, evameva yaṃkiñci āmāsaye patitaṃ pānabhojanādikaṃ udaragginā pheṇuddehakaṃ pakkaṃ pakkaṃ saṇhakaraṇiyā piṭṭhamiva saṇhabhāvaṃ āpajjitvā antabilena ogaḷitvā omadditvā vaṃsanaḷake pakkhittapaṇḍumattikā viya sannicitaṃ hutvā tiṭṭhati.

    তত্থ যথা ৰংসনল়কে ওমদ্দিত্ৰা পক্খিত্তপণ্ডুমত্তিকা ন জানাতি ‘‘অহং ৰংসনল়কে ঠিতা’’তি, নপি ৰংসনল়কো জানাতি ‘‘মযি পণ্ডুমত্তিকা ঠিতা’’তি; এৰমেৰ ন করীসং জানাতি ‘‘অহং পক্কাসযে ঠিত’’ন্তি, নপি পক্কাসযো জানাতি ‘‘মযি করীসং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো করীসং করীসভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং করীসং ৰণ্ণাদিতো ৰৰত্থপেতি।

    Tattha yathā vaṃsanaḷake omadditvā pakkhittapaṇḍumattikā na jānāti ‘‘ahaṃ vaṃsanaḷake ṭhitā’’ti, napi vaṃsanaḷako jānāti ‘‘mayi paṇḍumattikā ṭhitā’’ti; evameva na karīsaṃ jānāti ‘‘ahaṃ pakkāsaye ṭhita’’nti, napi pakkāsayo jānāti ‘‘mayi karīsaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato karīsaṃ karīsabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ karīsaṃ vaṇṇādito vavatthapeti.

    ততো পরং সরীরে সীসকটাহব্ভন্তরে মত্থলুঙ্গং ৰণ্ণতো সেতং অহিছত্তকপিণ্ডিৰণ্ণন্তি ৰৰত্থপেতি। পক্কুথিতদুদ্ধৰণ্ণন্তিপি একে। সণ্ঠানতো ওকাসসণ্ঠানং। দিসতো উপরিমায দিসায জাতং। ওকাসতো সীসকটাহস্স অব্ভন্তরে চত্তারো সিব্বিনিমগ্গে নিস্সায সমোধায ঠপিতা চত্তারো পিট্ঠপিণ্ডিকা ৰিয সমোহিতং চতুমত্থলুঙ্গপিণ্ডপ্পভেদং হুত্ৰা ঠিতন্তি।

    Tato paraṃ sarīre sīsakaṭāhabbhantare matthaluṅgaṃ vaṇṇato setaṃ ahichattakapiṇḍivaṇṇanti vavatthapeti. Pakkuthitaduddhavaṇṇantipi eke. Saṇṭhānato okāsasaṇṭhānaṃ. Disato uparimāya disāya jātaṃ. Okāsato sīsakaṭāhassa abbhantare cattāro sibbinimagge nissāya samodhāya ṭhapitā cattāro piṭṭhapiṇḍikā viya samohitaṃ catumatthaluṅgapiṇḍappabhedaṃ hutvā ṭhitanti.

    তত্থ যথা পুরাণলাবুকটাহে পক্খিত্তপিট্ঠপিণ্ডি পক্কুথিতদুদ্ধং ৰা ন জানাতি ‘‘অহং পুরাণলাবুকটাহে ঠিত’’ন্তি, নপি পুরাণলাবুকটাহং জানাতি ‘‘মযি পিট্ঠপিণ্ডি পক্কুথিতদুদ্ধং ৰা ঠিত’’ন্তি; এৰমেৰ ন মত্থলুঙ্গং জানাতি ‘‘অহং সীসকটাহব্ভন্তরে ঠিত’’ন্তি, নপি সীসকটাহব্ভন্তরং জানাতি ‘‘মযি মত্থলুঙ্গং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো মত্থলুঙ্গং মত্থলুঙ্গভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং মত্থলুঙ্গং ৰণ্ণাদিতো ৰৰত্থপেতি।

    Tattha yathā purāṇalābukaṭāhe pakkhittapiṭṭhapiṇḍi pakkuthitaduddhaṃ vā na jānāti ‘‘ahaṃ purāṇalābukaṭāhe ṭhita’’nti, napi purāṇalābukaṭāhaṃ jānāti ‘‘mayi piṭṭhapiṇḍi pakkuthitaduddhaṃ vā ṭhita’’nti; evameva na matthaluṅgaṃ jānāti ‘‘ahaṃ sīsakaṭāhabbhantare ṭhita’’nti, napi sīsakaṭāhabbhantaraṃ jānāti ‘‘mayi matthaluṅgaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato matthaluṅgaṃ matthaluṅgabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ matthaluṅgaṃ vaṇṇādito vavatthapeti.

    ততো পরং সরীরে বদ্ধাবদ্ধভেদতো দুৰিধম্পি পিত্তং ৰণ্ণতো বহলমধুকতেলৰণ্ণন্তি ৰৰত্থপেতি। অবদ্ধপিত্তং মিলাতবকুলপুপ্ফৰণ্ণন্তিপি একে। সণ্ঠানতো ওকাসসণ্ঠানং। দিসতো দ্ৰীসু দিসাসু জাতং। ওকাসতো অবদ্ধপিত্তং কেসলোমনখদন্তানং মংসৰিনিমুত্তট্ঠানং থদ্ধসুক্খচম্মঞ্চ ৰজ্জেত্ৰা উদকমিৰ তেলবিন্দু অৰসেসসরীরং ব্যাপেত্ৰা ঠিতং, যম্হি কুপিতে অক্খীনি পীতকানি হোন্তি ভমন্তি, গত্তং কম্পতি কণ্ডূযতি। বদ্ধপিত্তং হদযপপ্ফাসানমন্তরে যকনমংসং নিস্সায পতিট্ঠিতে মহাকোসাতকিকোসকসদিসে পিত্তকোসকে ঠিতং, যম্হি কুপিতে সত্তা উম্মত্তকা হোন্তি, ৰিপল্লত্থচিত্তা হিরোত্তপ্পং ছড্ডেত্ৰা অকত্তব্বং করোন্তি, অভাসিতব্বং ভাসন্তি, অচিন্তিতব্বং চিন্তেন্তি।

    Tato paraṃ sarīre baddhābaddhabhedato duvidhampi pittaṃ vaṇṇato bahalamadhukatelavaṇṇanti vavatthapeti. Abaddhapittaṃ milātabakulapupphavaṇṇantipi eke. Saṇṭhānato okāsasaṇṭhānaṃ. Disato dvīsu disāsu jātaṃ. Okāsato abaddhapittaṃ kesalomanakhadantānaṃ maṃsavinimuttaṭṭhānaṃ thaddhasukkhacammañca vajjetvā udakamiva telabindu avasesasarīraṃ byāpetvā ṭhitaṃ, yamhi kupite akkhīni pītakāni honti bhamanti, gattaṃ kampati kaṇḍūyati. Baddhapittaṃ hadayapapphāsānamantare yakanamaṃsaṃ nissāya patiṭṭhite mahākosātakikosakasadise pittakosake ṭhitaṃ, yamhi kupite sattā ummattakā honti, vipallatthacittā hirottappaṃ chaḍḍetvā akattabbaṃ karonti, abhāsitabbaṃ bhāsanti, acintitabbaṃ cintenti.

    তত্থ যথা উদকং ব্যাপেত্ৰা ঠিতং তেলং ন জানাতি ‘‘অহং উদকং ব্যাপেত্ৰা ঠিত’’ন্তি, নপি উদকং জানাতি ‘‘তেলং মং ব্যাপেত্ৰা ঠিত’’ন্তি; এৰমেৰ ন অবদ্ধপিত্তং জানাতি ‘‘অহং সরীরং ব্যাপেত্ৰা ঠিত’’ন্তি, নপি সরীরং জানাতি ‘‘অবদ্ধপিত্তং মং ব্যাপেত্ৰা ঠিত’’ন্তি। যথা চ কোসাতকিকোসকে ঠিতং ৰস্সোদকং ন জানাতি ‘‘অহং কোসাতকিকোসকে ঠিত’’ন্তি, নপি কোসাতকিকোসকো জানাতি ‘‘মযি ৰস্সোদকং ঠিত’’ন্তি; এৰমেৰ ন বদ্ধপিত্তং জানাতি ‘‘অহং পিত্তকোসকে ঠিত’’ন্তি, নপি পিত্তকোসকো জানাতি ‘‘মযি বদ্ধপিত্তং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো পিত্তং পিত্তভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং পিত্তং ৰণ্ণাদিতো ৰৰত্থপেতি।

    Tattha yathā udakaṃ byāpetvā ṭhitaṃ telaṃ na jānāti ‘‘ahaṃ udakaṃ byāpetvā ṭhita’’nti, napi udakaṃ jānāti ‘‘telaṃ maṃ byāpetvā ṭhita’’nti; evameva na abaddhapittaṃ jānāti ‘‘ahaṃ sarīraṃ byāpetvā ṭhita’’nti, napi sarīraṃ jānāti ‘‘abaddhapittaṃ maṃ byāpetvā ṭhita’’nti. Yathā ca kosātakikosake ṭhitaṃ vassodakaṃ na jānāti ‘‘ahaṃ kosātakikosake ṭhita’’nti, napi kosātakikosako jānāti ‘‘mayi vassodakaṃ ṭhita’’nti; evameva na baddhapittaṃ jānāti ‘‘ahaṃ pittakosake ṭhita’’nti, napi pittakosako jānāti ‘‘mayi baddhapittaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato pittaṃ pittabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ pittaṃ vaṇṇādito vavatthapeti.

    ততো পরং সরীরব্ভন্তরে একপত্তপূরপ্পমাণং সেম্হং ৰণ্ণতো সেতং কচ্ছকপণ্ণরসৰণ্ণন্তি ৰৰত্থপেতি। সণ্ঠানতো ওকাসসণ্ঠানং। দিসতো উপরিমায দিসায জাতং। ওকাসতো উদরপটলে ঠিতন্তি। যং পানভোজনাদিঅজ্ঝোহরণকালে সেয্যথাপি নাম উদকে সেৰালপণকং কট্ঠে ৰা কথলে ৰা পতন্তে ছিজ্জিত্ৰা দ্ৰিধা হুত্ৰা পুন অজ্ঝোত্থরিত্ৰা তিট্ঠতি, এৰমেৰ পানভোজনাদিম্হি নিপতন্তে ছিজ্জিত্ৰা দ্ৰিধা হুত্ৰা পুন অজ্ঝোত্থরিত্ৰা তিট্ঠতি, যম্হি চ মন্দীভূতে পক্কমিৰ গণ্ডং পূতিকমিৰ কুক্কুটণ্ডং উদরপটলং পরমজেগুচ্ছকুণপগন্ধং হোতি। ততো উগ্গতেন চ গন্ধেন উগ্গারোপি মুখম্পি দুগ্গন্ধং পূতিকুণপসদিসং হোতি, সো চ পুরিসো ‘‘অপেহি দুগ্গন্ধং ৰাযসী’’তি ৰত্তব্বতং আপজ্জতি, যঞ্চ অভিৰড্ঢিতং বহলত্তমাপন্নং পটিকুজ্জনফলকমিৰ ৰচ্চকুটিযা উদরপটলব্ভন্তরে এৰ কুণপগন্ধং সন্নিরুম্ভিত্ৰা তিট্ঠতি।

    Tato paraṃ sarīrabbhantare ekapattapūrappamāṇaṃ semhaṃ vaṇṇato setaṃ kacchakapaṇṇarasavaṇṇanti vavatthapeti. Saṇṭhānato okāsasaṇṭhānaṃ. Disato uparimāya disāya jātaṃ. Okāsato udarapaṭale ṭhitanti. Yaṃ pānabhojanādiajjhoharaṇakāle seyyathāpi nāma udake sevālapaṇakaṃ kaṭṭhe vā kathale vā patante chijjitvā dvidhā hutvā puna ajjhottharitvā tiṭṭhati, evameva pānabhojanādimhi nipatante chijjitvā dvidhā hutvā puna ajjhottharitvā tiṭṭhati, yamhi ca mandībhūte pakkamiva gaṇḍaṃ pūtikamiva kukkuṭaṇḍaṃ udarapaṭalaṃ paramajegucchakuṇapagandhaṃ hoti. Tato uggatena ca gandhena uggāropi mukhampi duggandhaṃ pūtikuṇapasadisaṃ hoti, so ca puriso ‘‘apehi duggandhaṃ vāyasī’’ti vattabbataṃ āpajjati, yañca abhivaḍḍhitaṃ bahalattamāpannaṃ paṭikujjanaphalakamiva vaccakuṭiyā udarapaṭalabbhantare eva kuṇapagandhaṃ sannirumbhitvā tiṭṭhati.

