| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
3. த்³வேபா⁴க³ஸிக்கா²பத³வண்ணனா
3. Dvebhāgasikkhāpadavaṇṇanā
க³ஹேதப்³பா³தி யதா² காளகா அதி⁴கா ந ஹொந்தி, ததா² க³ஹேதப்³பா³. ட²பெத்வா செத்த² காளகஓதா³தே அவஸேஸா கோ³சரியேஸுயேவ ஸங்க³ஹங் க³ச்ச²ந்தீதி (ஸாரத்த²॰ டீ॰ 2.552) த³ட்ட²ப்³ப³ங். எத்த² ச த்³வே பா⁴கா³தி உக்கட்ட²பரிச்சே²தோ³ காளகானங் அதி⁴கக்³க³ஹணஸ்ஸ படிக்கே²பவஸேன ஸிக்கா²பத³ஸ்ஸ பஞ்ஞத்தத்தா. தஸ்மா காளகானங் பா⁴க³த்³வயதோ அதி⁴கங் ந வட்டதி, ஊனகங் வட்டதி. தேனாஹ ‘‘ஏகஸ்ஸாபீ’’திஆதி³. ஏகஸ்ஸாபி காளகலோமஸ்ஸ அதிரேகபா⁴வேதி துலாய தா⁴ரயித்வா ட²பிதேஸு அந்தமஸோ வாதவேகே³னபி பஹிதஸ்ஸ ஏகஸ்ஸாபி காளகலோமஸ்ஸ அதி⁴கபா⁴வே ஸதீதி அத்தோ². ‘‘ததியங் ஓதா³தானங், சதுத்த²ங் கோ³சரியான’’ந்தி இத³ங் பன ஹெட்டி²மபரிச்சே²தோ³ தேஸங் அதி⁴கக்³க³ஹணே படிக்கே²பாபா⁴வதோ. தஸ்மா தேஸங் வுத்தப்பமாணதோ அதி⁴கம்பி வட்டதி.
Gahetabbāti yathā kāḷakā adhikā na honti, tathā gahetabbā. Ṭhapetvā cettha kāḷakaodāte avasesā gocariyesuyeva saṅgahaṃ gacchantīti (sārattha. ṭī. 2.552) daṭṭhabbaṃ. Ettha ca dve bhāgāti ukkaṭṭhaparicchedo kāḷakānaṃ adhikaggahaṇassa paṭikkhepavasena sikkhāpadassa paññattattā. Tasmā kāḷakānaṃ bhāgadvayato adhikaṃ na vaṭṭati, ūnakaṃ vaṭṭati. Tenāha ‘‘ekassāpī’’tiādi. Ekassāpi kāḷakalomassa atirekabhāveti tulāya dhārayitvā ṭhapitesu antamaso vātavegenapi pahitassa ekassāpi kāḷakalomassa adhikabhāve satīti attho. ‘‘Tatiyaṃ odātānaṃ, catutthaṃ gocariyāna’’nti idaṃ pana heṭṭhimaparicchedo tesaṃ adhikaggahaṇe paṭikkhepābhāvato. Tasmā tesaṃ vuttappamāṇato adhikampi vaṭṭati.
எத்த² ச ‘‘இத³ங் மே, ப⁴ந்தே, ஸந்த²தங் அனாதி³யித்வா த்³வே துலே ஸுத்³த⁴காளகானங் ஏளகலோமானங், துலங் ஓதா³தானங், துலங் கோ³சரியானங் ஸந்த²தங் காராபிதங் நிஸ்ஸக்³கி³ய’’ந்தி (பாரா॰ 554) இமினா நயேன நிஸ்ஸஜ்ஜனவிதா⁴னங் வேதி³தப்³ப³ங். ஆதா³ய ச வுத்தபரிச்சே²தே³ன அனாதா³ய ச கரணதோ கிரியாகிரியங். ஸேஸந்தி புப்³ப³பயோக³து³க்கடசதுக்கபாசித்தியாதி³கங். அயங் பன விஸேஸோ – துலங் ஓதா³தானங் துலங் கோ³சரியானங் ஆதி³யித்வா கரணே, ப³ஹுதரங் ஓதா³தானங் ப³ஹுதரங் கோ³சரியானங் ஆதி³யித்வா கரணே , ஸுத்³த⁴ங் ஓதா³தானங் ஸுத்³த⁴ங் கோ³சரியானங் ஆதி³யித்வா கரணே ச அனாபத்தீதி.
Ettha ca ‘‘idaṃ me, bhante, santhataṃ anādiyitvā dve tule suddhakāḷakānaṃ eḷakalomānaṃ, tulaṃ odātānaṃ, tulaṃ gocariyānaṃ santhataṃ kārāpitaṃ nissaggiya’’nti (pārā. 554) iminā nayena nissajjanavidhānaṃ veditabbaṃ. Ādāya ca vuttaparicchedena anādāya ca karaṇato kiriyākiriyaṃ. Sesanti pubbapayogadukkaṭacatukkapācittiyādikaṃ. Ayaṃ pana viseso – tulaṃ odātānaṃ tulaṃ gocariyānaṃ ādiyitvā karaṇe, bahutaraṃ odātānaṃ bahutaraṃ gocariyānaṃ ādiyitvā karaṇe , suddhaṃ odātānaṃ suddhaṃ gocariyānaṃ ādiyitvā karaṇe ca anāpattīti.
அங்கே³ஸு பன பட²மங்க³ங் காளகானங் த்³வேபா⁴க³தோ அதிரேகபா⁴வோதி த³ட்ட²ப்³ப³ங். இமானி தீணி ந கேவலங் அனிஸ்ஸட்டா²னேவ பரிபு⁴ஞ்ஜிதுங் ந வட்டந்தீதி ஆஹ ‘‘இமானி பனா’’திஆதி³. ‘‘பரிபு⁴ஞ்ஜிதுங் ந வட்டந்தீ’’தி இமினா யதி³ பரிபு⁴ஞ்ஜதி, து³க்கடந்தி த³ஸ்ஸேதி.
Aṅgesu pana paṭhamaṅgaṃ kāḷakānaṃ dvebhāgato atirekabhāvoti daṭṭhabbaṃ. Imāni tīṇi na kevalaṃ anissaṭṭhāneva paribhuñjituṃ na vaṭṭantīti āha ‘‘imāni panā’’tiādi. ‘‘Paribhuñjituṃ na vaṭṭantī’’ti iminā yadi paribhuñjati, dukkaṭanti dasseti.
த்³வேபா⁴க³ஸிக்கா²பத³வண்ணனா நிட்டி²தா.
Dvebhāgasikkhāpadavaṇṇanā niṭṭhitā.
