| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৯. দ্ৰেধাৰিতক্কসুত্তৰণ্ণনা
9. Dvedhāvitakkasuttavaṇṇanā
২০৬. মে সুতন্তি দ্ৰেধাৰিতক্কসুত্তং। তত্থ দ্ৰিধা কত্ৰা দ্ৰিধা কত্ৰাতি দ্ৰে দ্ৰে ভাগে কত্ৰা। কামৰিতক্কোতি কামপটিসংযুত্তো ৰিতক্কো। ব্যাপাদৰিতক্কোতি ব্যাপাদপটিসংযুত্তো ৰিতক্কো। ৰিহিংসাৰিতক্কোতি ৰিহিংসাপটিসংযুত্তো ৰিতক্কো। একং ভাগন্তি অজ্ঝত্তং ৰা বহিদ্ধা ৰা ওল়ারিকো ৰা সুখুমো ৰা সব্বো পাযং ৰিতক্কো অকুসলপক্খিকোযেৰাতি তযোপি কামব্যাপাদৰিহিংসাৰিতক্কে একং কোট্ঠাসমকাসিং। কামেহি নিস্সটো নেক্খম্মপটিসংযুত্তো ৰিতক্কো নেক্খম্মৰিতক্কো নাম, সো যাৰ পঠমজ্ঝানা ৰট্টতি। অব্যাপাদপটিসংযুত্তো ৰিতক্কো অব্যাপাদৰিতক্কো, সো মেত্তাপুব্বভাগতো পট্ঠায যাৰ পঠমজ্ঝানা ৰট্টতি। অৰিহিংসাপটিসংযুত্তো ৰিতক্কো অৰিহিংসাৰিতক্কো, সো করুণাপুব্বভাগতো পট্ঠায যাৰ পঠমজ্ঝানা ৰট্টতি। দুতিযং ভাগন্তি সব্বোপাযং কুসলপক্খিকোযেৰাতি দুতিযং কোট্ঠাসমকাসিং। ইমিনা বোধিসত্তস্স ৰিতক্কনিগ্গহণকালো কথিতো।
206.Me sutanti dvedhāvitakkasuttaṃ. Tattha dvidhā katvā dvidhā katvāti dve dve bhāge katvā. Kāmavitakkoti kāmapaṭisaṃyutto vitakko. Byāpādavitakkoti byāpādapaṭisaṃyutto vitakko. Vihiṃsāvitakkoti vihiṃsāpaṭisaṃyutto vitakko. Ekaṃ bhāganti ajjhattaṃ vā bahiddhā vā oḷāriko vā sukhumo vā sabbo pāyaṃ vitakko akusalapakkhikoyevāti tayopi kāmabyāpādavihiṃsāvitakke ekaṃ koṭṭhāsamakāsiṃ. Kāmehi nissaṭo nekkhammapaṭisaṃyutto vitakko nekkhammavitakko nāma, so yāva paṭhamajjhānā vaṭṭati. Abyāpādapaṭisaṃyutto vitakko abyāpādavitakko, so mettāpubbabhāgato paṭṭhāya yāva paṭhamajjhānā vaṭṭati. Avihiṃsāpaṭisaṃyutto vitakko avihiṃsāvitakko, so karuṇāpubbabhāgato paṭṭhāya yāva paṭhamajjhānā vaṭṭati. Dutiyaṃ bhāganti sabbopāyaṃ kusalapakkhikoyevāti dutiyaṃ koṭṭhāsamakāsiṃ. Iminā bodhisattassa vitakkaniggahaṇakālo kathito.