    তত্থ যথা চন্দনিকায উপরিফেণপটলং ন জানাতি ‘‘অহং চন্দনিকায ঠিত’’ন্তি, নপি চন্দনিকা জানাতি ‘‘মযি ফেণপটলং ঠিত’’ন্তি; এৰমেৰ ন সেম্হং জানাতি ‘‘অহং উদরপটলে ঠিত’’ন্তি, নপি উদরপটলং জানাতি ‘‘মযি সেম্হং ঠিতন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো সেম্হং সেম্হভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং সেম্হং ৰণ্ণাদিতো ৰৰত্থপেতি।

    Tattha yathā candanikāya uparipheṇapaṭalaṃ na jānāti ‘‘ahaṃ candanikāya ṭhita’’nti, napi candanikā jānāti ‘‘mayi pheṇapaṭalaṃ ṭhita’’nti; evameva na semhaṃ jānāti ‘‘ahaṃ udarapaṭale ṭhita’’nti, napi udarapaṭalaṃ jānāti ‘‘mayi semhaṃ ṭhitanti. Ābhogapaccavekkhaṇavirahitā hi ete dhammā…pe… na puggaloti. Paricchedato semhaṃ semhabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ semhaṃ vaṇṇādito vavatthapeti.

    ততো পরং সরীরে পুব্বো ৰণ্ণতো পণ্ডুপলাসৰণ্ণোতি ৰৰত্থপেতি। সণ্ঠানতো ওকাসসণ্ঠানো। দিসতো দ্ৰীসু দিসাসু জাতো। ওকাসতো পুব্বস্স ওকাসো নাম নিবদ্ধো নত্থি। যত্থ পুব্বো সন্নিচিতো তিট্ঠেয্য, যত্র যত্র খাণুকণ্টকপ্পহরণগ্গিজালাদীহি অভিহতে সরীরপ্পদেসে লোহিতং সণ্ঠহিত্ৰা পচ্চতি, গণ্ডপিল়কাদযো ৰা উপ্পজ্জন্তি, তত্র তত্র তিট্ঠতি।

    Tato paraṃ sarīre pubbo vaṇṇato paṇḍupalāsavaṇṇoti vavatthapeti. Saṇṭhānato okāsasaṇṭhāno. Disato dvīsu disāsu jāto. Okāsato pubbassa okāso nāma nibaddho natthi. Yattha pubbo sannicito tiṭṭheyya, yatra yatra khāṇukaṇṭakappaharaṇaggijālādīhi abhihate sarīrappadese lohitaṃ saṇṭhahitvā paccati, gaṇḍapiḷakādayo vā uppajjanti, tatra tatra tiṭṭhati.

    তত্থ যথা রুক্খস্স তত্থ তত্থ ফরসুধারাদীহি পহতপ্পদেসে অৰগল়িত্ৰা ঠিতো নিয্যাসো ন জানাতি ‘‘অহং রুক্খস্স পহতপ্পদেসে ঠিতো’’তি, নপি রুক্খস্স পহতপ্পদেসো জানাতি ‘‘মযি নিয্যাসো ঠিতো’’তি; এৰমেৰ ন পুব্বো জানাতি ‘‘অহং সরীরস্স তত্থ তত্থ খাণুকণ্টকাদীহি অভিহতপ্পদেসে গণ্ডপিল়কাদীনং উট্ঠিতপ্পদেসে ৰা ঠিতো’’তি, নপি সরীরপ্পদেসো জানাতি ‘‘মযি পুব্বো ঠিতো’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো পুব্বো পুব্বভাগেন পরিচ্ছিন্নোতি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং পুব্বং ৰণ্ণাদিতো ৰৰত্থপেতি।

    Tattha yathā rukkhassa tattha tattha pharasudhārādīhi pahatappadese avagaḷitvā ṭhito niyyāso na jānāti ‘‘ahaṃ rukkhassa pahatappadese ṭhito’’ti, napi rukkhassa pahatappadeso jānāti ‘‘mayi niyyāso ṭhito’’ti; evameva na pubbo jānāti ‘‘ahaṃ sarīrassa tattha tattha khāṇukaṇṭakādīhi abhihatappadese gaṇḍapiḷakādīnaṃ uṭṭhitappadese vā ṭhito’’ti, napi sarīrappadeso jānāti ‘‘mayi pubbo ṭhito’’ti. Ābhogapaccavekkhaṇavirahitā hi ete dhammā…pe… na puggaloti. Paricchedato pubbo pubbabhāgena paricchinnoti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ pubbaṃ vaṇṇādito vavatthapeti.

    ততো পরং সরীরে সন্নিচিতলোহিতং সংসরণলোহিতন্তি এৰং দুৰিধে লোহিতে সন্নিচিতলোহিতং তাৰ ৰণ্ণতো বহলকুথিতলাখারসৰণ্ণন্তি ৰৰত্থপেতি, সংসরণলোহিতং অচ্ছলাখারসৰণ্ণন্তি। সণ্ঠানতো সব্বম্পি অত্তনো ওকাসসণ্ঠানং। দিসতো সন্নিচিতলোহিতং উপরিমায দিসায জাতং, সংসরণলোহিতং দ্ৰীসুপীতি। ওকাসতো সংসরণলোহিতং কেসলোমনখদন্তানং মংসৰিনিমুত্তট্ঠানঞ্চেৰ থদ্ধসুক্খচম্মঞ্চ ৰজ্জেত্ৰা ধমনিজালানুসারেন সব্বং উপাদিন্নকসরীরং ফরিত্ৰা ঠিতং। সন্নিচিতলোহিতং যকনস্স হেট্ঠাভাগং পূরেত্ৰা একপত্তপূরণমত্তং ৰক্কহদযপপ্ফাসানং উপরি থোকং থোকং বিন্দুং পাতেন্তং ৰক্কহদযযকনপপ্ফাসে তেমেন্তং ঠিতং, যম্হি ৰক্কহদযাদীনি অতেমেন্তে সত্তা পিপাসিতা হোন্তি।

    Tato paraṃ sarīre sannicitalohitaṃ saṃsaraṇalohitanti evaṃ duvidhe lohite sannicitalohitaṃ tāva vaṇṇato bahalakuthitalākhārasavaṇṇanti vavatthapeti, saṃsaraṇalohitaṃ acchalākhārasavaṇṇanti. Saṇṭhānato sabbampi attano okāsasaṇṭhānaṃ. Disato sannicitalohitaṃ uparimāya disāya jātaṃ, saṃsaraṇalohitaṃ dvīsupīti. Okāsato saṃsaraṇalohitaṃ kesalomanakhadantānaṃ maṃsavinimuttaṭṭhānañceva thaddhasukkhacammañca vajjetvā dhamanijālānusārena sabbaṃ upādinnakasarīraṃ pharitvā ṭhitaṃ. Sannicitalohitaṃ yakanassa heṭṭhābhāgaṃ pūretvā ekapattapūraṇamattaṃ vakkahadayapapphāsānaṃ upari thokaṃ thokaṃ binduṃ pātentaṃ vakkahadayayakanapapphāse tementaṃ ṭhitaṃ, yamhi vakkahadayādīni atemente sattā pipāsitā honti.

    তত্থ যথা জজ্জরকপালে ঠিতং উদকং হেট্ঠা লেড্ডুখণ্ডাদীনি তেমেন্তং ন জানাতি ‘‘অহং জজ্জরকপালে ঠিতং হেট্ঠা লেড্ডুখণ্ডাদীনি তেমেমী’’তি, নপি জজ্জরকপালং হেট্ঠা লেড্ডুখণ্ডাদীনি ৰা জানন্তি ‘‘মযি উদকং ঠিতং, অম্হে ৰা তেমেন্তং ঠিত’’ন্তি; এৰমেৰ ন লোহিতং জানাতি ‘‘অহং যকনস্স হেট্ঠাভাগে ৰক্কহদযাদীনি তেমেন্তং ঠিত’’ন্তি, নপি যকনস্স হেট্ঠাভাগট্ঠানং ৰক্কহদযাদীনি ৰা জানন্তি ‘‘মযি লোহিতং ঠিতং, অম্হে ৰা তেমেন্তং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো লোহিতং লোহিতভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং লোহিতং ৰণ্ণাদিতো ৰৰত্থপেতি।

    Tattha yathā jajjarakapāle ṭhitaṃ udakaṃ heṭṭhā leḍḍukhaṇḍādīni tementaṃ na jānāti ‘‘ahaṃ jajjarakapāle ṭhitaṃ heṭṭhā leḍḍukhaṇḍādīni tememī’’ti, napi jajjarakapālaṃ heṭṭhā leḍḍukhaṇḍādīni vā jānanti ‘‘mayi udakaṃ ṭhitaṃ, amhe vā tementaṃ ṭhita’’nti; evameva na lohitaṃ jānāti ‘‘ahaṃ yakanassa heṭṭhābhāge vakkahadayādīni tementaṃ ṭhita’’nti, napi yakanassa heṭṭhābhāgaṭṭhānaṃ vakkahadayādīni vā jānanti ‘‘mayi lohitaṃ ṭhitaṃ, amhe vā tementaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato lohitaṃ lohitabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ lohitaṃ vaṇṇādito vavatthapeti.

    ততো পরং সরীরে সেদো ৰণ্ণতো পসন্নতিলতেলৰণ্ণোতি ৰৰত্থপেতি। সণ্ঠানতো ওকাসসণ্ঠানো। দিসতো দ্ৰীসু দিসাসু জাতো। ওকাসতো সেদস্স ওকাসো নাম নিবদ্ধো নত্থি, যত্থ সেদো লোহিতং ৰিয সদা তিট্ঠেয্য। যস্মা ৰা যদা অগ্গিসন্তাপসূরিযসন্তাপউতুৰিকারাদীহি সরীরং সন্তপতি, অথ উদকতো অব্বূল়্হমত্তৰিসমচ্ছিন্নভিসমুল়ালকুমুদনালকলাপউদকমিৰ সব্বকেসলোমকূপৰিৰরেহি পগ্ঘরতি। তস্মা তেসং কেসলোমকূপৰিৰরানং ৰসেন তং সণ্ঠানতো ৰৰত্থপেতি। ‘‘সেদপরিগ্গণ্হকেন চ যোগাৰচরেন কেসলোমকূপৰিৰরে পূরেত্ৰা ঠিতৰসেনেৰ সেদো মনসিকাতব্বো’’তি ৰুত্তং পুব্বাচরিযেহি।

    Tato paraṃ sarīre sedo vaṇṇato pasannatilatelavaṇṇoti vavatthapeti. Saṇṭhānato okāsasaṇṭhāno. Disato dvīsu disāsu jāto. Okāsato sedassa okāso nāma nibaddho natthi, yattha sedo lohitaṃ viya sadā tiṭṭheyya. Yasmā vā yadā aggisantāpasūriyasantāpautuvikārādīhi sarīraṃ santapati, atha udakato abbūḷhamattavisamacchinnabhisamuḷālakumudanālakalāpaudakamiva sabbakesalomakūpavivarehi paggharati. Tasmā tesaṃ kesalomakūpavivarānaṃ vasena taṃ saṇṭhānato vavatthapeti. ‘‘Sedapariggaṇhakena ca yogāvacarena kesalomakūpavivare pūretvā ṭhitavaseneva sedo manasikātabbo’’ti vuttaṃ pubbācariyehi.

