| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. த்³வயகாரீஸுத்தங்
3. Dvayakārīsuttaṃ
394. ஸாவத்தி²னிதா³னங். அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘கோ நு கோ², ப⁴ந்தே, ஹேது, கோ பச்சயோ, யேன மிதே⁴கச்சோ காயஸ்ஸ பே⁴தா³ பரங் மரணா அண்ட³ஜானங் ஸுபண்ணானங் ஸஹப்³யதங் உபபஜ்ஜதீ’’தி? ‘‘இத⁴, பி⁴க்கு², ஏகச்சோ காயேன த்³வயகாரீ ஹோதி, வாசாய த்³வயகாரீ, மனஸா த்³வயகாரீ. தஸ்ஸ ஸுதங் ஹோதி – ‘அண்ட³ஜா ஸுபண்ணா தீ³கா⁴யுகா வண்ணவந்தோ ஸுக²ப³ஹுலா’தி. தஸ்ஸ ஏவங் ஹோதி – ‘அஹோ வதாஹங் காயஸ்ஸ பே⁴தா³ பரங் மரணா அண்ட³ஜானங் ஸுபண்ணானங் ஸஹப்³யதங் உபபஜ்ஜெய்ய’ந்தி. ஸோ காயஸ்ஸ பே⁴தா³ பரங் மரணா அண்ட³ஜானங் ஸுபண்ணானங் ஸஹப்³யதங் உபபஜ்ஜதி. அயங் கோ², பி⁴க்கு², ஹேது, அயங் பச்சயோ , யேன மிதே⁴கச்சோ காயஸ்ஸ பே⁴தா³ பரங் மரணா அண்ட³ஜானங் ஸுபண்ணானங் ஸஹப்³யதங் உபபஜ்ஜதீ’’தி. ததியங்.
394. Sāvatthinidānaṃ. Aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ko nu kho, bhante, hetu, ko paccayo, yena midhekacco kāyassa bhedā paraṃ maraṇā aṇḍajānaṃ supaṇṇānaṃ sahabyataṃ upapajjatī’’ti? ‘‘Idha, bhikkhu, ekacco kāyena dvayakārī hoti, vācāya dvayakārī, manasā dvayakārī. Tassa sutaṃ hoti – ‘aṇḍajā supaṇṇā dīghāyukā vaṇṇavanto sukhabahulā’ti. Tassa evaṃ hoti – ‘aho vatāhaṃ kāyassa bhedā paraṃ maraṇā aṇḍajānaṃ supaṇṇānaṃ sahabyataṃ upapajjeyya’nti. So kāyassa bhedā paraṃ maraṇā aṇḍajānaṃ supaṇṇānaṃ sahabyataṃ upapajjati. Ayaṃ kho, bhikkhu, hetu, ayaṃ paccayo , yena midhekacco kāyassa bhedā paraṃ maraṇā aṇḍajānaṃ supaṇṇānaṃ sahabyataṃ upapajjatī’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. ஸுபண்ணஸங்யுத்தவண்ணனா • 9. Supaṇṇasaṃyuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. ஸுபண்ணஸங்யுத்தவண்ணனா • 9. Supaṇṇasaṃyuttavaṇṇanā