বোধিসত্তস্স হি ছব্বস্সানি পধানং পদহন্তস্স নেক্খম্মৰিতক্কাদযো পুঞ্জপুঞ্জা মহানদিযং ওঘা ৰিয পৰত্তিংসু। সতিসম্মোসেন পন সহসা কামৰিতক্কাদযো উপ্পজ্জিত্ৰা কুসলৰারং পচ্ছিন্দিত্ৰা সযং অকুসলজৰনৰারা হুত্ৰা তিট্ঠন্তি। ততো বোধিসত্তো চিন্তেসি – ‘‘ময্হং ইমে কামৰিতক্কাদযো কুসলৰারং পচ্ছিন্দিত্ৰা তিট্ঠন্তি, হন্দাহং ইমে ৰিতক্কে দ্ৰে ভাগে কত্ৰা ৰিহরামী’’তি কামৰিতক্কাদযো অকুসলপক্খিকাতি একং ভাগং করোতি নেক্খম্মৰিতক্কাদযো কুসলপক্খিকাতি একং। অথ পুন চিন্তেসি – ‘‘অকুসলপক্খতো আগতং ৰিতক্কং মন্তেন কণ্হসপ্পং উপ্পীল়েত্ৰা গণ্হন্তো ৰিয অমিত্তং গীৰায অক্কমন্তো ৰিয চ নিগ্গহেস্সামি, নাস্স ৰড্ঢিতুং দস্সামি। কুসলপক্খতো আগতং ৰিতক্কং মেঘসমযে মেঘং ৰিয সুখেত্তে সালকল্যাণিপোতকং ৰিয চ সীঘং ৰড্ঢেস্সামী’’তি। সো তথা কত্ৰা অকুসলৰিতক্কে নিগ্গণ্হি, কুসলৰিতক্কে ৰড্ঢেসি। এৰং ইমিনা বোধিসত্তস্স ৰিতক্কনিগ্গহণনকালো কথিতোতি ৰেদিতব্বো।
Bodhisattassa hi chabbassāni padhānaṃ padahantassa nekkhammavitakkādayo puñjapuñjā mahānadiyaṃ oghā viya pavattiṃsu. Satisammosena pana sahasā kāmavitakkādayo uppajjitvā kusalavāraṃ pacchinditvā sayaṃ akusalajavanavārā hutvā tiṭṭhanti. Tato bodhisatto cintesi – ‘‘mayhaṃ ime kāmavitakkādayo kusalavāraṃ pacchinditvā tiṭṭhanti, handāhaṃ ime vitakke dve bhāge katvā viharāmī’’ti kāmavitakkādayo akusalapakkhikāti ekaṃ bhāgaṃ karoti nekkhammavitakkādayo kusalapakkhikāti ekaṃ. Atha puna cintesi – ‘‘akusalapakkhato āgataṃ vitakkaṃ mantena kaṇhasappaṃ uppīḷetvā gaṇhanto viya amittaṃ gīvāya akkamanto viya ca niggahessāmi, nāssa vaḍḍhituṃ dassāmi. Kusalapakkhato āgataṃ vitakkaṃ meghasamaye meghaṃ viya sukhette sālakalyāṇipotakaṃ viya ca sīghaṃ vaḍḍhessāmī’’ti. So tathā katvā akusalavitakke niggaṇhi, kusalavitakke vaḍḍhesi. Evaṃ iminā bodhisattassa vitakkaniggahaṇanakālo kathitoti veditabbo.
২০৭. ইদানি যথাস্স তে ৰিতক্কা উপ্পজ্জিংসু, যথা চ নে নিগ্গহেসি, তং দস্সেন্তো তস্স ময্হং, ভিক্খৰেতিআদিমাহ। তত্থ অপ্পমত্তস্সাতি সতিযা অৰিপ্পৰাসে ঠিতস্স। আতাপিনোতি আতাপৰীরিযৰন্তস্স। পহিতত্তস্সাতি পেসিতচিত্তস্স। উপ্পজ্জতি কামৰিতক্কোতি বোধিসত্তস্স ছব্বস্সানি পধানং পদহতো রজ্জসুখং ৰা আরব্ভ, পাসাদে ৰা নাটকানি ৰা ওরোধে ৰা কিঞ্চিদেৰ ৰা সম্পত্তিং আরব্ভ কামৰিতক্কো নাম ন উপ্পন্নপুব্বো। দুক্করকারিকায পনস্স আহারূপচ্ছেদেন অধিমত্তকসিমানং পত্তস্স এতদহোসি – ‘‘ন সক্কা আহারূপচ্ছেদেন ৰিসেসং নিব্বত্তেতুং, যংনূনাহং ওল়ারিকং আহারং আহারেয্য’’ন্তি। সো উরুৰেলং পিণ্ডায পাৰিসি। মনুস্সা – ‘‘মহাপুরিসো পুব্বে আহরিত্ৰা দিন্নম্পি ন গণ্হি, অদ্ধাস্স ইদানি মনোরথো মত্থকং পত্তো, তস্মা সযমেৰ আগতো’’তি পণীতপণীতং আহারং উপহরিংসু। বোধিসত্তস্স অত্তভাৰো নচিরস্সেৰ পাকতিকো অহোসি। জরাজিণ্ণত্তভাৰো হি সপ্পাযভোজনং লভিত্ৰাপি পাকতিকো ন হোতি। বোধিসত্তো পন দহরো। তেনস্স সপ্পাযভোজনং ভুঞ্জতো অত্তভাৰো ন চিরস্সেৰ পাকতিকো জাতো, ৰিপ্পসন্নানি ইন্দ্রিযানি, পরিসুদ্ধো ছৰিৰণ্ণো, সমুগ্গততারাগণং ৰিয নভং পরিপুণ্ণদ্ৰত্তিংসমহাপুরিসলক্খণপ্পটিমণ্ডিতসরীরং অহোসি। সো তং ওলোকেত্ৰা ‘‘তাৰ কিলন্তো নাম অত্তভাৰো এৰং পটিপাকতিকো জাতো’’তি চিন্তেত্ৰা অত্তনো পঞ্ঞামহন্ততায এৰং পরিত্তকম্পি ৰিতক্কং গহেত্ৰা কামৰিতক্কোতি অকাসি।