    তত্থ যথা ভিসমুল়ালকুমুদনালকলাপৰিৰরেহি পগ্ঘরন্তং উদকং ন জানাতি ‘‘অহং ভিসমুল়ালকুমুদনালকলাপৰিৰরেহি পগ্ঘরামী’’তি, নপি ভিসমুল়ালকুমুদনালকলাপৰিৰরা জানন্তি ‘‘অম্হেহি উদকং পগ্ঘরতী’’তি; এৰমেৰ ন সেদো জানাতি ‘‘অহং কেসলোমকূপৰিৰরেহি পগ্ঘরামী’’তি, নপি কেসলোমকূপৰিৰরা জানন্তি ‘‘অম্হেহি সেদো পগ্ঘরতী’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো সেদো সেদভাগেন পরিচ্ছিন্নোতি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং সেদং ৰণ্ণাদিতো ৰৰত্থপেতি।

    Tattha yathā bhisamuḷālakumudanālakalāpavivarehi paggharantaṃ udakaṃ na jānāti ‘‘ahaṃ bhisamuḷālakumudanālakalāpavivarehi paggharāmī’’ti, napi bhisamuḷālakumudanālakalāpavivarā jānanti ‘‘amhehi udakaṃ paggharatī’’ti; evameva na sedo jānāti ‘‘ahaṃ kesalomakūpavivarehi paggharāmī’’ti, napi kesalomakūpavivarā jānanti ‘‘amhehi sedo paggharatī’’ti. Ābhogapaccavekkhaṇavirahitā hi ete dhammā…pe… na puggaloti. Paricchedato sedo sedabhāgena paricchinnoti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ sedaṃ vaṇṇādito vavatthapeti.

    ততো পরং সরীরে চম্মমংসন্তরে মেদো ৰণ্ণতো ফালিতহলিদ্দিৰণ্ণোতি ৰৰত্থপেতি। সণ্ঠানতো ওকাসসণ্ঠানো। তথা হি সুখিনো থূলসরীরস্স চম্মমংসন্তরে ফরিত্ৰা ঠিতো হলিদ্দিরত্তদুকূলপিলোতিকসণ্ঠানো, কিসসরীরস্স জঙ্ঘমংসঊরুমংসপিট্ঠিকণ্টকনিস্সিতপিট্ঠিমংসউদরপটলমংসানি নিস্সায সংৰেল্লিত্ৰা ঠপিতহলিদ্দিরত্তদুকূলপিলোতিকখণ্ডসণ্ঠানো। দিসতো দ্ৰীসু দিসাসু জাতো। ওকাসতো থূলসরীরস্স সকলসরীরং ফরিত্ৰা কিসস্স জঙ্ঘামংসাদীনি নিস্সায ঠিতো, যো সিনেহসঙ্খাতোপি হুত্ৰা পরমজেগুচ্ছত্তা ন মত্থকতেলত্থং ন গণ্ডূসতেলত্থং ন দীপজালনত্থং সঙ্গয্হতি।

    Tato paraṃ sarīre cammamaṃsantare medo vaṇṇato phālitahaliddivaṇṇoti vavatthapeti. Saṇṭhānato okāsasaṇṭhāno. Tathā hi sukhino thūlasarīrassa cammamaṃsantare pharitvā ṭhito haliddirattadukūlapilotikasaṇṭhāno, kisasarīrassa jaṅghamaṃsaūrumaṃsapiṭṭhikaṇṭakanissitapiṭṭhimaṃsaudarapaṭalamaṃsāni nissāya saṃvellitvā ṭhapitahaliddirattadukūlapilotikakhaṇḍasaṇṭhāno. Disato dvīsu disāsu jāto. Okāsato thūlasarīrassa sakalasarīraṃ pharitvā kisassa jaṅghāmaṃsādīni nissāya ṭhito, yo sinehasaṅkhātopi hutvā paramajegucchattā na matthakatelatthaṃ na gaṇḍūsatelatthaṃ na dīpajālanatthaṃ saṅgayhati.

    তত্থ যথা মংসপুঞ্জং নিস্সায ঠিতা হলিদ্দিরত্তদুকূলপিলোতিকা ন জানাতি ‘‘অহং মংসপুঞ্জং নিস্সায ঠিতা’’তি, নপি মংসপুঞ্জো জানাতি ‘‘হলিদ্দিরত্তদুকূলপিলোতিকা মং নিস্সায ঠিতা’’তি; এৰমেৰ ন মেদো জানাতি ‘‘অহং সকলসরীরং জঙ্ঘাদীসু ৰা মংসং নিস্সায ঠিতো’’তি, নপি সকলসরীরং জানাতি জঙ্ঘাদীসু ৰা মংসং ‘‘মেদো মং নিস্সায ঠিতো’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো মেদো হেট্ঠা মংসেন, উপরি চম্মেন, সমন্ততো মেদভাগেন পরিচ্ছিন্নোতি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং মেদং ৰণ্ণাদিতো ৰৰত্থপেতি।

    Tattha yathā maṃsapuñjaṃ nissāya ṭhitā haliddirattadukūlapilotikā na jānāti ‘‘ahaṃ maṃsapuñjaṃ nissāya ṭhitā’’ti, napi maṃsapuñjo jānāti ‘‘haliddirattadukūlapilotikā maṃ nissāya ṭhitā’’ti; evameva na medo jānāti ‘‘ahaṃ sakalasarīraṃ jaṅghādīsu vā maṃsaṃ nissāya ṭhito’’ti, napi sakalasarīraṃ jānāti jaṅghādīsu vā maṃsaṃ ‘‘medo maṃ nissāya ṭhito’’ti. Ābhogapaccavekkhaṇavirahitā hi ete dhammā…pe… na puggaloti. Paricchedato medo heṭṭhā maṃsena, upari cammena, samantato medabhāgena paricchinnoti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ medaṃ vaṇṇādito vavatthapeti.

    ততো পরং সরীরে অস্সু ৰণ্ণতো পসন্নতিলতেলৰণ্ণন্তি ৰৰত্থপেতি। সণ্ঠানতো ওকাসসণ্ঠানং। দিসতো উপরিমায দিসায জাতং। ওকাসতো অক্খিকূপকেসু ঠিতন্তি। ন চেতং পিত্তকোসকে পিত্তমিৰ অক্খিকূপকেসু সদা সন্নিচিতং হুত্ৰা তিট্ঠতি, কিন্তু যদা সোমনস্সজাতা সত্তা মহাহসিতং হসন্তি, দোমনস্সজাতা রোদন্তি পরিদেৰন্তি, তথারূপং ৰিসমাহারং ৰা হরন্তি, যদা চ তেসং অক্খীনি ধূমরজপংসুকাদীহি অভিহঞ্ঞন্তি, তদা এতেহি সোমনস্সদোমনস্সৰিসমাহারাদীহি সমুট্ঠহিত্ৰা অস্সু অক্খিকূপকেসু পূরেত্ৰা তিট্ঠতি পগ্ঘরতি চ। ‘‘অস্সুপরিগ্গণ্হকেন চ যোগাৰচরেন অক্খিকূপকে পূরেত্ৰা ঠিতৰসেনেৰ তং মনসিকাতব্ব’’ন্তি পুব্বাচরিযা ৰণ্ণযন্তি।

    Tato paraṃ sarīre assu vaṇṇato pasannatilatelavaṇṇanti vavatthapeti. Saṇṭhānato okāsasaṇṭhānaṃ. Disato uparimāya disāya jātaṃ. Okāsato akkhikūpakesu ṭhitanti. Na cetaṃ pittakosake pittamiva akkhikūpakesu sadā sannicitaṃ hutvā tiṭṭhati, kintu yadā somanassajātā sattā mahāhasitaṃ hasanti, domanassajātā rodanti paridevanti, tathārūpaṃ visamāhāraṃ vā haranti, yadā ca tesaṃ akkhīni dhūmarajapaṃsukādīhi abhihaññanti, tadā etehi somanassadomanassavisamāhārādīhi samuṭṭhahitvā assu akkhikūpakesu pūretvā tiṭṭhati paggharati ca. ‘‘Assupariggaṇhakena ca yogāvacarena akkhikūpake pūretvā ṭhitavaseneva taṃ manasikātabba’’nti pubbācariyā vaṇṇayanti.

    তত্থ যথা মত্থকচ্ছিন্নতরুণতালট্ঠিকূপকেসু ঠিতং উদকং ন জানাতি ‘‘অহং মত্থকচ্ছিন্নতরুণতালট্ঠিকূপকেসু ঠিত’’ন্তি, নপি মত্থকচ্ছিন্নতরুণতালট্ঠিকূপকা জানন্তি ‘‘অম্হেসু উদকং ঠিত’’ন্তি; এৰমেৰ ন অস্সু জানাতি ‘‘অহং অক্খিকূপকেসু ঠিত’’ন্তি, নপি অক্খিকূপকা জানন্তি ‘‘অম্হেসু অস্সু ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো অস্সু অস্সুভাগেন পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং অস্সুং ৰণ্ণাদিতো ৰৰত্থপেতি।

    Tattha yathā matthakacchinnataruṇatālaṭṭhikūpakesu ṭhitaṃ udakaṃ na jānāti ‘‘ahaṃ matthakacchinnataruṇatālaṭṭhikūpakesu ṭhita’’nti, napi matthakacchinnataruṇatālaṭṭhikūpakā jānanti ‘‘amhesu udakaṃ ṭhita’’nti; evameva na assu jānāti ‘‘ahaṃ akkhikūpakesu ṭhita’’nti, napi akkhikūpakā jānanti ‘‘amhesu assu ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato assu assubhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ assuṃ vaṇṇādito vavatthapeti.

    ততো পরং সরীরে ৰিলীনসিনেহসঙ্খাতা ৰসা ৰণ্ণতো আচামে আসিত্ততেলৰণ্ণাতি ৰৰত্থপেতি। সণ্ঠানতো ওকাসসণ্ঠানা। দিসতো দ্ৰীসু দিসাসু জাতা। ওকাসতো হত্থতলহত্থপিট্ঠিপাদতলপাদপিট্ঠিনাসাপুটনলাটঅংসকূটেসু ঠিতাতি। ন চেসা এতেসু ওকাসেসু সদা ৰিলীনা এৰ হুত্ৰা তিট্ঠতি, কিন্তু যদা অগ্গিসন্তাপসূরিযসন্তাপউতুৰিসভাগধাতুৰিসভাগেহি তে পদেসা উস্মাজাতা হোন্তি, তদা তত্থ ৰিলীনাৰ হুত্ৰা পসন্নসলিলাসু উদকসোণ্ডিকাসু নীহারো ৰিয সরতি।

    Tato paraṃ sarīre vilīnasinehasaṅkhātā vasā vaṇṇato ācāme āsittatelavaṇṇāti vavatthapeti. Saṇṭhānato okāsasaṇṭhānā. Disato dvīsu disāsu jātā. Okāsato hatthatalahatthapiṭṭhipādatalapādapiṭṭhināsāpuṭanalāṭaaṃsakūṭesu ṭhitāti. Na cesā etesu okāsesu sadā vilīnā eva hutvā tiṭṭhati, kintu yadā aggisantāpasūriyasantāpautuvisabhāgadhātuvisabhāgehi te padesā usmājātā honti, tadā tattha vilīnāva hutvā pasannasalilāsu udakasoṇḍikāsu nīhāro viya sarati.

