| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
த்³வே மாஸா பரிவஸிதப்³ப³விதி⁴
Dve māsā parivasitabbavidhi
140. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ. தஸ்ஸ ஏவங் ஹோதி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் ஏகிஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசெய்ய’ந்தி . ஸோ ஸங்க⁴ங் ஏகிஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசதி. தஸ்ஸ ஸங்கோ⁴ ஏகிஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் தே³தி. தஸ்ஸ பரிவஸந்தஸ்ஸ லஜ்ஜீத⁴ம்மோ ஓக்கமி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. தஸ்ஸ மே ஏதத³ஹோஸி – அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் ஏகிஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசெய்ய’ந்தி. ஸோஹங் ஸங்க⁴ங் ஏகிஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசிங். தஸ்ஸ மே ஸங்கோ⁴ ஏகிஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி. யங்னூனாஹங் ஸங்க⁴ங் இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசெய்யந்தி. ஸோ ஸங்க⁴ங் இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசதி. தஸ்ஸ ஸங்கோ⁴ இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் தே³தி. தேன, பி⁴க்க²வே, பி⁴க்கு²னா தது³பாதா³ய த்³வே மாஸா பரிவஸிதப்³பா³.
140. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo. Tassa evaṃ hoti – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ ekissā āpattiyā dvemāsappaṭicchannāya dvemāsaparivāsaṃ yāceyya’nti . So saṅghaṃ ekissā āpattiyā dvemāsappaṭicchannāya dvemāsaparivāsaṃ yācati. Tassa saṅgho ekissā āpattiyā dvemāsappaṭicchannāya dvemāsaparivāsaṃ deti. Tassa parivasantassa lajjīdhammo okkami – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Tassa me etadahosi – ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ ekissā āpattiyā dvemāsappaṭicchannāya dvemāsaparivāsaṃ yāceyya’nti. Sohaṃ saṅghaṃ ekissā āpattiyā dvemāsappaṭicchannāya dvemāsaparivāsaṃ yāciṃ. Tassa me saṅgho ekissā āpattiyā dvemāsappaṭicchannāya dvemāsaparivāsaṃ adāsi. Tassa me parivasantassa lajjīdhammo okkami. Yaṃnūnāhaṃ saṅghaṃ itarissāpi āpattiyā dvemāsappaṭicchannāya dvemāsaparivāsaṃ yāceyyanti. So saṅghaṃ itarissāpi āpattiyā dvemāsappaṭicchannāya dvemāsaparivāsaṃ yācati. Tassa saṅgho itarissāpi āpattiyā dvemāsappaṭicchannāya dvemāsaparivāsaṃ deti. Tena, bhikkhave, bhikkhunā tadupādāya dve māsā parivasitabbā.
141. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ ; ஏகங் ஆபத்திங் ஜானாதி, ஏகங் ஆபத்திங் ந ஜானாதி. ஸோ ஸங்க⁴ங் யங் ஆபத்திங் ஜானாதி தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசதி. தஸ்ஸ ஸங்கோ⁴ தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் தே³தி. ஸோ பரிவஸந்தோ இதரம்பி ஆபத்திங் ஜானாதி. தஸ்ஸ ஏவங் ஹோதி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ; ஏகங் ஆபத்திங் ஜானிங், ஏகங் ஆபத்திங் ந ஜானிங். ஸோஹங் ஸங்க⁴ங் யங் ஆபத்திங் ஜானிங் தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசிங். தஸ்ஸ மே ஸங்கோ⁴ தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் அதா³ஸி. ஸோஹங் பரிவஸந்தோ இதரம்பி ஆபத்திங் ஜானாமி. யங்னூனாஹங் ஸங்க⁴ங் இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசெய்ய’ந்தி. ஸோ ஸங்க⁴ங் இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசதி. தஸ்ஸ ஸங்கோ⁴ இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் தே³தி. தேன, பி⁴க்க²வே, பி⁴க்கு²னா தது³பாதா³ய த்³வே மாஸா பரிவஸிதப்³பா³.
141. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo ; ekaṃ āpattiṃ jānāti, ekaṃ āpattiṃ na jānāti. So saṅghaṃ yaṃ āpattiṃ jānāti tassā āpattiyā dvemāsappaṭicchannāya dvemāsaparivāsaṃ yācati. Tassa saṅgho tassā āpattiyā dvemāsappaṭicchannāya dvemāsaparivāsaṃ deti. So parivasanto itarampi āpattiṃ jānāti. Tassa evaṃ hoti – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo; ekaṃ āpattiṃ jāniṃ, ekaṃ āpattiṃ na jāniṃ. Sohaṃ saṅghaṃ yaṃ āpattiṃ jāniṃ tassā āpattiyā dvemāsappaṭicchannāya dvemāsaparivāsaṃ yāciṃ. Tassa me saṅgho tassā āpattiyā dvemāsappaṭicchannāya dvemāsaparivāsaṃ adāsi. Sohaṃ parivasanto itarampi āpattiṃ jānāmi. Yaṃnūnāhaṃ saṅghaṃ itarissāpi āpattiyā dvemāsappaṭicchannāya dvemāsaparivāsaṃ yāceyya’nti. So saṅghaṃ itarissāpi āpattiyā dvemāsappaṭicchannāya dvemāsaparivāsaṃ yācati. Tassa saṅgho itarissāpi āpattiyā dvemāsappaṭicchannāya dvemāsaparivāsaṃ deti. Tena, bhikkhave, bhikkhunā tadupādāya dve māsā parivasitabbā.
142. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகங் ஆபத்திங் ஸரதி, ஏகங் ஆபத்திங் நஸ்ஸரதி. ஸோ ஸங்க⁴ங் யங் ஆபத்திங் ஸரதி தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசதி. தஸ்ஸ ஸங்கோ⁴ தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் தே³தி. ஸோ பரிவஸந்தோ இதரம்பி ஆபத்திங் ஸரதி. தஸ்ஸ ஏவங் ஹோதி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ; ஏகங் ஆபத்திங் ஸரிங், ஏகங் ஆபத்திங் நஸ்ஸரிங். ஸோஹங் ஸங்க⁴ங் யங் ஆபத்திங் ஸரிங், தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசிங். தஸ்ஸ மே ஸங்கோ⁴ தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் அதா³ஸி. ஸோஹங் பரிவஸந்தோ இதரம்பி ஆபத்திங் ஸராமி. யங்னூனாஹங் ஸங்க⁴ங் இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசெய்ய’ந்தி. ஸோ ஸங்க⁴ங் இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசதி. தஸ்ஸ ஸங்கோ⁴ இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் தே³தி. தேன, பி⁴க்க²வே, பி⁴க்கு²னா தது³பாதா³ய த்³வே மாஸா பரிவஸிதப்³பா³.
142. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; ekaṃ āpattiṃ sarati, ekaṃ āpattiṃ nassarati. So saṅghaṃ yaṃ āpattiṃ sarati tassā āpattiyā dvemāsappaṭicchannāya dvemāsaparivāsaṃ yācati. Tassa saṅgho tassā āpattiyā dvemāsappaṭicchannāya dvemāsaparivāsaṃ deti. So parivasanto itarampi āpattiṃ sarati. Tassa evaṃ hoti – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo; ekaṃ āpattiṃ sariṃ, ekaṃ āpattiṃ nassariṃ. Sohaṃ saṅghaṃ yaṃ āpattiṃ sariṃ, tassā āpattiyā dvemāsappaṭicchannāya dvemāsaparivāsaṃ yāciṃ. Tassa me saṅgho tassā āpattiyā dvemāsappaṭicchannāya dvemāsaparivāsaṃ adāsi. Sohaṃ parivasanto itarampi āpattiṃ sarāmi. Yaṃnūnāhaṃ saṅghaṃ itarissāpi āpattiyā dvemāsappaṭicchannāya dvemāsaparivāsaṃ yāceyya’nti. So saṅghaṃ itarissāpi āpattiyā dvemāsappaṭicchannāya dvemāsaparivāsaṃ yācati. Tassa saṅgho itarissāpi āpattiyā dvemāsappaṭicchannāya dvemāsaparivāsaṃ deti. Tena, bhikkhave, bhikkhunā tadupādāya dve māsā parivasitabbā.
143. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகாய ஆபத்தியா நிப்³பே³மதிகோ, ஏகாய ஆபத்தியா வேமதிகோ. ஸோ ஸங்க⁴ங் யாய ஆபத்தியா நிப்³பே³மதிகோ தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசதி. தஸ்ஸ ஸங்கோ⁴ தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் தே³தி. ஸோ பரிவஸந்தோ இதரிஸ்ஸாபி ஆபத்தியா நிப்³பே³மதிகோ ஹோதி. தஸ்ஸ ஏவங் ஹோதி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ; ஏகாய ஆபத்தியா நிப்³பே³மதிகோ, ஏகாய ஆபத்தியா வேமதிகோ. ஸோஹங் ஸங்க⁴ங் யாய ஆபத்தியா நிப்³பே³மதிகோ தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசிங். தஸ்ஸ மே ஸங்கோ⁴ தஸ்ஸா ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் அதா³ஸி. ஸோஹங் பரிவஸந்தோ இதரிஸ்ஸாபி ஆபத்தியா நிப்³பே³மதிகோ. யங்னூனாஹங் ஸங்க⁴ங் இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசெய்ய’ந்தி. ஸோ ஸங்க⁴ங் இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் யாசதி. தஸ்ஸ ஸங்கோ⁴ இதரிஸ்ஸாபி ஆபத்தியா த்³வேமாஸப்படிச்ச²ன்னாய த்³வேமாஸபரிவாஸங் தே³தி. தேன, பி⁴க்க²வே, பி⁴க்கு²னா தது³பாதா³ய த்³வே மாஸா பரிவஸிதப்³பா³.
143. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; ekāya āpattiyā nibbematiko, ekāya āpattiyā vematiko. So saṅghaṃ yāya āpattiyā nibbematiko tassā āpattiyā dvemāsappaṭicchannāya dvemāsaparivāsaṃ yācati. Tassa saṅgho tassā āpattiyā dvemāsappaṭicchannāya dvemāsaparivāsaṃ deti. So parivasanto itarissāpi āpattiyā nibbematiko hoti. Tassa evaṃ hoti – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo; ekāya āpattiyā nibbematiko, ekāya āpattiyā vematiko. Sohaṃ saṅghaṃ yāya āpattiyā nibbematiko tassā āpattiyā dvemāsappaṭicchannāya dvemāsaparivāsaṃ yāciṃ. Tassa me saṅgho tassā āpattiyā dvemāsappaṭicchannāya dvemāsaparivāsaṃ adāsi. Sohaṃ parivasanto itarissāpi āpattiyā nibbematiko. Yaṃnūnāhaṃ saṅghaṃ itarissāpi āpattiyā dvemāsappaṭicchannāya dvemāsaparivāsaṃ yāceyya’nti. So saṅghaṃ itarissāpi āpattiyā dvemāsappaṭicchannāya dvemāsaparivāsaṃ yācati. Tassa saṅgho itarissāpi āpattiyā dvemāsappaṭicchannāya dvemāsaparivāsaṃ deti. Tena, bhikkhave, bhikkhunā tadupādāya dve māsā parivasitabbā.
144. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகா ஆபத்தி ஜானப்படிச்ச²ன்னா, ஏகா ஆபத்தி அஜானப்படிச்ச²ன்னா. ஸோ ஸங்க⁴ங் தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசதி. தஸ்ஸ ஸங்கோ⁴ தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் தே³தி. தஸ்ஸ பரிவஸந்தஸ்ஸ அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ வியத்தோ மேதா⁴வீ லஜ்ஜீ குக்குச்சகோ ஸிக்கா²காமோ. ஸோ ஏவங் வதே³தி – ‘கிங் அயங், ஆவுஸோ, பி⁴க்கு² ஆபன்னோ? கிஸ்ஸாயங் பி⁴க்கு² பரிவஸதீ’தி? தே ஏவங் வதெ³ந்தி – ‘அயங், ஆவுஸோ, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜி த்³வேமாஸப்படிச்ச²ன்னாயோ; ஏகா ஆபத்தி ஜானப்படிச்ச²ன்னா, ஏகா ஆபத்தி அஜானப்படிச்ச²ன்னா. ஸோ ஸங்க⁴ங் தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசதி. தஸ்ஸ ஸங்கோ⁴ தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் அதா³ஸி. தாயோ அயங், ஆவுஸோ, பி⁴க்கு² ஆபன்னோ, தாஸாயங் பி⁴க்கு² பரிவஸதீ’தி. ஸோ ஏவங் வதே³தி – ‘யாயங், ஆவுஸோ , ஆபத்தி ஜானப்படிச்ச²ன்னா, த⁴ம்மிகங் தஸ்ஸா ஆபத்தியா பரிவாஸதா³னங்; த⁴ம்மத்தா ருஹதி. யா ச க்²வாயங், ஆவுஸோ, ஆபத்தி அஜானப்படிச்ச²ன்னா, அத⁴ம்மிகங் தஸ்ஸா ஆபத்தியா பரிவாஸதா³னங்; அத⁴ம்மத்தா ந ருஹதி. ஏகிஸ்ஸா, ஆவுஸோ, ஆபத்தியா பி⁴க்கு² மானத்தாரஹோ’’’தி.
144. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; ekā āpatti jānappaṭicchannā, ekā āpatti ajānappaṭicchannā. So saṅghaṃ tāsaṃ āpattīnaṃ dvemāsappaṭicchannānaṃ dvemāsaparivāsaṃ yācati. Tassa saṅgho tāsaṃ āpattīnaṃ dvemāsappaṭicchannānaṃ dvemāsaparivāsaṃ deti. Tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. So evaṃ vadeti – ‘kiṃ ayaṃ, āvuso, bhikkhu āpanno? Kissāyaṃ bhikkhu parivasatī’ti? Te evaṃ vadenti – ‘ayaṃ, āvuso, bhikkhu dve saṅghādisesā āpattiyo āpajji dvemāsappaṭicchannāyo; ekā āpatti jānappaṭicchannā, ekā āpatti ajānappaṭicchannā. So saṅghaṃ tāsaṃ āpattīnaṃ dvemāsappaṭicchannānaṃ dvemāsaparivāsaṃ yācati. Tassa saṅgho tāsaṃ āpattīnaṃ dvemāsappaṭicchannānaṃ dvemāsaparivāsaṃ adāsi. Tāyo ayaṃ, āvuso, bhikkhu āpanno, tāsāyaṃ bhikkhu parivasatī’ti. So evaṃ vadeti – ‘yāyaṃ, āvuso , āpatti jānappaṭicchannā, dhammikaṃ tassā āpattiyā parivāsadānaṃ; dhammattā ruhati. Yā ca khvāyaṃ, āvuso, āpatti ajānappaṭicchannā, adhammikaṃ tassā āpattiyā parivāsadānaṃ; adhammattā na ruhati. Ekissā, āvuso, āpattiyā bhikkhu mānattāraho’’’ti.
145. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகா ஆபத்தி ஸரமானப்படிச்ச²ன்னா, ஏகா ஆபத்தி அஸ்ஸரமானப்படிச்ச²ன்னா. ஸோ ஸங்க⁴ங் தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசதி. தஸ்ஸ ஸங்கோ⁴ தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் தே³தி. தஸ்ஸ பரிவஸந்தஸ்ஸ அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ வியத்தோ மேதா⁴வீ லஜ்ஜீ குக்குச்சகோ ஸிக்கா²காமோ. ஸோ ஏவங் வதே³தி – ‘கி அயங், ஆவுஸோ, பி⁴க்கு² ஆபன்னோ? கிஸ்ஸாயங் பி⁴க்கு² பரிவஸதீ’தி? தே ஏவங் வதெ³ந்தி – ‘அயங், ஆவுஸோ, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜி த்³வேமாஸப்படிச்ச²ன்னாயோ; ஏகா ஆபத்தி ஸரமானப்படிச்ச²ன்னா, ஏகா ஆபத்தி அஸ்ஸரமானப்படிச்ச²ன்னா. ஸோ ஸங்க⁴ங் தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசி. தஸ்ஸ ஸங்கோ⁴ தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் அதா³ஸி. தாயோ அயங், ஆவுஸோ, பி⁴க்கு² ஆபன்னோ; தாஸாயங் பி⁴க்கு² பரிவஸதீ’தி. ஸோ ஏவங் வதே³தி – ‘யாயங், ஆவுஸோ , ஆபத்தி ஸரமானப்படிச்ச²ன்னா த⁴ம்மிகங் தஸ்ஸா ஆபத்தியா பரிவாஸதா³னங்; த⁴ம்மத்தா ருஹதி. யா ச க்²வாயங், ஆவுஸோ, ஆபத்தி அஸ்ஸரமானப்படிச்ச²ன்னா, அத⁴ம்மிகங் தஸ்ஸா ஆபத்தியா பரிவாஸதா³னங்; அத⁴ம்மத்தா ந ருஹதி. ஏகிஸ்ஸா, ஆவுஸோ, ஆபத்தியா பி⁴க்கு² மானத்தாரஹோ’’’தி.
145. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; ekā āpatti saramānappaṭicchannā, ekā āpatti assaramānappaṭicchannā. So saṅghaṃ tāsaṃ āpattīnaṃ dvemāsappaṭicchannānaṃ dvemāsaparivāsaṃ yācati. Tassa saṅgho tāsaṃ āpattīnaṃ dvemāsappaṭicchannānaṃ dvemāsaparivāsaṃ deti. Tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. So evaṃ vadeti – ‘ki ayaṃ, āvuso, bhikkhu āpanno? Kissāyaṃ bhikkhu parivasatī’ti? Te evaṃ vadenti – ‘ayaṃ, āvuso, bhikkhu dve saṅghādisesā āpattiyo āpajji dvemāsappaṭicchannāyo; ekā āpatti saramānappaṭicchannā, ekā āpatti assaramānappaṭicchannā. So saṅghaṃ tāsaṃ āpattīnaṃ dvemāsappaṭicchannānaṃ dvemāsaparivāsaṃ yāci. Tassa saṅgho tāsaṃ āpattīnaṃ dvemāsappaṭicchannānaṃ dvemāsaparivāsaṃ adāsi. Tāyo ayaṃ, āvuso, bhikkhu āpanno; tāsāyaṃ bhikkhu parivasatī’ti. So evaṃ vadeti – ‘yāyaṃ, āvuso , āpatti saramānappaṭicchannā dhammikaṃ tassā āpattiyā parivāsadānaṃ; dhammattā ruhati. Yā ca khvāyaṃ, āvuso, āpatti assaramānappaṭicchannā, adhammikaṃ tassā āpattiyā parivāsadānaṃ; adhammattā na ruhati. Ekissā, āvuso, āpattiyā bhikkhu mānattāraho’’’ti.
146. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகா ஆபத்தி நிப்³பே³மதிகப்படிச்ச²ன்னா, ஏகா ஆபத்தி வேமதிகப்படிச்ச²ன்னா. ஸோ ஸங்க⁴ங் தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசதி. தஸ்ஸ ஸங்கோ⁴ தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் தே³தி. தஸ்ஸ பரிவஸந்தஸ்ஸ அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ வியத்தோ மேதா⁴வீ லஜ்ஜீ குக்குச்சகோ ஸிக்கா²காமோ. ஸோ ஏவங் வதே³தி – ‘கிங் அயங், ஆவுஸோ, பி⁴க்கு² ஆபன்னோ? கிஸ்ஸாயங் பி⁴க்கு² பரிவஸதீ’தி? தே ஏவங் வதெ³ந்தி – ‘அயங், ஆவுஸோ, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜி த்³வேமாஸப்படிச்ச²ன்னாயோ; ஏகா ஆபத்தி நிப்³பே³மதிகப்படிச்ச²ன்னா, ஏகா ஆபத்தி வேமதிகப்படிச்ச²ன்னா. ஸோ ஸங்க⁴ங் தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசி. தஸ்ஸ ஸங்கோ⁴ தாஸங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் அதா³ஸி. தாயோ அயங், ஆவுஸோ, பி⁴க்கு² ஆபன்னோ; தாஸாயங் பி⁴க்கு² பரிவஸதீ’தி. ஸோ ஏவங் வதே³தி – ‘யாயங் , ஆவுஸோ, ஆபத்தி நிப்³பே³மதிகப்படிச்ச²ன்னா, த⁴ம்மிகங் தஸ்ஸா ஆபத்தியா பரிவாஸதா³னங்; த⁴ம்மத்தா ருஹதி. யா ச க்²வாயங், ஆவுஸோ, ஆபத்தி வேமதிகப்படிச்ச²ன்னா அத⁴ம்மிகங் தஸ்ஸா ஆபத்தியா பரிவாஸதா³னங்; அத⁴ம்மத்தா ந ருஹதி. ஏகிஸ்ஸா, ஆவுஸோ, ஆபத்தியா பி⁴க்கு² மானத்தாரஹோ’’தி.
146. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; ekā āpatti nibbematikappaṭicchannā, ekā āpatti vematikappaṭicchannā. So saṅghaṃ tāsaṃ āpattīnaṃ dvemāsappaṭicchannānaṃ dvemāsaparivāsaṃ yācati. Tassa saṅgho tāsaṃ āpattīnaṃ dvemāsappaṭicchannānaṃ dvemāsaparivāsaṃ deti. Tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. So evaṃ vadeti – ‘kiṃ ayaṃ, āvuso, bhikkhu āpanno? Kissāyaṃ bhikkhu parivasatī’ti? Te evaṃ vadenti – ‘ayaṃ, āvuso, bhikkhu dve saṅghādisesā āpattiyo āpajji dvemāsappaṭicchannāyo; ekā āpatti nibbematikappaṭicchannā, ekā āpatti vematikappaṭicchannā. So saṅghaṃ tāsaṃ āpattīnaṃ dvemāsappaṭicchannānaṃ dvemāsaparivāsaṃ yāci. Tassa saṅgho tāsaṃ āpattīnaṃ dvemāsappaṭicchannānaṃ dvemāsaparivāsaṃ adāsi. Tāyo ayaṃ, āvuso, bhikkhu āpanno; tāsāyaṃ bhikkhu parivasatī’ti. So evaṃ vadeti – ‘yāyaṃ , āvuso, āpatti nibbematikappaṭicchannā, dhammikaṃ tassā āpattiyā parivāsadānaṃ; dhammattā ruhati. Yā ca khvāyaṃ, āvuso, āpatti vematikappaṭicchannā adhammikaṃ tassā āpattiyā parivāsadānaṃ; adhammattā na ruhati. Ekissā, āvuso, āpattiyā bhikkhu mānattāraho’’ti.
147. தேன கோ² பன ஸமயேன அஞ்ஞத்தரோ பி⁴க்கு² த்³வே ஸங்கா⁴தி³ஸேஸா ஆபத்தியோ ஆபன்னோ ஹோதி த்³வேமாஸப்படிச்ச²ன்னாயோ. தஸ்ஸ ஏதத³ஹோஸி – ‘‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ பரிவஸந்தஸ்ஸ லஜ்ஜீத⁴ம்மோ ஓக்கமி – ‘‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. தஸ்ஸ மே ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் 1 யாசெய்ய’’ந்தி.
147. Tena kho pana samayena aññattaro bhikkhu dve saṅghādisesā āpattiyo āpanno hoti dvemāsappaṭicchannāyo. Tassa etadahosi – ‘‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’’nti. So saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāci. Tassa saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa parivasantassa lajjīdhammo okkami – ‘‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Tassa me etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa me parivasantassa lajjīdhammo okkami. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ 2 yāceyya’’nti.