207. Idāni yathāssa te vitakkā uppajjiṃsu, yathā ca ne niggahesi, taṃ dassento tassa mayhaṃ, bhikkhavetiādimāha. Tattha appamattassāti satiyā avippavāse ṭhitassa. Ātāpinoti ātāpavīriyavantassa. Pahitattassāti pesitacittassa. Uppajjati kāmavitakkoti bodhisattassa chabbassāni padhānaṃ padahato rajjasukhaṃ vā ārabbha, pāsāde vā nāṭakāni vā orodhe vā kiñcideva vā sampattiṃ ārabbha kāmavitakko nāma na uppannapubbo. Dukkarakārikāya panassa āhārūpacchedena adhimattakasimānaṃ pattassa etadahosi – ‘‘na sakkā āhārūpacchedena visesaṃ nibbattetuṃ, yaṃnūnāhaṃ oḷārikaṃ āhāraṃ āhāreyya’’nti. So uruvelaṃ piṇḍāya pāvisi. Manussā – ‘‘mahāpuriso pubbe āharitvā dinnampi na gaṇhi, addhāssa idāni manoratho matthakaṃ patto, tasmā sayameva āgato’’ti paṇītapaṇītaṃ āhāraṃ upahariṃsu. Bodhisattassa attabhāvo nacirasseva pākatiko ahosi. Jarājiṇṇattabhāvo hi sappāyabhojanaṃ labhitvāpi pākatiko na hoti. Bodhisatto pana daharo. Tenassa sappāyabhojanaṃ bhuñjato attabhāvo na cirasseva pākatiko jāto, vippasannāni indriyāni, parisuddho chavivaṇṇo, samuggatatārāgaṇaṃ viya nabhaṃ paripuṇṇadvattiṃsamahāpurisalakkhaṇappaṭimaṇḍitasarīraṃ ahosi. So taṃ oloketvā ‘‘tāva kilanto nāma attabhāvo evaṃ paṭipākatiko jāto’’ti cintetvā attano paññāmahantatāya evaṃ parittakampi vitakkaṃ gahetvā kāmavitakkoti akāsi.
পণ্ণসালায পুরতো নিসিন্নো চমরপসদগৰযরোহিতমিগাদিকে মগগণে মনুঞ্ঞসদ্দরৰনে মোরৰনকুক্কুটাদিকে পক্খিগণে নীলুপ্পলকুমুদকমলাদিসঞ্ছন্নানি পল্ললানি নানাকুসুমসঞ্ছন্নৰিটপা ৰনরাজিযো মণিক্খন্ধনিম্মলজলপৰাহঞ্চ নদিং নেরঞ্জরং পস্সতি। তস্স এৰং হোতি ‘‘সোভনা ৰতিমে মিগজাতা পক্খিগণা পল্ললানি ৰনরাজিযো নদী নেরঞ্জরা’’তি। সো তম্পি এৰং পরিত্তকং ৰিতক্কং গহেত্ৰা কামৰিতক্কমকাসি, তেনাহ ‘‘উপ্পজ্জতি কামৰিতক্কো’’তি।
Paṇṇasālāya purato nisinno camarapasadagavayarohitamigādike magagaṇe manuññasaddaravane moravanakukkuṭādike pakkhigaṇe nīluppalakumudakamalādisañchannāni pallalāni nānākusumasañchannaviṭapā vanarājiyo maṇikkhandhanimmalajalapavāhañca nadiṃ nerañjaraṃ passati. Tassa evaṃ hoti ‘‘sobhanā vatime migajātā pakkhigaṇā pallalāni vanarājiyo nadī nerañjarā’’ti. So tampi evaṃ parittakaṃ vitakkaṃ gahetvā kāmavitakkamakāsi, tenāha ‘‘uppajjati kāmavitakko’’ti.