    তত্থ যথা উদকসোণ্ডিযো অজ্ঝোত্থরিত্ৰা ঠিতো নীহারো ন জানাতি ‘‘অহং উদকসোণ্ডিযো অজ্ঝোত্থরিত্ৰা ঠিতো’’তি, নপি উদকসোণ্ডিযো জানন্তি ‘‘নীহারো অম্হে অজ্ঝোত্থরিত্ৰা ঠিতো’’তি; এৰমেৰ ন ৰসা জানাতি ‘‘অহং হত্থতলাদীনি অজ্ঝোত্থরিত্ৰা ঠিতা’’তি, নপি হত্থতলাদীনি জানন্তি ‘‘ৰসা অম্হে অজ্ঝোত্থরিত্ৰা ঠিতা’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো ৰসা ৰসাভাগেন পরিচ্ছিন্নাতি ৰৰত্থপেতি। অযমেতিস্সা সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং ৰসং ৰণ্ণাদিতো ৰৰত্থপেতি।

    Tattha yathā udakasoṇḍiyo ajjhottharitvā ṭhito nīhāro na jānāti ‘‘ahaṃ udakasoṇḍiyo ajjhottharitvā ṭhito’’ti, napi udakasoṇḍiyo jānanti ‘‘nīhāro amhe ajjhottharitvā ṭhito’’ti; evameva na vasā jānāti ‘‘ahaṃ hatthatalādīni ajjhottharitvā ṭhitā’’ti, napi hatthatalādīni jānanti ‘‘vasā amhe ajjhottharitvā ṭhitā’’ti. Ābhogapaccavekkhaṇavirahitā hi ete dhammā…pe… na puggaloti. Paricchedato vasā vasābhāgena paricchinnāti vavatthapeti. Ayametissā sabhāgaparicchedo, visabhāgaparicchedo pana kesasadiso evāti evaṃ vasaṃ vaṇṇādito vavatthapeti.

    ততো পরং সরীরে মুখস্সব্ভন্তরে খেল়ো ৰণ্ণতো সেতো ফেণৰণ্ণোতি ৰৰত্থপেতি। সণ্ঠানতো ওকাসসণ্ঠানোতি, সমুদ্দফেণসণ্ঠানোতিপি একে। দিসতো উপরিমায দিসায জাতো। ওকাসতো উভোহি কপোলপস্সেহি ওরোহিত্ৰা জিৰ্হায ঠিতোতি। ন চেসো এত্থ সদা সন্নিচিতো হুত্ৰা তিট্ঠতি, কিন্তু যদা সত্তা তথারূপং আহারং পস্সন্তি ৰা সরন্তি ৰা, উণ্হতিত্তকটুকলোণম্বিলানং ৰা কিঞ্চি মুখে ঠপেন্তি। যদা চ তেসং হদযং আগিলাযতি, কিস্মিঞ্চিদেৰ ৰা জিগুচ্ছা উপ্পজ্জতি, তদা খেল়ো উপ্পজ্জিত্ৰা উভোহি কপোলপস্সেহি ওরোহিত্ৰা জিৰ্হায সণ্ঠাতি। অগ্গজিৰ্হায চেস খেল়ো তনুকো হোতি, মূলজিৰ্হায বহলো, মুখে পক্খিত্তঞ্চ পুথুকং ৰা তণ্ডুলং ৰা অঞ্ঞং ৰা কিঞ্চি খাদনীযং নদিপুলিনে খতকূপসলিলমিৰ পরিক্খযমগচ্ছন্তোৰ সদা তেমনসমত্থো হোতি।

    Tato paraṃ sarīre mukhassabbhantare kheḷo vaṇṇato seto pheṇavaṇṇoti vavatthapeti. Saṇṭhānato okāsasaṇṭhānoti, samuddapheṇasaṇṭhānotipi eke. Disato uparimāya disāya jāto. Okāsato ubhohi kapolapassehi orohitvā jivhāya ṭhitoti. Na ceso ettha sadā sannicito hutvā tiṭṭhati, kintu yadā sattā tathārūpaṃ āhāraṃ passanti vā saranti vā, uṇhatittakaṭukaloṇambilānaṃ vā kiñci mukhe ṭhapenti. Yadā ca tesaṃ hadayaṃ āgilāyati, kismiñcideva vā jigucchā uppajjati, tadā kheḷo uppajjitvā ubhohi kapolapassehi orohitvā jivhāya saṇṭhāti. Aggajivhāya cesa kheḷo tanuko hoti, mūlajivhāya bahalo, mukhe pakkhittañca puthukaṃ vā taṇḍulaṃ vā aññaṃ vā kiñci khādanīyaṃ nadipuline khatakūpasalilamiva parikkhayamagacchantova sadā temanasamattho hoti.

    তত্থ যথা নদিপুলিনে খতকূপতলে সণ্ঠিতং উদকং ন জানাতি ‘‘অহং কূপতলে সণ্ঠিত’’ন্তি , নপি কূপতলং জানাতি ‘‘মযি উদকং ঠিত’’ন্তি; এৰমেৰ ন খেল়ো জানাতি ‘‘অহং উভোহি কপোলপস্সেহি ওরোহিত্ৰা জিৰ্হাতলে সণ্ঠিতো’’তি, নপি জিৰ্হাতলং জানাতি ‘‘মযি উভোহি কপোলপস্সেহি ওরোহিত্ৰা খেল়ো সণ্ঠিতো’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো খেল়ো খেল়ভাগেন পরিচ্ছিন্নোতি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং খেল়ং ৰণ্ণাদিতো ৰৰত্থপেতি।

    Tattha yathā nadipuline khatakūpatale saṇṭhitaṃ udakaṃ na jānāti ‘‘ahaṃ kūpatale saṇṭhita’’nti , napi kūpatalaṃ jānāti ‘‘mayi udakaṃ ṭhita’’nti; evameva na kheḷo jānāti ‘‘ahaṃ ubhohi kapolapassehi orohitvā jivhātale saṇṭhito’’ti, napi jivhātalaṃ jānāti ‘‘mayi ubhohi kapolapassehi orohitvā kheḷo saṇṭhito’’ti. Ābhogapaccavekkhaṇavirahitā hi ete dhammā…pe… na puggaloti. Paricchedato kheḷo kheḷabhāgena paricchinnoti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ kheḷaṃ vaṇṇādito vavatthapeti.

    ততো পরং সরীরে সিঙ্ঘাণিকা ৰণ্ণতো সেতা তরুণতালমিঞ্জৰণ্ণাতি ৰৰত্থপেতি। সণ্ঠানতো ওকাসসণ্ঠানা, সেদেত্ৰা সেদেত্ৰা নাসাপুটে নিরন্তরং পক্খিত্তৰেত্তঙ্কুরসণ্ঠানাতিপি একে। দিসতো উপরিমায দিসায জাতা। ওকাসতো নাসাপুটে পূরেত্ৰা ঠিতাতি। ন চেসা এত্থ সদা সন্নিচিতা হুত্ৰা তিট্ঠতি, কিন্তু সেয্যথাপি নাম পুরিসো পদুমিনিপত্তে দধিং বন্ধিত্ৰা হেট্ঠা পদুমিনিপত্তং কণ্টকেন ৰিজ্ঝেয্য, অথ তেন ছিদ্দেন দধিপিণ্ডং গল়িত্ৰা বহি পপতেয্য; এৰমেৰ যদা সত্তা রোদন্তি, ৰিসভাগাহারউতুৰসেন ৰা সঞ্জাতধাতুক্খোভা হোন্তি, তদা অন্তোসীসতো পূতিসেম্হভাৰং আপন্নং মত্থলুঙ্গং গল়িত্ৰা তালুমত্থকৰিৰরেন ওতরিত্ৰা নাসাপুটে পূরেত্ৰা তিট্ঠতি।

    Tato paraṃ sarīre siṅghāṇikā vaṇṇato setā taruṇatālamiñjavaṇṇāti vavatthapeti. Saṇṭhānato okāsasaṇṭhānā, sedetvā sedetvā nāsāpuṭe nirantaraṃ pakkhittavettaṅkurasaṇṭhānātipi eke. Disato uparimāya disāya jātā. Okāsato nāsāpuṭe pūretvā ṭhitāti. Na cesā ettha sadā sannicitā hutvā tiṭṭhati, kintu seyyathāpi nāma puriso paduminipatte dadhiṃ bandhitvā heṭṭhā paduminipattaṃ kaṇṭakena vijjheyya, atha tena chiddena dadhipiṇḍaṃ gaḷitvā bahi papateyya; evameva yadā sattā rodanti, visabhāgāhārautuvasena vā sañjātadhātukkhobhā honti, tadā antosīsato pūtisemhabhāvaṃ āpannaṃ matthaluṅgaṃ gaḷitvā tālumatthakavivarena otaritvā nāsāpuṭe pūretvā tiṭṭhati.

    তত্থ যথা সিপ্পিকায পক্খিত্তং পূতিদধি ন জানাতি ‘‘অহং সিপ্পিকায ঠিত’’ন্তি, নপি সিপ্পিকা জানাতি ‘‘মযি পূতিকং দধি ঠিত’’ন্তি; এৰমেৰ ন সিঙ্ঘাণিকা জানাতি ‘‘অহং নাসাপুটেসু ঠিতা’’তি, নপি নাসাপুটা জানন্তি ‘‘অম্হেসু সিঙ্ঘাণিকা ঠিতা’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো সিঙ্ঘাণিকা সিঙ্ঘাণিকভাগেন পরিচ্ছিন্নাতি ৰৰত্থপেতি। অযমেতিস্সা সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং সিঙ্ঘাণিকং ৰণ্ণাদিতো ৰৰত্থপেতি।

    Tattha yathā sippikāya pakkhittaṃ pūtidadhi na jānāti ‘‘ahaṃ sippikāya ṭhita’’nti, napi sippikā jānāti ‘‘mayi pūtikaṃ dadhi ṭhita’’nti; evameva na siṅghāṇikā jānāti ‘‘ahaṃ nāsāpuṭesu ṭhitā’’ti, napi nāsāpuṭā jānanti ‘‘amhesu siṅghāṇikā ṭhitā’’ti. Ābhogapaccavekkhaṇavirahitā hi ete dhammā…pe… na puggaloti. Paricchedato siṅghāṇikā siṅghāṇikabhāgena paricchinnāti vavatthapeti. Ayametissā sabhāgaparicchedo, visabhāgaparicchedo pana kesasadiso evāti evaṃ siṅghāṇikaṃ vaṇṇādito vavatthapeti.

    ততো পরং অন্তোসরীরে লসিকাতি সরীরসন্ধীনং অব্ভন্তরে পিচ্ছিলকুণপং। সা ৰণ্ণতো কণিকারনিয্যাসৰণ্ণাতি ৰৰত্থপেতি। সণ্ঠানতো ওকাসসণ্ঠানা। দিসতো দ্ৰীসু দিসাসু জাতা। ওকাসতো অট্ঠিসন্ধীনং অব্ভঞ্জনকিচ্চং সাধযমানা অসীতিসতসন্ধীনং অব্ভন্তরে ঠিতাতি। যস্স চেসা মন্দা হোতি, তস্স উট্ঠহন্তস্স নিসীদন্তস্স অভিক্কমন্তস্স পটিক্কমন্তস্স সমিঞ্জন্তস্স পসারেন্তস্স অট্ঠিকানি কটকটাযন্তি, অচ্ছরিকাসদ্দং করোন্তো ৰিয ৰিচরতি , একযোজনদ্ৰিযোজনমত্তম্পি অদ্ধানং গতস্স ৰাযোধাতু কুপ্পতি, গত্তানি দুক্খন্তি যস্স পন চেসা বহুকা হোতি, তস্স উট্ঠাননিসজ্জাদীসু ন অট্ঠীনি কটকটাযন্তি, দীঘম্পি অদ্ধানং গতস্স ন ৰাযোধাতু কুপ্পতি, ন গত্তানি দুক্খন্তি।

    Tato paraṃ antosarīre lasikāti sarīrasandhīnaṃ abbhantare picchilakuṇapaṃ. Sā vaṇṇato kaṇikāraniyyāsavaṇṇāti vavatthapeti. Saṇṭhānato okāsasaṇṭhānā. Disato dvīsu disāsu jātā. Okāsato aṭṭhisandhīnaṃ abbhañjanakiccaṃ sādhayamānā asītisatasandhīnaṃ abbhantare ṭhitāti. Yassa cesā mandā hoti, tassa uṭṭhahantassa nisīdantassa abhikkamantassa paṭikkamantassa samiñjantassa pasārentassa aṭṭhikāni kaṭakaṭāyanti, accharikāsaddaṃ karonto viya vicarati , ekayojanadviyojanamattampi addhānaṃ gatassa vāyodhātu kuppati, gattāni dukkhanti yassa pana cesā bahukā hoti, tassa uṭṭhānanisajjādīsu na aṭṭhīni kaṭakaṭāyanti, dīghampi addhānaṃ gatassa na vāyodhātu kuppati, na gattāni dukkhanti.

