| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
3. த்³வேபா⁴க³ஸிக்கா²பத³ங்
3. Dvebhāgasikkhāpadaṃ
552. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² – ‘‘ப⁴க³வதா படிக்கி²த்தங் ஸுத்³த⁴காளகானங் ஏளகலோமானங் ஸந்த²தங் காராபேது’’ந்தி, தே தோ²கங்யேவ ஓதா³தங் அந்தே ஆதி³யித்வா ததே²வ ஸுத்³த⁴காளகானங் ஏளகலோமானங் ஸந்த²தங் காராபெந்தி. யே தே பி⁴க்கூ² அப்பிச்சா²… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² தோ²கங்யேவ ஓதா³தங் அந்தே ஆதி³யித்வா ததே²வ ஸுத்³த⁴காளகானங் ஏளகலோமானங் ஸந்த²தங் காராபெஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர தும்ஹே, பி⁴க்க²வே, தோ²கங்யேவ ஓதா³தங் அந்தே ஆதி³யித்வா ததே²வ ஸுத்³த⁴காளகானங் ஏளகலோமானங் ஸந்த²தங் காராபேதா²’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தும்ஹே, மோக⁴புரிஸா, தோ²கங்யேவ ஓதா³தங் அந்தே ஆதி³யித்வா ததே²வ ஸுத்³த⁴காளகானங் ஏளகலோமானங் ஸந்த²தங் காராபெஸ்ஸத²! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
552. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū – ‘‘bhagavatā paṭikkhittaṃ suddhakāḷakānaṃ eḷakalomānaṃ santhataṃ kārāpetu’’nti, te thokaṃyeva odātaṃ ante ādiyitvā tatheva suddhakāḷakānaṃ eḷakalomānaṃ santhataṃ kārāpenti. Ye te bhikkhū appicchā… te ujjhāyanti khiyyanti vipācenti – ‘‘kathañhi nāma chabbaggiyā bhikkhū thokaṃyeva odātaṃ ante ādiyitvā tatheva suddhakāḷakānaṃ eḷakalomānaṃ santhataṃ kārāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, thokaṃyeva odātaṃ ante ādiyitvā tatheva suddhakāḷakānaṃ eḷakalomānaṃ santhataṃ kārāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, thokaṃyeva odātaṃ ante ādiyitvā tatheva suddhakāḷakānaṃ eḷakalomānaṃ santhataṃ kārāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
553. ‘‘நவங் பன பி⁴க்கு²னா ஸந்த²தங் காரயமானேன த்³வே பா⁴கா³ ஸுத்³த⁴காளகானங் ஏளகலோமானங் ஆதா³தப்³பா³ ததியங் ஓதா³தானங் சதுத்த²ங் கோ³சரியானங் . அனாதா³ சே பி⁴க்கு² த்³வே பா⁴கே³ ஸுத்³த⁴காளகானங் ஏளகலோமானங் ததியங் ஓதா³தானங் சதுத்த²ங் கோ³சரியானங் நவங் ஸந்த²தங் காராபெய்ய, நிஸ்ஸக்³கி³யங் பாசித்திய’’ந்தி.
553.‘‘Navaṃ pana bhikkhunā santhataṃ kārayamānena dve bhāgā suddhakāḷakānaṃ eḷakalomānaṃ ādātabbā tatiyaṃ odātānaṃ catutthaṃ gocariyānaṃ . Anādā ce bhikkhu dve bhāge suddhakāḷakānaṃ eḷakalomānaṃ tatiyaṃ odātānaṃ catutthaṃ gocariyānaṃ navaṃ santhataṃ kārāpeyya, nissaggiyaṃ pācittiya’’nti.
554. நவங் நாம கரணங் உபாதா³ய வுச்சதி.
554.Navaṃ nāma karaṇaṃ upādāya vuccati.
ஸந்த²தங் நாம ஸந்த²ரித்வா கதங் ஹோதி அவாயிமங்.
Santhataṃ nāma santharitvā kataṃ hoti avāyimaṃ.
காரயமானேனாதி கரொந்தோ வா காராபெந்தோ வா.
Kārayamānenāti karonto vā kārāpento vā.
த்³வே பா⁴கா³ ஸுத்³த⁴காளகானங் ஏளகலோமானங் ஆதா³தப்³பா³தி தா⁴ரயித்வா த்³வே துலா ஆதா³தப்³பா³.
Dve bhāgā suddhakāḷakānaṃ eḷakalomānaṃ ādātabbāti dhārayitvā dve tulā ādātabbā.
ததியங் ஓதா³தானந்தி துலங் ஓதா³தானங்.