অত্তব্যাবাধাযপীতি অত্তদুক্খাযপি। এসেৰনযো সব্বত্থ। কিং পন মহাসত্তস্স উভযদুক্খায সংৰত্তনকৰিতক্কো নাম অত্থীতি? নত্থি। অপরিঞ্ঞাযং ঠিতস্স পন ৰিতক্কো যাৰ উভযব্যাবাধায সংৰত্ততীতি এতানি তীণি নামানি লভতি, তস্মা এৰমাহ। পঞ্ঞানিরোধিকোতি অনুপ্পন্নায লোকিযলোকুত্তরায পঞ্ঞায উপ্পজ্জিতুং ন দেতি, লোকিযপঞ্ঞং পন অট্ঠসমাপত্তিপঞ্চাভিঞ্ঞাৰসেন উপ্পন্নম্পি সমুচ্ছিন্দিত্ৰা খিপতীতি পঞ্ঞানিরোধিকো। ৰিঘাতপক্খিকোতি দুক্খকোট্ঠাসিকো। অসঙ্খতং নিব্বানং নাম, তং পচ্চক্খং কাতুং ন দেতীতি অনিব্বানসংৰত্তনিকো। অব্ভত্থং গচ্ছতীতি খযং নত্থিভাৰং গচ্ছতি। উদকপুপ্ফুল়কো ৰিয নিরুজ্ঝতি। পজহমেৰাতি পজহিমেৰ। ৰিনোদমেৰাতি নীহরিমেৰ। ব্যন্তমেৰ নং অকাসিন্তি ৰিগতন্তং নিস্সেসং পরিৰটুমং পরিচ্ছিন্নমেৰ নং অকাসিং।
Attabyābādhāyapīti attadukkhāyapi. Esevanayo sabbattha. Kiṃ pana mahāsattassa ubhayadukkhāya saṃvattanakavitakko nāma atthīti? Natthi. Apariññāyaṃ ṭhitassa pana vitakko yāva ubhayabyābādhāya saṃvattatīti etāni tīṇi nāmāni labhati, tasmā evamāha. Paññānirodhikoti anuppannāya lokiyalokuttarāya paññāya uppajjituṃ na deti, lokiyapaññaṃ pana aṭṭhasamāpattipañcābhiññāvasena uppannampi samucchinditvā khipatīti paññānirodhiko. Vighātapakkhikoti dukkhakoṭṭhāsiko. Asaṅkhataṃ nibbānaṃ nāma, taṃ paccakkhaṃ kātuṃ na detīti anibbānasaṃvattaniko. Abbhatthaṃ gacchatīti khayaṃ natthibhāvaṃ gacchati. Udakapupphuḷako viya nirujjhati. Pajahamevāti pajahimeva. Vinodamevāti nīharimeva. Byantameva naṃ akāsinti vigatantaṃ nissesaṃ parivaṭumaṃ paricchinnameva naṃ akāsiṃ.
২০৮. ব্যাপাদৰিতক্কোতি ন বোধিসত্তস্স পরূপঘাতপ্পটিসংযুত্তো নাম ৰিতক্কো চিত্তে উপ্পজ্জতি, অথস্স অতিৰস্সঅচ্চুণ্হঅতিসীতাদীনি পন পটিচ্চ চিত্তৰিপরিণামভাৰো হোতি, তং সন্ধায ‘‘ব্যাপাদৰিতক্কো’’তি আহ। ৰিহিংসাৰিতক্কোতি ন মহাসত্তস্স পরেসং দুক্খুপ্পাদনপ্পটিসংযুত্তো ৰিতক্কো উপ্পজ্জতি, চিত্তে পন উদ্ধতাকারো অনেকগ্গতাকারো হোতি, তং গহেত্ৰা ৰিহিংসাৰিতক্কমকাসি। পণ্ণসালাদ্ৰারে নিসিন্নো হি সীহব্যগ্ঘাদিকে ৰাল়মিগে সূকরাদযো খুদ্দমিগে ৰিহিংসন্তে পস্সতি। অথ বোধিসত্তো ইমস্মিম্পি নাম অকুতোভযে অরঞ্ঞে ইমেসং তিরচ্ছানগতানং পচ্চত্থিকা উপ্পজ্জন্তি, বলৰন্তো দুব্বলে খাদন্তি, বলৰন্তখাদিতা ৰত্তন্তীতি কারুঞ্ঞং উপ্পাদেতি। অঞ্ঞেপি বিল়ারাদযো কুক্কুটমূসিকাদীনি খাদন্তে পস্সতি, গামং পিণ্ডায পৰিট্ঠো মনুস্সে রাজকম্মিকেহি উপদ্দুতে ৰধবন্ধাদীনি অনুভৰন্তে অত্তনো কসিৰণিজ্জাদীনি কম্মানি কত্ৰা জীৰিতুং ন লভন্তীতি কারুঞ্ঞং