    তত্থ যথা অব্ভঞ্জনতেলং ন জানাতি ‘‘অহং অক্খং অব্ভঞ্জিত্ৰা ঠিত’’ন্তি, নপি অক্খো জানাতি ‘‘মং তেলং অব্ভঞ্জিত্ৰা ঠিত’’ন্তি; এৰমেৰ ন লসিকা জানাতি ‘‘অহং অসীতিসতসন্ধিযো অব্ভঞ্জিত্ৰা ঠিতা’’তি, নপি অসীতিসতসন্ধিযো জানন্তি ‘‘লসিকা অম্হে অব্ভঞ্জিত্ৰা ঠিতা’’তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো লসিকা লসিকভাগেন পরিচ্ছিন্নাতি ৰৰত্থপেতি। অযমেতিস্সা সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং লসিকং ৰণ্ণাদিতো ৰৰত্থপেতি।

    Tattha yathā abbhañjanatelaṃ na jānāti ‘‘ahaṃ akkhaṃ abbhañjitvā ṭhita’’nti, napi akkho jānāti ‘‘maṃ telaṃ abbhañjitvā ṭhita’’nti; evameva na lasikā jānāti ‘‘ahaṃ asītisatasandhiyo abbhañjitvā ṭhitā’’ti, napi asītisatasandhiyo jānanti ‘‘lasikā amhe abbhañjitvā ṭhitā’’ti. Ābhogapaccavekkhaṇavirahitā hi ete dhammā…pe… na puggaloti. Paricchedato lasikā lasikabhāgena paricchinnāti vavatthapeti. Ayametissā sabhāgaparicchedo, visabhāgaparicchedo pana kesasadiso evāti evaṃ lasikaṃ vaṇṇādito vavatthapeti.

    ততো পরং অন্তোসরীরে মুত্তং ৰণ্ণতো মাসখারোদকৰণ্ণন্তি ৰৰত্থপেতি। সণ্ঠানতো উদকং পূরেত্ৰা অধোমুখঠপিতউদককুম্ভঅন্তরগতউদকসণ্ঠানং। দিসতো হেট্ঠিমায দিসায জাতং। ওকাসতো ৰত্থিস্সব্ভন্তরে ঠিতন্তি। ৰত্থি নাম ৰত্থিপুটো ৰুচ্চতি, যত্থ সেয্যথাপি নাম চন্দনিকায পক্খিত্তে অমুখে পেল়াঘটে চন্দনিকারসো পৰিসতি, ন চস্স পৰিসনমগ্গো পঞ্ঞাযতি; এৰমেৰ সরীরতো মুত্তং পৰিসতি, ন চস্স পৰিসনমগ্গো পঞ্ঞাযতি নিক্খমনমগ্গো এৰ তু পাকটো হোতি, যম্হি চ মুত্তস্স ভরিতে ‘‘পস্সাৰং করোমা’’তি সত্তানং আযূহনং হোতি। তত্থ যথা চন্দনিকায পক্খিত্তে অমুখে পেল়াঘটে ঠিতো চন্দনিকারসো ন জানাতি ‘‘অহং অমুখে পেল়াঘটে ঠিতো’’তি, নপি পেল়াঘটো জানাতি ‘‘মযি চন্দনিকারসো ঠিতো’’তি; এৰমেৰ মুত্তং ন জানাতি ‘‘অহং ৰত্থিম্হি ঠিত’’ন্তি, নপি ৰত্থি জানাতি ‘‘মযি মুত্তং ঠিত’’ন্তি। আভোগপচ্চৰেক্খণৰিরহিতা হি এতে ধম্মা…পে॰… ন পুগ্গলোতি। পরিচ্ছেদতো ৰত্থিঅব্ভন্তরেন চেৰ মুত্তভাগেন চ পরিচ্ছিন্নন্তি ৰৰত্থপেতি। অযমেতস্স সভাগপরিচ্ছেদো, ৰিসভাগপরিচ্ছেদো পন কেসসদিসো এৰাতি এৰং মুত্তং ৰণ্ণাদিতো ৰৰত্থপেতি। এৰমযং ইমং দ্ৰত্তিংসাকারং ৰণ্ণাদিতো ৰৰত্থপেতি।

    Tato paraṃ antosarīre muttaṃ vaṇṇato māsakhārodakavaṇṇanti vavatthapeti. Saṇṭhānato udakaṃ pūretvā adhomukhaṭhapitaudakakumbhaantaragataudakasaṇṭhānaṃ. Disato heṭṭhimāya disāya jātaṃ. Okāsato vatthissabbhantare ṭhitanti. Vatthi nāma vatthipuṭo vuccati, yattha seyyathāpi nāma candanikāya pakkhitte amukhe peḷāghaṭe candanikāraso pavisati, na cassa pavisanamaggo paññāyati; evameva sarīrato muttaṃ pavisati, na cassa pavisanamaggo paññāyati nikkhamanamaggo eva tu pākaṭo hoti, yamhi ca muttassa bharite ‘‘passāvaṃ karomā’’ti sattānaṃ āyūhanaṃ hoti. Tattha yathā candanikāya pakkhitte amukhe peḷāghaṭe ṭhito candanikāraso na jānāti ‘‘ahaṃ amukhe peḷāghaṭe ṭhito’’ti, napi peḷāghaṭo jānāti ‘‘mayi candanikāraso ṭhito’’ti; evameva muttaṃ na jānāti ‘‘ahaṃ vatthimhi ṭhita’’nti, napi vatthi jānāti ‘‘mayi muttaṃ ṭhita’’nti. Ābhogapaccavekkhaṇavirahitā hi ete dhammā…pe… na puggaloti. Paricchedato vatthiabbhantarena ceva muttabhāgena ca paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ muttaṃ vaṇṇādito vavatthapeti. Evamayaṃ imaṃ dvattiṃsākāraṃ vaṇṇādito vavatthapeti.

    তস্সেৰং ইমং দ্ৰত্তিংসাকারং ৰণ্ণাদিৰসেন ৰৰত্থপেন্তস্স তং তং ভাৰনানুযোগং আগম্ম কেসাদযো পগুণা হোন্তি, কোট্ঠাসভাৰেন উপট্ঠহন্তি। ততো পভুতি সেয্যথাপি নাম চক্খুমতো পুরিসস্স দ্ৰত্তিংসৰণ্ণানং পুপ্ফানং একসুত্তগন্থিতং মালং ওলোকেন্তস্স সব্বপুপ্ফানি অপুব্বাপরিযমিৰ পাকটানি হোন্তি; এৰমেৰ ‘‘অত্থি ইমস্মিং কাযে কেসা’’তি ইমং কাযং সতিযা ওলোকেন্তস্স সব্বে তে ধম্মা অপুব্বাপরিযমিৰ পাকটা হোন্তি। কেসেসু আৰজ্জিতেসু অসণ্ঠহমানাৰ সতি যাৰ মুত্তং, তাৰ পৰত্ততি। ততো পভুতি তস্স আহিণ্ডন্তা মনুস্সতিরচ্ছানাদযো চ সত্তাকারং ৰিজহিত্ৰা কোট্ঠাসরাসিৰসেনেৰ উপট্ঠহন্তি, তেহি চ অজ্ঝোহরিযমানং পানভোজনাদি কোট্ঠাসরাসিম্হি পক্খিপ্পমানমিৰ উপট্ঠাতীতি।

    Tassevaṃ imaṃ dvattiṃsākāraṃ vaṇṇādivasena vavatthapentassa taṃ taṃ bhāvanānuyogaṃ āgamma kesādayo paguṇā honti, koṭṭhāsabhāvena upaṭṭhahanti. Tato pabhuti seyyathāpi nāma cakkhumato purisassa dvattiṃsavaṇṇānaṃ pupphānaṃ ekasuttaganthitaṃ mālaṃ olokentassa sabbapupphāni apubbāpariyamiva pākaṭāni honti; evameva ‘‘atthi imasmiṃ kāye kesā’’ti imaṃ kāyaṃ satiyā olokentassa sabbe te dhammā apubbāpariyamiva pākaṭā honti. Kesesu āvajjitesu asaṇṭhahamānāva sati yāva muttaṃ, tāva pavattati. Tato pabhuti tassa āhiṇḍantā manussatiracchānādayo ca sattākāraṃ vijahitvā koṭṭhāsarāsivaseneva upaṭṭhahanti, tehi ca ajjhohariyamānaṃ pānabhojanādi koṭṭhāsarāsimhi pakkhippamānamiva upaṭṭhātīti.

    এত্থাহ ‘‘অথানেন ততো পরং কিং কাতব্ব’’ন্তি? ৰুচ্চতে – তদেৰ নিমিত্তং আসেৰিতব্বং ভাৰেতব্বং বহুলীকাতব্বং সুৰৰত্থিতং ৰৰত্থপেতব্বং। কথং পনাযং তং নিমিত্তং আসেৰতি ভাৰেতি বহুলীকরোতি সুৰৰত্থিতং ৰৰত্থপেতীতি? অযঞ্হি তং কেসাদীনং কোট্ঠাসভাৰেন উপট্ঠাননিমিত্তং আসেৰতি, সতিযা অল্লিযতি ভজতি উপগচ্ছতি, সতিগব্ভং গণ্হাপেতি। তত্থ লদ্ধং ৰা সতিং ৰড্ঢেন্তো তং ভাৰেতীতি ৰুচ্চতি। বহুলীকরোতীতি পুনপ্পুনং সতিসম্পযুত্তং ৰিতক্কৰিচারব্ভাহতং করোতি। সুৰৰত্থিতং ৰৰত্থপেতীতি যথা সুট্ঠু ৰৰত্থিতং হোতি, ন পুন অন্তরধানং গচ্ছতি, তথা তং সতিযা ৰৰত্থপেতি, উপধারেতি উপনিবন্ধতি।

    Etthāha ‘‘athānena tato paraṃ kiṃ kātabba’’nti? Vuccate – tadeva nimittaṃ āsevitabbaṃ bhāvetabbaṃ bahulīkātabbaṃ suvavatthitaṃ vavatthapetabbaṃ. Kathaṃ panāyaṃ taṃ nimittaṃ āsevati bhāveti bahulīkaroti suvavatthitaṃ vavatthapetīti? Ayañhi taṃ kesādīnaṃ koṭṭhāsabhāvena upaṭṭhānanimittaṃ āsevati, satiyā alliyati bhajati upagacchati, satigabbhaṃ gaṇhāpeti. Tattha laddhaṃ vā satiṃ vaḍḍhento taṃ bhāvetīti vuccati. Bahulīkarotīti punappunaṃ satisampayuttaṃ vitakkavicārabbhāhataṃ karoti. Suvavatthitaṃ vavatthapetīti yathā suṭṭhu vavatthitaṃ hoti, na puna antaradhānaṃ gacchati, tathā taṃ satiyā vavatthapeti, upadhāreti upanibandhati.

