| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
3. ද්‌වෙභාගසික්‌ඛාපදං
3. Dvebhāgasikkhāpadaṃ
552. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ඡබ්‌බග්‌ගියා භික්‌ඛූ – ‘‘භගවතා පටික්‌ඛිත්‌තං සුද්‌ධකාළකානං එළකලොමානං සන්‌ථතං කාරාපෙතු’’න්‌ති, තෙ ථොකංයෙව ඔදාතං අන්‌තෙ ආදියිත්‌වා තථෙව සුද්‌ධකාළකානං එළකලොමානං සන්‌ථතං කාරාපෙන්‌ති. යෙ තෙ භික්‌ඛූ අප්‌පිච්‌ඡා… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛූ ථොකංයෙව ඔදාතං අන්‌තෙ ආදියිත්‌වා තථෙව සුද්‌ධකාළකානං එළකලොමානං සන්‌ථතං කාරාපෙස්‌සන්‌තී’’ති! අථ ඛො තෙ භික්‌ඛූ ඡබ්‌බග්‌ගියෙ භික්‌ඛූ අනෙකපරියායෙන විගරහිත්‌වා භගවතො එතමත්‌ථං ආරොචෙසුං…පෙ.… ‘‘සච්‌චං කිර තුම්‌හෙ, භික්‌ඛවෙ, ථොකංයෙව ඔදාතං අන්‌තෙ ආදියිත්‌වා තථෙව සුද්‌ධකාළකානං එළකලොමානං සන්‌ථතං කාරාපෙථා’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම තුම්‌හෙ, මොඝපුරිසා, ථොකංයෙව ඔදාතං අන්‌තෙ ආදියිත්‌වා තථෙව සුද්‌ධකාළකානං එළකලොමානං සන්‌ථතං කාරාපෙස්‌සථ! නෙතං, මොඝපුරිසා, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
552. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū – ‘‘bhagavatā paṭikkhittaṃ suddhakāḷakānaṃ eḷakalomānaṃ santhataṃ kārāpetu’’nti, te thokaṃyeva odātaṃ ante ādiyitvā tatheva suddhakāḷakānaṃ eḷakalomānaṃ santhataṃ kārāpenti. Ye te bhikkhū appicchā… te ujjhāyanti khiyyanti vipācenti – ‘‘kathañhi nāma chabbaggiyā bhikkhū thokaṃyeva odātaṃ ante ādiyitvā tatheva suddhakāḷakānaṃ eḷakalomānaṃ santhataṃ kārāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, thokaṃyeva odātaṃ ante ādiyitvā tatheva suddhakāḷakānaṃ eḷakalomānaṃ santhataṃ kārāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, thokaṃyeva odātaṃ ante ādiyitvā tatheva suddhakāḷakānaṃ eḷakalomānaṃ santhataṃ kārāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
553. ‘‘නවං පන භික්‌ඛුනා සන්‌ථතං කාරයමානෙන ද්‌වෙ භාගා සුද්‌ධකාළකානං එළකලොමානං ආදාතබ්‌බා තතියං ඔදාතානං චතුත්‌ථං ගොචරියානං . අනාදා චෙ භික්‌ඛු ද්‌වෙ භාගෙ සුද්‌ධකාළකානං එළකලොමානං තතියං ඔදාතානං චතුත්‌ථං ගොචරියානං නවං සන්‌ථතං කාරාපෙය්‍ය, නිස්‌සග්‌ගියං පාචිත්‌තිය’’න්‌ති.
553.‘‘Navaṃ pana bhikkhunā santhataṃ kārayamānena dve bhāgā suddhakāḷakānaṃ eḷakalomānaṃ ādātabbā tatiyaṃ odātānaṃ catutthaṃ gocariyānaṃ . Anādā ce bhikkhu dve bhāge suddhakāḷakānaṃ eḷakalomānaṃ tatiyaṃ odātānaṃ catutthaṃ gocariyānaṃ navaṃ santhataṃ kārāpeyya, nissaggiyaṃ pācittiya’’nti.
554. නවං නාම කරණං උපාදාය වුච්‌චති.
554.Navaṃ nāma karaṇaṃ upādāya vuccati.
සන්‌ථතං නාම සන්‌ථරිත්‌වා කතං හොති අවායිමං.
Santhataṃ nāma santharitvā kataṃ hoti avāyimaṃ.
කාරයමානෙනාති කරොන්‌තො වා කාරාපෙන්‌තො වා.
Kārayamānenāti karonto vā kārāpento vā.
ද්‌වෙ භාගා සුද්‌ධකාළකානං එළකලොමානං ආදාතබ්‌බාති ධාරයිත්‌වා ද්‌වෙ තුලා ආදාතබ්‌බා.
Dve bhāgā suddhakāḷakānaṃ eḷakalomānaṃ ādātabbāti dhārayitvā dve tulā ādātabbā.
තතියං ඔදාතානන්‌ති තුලං ඔදාතානං.
Tatiyaṃ odātānanti tulaṃ odātānaṃ.
චතුත්‌ථං ගොචරියානන්‌ති තුලං ගොචරියානං.
Catutthaṃ gocariyānanti tulaṃ gocariyānaṃ.