উপ্পাদেতি, তং সন্ধায ‘‘উপ্পজ্জতি ৰিহিংসাৰিতক্কো’’তি আহ। তথা তথাতি তেন তেন আকারেন। ইদং ৰুত্তং হোতি – কামৰিতক্কাদীসু যং যং ৰিতক্কেতি, যং যং ৰিতক্কং পৰত্তেতি, তেন তেনে চস্সাকারেন কামৰিতক্কাদিভাৰো চেতসো ন হি হোতীতি। পহাসি নেক্খম্মৰিতক্কন্তি নেক্খম্মৰিতক্কং পজহতি। বহুলমকাসীতি বহুলং করোতি। তস্স তং কামৰিতক্কায চিত্তন্তি তস্স তং চিত্তং কামৰিতক্কত্থায। যথা কামৰিতক্কসম্পযুত্তং হোতি, এৰমেৰং নমতীতি অত্থো। সেসপদেসুপি এসেৰ নযো।
208.Byāpādavitakkoti na bodhisattassa parūpaghātappaṭisaṃyutto nāma vitakko citte uppajjati, athassa ativassaaccuṇhaatisītādīni pana paṭicca cittavipariṇāmabhāvo hoti, taṃ sandhāya ‘‘byāpādavitakko’’ti āha. Vihiṃsāvitakkoti na mahāsattassa paresaṃ dukkhuppādanappaṭisaṃyutto vitakko uppajjati, citte pana uddhatākāro anekaggatākāro hoti, taṃ gahetvā vihiṃsāvitakkamakāsi. Paṇṇasālādvāre nisinno hi sīhabyagghādike vāḷamige sūkarādayo khuddamige vihiṃsante passati. Atha bodhisatto imasmimpi nāma akutobhaye araññe imesaṃ tiracchānagatānaṃ paccatthikā uppajjanti, balavanto dubbale khādanti, balavantakhāditā vattantīti kāruññaṃ uppādeti. Aññepi biḷārādayo kukkuṭamūsikādīni khādante passati, gāmaṃ piṇḍāya paviṭṭho manusse rājakammikehi upaddute vadhabandhādīni anubhavante attano kasivaṇijjādīni kammāni katvā jīvituṃ na labhantīti kāruññaṃ uppādeti, taṃ sandhāya ‘‘uppajjati vihiṃsāvitakko’’ti āha. Tathā tathāti tena tena ākārena. Idaṃ vuttaṃ hoti – kāmavitakkādīsu yaṃ yaṃ vitakketi, yaṃ yaṃ vitakkaṃ pavatteti, tena tene cassākārena kāmavitakkādibhāvo cetaso na hi hotīti. Pahāsi nekkhammavitakkanti nekkhammavitakkaṃ pajahati. Bahulamakāsīti bahulaṃ karoti. Tassa taṃ kāmavitakkāya cittanti tassa taṃ cittaṃ kāmavitakkatthāya. Yathā kāmavitakkasampayuttaṃ hoti, evamevaṃ namatīti attho. Sesapadesupi eseva nayo.
ইদানি অত্থদীপিকং উপমং দস্সেন্তো সেয্যথাপী তিআদিমাহ। তত্থ কিট্ঠসম্বাধেতি সস্সসম্বাধে। আকোটেয্যাতি উজুকং পিট্ঠিযং পহরেয্য। পটিকোটেয্যাতি তিরিযং ফাসুকাসু পহরেয্য। সন্নিরুন্ধেয্যাতি আৰরিত্ৰা তিট্ঠেয্য। সন্নিৰারেয্যাতি ইতো চিতো চ গন্তুং ন দদেয্য । ততোনিদানন্তি তেন কারণেন, এৰং অরক্খিতানং গুন্নং পরেসং সস্সখাদনকারণেনাতি অত্থো। বালো হি গোপালোকো এৰং গাৰো অরক্খমানো ‘‘অযং অম্হাকং ভত্তৰেতনং খাদতি, উজুং গাৰো রক্খিতুম্পি ন সক্কোতি, কুলেহি সদ্ধিং ৰেরং গণ্হাপেতী’’তি