    অথ ৰা যং পুব্বে অনুপুব্বতো, নাতিসীঘতো, নাতিসণিকতো, ৰিক্খেপপ্পহানতো, পণ্ণত্তিসমতিক্কমনতো, অনুপুব্বমুঞ্চনতো, লক্খণতো, তযো চ সুত্তন্তাতি এৰং দসৰিধং মনসিকারকোসল্লং ৰুত্তং। তত্থ অনুপুব্বতো মনসিকরোন্তো আসেৰতি, নাতিসীঘতো নাতিসণিকতো চ মনসিকরোন্তো ভাৰেতি, ৰিক্খেপপ্পহানতো মনসিকরোন্তো বহুলী করোতি, পণ্ণত্তিসমতিক্কমনাদিতো মনসিকরোন্তো সুৰৰত্থিতং ৰৰত্থপেতীতি ৰেদিতব্বো।

    Atha vā yaṃ pubbe anupubbato, nātisīghato, nātisaṇikato, vikkhepappahānato, paṇṇattisamatikkamanato, anupubbamuñcanato, lakkhaṇato, tayo ca suttantāti evaṃ dasavidhaṃ manasikārakosallaṃ vuttaṃ. Tattha anupubbato manasikaronto āsevati, nātisīghato nātisaṇikato ca manasikaronto bhāveti, vikkhepappahānato manasikaronto bahulī karoti, paṇṇattisamatikkamanādito manasikaronto suvavatthitaṃ vavatthapetīti veditabbo.

    এত্থাহ ‘‘কথং পনাযং অনুপুব্বাদিৰসেন এতে ধম্মে মনসি করোতী’’তি? ৰুচ্চতে – অযঞ্হি কেসে মনসি করিত্ৰা তদনন্তরং লোমে মনসি করোতি, ন নখে। তথা লোমে মনসি করিত্ৰা তদনন্তরং নখে মনসি করোতি, ন দন্তে। এস নযো সব্বত্থ। কস্মা? উপ্পটিপাটিযা হি মনসিকরোন্তো সেয্যথাপি নাম অকুসলো পুরিসো দ্ৰত্তিংসপদং নিস্সেণিং উপ্পটিপাটিযা আরোহন্তো কিলন্তকাযো ততো নিস্সেণিতো পপততি, ন আরোহনং সম্পাদেতি; এৰমেৰ ভাৰনাসম্পত্তিৰসেন অধিগন্তব্বস্স অস্সাদস্স অনধিগমনতো কিলন্তচিত্তো দ্ৰত্তিংসাকারভাৰনাতো পপততি, ন ভাৰনং সম্পাদেতীতি।

    Etthāha ‘‘kathaṃ panāyaṃ anupubbādivasena ete dhamme manasi karotī’’ti? Vuccate – ayañhi kese manasi karitvā tadanantaraṃ lome manasi karoti, na nakhe. Tathā lome manasi karitvā tadanantaraṃ nakhe manasi karoti, na dante. Esa nayo sabbattha. Kasmā? Uppaṭipāṭiyā hi manasikaronto seyyathāpi nāma akusalo puriso dvattiṃsapadaṃ nisseṇiṃ uppaṭipāṭiyā ārohanto kilantakāyo tato nisseṇito papatati, na ārohanaṃ sampādeti; evameva bhāvanāsampattivasena adhigantabbassa assādassa anadhigamanato kilantacitto dvattiṃsākārabhāvanāto papatati, na bhāvanaṃ sampādetīti.

    অনুপুব্বতো মনসিকরোন্তোপি চ কেসা লোমাতি নাতিসীঘতোপি মনসি করোতি। অতিসীঘতো হি মনসিকরোন্তো সেয্যথাপি নাম অদ্ধানং গচ্ছন্তো পুরিসো সমৰিসমরুক্খথলনিন্নদ্ৰেধাপথাদীনি মগ্গনিমিত্তানি উপলক্খেতুং ন সক্কোতি, ততো ন মগ্গকুসলো হোতি, অদ্ধানঞ্চ পরিক্খযং নেতি; এৰমেৰ ৰণ্ণসণ্ঠানাদীনি দ্ৰত্তিংসাকারনিমিত্তানি উপলক্খেতুং ন সক্কোতি, ততো ন দ্ৰত্তিংসাকারে কুসলো হোতি, কম্মট্ঠানঞ্চ পরিক্খযং নেতি।

    Anupubbato manasikarontopi ca kesā lomāti nātisīghatopi manasi karoti. Atisīghato hi manasikaronto seyyathāpi nāma addhānaṃ gacchanto puriso samavisamarukkhathalaninnadvedhāpathādīni magganimittāni upalakkhetuṃ na sakkoti, tato na maggakusalo hoti, addhānañca parikkhayaṃ neti; evameva vaṇṇasaṇṭhānādīni dvattiṃsākāranimittāni upalakkhetuṃ na sakkoti, tato na dvattiṃsākāre kusalo hoti, kammaṭṭhānañca parikkhayaṃ neti.

    যথা চ নাতিসীঘতো, এৰং নাতিসণিকতোপি মনসি করোতি। অতিসণিকতো হি মনসিকরোন্তো সেয্যথাপি নাম পুরিসো অদ্ধানমগ্গং পটিপন্নো অন্তরামগ্গে রুক্খপব্বততল়াকাদীসু ৰিলম্বমানো ইচ্ছিতপ্পদেসং অপাপুণন্তো অন্তরামগ্গেযেৰ সীহব্যগ্ঘাদীহি অনযব্যসনং পাপুণাতি; এৰমেৰ দ্ৰত্তিংসাকারভাৰনাসম্পদং অপাপুণন্তো ভাৰনাৰিচ্ছেদেন অন্তরাযেৰ কামৰিতক্কাদীহি অনযব্যসনং পাপুণাতি।

    Yathā ca nātisīghato, evaṃ nātisaṇikatopi manasi karoti. Atisaṇikato hi manasikaronto seyyathāpi nāma puriso addhānamaggaṃ paṭipanno antarāmagge rukkhapabbatataḷākādīsu vilambamāno icchitappadesaṃ apāpuṇanto antarāmaggeyeva sīhabyagghādīhi anayabyasanaṃ pāpuṇāti; evameva dvattiṃsākārabhāvanāsampadaṃ apāpuṇanto bhāvanāvicchedena antarāyeva kāmavitakkādīhi anayabyasanaṃ pāpuṇāti.

    নাতিসণিকতো মনসিকরোন্তোপি চ ৰিক্খেপপ্পহানতোপি মনসি করোতি। ৰিক্খেপপ্পহানতো নাম যথা অঞ্ঞেসু নৰকম্মাদীসু চিত্তং ন ৰিক্খিপতি, তথা মনসি করোতি। বহিদ্ধা ৰিক্খেপমানচিত্তো হি কেসাদীস্ৰেৰ অসমাহিতচেতোৰিতক্কো ভাৰনাসম্পদং অপাপুণিত্ৰা অন্তরাৰ অনযব্যসনং আপজ্জতি তক্কসিলাগমনে বোধিসত্তস্স সহাযকা ৰিয। অৰিক্খিপমানচিত্তো পন কেসাদীস্ৰেৰ সমাহিতচেতোৰিতক্কো ভাৰনাসম্পদং পাপুণাতি বোধিসত্তো ৰিয তক্কসিলরজ্জসম্পদন্তি। তস্সেৰং ৰিক্খেপপ্পহানতো মনসিকরোতো অধিকারচরিযাধিমুত্তীনং ৰসেন তে ধম্মা অসুভতো ৰা ৰণ্ণতো ৰা সুঞ্ঞতো ৰা উপট্ঠহন্তি।

    Nātisaṇikato manasikarontopi ca vikkhepappahānatopi manasi karoti. Vikkhepappahānato nāma yathā aññesu navakammādīsu cittaṃ na vikkhipati, tathā manasi karoti. Bahiddhā vikkhepamānacitto hi kesādīsveva asamāhitacetovitakko bhāvanāsampadaṃ apāpuṇitvā antarāva anayabyasanaṃ āpajjati takkasilāgamane bodhisattassa sahāyakā viya. Avikkhipamānacitto pana kesādīsveva samāhitacetovitakko bhāvanāsampadaṃ pāpuṇāti bodhisatto viya takkasilarajjasampadanti. Tassevaṃ vikkhepappahānato manasikaroto adhikāracariyādhimuttīnaṃ vasena te dhammā asubhato vā vaṇṇato vā suññato vā upaṭṭhahanti.

    অথ পণ্ণত্তিসমতিক্কমনতো তে ধম্মে মনসি করোতি। পণ্ণত্তিসমতিক্কমনতোতি কেসা লোমাতি এৰমাদিৰোহারং সমতিক্কমিত্ৰা ৰিস্সজ্জেত্ৰা যথূপট্ঠিতানং অসুভাদীনংযেৰ ৰসেন মনসি করোতি। কথং ? যথা অরঞ্ঞনিৰাসূপগতা মনুস্সা অপরিচিতভূমিভাগত্তা উদকট্ঠানসঞ্জাননত্থং সাখাভঙ্গাদিনিমিত্তং কত্ৰা তদনুসারেন গন্ত্ৰা উদকং পরিভুঞ্জন্তি, যদা পন পরিচিতভূমিভাগা হোন্তি, অথ তং নিমিত্তং ৰিস্সজ্জেত্ৰা অমনসিকত্ৰাৰ উদকট্ঠানং উপসঙ্কমিত্ৰা উদকং পরিভুঞ্জন্তি, এৰমেৰাযং কেসা লোমাতিআদিনা তংতংৰোহারস্স ৰসেন পঠমং তে ধম্মে মনসাকাসি, তেসু ধম্মেসু অসুভাদীনং অঞ্ঞতরৰসেন উপট্ঠহন্তেসু তং ৰোহারং সমতিক্কমিত্ৰা ৰিস্সজ্জেত্ৰা অসুভাদিতোৰ মনসি করোতি।

    Atha paṇṇattisamatikkamanato te dhamme manasi karoti. Paṇṇattisamatikkamanatoti kesā lomāti evamādivohāraṃ samatikkamitvā vissajjetvā yathūpaṭṭhitānaṃ asubhādīnaṃyeva vasena manasi karoti. Kathaṃ ? Yathā araññanivāsūpagatā manussā aparicitabhūmibhāgattā udakaṭṭhānasañjānanatthaṃ sākhābhaṅgādinimittaṃ katvā tadanusārena gantvā udakaṃ paribhuñjanti, yadā pana paricitabhūmibhāgā honti, atha taṃ nimittaṃ vissajjetvā amanasikatvāva udakaṭṭhānaṃ upasaṅkamitvā udakaṃ paribhuñjanti, evamevāyaṃ kesā lomātiādinā taṃtaṃvohārassa vasena paṭhamaṃ te dhamme manasākāsi, tesu dhammesu asubhādīnaṃ aññataravasena upaṭṭhahantesu taṃ vohāraṃ samatikkamitvā vissajjetvā asubhāditova manasi karoti.