අනාදා චෙ භික්‌ඛු ද්‌වෙ භාගෙ සුද්‌ධකාළකානං එළකලොමානං තතියං ඔදාතානං චතුත්‌ථං ගොචරියානන්‌ති. අනාදියිත්‌වා ද්‌වෙ තුලෙ සුද්‌ධකාළකානං එළකලොමානං තුලං ඔදාතානං තුලං ගොචරියානං නවං සන්‌ථතං කරොති වා කාරාපෙති වා පයොගෙ දුක්‌කටං, පටිලාභෙන නිස්‌සග්‌ගියං හොති. නිස්‌සජ්‌ජිතබ්‌බං සඞ්‌ඝස්‌ස වා ගණස්‌ස වා පුග්‌ගලස්‌ස වා. එවඤ්‌ච පන, භික්‌ඛවෙ, නිස්‌සජ්‌ජිතබ්‌බං…පෙ.… ඉදං මෙ, භන්‌තෙ, සන්‌ථතං අනාදියිත්‌වා ද්‌වෙ තුලෙ සුද්‌ධකාළකානං එළකලොමානං තුලං ඔදාතානං තුලං ගොචරියානං කාරාපිතං නිස්‌සග්‌ගියං. ඉමාහං සඞ්‌ඝස්‌ස නිස්‌සජ්‌ජාමීති…පෙ.… දදෙය්‍යාති…පෙ.… දදෙය්‍යුන්‌ති…පෙ.… ආයස්‌මතො දම්‌මීති.
Anādāce bhikkhu dve bhāge suddhakāḷakānaṃ eḷakalomānaṃ tatiyaṃ odātānaṃ catutthaṃ gocariyānanti. Anādiyitvā dve tule suddhakāḷakānaṃ eḷakalomānaṃ tulaṃ odātānaṃ tulaṃ gocariyānaṃ navaṃ santhataṃ karoti vā kārāpeti vā payoge dukkaṭaṃ, paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, santhataṃ anādiyitvā dve tule suddhakāḷakānaṃ eḷakalomānaṃ tulaṃ odātānaṃ tulaṃ gocariyānaṃ kārāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
555. අත්‌තනා විප්‌පකතං අත්‌තනා පරියොසාපෙති, නිස්‌සග්‌ගියං පාචිත්‌තියං. අත්‌තනා විප්‌පකතං පරෙහි පරියොසාපෙති, නිස්‌සග්‌ගියං පාචිත්‌තියං. පරෙහි විප්‌පකතං අත්‌තනා පරියොසාපෙති, නිස්‌සග්‌ගියං පාචිත්‌තියං . පරෙහි විප්‌පකතං පරෙහි පරියොසාපෙති, නිස්‌සග්‌ගියං පාචිත්‌තියං.
555. Attanā vippakataṃ attanā pariyosāpeti, nissaggiyaṃ pācittiyaṃ. Attanā vippakataṃ parehi pariyosāpeti, nissaggiyaṃ pācittiyaṃ. Parehi vippakataṃ attanā pariyosāpeti, nissaggiyaṃ pācittiyaṃ . Parehi vippakataṃ parehi pariyosāpeti, nissaggiyaṃ pācittiyaṃ.
අඤ්‌ඤස්‌සත්‌ථාය කරොති වා කාරාපෙති වා, ආපත්‌ති දුක්‌කටස්‌ස. අඤ්‌ඤෙන කතං පටිලභිත්‌වා පරිභුඤ්‌ජති, ආපත්‌ති දුක්‌කටස්‌ස.
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
556. අනාපත්‌ති තුලං ඔදාතානං තුලං ගොචරියානං ආදියිත්‌වා කරොති, බහුතරං ඔදාතානං බහුතරං ගොචරියානං ආදියිත්‌වා කරොති, සුද්‌ධං ඔදාතානං සුද්‌ධං ගොචරියානං ආදියිත්‌වා කරොති, විතානං වා භූමත්‌ථරණං වා සාණිපාකාරං වා භිසිං වා බිබ්‌බොහනං වා කරොති, උම්‌මත්‌තකස්‌ස, ආදිකම්‌මිකස්‌සාති.
556. Anāpatti tulaṃ odātānaṃ tulaṃ gocariyānaṃ ādiyitvā karoti, bahutaraṃ odātānaṃ bahutaraṃ gocariyānaṃ ādiyitvā karoti, suddhaṃ odātānaṃ suddhaṃ gocariyānaṃ ādiyitvā karoti, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa, ādikammikassāti.
ද්‌වෙභාගසික්‌ඛාපදං නිට්‌ඨිතං තතියං.
Dvebhāgasikkhāpadaṃ niṭṭhitaṃ tatiyaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 3. ද්‌වෙභාගසික්‌ඛාපදවණ්‌ණනා • 3. Dvebhāgasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. ද්‌වෙභාගසික්‌ඛාපදවණ්‌ණනා • 3. Dvebhāgasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 3. ද්‌වෙභාගසික්‌ඛාපදවණ්‌ණනා • 3. Dvebhāgasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. කොසියසික්‌ඛාපදවණ්‌ණනා • 1. Kosiyasikkhāpadavaṇṇanā