গোসামিকানম্পি সন্তিকা ৰধাদীনি পাপুণাতি, কিট্ঠসামিকানম্পি। পণ্ডিতো পন ইমানি চত্তারি ভযানি সম্পস্সন্তো গাৰো সাধুকং রক্খতি, তং সন্ধাযেতং ৰুত্তং। আদীনৰন্তি উপদ্দৰং। ওকারন্তি লামকং, খন্ধেসু ৰা ওতারং। সংকিলেসন্তি কিলিট্ঠভাৰং। নেক্খম্মেতি নেক্খম্মম্হি। আনিসংসন্তি ৰিসুদ্ধিপক্খং। ৰোদানপক্খন্তি ইদং তস্সেৰ ৰেৰচনং, কুসলানং ধম্মানং নেক্খম্মম্হি ৰিসুদ্ধিপক্খং অদ্দসন্তি অত্থো।
Idāni atthadīpikaṃ upamaṃ dassento seyyathāpī tiādimāha. Tattha kiṭṭhasambādheti sassasambādhe. Ākoṭeyyāti ujukaṃ piṭṭhiyaṃ pahareyya. Paṭikoṭeyyāti tiriyaṃ phāsukāsu pahareyya. Sannirundheyyāti āvaritvā tiṭṭheyya. Sannivāreyyāti ito cito ca gantuṃ na dadeyya . Tatonidānanti tena kāraṇena, evaṃ arakkhitānaṃ gunnaṃ paresaṃ sassakhādanakāraṇenāti attho. Bālo hi gopāloko evaṃ gāvo arakkhamāno ‘‘ayaṃ amhākaṃ bhattavetanaṃ khādati, ujuṃ gāvo rakkhitumpi na sakkoti, kulehi saddhiṃ veraṃ gaṇhāpetī’’ti gosāmikānampi santikā vadhādīni pāpuṇāti, kiṭṭhasāmikānampi. Paṇḍito pana imāni cattāri bhayāni sampassanto gāvo sādhukaṃ rakkhati, taṃ sandhāyetaṃ vuttaṃ. Ādīnavanti upaddavaṃ. Okāranti lāmakaṃ, khandhesu vā otāraṃ. Saṃkilesanti kiliṭṭhabhāvaṃ. Nekkhammeti nekkhammamhi. Ānisaṃsanti visuddhipakkhaṃ. Vodānapakkhanti idaṃ tasseva vevacanaṃ, kusalānaṃ dhammānaṃ nekkhammamhi visuddhipakkhaṃ addasanti attho.
২০৯. নেক্খম্মন্তি চ কামেহি নিস্সটং সব্বকুসলং, একধম্মে সঙ্গয্হমানে নিব্বানমেৰ। তত্রিদং ওপম্মসংসন্দনং – কিট্ঠসম্বাধং ৰিয হি রূপাদিআরম্মণং, কূটগাৰো ৰিয কূটচিত্তং, পণ্ডিতগোপালকো ৰিয বোধিসত্তো, চতুব্বিধভযং ৰিয অত্তপরূভযব্যাবাধায সংৰত্তনৰিতক্কো, পণ্ডিতগোপালকস্স চতুব্বিধং ভযং দিস্ৰা কিট্ঠসম্বাধে অপ্পমাদেন গোরক্খণং ৰিয বোধিসত্তস্স ছব্বস্সানি পধানং পদহতো অত্তব্যাবাধাদিভযং দিস্ৰা রূপাদীসু আরম্মণেসু যথা কামৰিতক্কাদযো ন উপ্পজ্জন্তি, এৰং চিত্তরক্খণং। পঞ্ঞাৰুদ্ধিকোতিআদীসু অনুপ্পন্নায লোকিযলোকুত্তরপঞ্ঞায উপ্পাদায, উপ্পন্নায চ ৰুদ্ধিযা সংৰত্ততীতি পঞ্ঞাৰুদ্ধিকো। ন দুক্খকোট্ঠাসায সংৰত্ততীতি অৰিঘাতপক্খিকো। নিব্বানধাতুসচ্ছিকিরিযায সংৰত্ততীতি নিব্বানসংৰত্তনিকো। রত্তিং চেপি নং, ভিক্খৰে, অনুৰিতক্কেয্যন্তি সকলরত্তিং চেপি তং ৰিতক্কং পৰত্তেয্যং। ততোনিদানন্তি তংমূলকং। ওহঞ্ঞেয্যাতি উগ্ঘাতীযেয্য, উদ্ধচ্চায সংৰত্তেয্যাতি অত্থো। আরাতি দূরে। সমাধিম্হাতি উপচারসমাধিতোপি অপ্পনাসমাধিতোপি। সো খো অহং, ভিক্খৰে, অজ্ঝত্তমেৰ চিত্তন্তি সো অহং, ভিক্খৰে, মা মে চিত্তং সমাধিম্হা দূরে হোতূতি অজ্ঝত্তমেৰ চিত্তং সণ্ঠপেমি, গোচরজ্ঝত্তে ঠপেমীতি অত্থো। সন্নিসাদেমীতি তত্থেৰ চ নং সন্নিসীদাপেমি। একোদিং করোমীতি একগ্গং করোমি। সমাদহামীতি সম্মা আদহামি, সুট্ঠু আরোপেমীতি অত্থো। মা মে চিত্তং ঊহঞ্ঞীতি মা ময্হং চিত্তং উগ্ঘাতীযিত্থ, মা উদ্ধচ্চায সংৰত্ততূতি অত্থো।