    এত্থাহ ‘‘কথং পনস্স এতে ধম্মা অসুভাদিতো উপট্ঠহন্তি, কথং ৰণ্ণতো, কথং সুঞ্ঞতো ৰা, কথঞ্চাযমেতে অসুভতো মনসি করোতি, কথং ৰণ্ণতো, কথং সুঞ্ঞতো ৰা’’তি? কেসা তাৰস্স ৰণ্ণসণ্ঠানগন্ধাসযোকাসৰসেন পঞ্চধা অসুভতো উপট্ঠহন্তি, পঞ্চধা এৰ অযমেতে অসুভতো মনসি করোতি। সেয্যথিদং – কেসা নামেতে ৰণ্ণতো অসুভা পরমপ্পটিকূলজেগুচ্ছা । তথা হি মনুস্সা দিৰা পানভোজনে পতিতং কেসৰণ্ণং ৰাকং ৰা সুত্তং ৰা দিস্ৰা কেসসঞ্ঞায মনোরমম্পি পানভোজনং ছড্ডেন্তি ৰা জিগুচ্ছন্তি ৰা। সণ্ঠানতোপি অসুভা। তথা হি রত্তিং পানভোজনে পতিতং কেসসণ্ঠানং ৰাকং ৰা সুত্তং ৰা ফুসিত্ৰা কেসসঞ্ঞায মনোরমম্পি পানভোজনং ছড্ডেন্তি ৰা জিগুচ্ছন্তি ৰা। গন্ধতোপি অসুভা। তথা হি তেলমক্খনপুপ্ফধূমাদিসঙ্খারেহি ৰিরহিতানং কেসানং গন্ধো পরমজেগুচ্ছো হোতি, অগ্গীসু পক্খিত্তস্স কেসস্স গন্ধং ঘাযিত্ৰা সত্তা নাসিকং পিধেন্তি, মুখম্পি ৰিকুজ্জেন্তি। আসযতোপি অসুভা। তথা হি নানাৰিধেন মনুস্সাসুচিনিস্সন্দেন সঙ্কারট্ঠানে তণ্ডুলেয্যকাদীনি ৰিয পিত্তসেম্হপুব্বলোহিতনিস্সন্দেন তে আচিতা ৰুদ্ধিং ৰিরূল়্হিং ৰেপুল্লং গমিতাতি। ওকাসতোপি অসুভা। তথা হি সঙ্কারট্ঠানে ৰিয তণ্ডুলেয্যকাদীনি পরমজেগুচ্ছে লোমাদিএকতিংসকুণপরাসিমত্থকে মনুস্সানং সীসপলিৰেঠকে অল্লচম্মে জাতাতি। এস নযো লোমাদীসু। এৰং তাৰ অযমেতে ধম্মে অসুভতো উপট্ঠহন্তে অসুভতো মনসি করোতি।

    Etthāha ‘‘kathaṃ panassa ete dhammā asubhādito upaṭṭhahanti, kathaṃ vaṇṇato, kathaṃ suññato vā, kathañcāyamete asubhato manasi karoti, kathaṃ vaṇṇato, kathaṃ suññato vā’’ti? Kesā tāvassa vaṇṇasaṇṭhānagandhāsayokāsavasena pañcadhā asubhato upaṭṭhahanti, pañcadhā eva ayamete asubhato manasi karoti. Seyyathidaṃ – kesā nāmete vaṇṇato asubhā paramappaṭikūlajegucchā . Tathā hi manussā divā pānabhojane patitaṃ kesavaṇṇaṃ vākaṃ vā suttaṃ vā disvā kesasaññāya manoramampi pānabhojanaṃ chaḍḍenti vā jigucchanti vā. Saṇṭhānatopi asubhā. Tathā hi rattiṃ pānabhojane patitaṃ kesasaṇṭhānaṃ vākaṃ vā suttaṃ vā phusitvā kesasaññāya manoramampi pānabhojanaṃ chaḍḍenti vā jigucchanti vā. Gandhatopi asubhā. Tathā hi telamakkhanapupphadhūmādisaṅkhārehi virahitānaṃ kesānaṃ gandho paramajeguccho hoti, aggīsu pakkhittassa kesassa gandhaṃ ghāyitvā sattā nāsikaṃ pidhenti, mukhampi vikujjenti. Āsayatopi asubhā. Tathā hi nānāvidhena manussāsucinissandena saṅkāraṭṭhāne taṇḍuleyyakādīni viya pittasemhapubbalohitanissandena te ācitā vuddhiṃ virūḷhiṃ vepullaṃ gamitāti. Okāsatopi asubhā. Tathā hi saṅkāraṭṭhāne viya taṇḍuleyyakādīni paramajegucche lomādiekatiṃsakuṇaparāsimatthake manussānaṃ sīsapaliveṭhake allacamme jātāti. Esa nayo lomādīsu. Evaṃ tāva ayamete dhamme asubhato upaṭṭhahante asubhato manasi karoti.

    যদি পনস্স ৰণ্ণতো উপট্ঠহন্তি, অথ কেসা নীলকসিণৰসেন উপট্ঠহন্তি। তথা লোমা দন্তা ওদাতকসিণৰসেনাতি। এস নযো সব্বত্থ । তংতংকসিণৰসেনেৰ অযমেতে মনসি করোতি, এৰং ৰণ্ণতো উপট্ঠহন্তে ৰণ্ণতো মনসি করোতি। যদি পনস্স সুঞ্ঞতো উপট্ঠহন্তি, অথ কেসা ঘনৰিনিব্ভোগৰৰত্থানেন ওজট্ঠমকসমূহৰসেন উপট্ঠহন্তি। তথা লোমাদযো, যথা উপট্ঠহন্তি। অযমেতে তথেৰ মনসি করোতি। এৰং সুঞ্ঞতো উপট্ঠহন্তে সুঞ্ঞতো মনসি করোতি।

    Yadi panassa vaṇṇato upaṭṭhahanti, atha kesā nīlakasiṇavasena upaṭṭhahanti. Tathā lomā dantā odātakasiṇavasenāti. Esa nayo sabbattha . Taṃtaṃkasiṇavaseneva ayamete manasi karoti, evaṃ vaṇṇato upaṭṭhahante vaṇṇato manasi karoti. Yadi panassa suññato upaṭṭhahanti, atha kesā ghanavinibbhogavavatthānena ojaṭṭhamakasamūhavasena upaṭṭhahanti. Tathā lomādayo, yathā upaṭṭhahanti. Ayamete tatheva manasi karoti. Evaṃ suññato upaṭṭhahante suññato manasi karoti.

    এৰং মনসিকরোন্তো অযমেতে ধম্মে অনুপুব্বমুঞ্চনতো মনসি করোতি। অনুপুব্বমুঞ্চনতোতি অসুভাদীনং অঞ্ঞতরৰসেন উপট্ঠিতে কেসে মুঞ্চিত্ৰা লোমে মনসিকরোন্তো সেয্যথাপি নাম জলূকা নঙ্গুট্ঠেন গহিতপ্পদেসে সাপেক্খাৰ হুত্ৰা তুণ্ডেন অঞ্ঞং পদেসং গণ্হাতি, গহিতে চ তস্মিং ইতরং মুঞ্চতি, এৰমেৰ কেসেসু সাপেক্খোৰ হুত্ৰা লোমে মনসি করোতি, লোমেসু চ পতিট্ঠিতে মনসিকারে কেসে মুঞ্চতি। এস নযো সব্বত্থ। এৰং হিস্স অনুপুব্বমুঞ্চনতো মনসিকরোতো অসুভাদীসু অঞ্ঞতরৰসেন তে ধম্মা উপট্ঠহন্তা অনৰসেসতো উপট্ঠহন্তি, পাকটতরূপট্ঠানা চ হোন্তি।

    Evaṃ manasikaronto ayamete dhamme anupubbamuñcanato manasi karoti. Anupubbamuñcanatoti asubhādīnaṃ aññataravasena upaṭṭhite kese muñcitvā lome manasikaronto seyyathāpi nāma jalūkā naṅguṭṭhena gahitappadese sāpekkhāva hutvā tuṇḍena aññaṃ padesaṃ gaṇhāti, gahite ca tasmiṃ itaraṃ muñcati, evameva kesesu sāpekkhova hutvā lome manasi karoti, lomesu ca patiṭṭhite manasikāre kese muñcati. Esa nayo sabbattha. Evaṃ hissa anupubbamuñcanato manasikaroto asubhādīsu aññataravasena te dhammā upaṭṭhahantā anavasesato upaṭṭhahanti, pākaṭatarūpaṭṭhānā ca honti.

    অথ যস্স তে ধম্মা অসুভতো উপট্ঠহন্তি, পাকটতরূপট্ঠানা চ হোন্তি, তস্স সেয্যথাপি নাম মক্কটো দ্ৰত্তিংসতালকে তালৰনে ব্যাধেন পরিপাতিযমানো একরুক্খেপি অসণ্ঠহন্তো পরিধাৰিত্ৰা যদা নিৰত্তো হোতি কিলন্তো, অথ একমেৰ ঘনতালপণ্ণপরিৰেঠিতং তালসুচিং নিস্সায তিট্ঠতি; এৰমেৰ চিত্তমক্কটো দ্ৰত্তিংসকোট্ঠাসকে ইমস্মিং কাযে তেনেৰ যোগিনা পরিপাতিযমানো এককোট্ঠাসকেপি অসণ্ঠহন্তো পরিধাৰিত্ৰা যদা অনেকারম্মণৰিধাৰনে অভিলাসাভাৰেন নিৰত্তো হোতি কিলন্তো। অথ য্ৰাস্স কেসাদীসু ধম্মো পগুণতরো চরিতানুরূপতরো ৰা, যত্থ ৰা পুব্বে কতাধিকারো হোতি, তং নিস্সায উপচারৰসেন তিট্ঠতি। অথ তমেৰ নিমিত্তং পুনপ্পুনং তক্কাহতং ৰিতক্কাহতং করিত্ৰা যথাক্কমং পঠমং ঝানং উপ্পাদেতি, তত্থ পতিট্ঠায ৰিপস্সনমারভিত্ৰা অরিযভূমিং পাপুণাতি।

    Atha yassa te dhammā asubhato upaṭṭhahanti, pākaṭatarūpaṭṭhānā ca honti, tassa seyyathāpi nāma makkaṭo dvattiṃsatālake tālavane byādhena paripātiyamāno ekarukkhepi asaṇṭhahanto paridhāvitvā yadā nivatto hoti kilanto, atha ekameva ghanatālapaṇṇapariveṭhitaṃ tālasuciṃ nissāya tiṭṭhati; evameva cittamakkaṭo dvattiṃsakoṭṭhāsake imasmiṃ kāye teneva yoginā paripātiyamāno ekakoṭṭhāsakepi asaṇṭhahanto paridhāvitvā yadā anekārammaṇavidhāvane abhilāsābhāvena nivatto hoti kilanto. Atha yvāssa kesādīsu dhammo paguṇataro caritānurūpataro vā, yattha vā pubbe katādhikāro hoti, taṃ nissāya upacāravasena tiṭṭhati. Atha tameva nimittaṃ punappunaṃ takkāhataṃ vitakkāhataṃ karitvā yathākkamaṃ paṭhamaṃ jhānaṃ uppādeti, tattha patiṭṭhāya vipassanamārabhitvā ariyabhūmiṃ pāpuṇāti.

    যস্স পন তে ধম্মা ৰণ্ণতো উপট্ঠহন্তি, তস্সাপি সেয্যথাপি নাম মক্কটো…পে॰… অথ য্ৰাস্স কেসাদীসু ধম্মো পগুণতরো চরিতানুরূপতরো ৰা, যত্থ ৰা পুব্বে কতাধিকারো হোতি, তং নিস্সায উপচারৰসেন তিট্ঠতি। অথ তমেৰ নিমিত্তং পুনপ্পুনং তক্কাহতং ৰিতক্কাহতং করিত্ৰা যথাক্কমং নীলকসিণৰসেন পীতকসিণৰসেন ৰা পঞ্চপি রূপাৰচরজ্ঝানানি উপ্পাদেতি, তেসঞ্চ যত্থ কত্থচি পতিট্ঠায ৰিপস্সনং আরভিত্ৰা অরিযভূমিং পাপুণাতি।

    Yassa pana te dhammā vaṇṇato upaṭṭhahanti, tassāpi seyyathāpi nāma makkaṭo…pe… atha yvāssa kesādīsu dhammo paguṇataro caritānurūpataro vā, yattha vā pubbe katādhikāro hoti, taṃ nissāya upacāravasena tiṭṭhati. Atha tameva nimittaṃ punappunaṃ takkāhataṃ vitakkāhataṃ karitvā yathākkamaṃ nīlakasiṇavasena pītakasiṇavasena vā pañcapi rūpāvacarajjhānāni uppādeti, tesañca yattha katthaci patiṭṭhāya vipassanaṃ ārabhitvā ariyabhūmiṃ pāpuṇāti.