Tatiyaṃ odātānanti tulaṃ odātānaṃ.
சதுத்த²ங் கோ³சரியானந்தி துலங் கோ³சரியானங்.
Catutthaṃ gocariyānanti tulaṃ gocariyānaṃ.
அனாதா³ சே பி⁴க்கு² த்³வே பா⁴கே³ ஸுத்³த⁴காளகானங் ஏளகலோமானங் ததியங் ஓதா³தானங் சதுத்த²ங் கோ³சரியானந்தி. அனாதி³யித்வா த்³வே துலே ஸுத்³த⁴காளகானங் ஏளகலோமானங் துலங் ஓதா³தானங் துலங் கோ³சரியானங் நவங் ஸந்த²தங் கரோதி வா காராபேதி வா பயோகே³ து³க்கடங், படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, ஸந்த²தங் அனாதி³யித்வா த்³வே துலே ஸுத்³த⁴காளகானங் ஏளகலோமானங் துலங் ஓதா³தானங் துலங் கோ³சரியானங் காராபிதங் நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Anādāce bhikkhu dve bhāge suddhakāḷakānaṃ eḷakalomānaṃ tatiyaṃ odātānaṃ catutthaṃ gocariyānanti. Anādiyitvā dve tule suddhakāḷakānaṃ eḷakalomānaṃ tulaṃ odātānaṃ tulaṃ gocariyānaṃ navaṃ santhataṃ karoti vā kārāpeti vā payoge dukkaṭaṃ, paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, santhataṃ anādiyitvā dve tule suddhakāḷakānaṃ eḷakalomānaṃ tulaṃ odātānaṃ tulaṃ gocariyānaṃ kārāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
555. அத்தனா விப்பகதங் அத்தனா பரியோஸாபேதி, நிஸ்ஸக்³கி³யங் பாசித்தியங். அத்தனா விப்பகதங் பரேஹி பரியோஸாபேதி, நிஸ்ஸக்³கி³யங் பாசித்தியங். பரேஹி விப்பகதங் அத்தனா பரியோஸாபேதி, நிஸ்ஸக்³கி³யங் பாசித்தியங் . பரேஹி விப்பகதங் பரேஹி பரியோஸாபேதி, நிஸ்ஸக்³கி³யங் பாசித்தியங்.
555. Attanā vippakataṃ attanā pariyosāpeti, nissaggiyaṃ pācittiyaṃ. Attanā vippakataṃ parehi pariyosāpeti, nissaggiyaṃ pācittiyaṃ. Parehi vippakataṃ attanā pariyosāpeti, nissaggiyaṃ pācittiyaṃ . Parehi vippakataṃ parehi pariyosāpeti, nissaggiyaṃ pācittiyaṃ.
அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ. அஞ்ஞேன கதங் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸ.
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
556. அனாபத்தி துலங் ஓதா³தானங் துலங் கோ³சரியானங் ஆதி³யித்வா கரோதி, ப³ஹுதரங் ஓதா³தானங் ப³ஹுதரங் கோ³சரியானங் ஆதி³யித்வா கரோதி, ஸுத்³த⁴ங் ஓதா³தானங் ஸுத்³த⁴ங் கோ³சரியானங் ஆதி³யித்வா கரோதி, விதானங் வா பூ⁴மத்த²ரணங் வா ஸாணிபாகாரங் வா பி⁴ஸிங் வா பி³ப்³போ³ஹனங் வா கரோதி, உம்மத்தகஸ்ஸ, ஆதி³கம்மிகஸ்ஸாதி.
556. Anāpatti tulaṃ odātānaṃ tulaṃ gocariyānaṃ ādiyitvā karoti, bahutaraṃ odātānaṃ bahutaraṃ gocariyānaṃ ādiyitvā karoti, suddhaṃ odātānaṃ suddhaṃ gocariyānaṃ ādiyitvā karoti, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa, ādikammikassāti.
த்³வேபா⁴க³ஸிக்கா²பத³ங் நிட்டி²தங் ததியங்.
Dvebhāgasikkhāpadaṃ niṭṭhitaṃ tatiyaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. த்³வேபா⁴க³ஸிக்கா²பத³வண்ணனா • 3. Dvebhāgasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. த்³வேபா⁴க³ஸிக்கா²பத³வண்ணனா • 3. Dvebhāgasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. த்³வேபா⁴க³ஸிக்கா²பத³வண்ணனா • 3. Dvebhāgasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. கோஸியஸிக்கா²பத³வண்ணனா • 1. Kosiyasikkhāpadavaṇṇanā