209.Nekkhammanti ca kāmehi nissaṭaṃ sabbakusalaṃ, ekadhamme saṅgayhamāne nibbānameva. Tatridaṃ opammasaṃsandanaṃ – kiṭṭhasambādhaṃ viya hi rūpādiārammaṇaṃ, kūṭagāvo viya kūṭacittaṃ, paṇḍitagopālako viya bodhisatto, catubbidhabhayaṃ viya attaparūbhayabyābādhāya saṃvattanavitakko, paṇḍitagopālakassa catubbidhaṃ bhayaṃ disvā kiṭṭhasambādhe appamādena gorakkhaṇaṃ viya bodhisattassa chabbassāni padhānaṃ padahato attabyābādhādibhayaṃ disvā rūpādīsu ārammaṇesu yathā kāmavitakkādayo na uppajjanti, evaṃ cittarakkhaṇaṃ. Paññāvuddhikotiādīsu anuppannāya lokiyalokuttarapaññāya uppādāya, uppannāya ca vuddhiyā saṃvattatīti paññāvuddhiko. Na dukkhakoṭṭhāsāya saṃvattatīti avighātapakkhiko. Nibbānadhātusacchikiriyāya saṃvattatīti nibbānasaṃvattaniko. Rattiṃ cepi naṃ, bhikkhave, anuvitakkeyyanti sakalarattiṃ cepi taṃ vitakkaṃ pavatteyyaṃ. Tatonidānanti taṃmūlakaṃ. Ohaññeyyāti ugghātīyeyya, uddhaccāya saṃvatteyyāti attho. Ārāti dūre. Samādhimhāti upacārasamādhitopi appanāsamādhitopi. So kho ahaṃ, bhikkhave, ajjhattameva cittanti so ahaṃ, bhikkhave, mā me cittaṃ samādhimhā dūre hotūti ajjhattameva cittaṃ saṇṭhapemi, gocarajjhatte ṭhapemīti attho. Sannisādemīti tattheva ca naṃ sannisīdāpemi. Ekodiṃ karomīti ekaggaṃ karomi. Samādahāmīti sammā ādahāmi, suṭṭhu āropemīti attho. Mā me cittaṃ ūhaññīti mā mayhaṃ cittaṃ ugghātīyittha, mā uddhaccāya saṃvattatūti attho.
২১০. উপ্পজ্জতি অব্যাপাদৰিতক্কো…পে॰… অৰিহিংসাৰিতক্কোতি এত্থ যো সো ইমায হেট্ঠা ৰুত্ততরুণৰিপস্সনায সদ্ধিং উপ্পন্নৰিতক্কো কামপচ্চনীকট্ঠেন নেক্খম্মৰিতক্কোতি ৰুত্তো। সোযেৰ ব্যাপাদপচ্চনীকট্ঠেন অব্যাপাদৰিতক্কোতি চ ৰিহিংসাপচ্চনীকট্ঠেন অৰিহিংসাৰিতক্কোতি চ ৰুত্তো।
210.Uppajjati abyāpādavitakko…pe… avihiṃsāvitakkoti ettha yo so imāya heṭṭhā vuttataruṇavipassanāya saddhiṃ uppannavitakko kāmapaccanīkaṭṭhena nekkhammavitakkoti vutto. Soyeva byāpādapaccanīkaṭṭhena abyāpādavitakkoti ca vihiṃsāpaccanīkaṭṭhena avihiṃsāvitakkoti ca vutto.