ஸோ பி⁴க்கூ²னங் ஆரோசேஸி – ‘‘அஹங் கோ², ஆவுஸோ, த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. தஸ்ஸ மே ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி – அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. தஸ்ஸ மே ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசெய்ய’ந்தி. கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘தேன ஹி, பி⁴க்க²வே, ஸங்கோ⁴ தஸ்ஸ பி⁴க்கு²னோ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் தே³து. ஏவஞ்ச பன, பி⁴க்க²வே, தா³தப்³போ³ –
So bhikkhūnaṃ ārocesi – ‘‘ahaṃ kho, āvuso, dve saṅghādisesā āpattiyo āpajjiṃ dvemāsappaṭicchannāyo. Tassa me etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa me parivasantassa lajjīdhammo okkami – ahaṃ kho dve saṅghādisesā āpattiyo āpajjiṃ dvemāsappaṭicchannāyo. Tassa me etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa me parivasantassa lajjīdhammo okkami. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yāceyya’nti. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Tena hi, bhikkhave, saṅgho tassa bhikkhuno dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ detu. Evañca pana, bhikkhave, dātabbo –
‘‘தேன, பி⁴க்க²வே, பி⁴க்கு²னா ஸங்க⁴ங் உபஸங்கமித்வா…பே॰… ஏவமஸ்ஸ வசனீயோ – அஹங், ப⁴ந்தே, த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ . தஸ்ஸ மே ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி – அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. தஸ்ஸ மே ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசெய்யந்தி. ஸோஹங், ப⁴ந்தே, ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசாமீதி. து³தியம்பி யாசிதப்³போ³. ததியம்பி யாசிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘Tena, bhikkhave, bhikkhunā saṅghaṃ upasaṅkamitvā…pe… evamassa vacanīyo – ahaṃ, bhante, dve saṅghādisesā āpattiyo āpajjiṃ dvemāsappaṭicchannāyo . Tassa me etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa me parivasantassa lajjīdhammo okkami – ahaṃ kho dve saṅghādisesā āpattiyo āpajjiṃ dvemāsappaṭicchannāyo. Tassa me etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa me parivasantassa lajjīdhammo okkami. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yāceyyanti. Sohaṃ, bhante, saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yācāmīti. Dutiyampi yācitabbo. Tatiyampi yācitabbo. Byattena bhikkhunā paṭibalena saṅgho ñāpetabbo –
148. ‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜி த்³வேமாஸப்படிச்ச²ன்னாயோ. தஸ்ஸ ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ பரிவஸந்தஸ்ஸ லஜ்ஜீத⁴ம்மோ ஓக்கமி – அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. தஸ்ஸ மே ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசெய்யந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ பி⁴க்கு²னோ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் த³தெ³ய்ய. ஏஸா ஞத்தி.
148. ‘‘Suṇātu me, bhante, saṅgho. Ayaṃ itthannāmo bhikkhu dve saṅghādisesā āpattiyo āpajji dvemāsappaṭicchannāyo. Tassa etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. So saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāci. Tassa saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa parivasantassa lajjīdhammo okkami – ahaṃ kho dve saṅghādisesā āpattiyo āpajjiṃ dvemāsappaṭicchannāyo. Tassa me etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa me parivasantassa lajjīdhammo okkami. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yāceyyanti. So saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yācati. Yadi saṅghassa pattakallaṃ, saṅgho itthannāmassa bhikkhuno dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜி த்³வேமாஸப்படிச்ச²ன்னாயோ. தஸ்ஸ ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ பரிவஸந்தஸ்ஸ லஜ்ஜீத⁴ம்மோ ஓக்கமி – அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. தஸ்ஸ மே ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசெய்ய’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸஸ்ஸ 3 தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ itthannāmo bhikkhu dve saṅghādisesā āpattiyo āpajji dvemāsappaṭicchannāyo. Tassa etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. So saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāci. Tassa saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa parivasantassa lajjīdhammo okkami – ahaṃ kho dve saṅghādisesā āpattiyo āpajjiṃ dvemāsappaṭicchannāyo. Tassa me etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa me parivasantassa lajjīdhammo okkami. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yāceyya’nti. So saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yācati. Saṅgho itthannāmassa bhikkhuno dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ deti. Yassāyasmato khamati itthannāmassa bhikkhuno dvinnaṃ āpattīnaṃ dvemāsappaṭicchannānaṃ itarampi māsaṃ parivāsassa 4 dānaṃ, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰….
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘தி³ன்னோ ஸங்கே⁴ன இத்த²ன்னாமஸ்ஸ பி⁴க்கு²னோ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸோ 5. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinno saṅghena itthannāmassa bhikkhuno dvinnaṃ āpattīnaṃ dvemāsappaṭicchannānaṃ itarampi māsaṃ parivāso 6. Khamati saṅghassa, tasmā tuṇhī, evametaṃ dhārayāmī’’ti.
‘‘தேன, பி⁴க்க²வே, பி⁴க்கு²னா புரிமங் உபாதா³ய த்³வே மாஸா பரிவஸிதப்³பா³.
‘‘Tena, bhikkhave, bhikkhunā purimaṃ upādāya dve māsā parivasitabbā.
149. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ. தஸ்ஸ ஏவங் ஹோதி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் தே³தி. தஸ்ஸ பரிவஸந்தஸ்ஸ லஜ்ஜீத⁴ம்மோ ஓக்கமி – அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. தஸ்ஸ மே ஏதத³ஹோஸி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசெய்ய’ந்தி. ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் ஏகமாஸபரிவாஸங் அதா³ஸி. தஸ்ஸ மே பரிவஸந்தஸ்ஸ லஜ்ஜீத⁴ம்மோ ஓக்கமி. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசெய்ய’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் தே³தி. தேன, பி⁴க்க²வே, பி⁴க்கு²னா புரிமங் உபாதா³ய த்³வே மாஸா பரிவஸிதப்³பா³.
149. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo. Tassa evaṃ hoti – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. So saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ deti. Tassa parivasantassa lajjīdhammo okkami – ahaṃ kho dve saṅghādisesā āpattiyo āpajjiṃ dvemāsappaṭicchannāyo. Tassa me etadahosi – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāceyya’nti. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ ekamāsaparivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ ekamāsaparivāsaṃ adāsi. Tassa me parivasantassa lajjīdhammo okkami. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yāceyya’nti. So saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ deti. Tena, bhikkhave, bhikkhunā purimaṃ upādāya dve māsā parivasitabbā.
150. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகங் மாஸங் ஜானாதி, ஏகங் மாஸங் ந ஜானாதி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் ஜானாதி தங் மாஸங் பரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் ஜானாதி தங் மாஸங் பரிவாஸங் தே³தி. ஸோ பரிவஸந்தோ இதரம்பி மாஸங் ஜானாதி. தஸ்ஸ ஏவங் ஹோதி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ; ஏகங் மாஸங் ஜானிங், ஏகங் மாஸங் ந ஜானிங். ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் ஜானிங் தங் மாஸங் பரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் ஜானிங் தங் மாஸங் பரிவாஸங் அதா³ஸி. ஸோஹங் பரிவஸந்தோ இதரம்பி மாஸங் ஜானாமி. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசெய்ய’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசதி . தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் தே³தி. தேன, பி⁴க்க²வே, பி⁴க்கு²னா புரிமங் உபாதா³ய த்³வே மாஸா பரிவஸிதப்³பா³.
150. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; ekaṃ māsaṃ jānāti, ekaṃ māsaṃ na jānāti. So saṅghaṃ dvinnaṃ āpattīnaṃ dvemāsappaṭicchannānaṃ yaṃ māsaṃ jānāti taṃ māsaṃ parivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ yaṃ māsaṃ jānāti taṃ māsaṃ parivāsaṃ deti. So parivasanto itarampi māsaṃ jānāti. Tassa evaṃ hoti – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo; ekaṃ māsaṃ jāniṃ, ekaṃ māsaṃ na jāniṃ. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ yaṃ māsaṃ jāniṃ taṃ māsaṃ parivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ yaṃ māsaṃ jāniṃ taṃ māsaṃ parivāsaṃ adāsi. Sohaṃ parivasanto itarampi māsaṃ jānāmi. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yāceyya’nti. So saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yācati . Tassa saṅgho dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ deti. Tena, bhikkhave, bhikkhunā purimaṃ upādāya dve māsā parivasitabbā.
151. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகங் மாஸங் ஸரதி, ஏகங் மாஸங் நஸ்ஸரதி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் ஸரதி தங் மாஸங் பரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் ஸரதி தங் மாஸங் பரிவாஸங் தே³தி. ஸோ பரிவஸந்தோ இதரம்பி மாஸங் ஸரதி. தஸ்ஸ ஏவங் ஹோதி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ; ஏகங் மாஸங் ஸரிங், ஏகங் மாஸங் நஸ்ஸரிங். ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் ஸரிங் தங் மாஸங் பரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் ஸரிங் தங் மாஸங் பரிவாஸங் அதா³ஸி. ஸோஹங் பரிவஸந்தோ இதரம்பி மாஸங் ஸராமி. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசெய்ய’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் தே³தி. தேன, பி⁴க்க²வே, பி⁴க்கு²னா புரிமங் உபாதா³ய த்³வே மாஸா பரிவஸிதப்³பா³.
151. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; ekaṃ māsaṃ sarati, ekaṃ māsaṃ nassarati. So saṅghaṃ dvinnaṃ āpattīnaṃ dvemāsappaṭicchannānaṃ yaṃ māsaṃ sarati taṃ māsaṃ parivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ yaṃ māsaṃ sarati taṃ māsaṃ parivāsaṃ deti. So parivasanto itarampi māsaṃ sarati. Tassa evaṃ hoti – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo; ekaṃ māsaṃ sariṃ, ekaṃ māsaṃ nassariṃ. Sohaṃ saṅghaṃ dvinnaṃ āpattīnaṃ dvemāsappaṭicchannānaṃ yaṃ māsaṃ sariṃ taṃ māsaṃ parivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchannānaṃ yaṃ māsaṃ sariṃ taṃ māsaṃ parivāsaṃ adāsi. Sohaṃ parivasanto itarampi māsaṃ sarāmi. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yāceyya’nti. So saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ deti. Tena, bhikkhave, bhikkhunā purimaṃ upādāya dve māsā parivasitabbā.
152. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகங் மாஸங் நிப்³பே³மதிகோ, ஏகங் மாஸங் வேமதிகோ. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் நிப்³பே³மதிகோ தங் மாஸங் பரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் நிப்³பே³மதிகோ தங் மாஸங் பரிவாஸங் தே³தி. ஸோ பரிவஸந்தோ இதரம்பி மாஸங் நிப்³பே³மதிகோ ஹோதி. தஸ்ஸ ஏவங் ஹோதி – ‘அஹங் கோ² த்³வே ஸங்கா⁴தி³ஸேஸா ஆபத்தியோ ஆபஜ்ஜிங் த்³வேமாஸப்படிச்ச²ன்னாயோ; ஏகங் மாஸங் நிப்³பே³மதிகோ, ஏகங் மாஸங் வேமதிகோ . ஸோஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் யங் மாஸங் நிப்³பே³மதிகோ தங் மாஸங் பரிவாஸங் யாசிங். தஸ்ஸ மே ஸங்கோ⁴ த்³வின்னங் ஆபத்தீனங் த்³வேமாஸப்படிச்சா²ன்னானங் யங் மாஸங் நிப்³பே³மதிகோ தங் மாஸங் பரிவாஸங் அதா³ஸி. ஸோஹங் பரிவஸந்தோ இதரம்பி மாஸங் நிப்³பே³மதிகோ. யங்னூனாஹங் ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசெய்ய’ந்தி. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் இதரம்பி மாஸங் பரிவாஸங் தே³தி. தேன, பி⁴க்க²வே , பி⁴க்கு²னா புரிமங் உபாதா³ய த்³வே மாஸா பரிவஸிதப்³பா³.
152. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; ekaṃ māsaṃ nibbematiko, ekaṃ māsaṃ vematiko. So saṅghaṃ dvinnaṃ āpattīnaṃ dvemāsappaṭicchannānaṃ yaṃ māsaṃ nibbematiko taṃ māsaṃ parivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ yaṃ māsaṃ nibbematiko taṃ māsaṃ parivāsaṃ deti. So parivasanto itarampi māsaṃ nibbematiko hoti. Tassa evaṃ hoti – ‘ahaṃ kho dve saṅghādisesā āpattiyo āpajjiṃ dvemāsappaṭicchannāyo; ekaṃ māsaṃ nibbematiko, ekaṃ māsaṃ vematiko . Sohaṃ saṅghaṃ dvinnaṃ āpattīnaṃ dvemāsappaṭicchannānaṃ yaṃ māsaṃ nibbematiko taṃ māsaṃ parivāsaṃ yāciṃ. Tassa me saṅgho dvinnaṃ āpattīnaṃ dvemāsappaṭicchānnānaṃ yaṃ māsaṃ nibbematiko taṃ māsaṃ parivāsaṃ adāsi. Sohaṃ parivasanto itarampi māsaṃ nibbematiko. Yaṃnūnāhaṃ saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yāceyya’nti. So saṅghaṃ dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ itarampi māsaṃ parivāsaṃ deti. Tena, bhikkhave , bhikkhunā purimaṃ upādāya dve māsā parivasitabbā.
153. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகோ மாஸோ ஜானப்படிச்ச²ன்னோ, ஏகோ மாஸோ அஜானப்படிச்ச²ன்னோ. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் தே³தி. தஸ்ஸ பரிவஸந்தஸ்ஸ அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ வியத்தோ மேதா⁴வீ லஜ்ஜீ குக்குச்சகோ ஸிக்கா²காமோ. ஸோ ஏவங் வதே³தி – ‘கிங் அயங், ஆவுஸோ, பி⁴க்கு² ஆபன்னோ? கிஸ்ஸாயங் பி⁴க்கு² பரிவஸதீ’தி? தே ஏவங் வதெ³ந்தி – ‘அயங், ஆவுஸோ, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜி த்³வேமாஸப்படிச்ச²ன்னாயோ. ஏகோ மாஸோ ஜானப்படிச்ச²ன்னோ, ஏகோ மாஸோ அஜானப்படிச்ச²ன்னோ. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் அதா³ஸி. தாயோ அயங், ஆவுஸோ, பி⁴க்கு² ஆபன்னோ தாஸாயங் பி⁴க்கு² பரிவஸதீ’தி. ஸோ ஏவங் வதே³தி – ‘ய்வாயங், ஆவுஸோ, மாஸோ ஜானப்படிச்ச²ன்னோ த⁴ம்மிகங் தஸ்ஸ மாஸஸ்ஸ பரிவாஸதா³னங்; த⁴ம்மத்தா ருஹதி. யோ ச க்²வாயங், ஆவுஸோ, மாஸோ அஜானப்படிச்ச²ன்னோ அத⁴ம்மிகங் தஸ்ஸ மாஸஸ்ஸ பரிவாஸதா³னங்; அத⁴ம்மத்தா ந ருஹதி. ஏகஸ்ஸ, ஆவுஸோ , மாஸஸ்ஸ பி⁴க்கு² மானத்தாரஹோ’தி.
153. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; eko māso jānappaṭicchanno, eko māso ajānappaṭicchanno. So saṅghaṃ dvinnaṃ āpattīnaṃ dvemāsappaṭicchannānaṃ dvemāsaparivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ dvemāsaparivāsaṃ deti. Tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. So evaṃ vadeti – ‘kiṃ ayaṃ, āvuso, bhikkhu āpanno? Kissāyaṃ bhikkhu parivasatī’ti? Te evaṃ vadenti – ‘ayaṃ, āvuso, bhikkhu dve saṅghādisesā āpattiyo āpajji dvemāsappaṭicchannāyo. Eko māso jānappaṭicchanno, eko māso ajānappaṭicchanno. So saṅghaṃ dvinnaṃ āpattīnaṃ dvemāsappaṭicchannānaṃ dvemāsaparivāsaṃ yāci. Tassa saṅgho dvinnaṃ āpattīnaṃ dvemāsappaṭicchannānaṃ dvemāsaparivāsaṃ adāsi. Tāyo ayaṃ, āvuso, bhikkhu āpanno tāsāyaṃ bhikkhu parivasatī’ti. So evaṃ vadeti – ‘yvāyaṃ, āvuso, māso jānappaṭicchanno dhammikaṃ tassa māsassa parivāsadānaṃ; dhammattā ruhati. Yo ca khvāyaṃ, āvuso, māso ajānappaṭicchanno adhammikaṃ tassa māsassa parivāsadānaṃ; adhammattā na ruhati. Ekassa, āvuso , māsassa bhikkhu mānattāraho’ti.
154. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகோ மாஸோ ஸரமானப்படிச்ச²ன்னோ, ஏகோ மாஸோ அஸ்ஸரமானப்படிச்ச²ன்னோ. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் தே³தி. தஸ்ஸ பரிவஸந்தஸ்ஸ அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ வியத்தோ மேதா⁴வீ லஜ்ஜீ குக்குச்சகோ ஸிக்கா²காமோ . ஸோ ஏவங் வதே³தி – ‘கிங் அயங், ஆவுஸோ, பி⁴க்கு² ஆபன்னோ? கிஸ்ஸாயங் பி⁴க்கு² பரிவஸதீ’தி? தே ஏவங் வதெ³ந்தி – ‘அயங், ஆவுஸோ, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜி த்³வேமாஸப்படிச்ச²ன்னாயோ; ஏகோ மாஸோ ஸரமானப்படிச்ச²ன்னோ, ஏகோ மாஸோ அஸ்ஸரமானப்படிச்ச²ன்னோ. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் அதா³ஸி. தாயோ அயங், ஆவுஸோ, பி⁴க்கு² ஆபன்னோ தாஸாயங் பி⁴க்கு² பரிவஸதீ’தி. ஸோ ஏவங் வதே³தி – ‘ய்வாயங், ஆவுஸோ, மாஸோ ஸரமானப்படிச்ச²ன்னோ த⁴ம்மிகங் தஸ்ஸ மாஸஸ்ஸ பரிவாஸதா³னங்; த⁴ம்மத்தா ருஹதி. யோ ச க்²வாயங், ஆவுஸோ, மாஸோ அஸ்ஸரமானப்படிச்ச²ன்னோ அத⁴ம்மிகங் தஸ்ஸ மாஸஸ்ஸ பரிவாஸதா³னங்; அத⁴ம்மத்தா ந ருஹதி. ஏகஸ்ஸ, ஆவுஸோ, மாஸஸ்ஸ பி⁴க்கு² மானத்தாரஹோ’தி.
154. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; eko māso saramānappaṭicchanno, eko māso assaramānappaṭicchanno. So saṅghaṃ dvinnaṃ āpattīnaṃ dvemāsappaṭicchannānaṃ dvemāsaparivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ dvemāsaparivāsaṃ deti. Tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo . So evaṃ vadeti – ‘kiṃ ayaṃ, āvuso, bhikkhu āpanno? Kissāyaṃ bhikkhu parivasatī’ti? Te evaṃ vadenti – ‘ayaṃ, āvuso, bhikkhu dve saṅghādisesā āpattiyo āpajji dvemāsappaṭicchannāyo; eko māso saramānappaṭicchanno, eko māso assaramānappaṭicchanno. So saṅghaṃ dvinnaṃ āpattīnaṃ dvemāsappaṭicchannānaṃ dvemāsaparivāsaṃ yāci. Tassa saṅgho dvinnaṃ āpattīnaṃ dvemāsappaṭicchannānaṃ dvemāsaparivāsaṃ adāsi. Tāyo ayaṃ, āvuso, bhikkhu āpanno tāsāyaṃ bhikkhu parivasatī’ti. So evaṃ vadeti – ‘yvāyaṃ, āvuso, māso saramānappaṭicchanno dhammikaṃ tassa māsassa parivāsadānaṃ; dhammattā ruhati. Yo ca khvāyaṃ, āvuso, māso assaramānappaṭicchanno adhammikaṃ tassa māsassa parivāsadānaṃ; adhammattā na ruhati. Ekassa, āvuso, māsassa bhikkhu mānattāraho’ti.
155. ‘‘இத⁴ பன, பி⁴க்க²வே, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜதி த்³வேமாஸப்படிச்ச²ன்னாயோ; ஏகோ மாஸோ நிப்³பே³மதிகப்படிச்ச²ன்னோ, ஏகோ மாஸோ வேமதிகப்படிச்ச²ன்னோ. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசதி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் தே³தி. தஸ்ஸ பரிவஸந்தஸ்ஸ அஞ்ஞோ பி⁴க்கு² ஆக³ச்ச²தி ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ வியத்தோ மேதா⁴வீ லஜ்ஜீ குக்குச்சகோ ஸிக்கா²காமோ. ஸோ ஏவங் வதே³தி – ‘கிங் அயங், ஆவுஸோ, பி⁴க்கு² ஆபன்னோ? கிஸ்ஸாயங் பி⁴க்கு² பரிவஸதீ’தி? தே ஏவங் வதெ³ந்தி – ‘அயங், ஆவுஸோ, பி⁴க்கு² த்³வே ஸங்கா⁴தி³ஸேஸா ஆபத்தியோ ஆபஜ்ஜி த்³வேமாஸப்படிச்ச²ன்னாயோ; ஏகோ மாஸோ நிப்³பே³மதிகப்படிச்ச²ன்னோ, ஏகோ மாஸோ வேமதிகப்படிச்ச²ன்னோ. ஸோ ஸங்க⁴ங் த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் யாசி. தஸ்ஸ ஸங்கோ⁴ த்³வின்னங் ஆபத்தீனங் த்³வேமாஸப்படிச்ச²ன்னானங் த்³வேமாஸபரிவாஸங் அதா³ஸி. தாயோ அயங், ஆவுஸோ, பி⁴க்கு² ஆபன்னோ தாஸாயங் பி⁴க்கு² பரிவஸதீ’தி . ஸோ ஏவங் வதே³தி – ‘ய்வாயங், ஆவுஸோ, மாஸோ நிப்³பே³மதிகப்படிச்ச²ன்னோ த⁴ம்மிகங் தஸ்ஸ மாஸஸ்ஸ பரிவாஸதா³னங்; த⁴ம்மத்தா ருஹதி. யோ ச க்²வாயங், ஆவுஸோ, மாஸோ வேமதிகப்படிச்ச²ன்னோ அத⁴ம்மிகங் தஸ்ஸ மாஸஸ்ஸ பரிவாஸதா³னங்; அத⁴ம்மத்தா ந ருஹதி. ஏகஸ்ஸ, ஆவுஸோ, மாஸஸ்ஸ பி⁴க்கு² மானத்தாரஹோ’’தி.
155. ‘‘Idha pana, bhikkhave, bhikkhu dve saṅghādisesā āpattiyo āpajjati dvemāsappaṭicchannāyo; eko māso nibbematikappaṭicchanno, eko māso vematikappaṭicchanno. So saṅghaṃ dvinnaṃ āpattīnaṃ dvemāsappaṭicchannānaṃ dvemāsaparivāsaṃ yācati. Tassa saṅgho dvinnaṃ āpattīnaṃ dvemāsappaṭicchannānaṃ dvemāsaparivāsaṃ deti. Tassa parivasantassa añño bhikkhu āgacchati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. So evaṃ vadeti – ‘kiṃ ayaṃ, āvuso, bhikkhu āpanno? Kissāyaṃ bhikkhu parivasatī’ti? Te evaṃ vadenti – ‘ayaṃ, āvuso, bhikkhu dve saṅghādisesā āpattiyo āpajji dvemāsappaṭicchannāyo; eko māso nibbematikappaṭicchanno, eko māso vematikappaṭicchanno. So saṅghaṃ dvinnaṃ āpattīnaṃ dvemāsappaṭicchannānaṃ dvemāsaparivāsaṃ yāci. Tassa saṅgho dvinnaṃ āpattīnaṃ dvemāsappaṭicchannānaṃ dvemāsaparivāsaṃ adāsi. Tāyo ayaṃ, āvuso, bhikkhu āpanno tāsāyaṃ bhikkhu parivasatī’ti . So evaṃ vadeti – ‘yvāyaṃ, āvuso, māso nibbematikappaṭicchanno dhammikaṃ tassa māsassa parivāsadānaṃ; dhammattā ruhati. Yo ca khvāyaṃ, āvuso, māso vematikappaṭicchanno adhammikaṃ tassa māsassa parivāsadānaṃ; adhammattā na ruhati. Ekassa, āvuso, māsassa bhikkhu mānattāraho’’ti.
Footnotes:
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / படிச்ச²ன்னபரிவாஸாதி³கதா²வண்ணனா • Paṭicchannaparivāsādikathāvaṇṇanā