    যস্স পন তে ধম্মা সুঞ্ঞতো উপট্ঠহন্তি, সো লক্খণতো মনসি করোতি, লক্খণতো মনসিকরোন্তো তত্থ চতুধাতুৰৰত্থানৰসেন উপচারজ্ঝানং পাপুণাতি। অথ মনসিকরোন্তো তে ধম্মে অনিচ্চদুক্খানত্তসুত্তত্তযৰসেন মনসি করোতি । অযমস্স ৰিপস্সনানযো। সো ইমং ৰিপস্সনং আরভিত্ৰা যথাক্কমঞ্চ পটিপজ্জিত্ৰা অরিযভূমিং পাপুণাতীতি।

    Yassa pana te dhammā suññato upaṭṭhahanti, so lakkhaṇato manasi karoti, lakkhaṇato manasikaronto tattha catudhātuvavatthānavasena upacārajjhānaṃ pāpuṇāti. Atha manasikaronto te dhamme aniccadukkhānattasuttattayavasena manasi karoti . Ayamassa vipassanānayo. So imaṃ vipassanaṃ ārabhitvā yathākkamañca paṭipajjitvā ariyabhūmiṃ pāpuṇātīti.

    এত্তাৰতা চ যং ৰুত্তং – ‘‘কথং পনাযং অনুপুব্বাদিৰসেন এতে ধম্মে মনসি করোতী’’তি, তং ব্যাকতং হোতি। যঞ্চাপি ৰুত্তং – ‘‘ভাৰনাৰসেন পনস্স এৰং ৰণ্ণনা ৰেদিতব্বা’’তি, তস্সত্থো পকাসিতো হোতীতি।

    Ettāvatā ca yaṃ vuttaṃ – ‘‘kathaṃ panāyaṃ anupubbādivasena ete dhamme manasi karotī’’ti, taṃ byākataṃ hoti. Yañcāpi vuttaṃ – ‘‘bhāvanāvasena panassa evaṃ vaṇṇanā veditabbā’’ti, tassattho pakāsito hotīti.

    পকিণ্ণকনযো

    Pakiṇṇakanayo

    ইদানি ইমস্মিংযেৰ দ্ৰত্তিংসাকারে ৰণ্ণনাপরিচযপাটৰত্থং অযং পকিণ্ণকনযো ৰেদিতব্বো –

    Idāni imasmiṃyeva dvattiṃsākāre vaṇṇanāparicayapāṭavatthaṃ ayaṃ pakiṇṇakanayo veditabbo –

    ‘‘নিমিত্ততো লক্খণতো, ধাতুতো সুঞ্ঞতোপি চ।

    ‘‘Nimittato lakkhaṇato, dhātuto suññatopi ca;

    খন্ধাদিতো চ ৰিঞ্ঞেয্যো, দ্ৰত্তিংসাকারনিচ্ছযো’’তি॥

    Khandhādito ca viññeyyo, dvattiṃsākāranicchayo’’ti.

    তত্থ নিমিত্ততোতি এৰং ৰুত্তপ্পকারে ইমস্মিং দ্ৰত্তিংসাকারে সট্ঠিসতং নিমিত্তানি হোন্তি, যেসং ৰসেন যোগাৰচরো দ্ৰত্তিংসাকারং কোট্ঠাসতো পরিগ্গণ্হাতি। সেয্যথিদং – কেসস্স ৰণ্ণনিমিত্তং, সণ্ঠাননিমিত্তং, দিসানিমিত্তং, ওকাসনিমিত্তং, পরিচ্ছেদনিমিত্তন্তি পঞ্চ নিমিত্তানি হোন্তি। এৰং লোমাদীসু।

    Tattha nimittatoti evaṃ vuttappakāre imasmiṃ dvattiṃsākāre saṭṭhisataṃ nimittāni honti, yesaṃ vasena yogāvacaro dvattiṃsākāraṃ koṭṭhāsato pariggaṇhāti. Seyyathidaṃ – kesassa vaṇṇanimittaṃ, saṇṭhānanimittaṃ, disānimittaṃ, okāsanimittaṃ, paricchedanimittanti pañca nimittāni honti. Evaṃ lomādīsu.

    লক্খণতোতি দ্ৰত্তিংসাকারে অট্ঠৰীসতিসতং লক্খণানি হোন্তি, যেসং ৰসেন যোগাৰচরো দ্ৰত্তিংসাকারং লক্খণতো মনসি করোতি । সেয্যথিদং – কেসস্স থদ্ধলক্খণং, আবন্ধনলক্খণং, উণ্হত্তলক্খণং, সমুদীরণলক্খণন্তি চত্তারি লক্খণানি হোন্তি। এৰং লোমাদীসু।

    Lakkhaṇatoti dvattiṃsākāre aṭṭhavīsatisataṃ lakkhaṇāni honti, yesaṃ vasena yogāvacaro dvattiṃsākāraṃ lakkhaṇato manasi karoti . Seyyathidaṃ – kesassa thaddhalakkhaṇaṃ, ābandhanalakkhaṇaṃ, uṇhattalakkhaṇaṃ, samudīraṇalakkhaṇanti cattāri lakkhaṇāni honti. Evaṃ lomādīsu.

    ধাতুতোতি দ্ৰত্তিংসাকারে ‘‘ছধাতুরো, ভিক্খৰে, অযং পুরিসপুগ্গলো’’তি (ম॰ নি॰ ৩.৩৪৩-৩৪৪) এত্থ ৰুত্তাসু ধাতূসু অট্ঠৰীসতিসতং ধাতুযো হোন্তি, যাসং ৰসেন যোগাৰচরো দ্ৰত্তিংসাকারং ধাতুতো পরিগ্গণ্হাতি। সেয্যথিদং – যা কেসে থদ্ধতা, সা পথৰীধাতু; যা আবন্ধনতা, সা আপোধাতু; যা পরিপাচনতা, সা তেজোধাতু; যা ৰিত্থম্ভনতা, সা ৰাযোধাতূতি চতস্সো ধাতুযো হোন্তি। এৰং লোমাদীসু।

    Dhātutoti dvattiṃsākāre ‘‘chadhāturo, bhikkhave, ayaṃ purisapuggalo’’ti (ma. ni. 3.343-344) ettha vuttāsu dhātūsu aṭṭhavīsatisataṃ dhātuyo honti, yāsaṃ vasena yogāvacaro dvattiṃsākāraṃ dhātuto pariggaṇhāti. Seyyathidaṃ – yā kese thaddhatā, sā pathavīdhātu; yā ābandhanatā, sā āpodhātu; yā paripācanatā, sā tejodhātu; yā vitthambhanatā, sā vāyodhātūti catasso dhātuyo honti. Evaṃ lomādīsu.

    সুঞ্ঞতোতি দ্ৰত্তিংসাকারে অট্ঠৰীসতিসতং সুঞ্ঞতা হোন্তি, যাসং ৰসেন যোগাৰচরো দ্ৰত্তিংসাকারং সুঞ্ঞতো ৰিপস্সতি। সেয্যথিদং – কেসে তাৰ পথৰীধাতু আপোধাত্ৰাদীহি সুঞ্ঞা, তথা আপোধাত্ৰাদযো পথৰীধাত্ৰাদীহীতি চতস্সো সুঞ্ঞতা হোন্তি। এৰং লোমাদীসু।

    Suññatoti dvattiṃsākāre aṭṭhavīsatisataṃ suññatā honti, yāsaṃ vasena yogāvacaro dvattiṃsākāraṃ suññato vipassati. Seyyathidaṃ – kese tāva pathavīdhātu āpodhātvādīhi suññā, tathā āpodhātvādayo pathavīdhātvādīhīti catasso suññatā honti. Evaṃ lomādīsu.

    খন্ধাদিতোতি দ্ৰত্তিংসাকারে কেসাদীসু খন্ধাদিৰসেন সঙ্গয্হমানেসু ‘‘কেসা কতি খন্ধা হোন্তি, কতি আযতনানি, কতি ধাতুযো, কতি সচ্চানি, কতি সতিপট্ঠানানী’’তি এৰমাদিনা নযেন ৰিনিচ্ছযো ৰেদিতব্বো। এৰঞ্চস্স ৰিজানতো তিণকট্ঠসমূহো ৰিয কাযো খাযতি। যথাহ –

    Khandhāditoti dvattiṃsākāre kesādīsu khandhādivasena saṅgayhamānesu ‘‘kesā kati khandhā honti, kati āyatanāni, kati dhātuyo, kati saccāni, kati satipaṭṭhānānī’’ti evamādinā nayena vinicchayo veditabbo. Evañcassa vijānato tiṇakaṭṭhasamūho viya kāyo khāyati. Yathāha –

    ‘‘নত্থি সত্তো নরো পোসো, পুগ্গলো নূপলব্ভতি।

    ‘‘Natthi satto naro poso, puggalo nūpalabbhati;

    সুঞ্ঞভূতো অযং কাযো, তিণকট্ঠসমূপমো’’তি॥

    Suññabhūto ayaṃ kāyo, tiṇakaṭṭhasamūpamo’’ti.

    অথস্স যা সা –

    Athassa yā sā –

    ‘‘সুঞ্ঞাগারং পৰিট্ঠস্স, সন্তচিত্তস্স তাদিনো।

    ‘‘Suññāgāraṃ paviṭṭhassa, santacittassa tādino;

    অমানুসী রতি হোতি, সম্মা ধম্মং ৰিপস্সতো’’তি॥ –

    Amānusī rati hoti, sammā dhammaṃ vipassato’’ti. –

    এৰং অমানুসী রতি ৰুত্তা, সা অদূরতরা হোতি। ততো যং তং –

    Evaṃ amānusī rati vuttā, sā adūratarā hoti. Tato yaṃ taṃ –

    ‘‘যতো যতো সম্মসতি, খন্ধানং উদযব্বযং।

    ‘‘Yato yato sammasati, khandhānaṃ udayabbayaṃ;

    লভতী পীতিপামোজ্জং, অমতং তং ৰিজানত’’ন্তি॥ (ধ॰ প॰ ৩৭৩-৩৭৪) –

    Labhatī pītipāmojjaṃ, amataṃ taṃ vijānata’’nti. (dha. pa. 373-374) –

    এৰং ৰিপস্সনামযং পীতিপামোজ্জামতং ৰুত্তং। তং অনুভৰন্তো ন চিরেনেৰ অরিযজনসেৰিতং অজরামরং নিব্বানামতং সচ্ছিকরোতীতি।

    Evaṃ vipassanāmayaṃ pītipāmojjāmataṃ vuttaṃ. Taṃ anubhavanto na cireneva ariyajanasevitaṃ ajarāmaraṃ nibbānāmataṃ sacchikarotīti.

    পরমত্থজোতিকায খুদ্দকপাঠ-অট্ঠকথায

    Paramatthajotikāya khuddakapāṭha-aṭṭhakathāya

    দ্ৰত্তিংসাকারৰণ্ণনা নিট্ঠিতা।

    Dvattiṃsākāravaṇṇanā niṭṭhitā.




    Next: ৪. কুমারপঞ্হৰণ্ণনা • 4. Kumārapañhavaṇṇanā




    Related texts:



    তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / খুদ্দকপাঠপাল়ি • Khuddakapāṭhapāḷi / ৩. দ্ৰত্তিংসাকারো • 3. Dvattiṃsākāro


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact