| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
၃. ဒ္ဝေဘာဂသိက္ခာပဒဝဏ္ဏနာ
3. Dvebhāgasikkhāpadavaṇṇanā
၅၅၂. ဒ္ဝေဘာဂသိက္ခာပဒေ ပန ဒ္ဝေ ဘာဂာတိ ဥက္ကဋ္ဌပရိစ္ဆေဒော ကာဠကာနံ အဓိကဂ္ဂဟဏသ္သ ပဋိက္ခေပဝသေန သိက္ခာပဒသ္သ ပညတ္တတ္တာ။ တတိယံ ဩဒာတာနံ စတုတ္ထံ ဂောစရိယာနန္တိ အယံ ဟေဋ္ဌိမပရိစ္ဆေဒော တေသံ အဓိကဂ္ဂဟဏေ ပဋိက္ခေပာဘာဝတော, တသ္မာ ကာဠကာနံ ဘာဂဒ္ဝယတော အဓိကံ န ဝဋ္ဋတိ, သေသာနံ ပန ဝုတ္တပ္ပမာဏတော အဓိကမ္ပိ ဝဋ္ဋတိ။ ‘‘ကာဠကာနံယေဝ စ အဓိကဂ္ဂဟဏသ္သ ပဋိက္ခိတ္တတ္တာ ကာဠကာနံ ဥပဍ္ဎံ ဩဒာတာနံ ဝာ ဂောစရိယာနံ ဝာ ဥပဍ္ဎံ ဂဟေတ္ဝာပိ ကာတုံ ဝဋ္ဋတီ’’တိ ဝဒန္တိ, ‘‘အနာပတ္တိ ဗဟုတရံ ဩဒာတာနံ ဗဟုတရံ ဂောစရိယာနံ အာဒိယိတ္ဝာ ကရောတိ, သုဒ္ဓံ ဩဒာတာနံ သုဒ္ဓံ ဂောစရိယာနံ အာဒိယိတ္ဝာ ကရောတီ’’တိ ဣမိနာ တံ သမေတိ။ ‘‘ကာဠကေ ဩဒာတေ စ ဌပေတ္ဝာ သေသာ ဂောစရိယေသုယေဝ သင္ဂဟံ ဂစ္ဆန္တီ’’တိ ဝဒန္တိ။ ဒ္ဝေ ကောဋ္ဌာသာ ကာဠကာနန္တိ ဧတ္ထ ပန ‘‘ဧကသ္သပိ ကာဠကလောမသ္သ အတိရေကဘာဝေ နိသ္သဂ္ဂိယံ ဟောတီ’’တိ မာတိကာဋ္ဌကထာယံ (ကင္ခာ. အဋ္ဌ. ဒ္ဝေဘာဂသိက္ခာပဒဝဏ္ဏနာ) တ္တံ, တံ ‘‘ဓာရယိတ္ဝာ ဒ္ဝေ တုလာ အာဒာတဗ္ဗာ’’တိ ဝစနတော တုလာဓာရဏာယ န သမေတိ ။ န ဟိ လောမေ ဂဏေတ္ဝာ တုလာဓာရဏာ ကရီယတိ, အထ ဂဏေတ္ဝာဝ ဓာရယိတဗ္ဗံ သိယာ, ကိံ တုလာဓာရဏာယ, တသ္မာ ဧဝမေတ္ထ အဓိပ္ပာယော ယုတ္တော သိယာ – အစိတ္တကတ္တာ သိက္ခာပဒသ္သ ပုဗ္ဗေ တုလာယ ဓာရယိတ္ဝာ ဌပိတေသု ဧကမ္ပိ လောမံ တတ္ထ ပတေယ္ယ, နိသ္သဂ္ဂိယန္တိ။ အညထာ ဒုဗ္ဗိညေယ္ယဘာဝတော ဒ္ဝေ တုလာ နာဒာတဗ္ဗာ, ဦနကတရာဝ အာဒာတဗ္ဗာ သိယုံ။
552. Dvebhāgasikkhāpade pana dve bhāgāti ukkaṭṭhaparicchedo kāḷakānaṃ adhikaggahaṇassa paṭikkhepavasena sikkhāpadassa paññattattā. Tatiyaṃ odātānaṃ catutthaṃ gocariyānanti ayaṃ heṭṭhimaparicchedo tesaṃ adhikaggahaṇe paṭikkhepābhāvato, tasmā kāḷakānaṃ bhāgadvayato adhikaṃ na vaṭṭati, sesānaṃ pana vuttappamāṇato adhikampi vaṭṭati. ‘‘Kāḷakānaṃyeva ca adhikaggahaṇassa paṭikkhittattā kāḷakānaṃ upaḍḍhaṃ odātānaṃ vā gocariyānaṃ vā upaḍḍhaṃ gahetvāpi kātuṃ vaṭṭatī’’ti vadanti, ‘‘anāpatti bahutaraṃ odātānaṃ bahutaraṃ gocariyānaṃ ādiyitvā karoti, suddhaṃ odātānaṃ suddhaṃ gocariyānaṃ ādiyitvā karotī’’ti iminā taṃ sameti. ‘‘Kāḷake odāte ca ṭhapetvā sesā gocariyesuyeva saṅgahaṃ gacchantī’’ti vadanti. Dvekoṭṭhāsā kāḷakānanti ettha pana ‘‘ekassapi kāḷakalomassa atirekabhāve nissaggiyaṃ hotī’’ti mātikāṭṭhakathāyaṃ (kaṅkhā. aṭṭha. dvebhāgasikkhāpadavaṇṇanā) ttaṃ, taṃ ‘‘dhārayitvā dve tulā ādātabbā’’ti vacanato tulādhāraṇāya na sameti . Na hi lome gaṇetvā tulādhāraṇā karīyati, atha gaṇetvāva dhārayitabbaṃ siyā, kiṃ tulādhāraṇāya, tasmā evamettha adhippāyo yutto siyā – acittakattā sikkhāpadassa pubbe tulāya dhārayitvā ṭhapitesu ekampi lomaṃ tattha pateyya, nissaggiyanti. Aññathā dubbiññeyyabhāvato dve tulā nādātabbā, ūnakatarāva ādātabbā siyuṃ.
ဒ္ဝေဘာဂသိက္ခာပဒဝဏ္ဏနာ နိဋ္ဌိတာ။
Dvebhāgasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၃. ဒ္ဝေဘာဂသိက္ခာပဒံ • 3. Dvebhāgasikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၃. ဒ္ဝေဘာဂသိက္ခာပဒဝဏ္ဏနာ • 3. Dvebhāgasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၃. ဒ္ဝေဘာဂသိက္ခာပဒဝဏ္ဏနာ • 3. Dvebhāgasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ကောသိယသိက္ခာပဒဝဏ္ဏနာ • 1. Kosiyasikkhāpadavaṇṇanā