এত্তাৰতা বোধিসত্তস্স সমাপত্তিং নিস্সায ৰিপস্সনাপট্ঠপনকালো কথিতো। যস্স হি সমাধিপি তরুণো, ৰিপস্সনাপি। তস্স ৰিপস্সনং পট্ঠপেত্ৰা অতিচিরং নিসিন্নস্স কাযো কিলমতি, অন্তো অগ্গি ৰিয উট্ঠহতি, কচ্ছেহি সেদা মুচ্চন্তি, মত্থকতো উসুমৰট্টি ৰিয উট্ঠহতি, চিত্তং হঞ্ঞতি ৰিহঞ্ঞতি ৰিপ্ফন্দতি। সো পুন সমাপত্তিং সমাপজ্জিত্ৰা তং পরিদমেত্ৰা মুদুকং কত্ৰা সমস্সাসেত্ৰা পুন ৰিপস্সনং পট্ঠপেতি। তস্স পুন অতিচিরং নিসিন্নস্স তথেৰ হোতি। সো পুন সমাপত্তিং সমাপজ্জিত্ৰা তথেৰ করোতি। ৰিপস্সনায হি বহূপকারা সমাপত্তি।
Ettāvatā bodhisattassa samāpattiṃ nissāya vipassanāpaṭṭhapanakālo kathito. Yassa hi samādhipi taruṇo, vipassanāpi. Tassa vipassanaṃ paṭṭhapetvā aticiraṃ nisinnassa kāyo kilamati, anto aggi viya uṭṭhahati, kacchehi sedā muccanti, matthakato usumavaṭṭi viya uṭṭhahati, cittaṃ haññati vihaññati vipphandati. So puna samāpattiṃ samāpajjitvā taṃ paridametvā mudukaṃ katvā samassāsetvā puna vipassanaṃ paṭṭhapeti. Tassa puna aticiraṃ nisinnassa tatheva hoti. So puna samāpattiṃ samāpajjitvā tatheva karoti. Vipassanāya hi bahūpakārā samāpatti.
যথা যোধস্স ফলককোট্ঠকো নাম বহূপকারো হোতি, সো তং নিস্সায সঙ্গামং পৰিসতি, তত্থ হত্থীহিপি অস্সেহিপি যোধেহিপি সদ্ধিং কম্মং কত্ৰা আৰুধেসু ৰা খীণেসু ভুঞ্জিতুকামতাদিভাৰে ৰা সতি নিৰত্তিত্ৰা ফলককোট্ঠকং পৰিসিত্ৰা আৰুধানিপি গণ্হাতি, ৰিস্সমতিপি, ভুঞ্জতিপি, পানীযম্পি পিৰতি, সন্নাহম্পি পটিসন্নয্হতি, তং তং কত্ৰা পুন সঙ্গামং পৰিসতি, তত্থ কম্মং কত্ৰা পুন উচ্চারাদিপীল়িতো ৰা কেনচিদেৰ ৰা করণীযেন ফলককোট্ঠকং পৰিসতি। তত্থ সন্থম্ভিত্ৰা পুন সঙ্গামং পৰিসতি, এৰং যোধস্স ফলককোট্ঠকো ৰিয ৰিপস্সনায বহূপকারা সমাপত্তি।
Yathā yodhassa phalakakoṭṭhako nāma bahūpakāro hoti, so taṃ nissāya saṅgāmaṃ pavisati, tattha hatthīhipi assehipi yodhehipi saddhiṃ kammaṃ katvā āvudhesu vā khīṇesu bhuñjitukāmatādibhāve vā sati nivattitvā phalakakoṭṭhakaṃ pavisitvā āvudhānipi gaṇhāti, vissamatipi, bhuñjatipi, pānīyampi pivati, sannāhampi paṭisannayhati, taṃ taṃ katvā puna saṅgāmaṃ pavisati, tattha kammaṃ katvā puna uccārādipīḷito vā kenacideva vā karaṇīyena phalakakoṭṭhakaṃ pavisati. Tattha santhambhitvā puna saṅgāmaṃ pavisati, evaṃ yodhassa phalakakoṭṭhako viya vipassanāya bahūpakārā samāpatti.
সমাপত্তিযা পন সঙ্গামনিত্থরণকযোধস্স ফলককোট্ঠকতোপি ৰিপস্সনা বহূপকারতরা। কিঞ্চাপি হি সমাপত্তিং নিস্সায ৰিপস্সনং পট্ঠপেতি, ৰিপস্সনা পন থামজাতা সমাপত্তিম্পি রক্খতি। থামজাতং করোতি।
Samāpattiyā pana saṅgāmanittharaṇakayodhassa phalakakoṭṭhakatopi vipassanā bahūpakāratarā. Kiñcāpi hi samāpattiṃ nissāya vipassanaṃ paṭṭhapeti, vipassanā pana thāmajātā samāpattimpi rakkhati. Thāmajātaṃ karoti.
যথা হি থলে নাৰম্পি নাৰায ভণ্ডম্পি সকটভারং করোন্তি। উদকং পত্ৰা পন সকটম্পি সকটভণ্ডম্পি যুত্তগোণেপি নাৰাভারং করোন্তি। নাৰা তিরিযং সোতং ছিন্দিত্ৰা সোত্থিনা সুপট্টনং গচ্ছতি, এৰমেৰং কিঞ্চাপি সমাপত্তিং নিস্সায ৰিপস্সনং পট্ঠপেতি, ৰিপস্সনা পন থামজাতা সমাপত্তিম্পি রক্খতি, থামজাতং করোতি। থলং পত্ৰা সকটং ৰিয হি সমাপত্তি। উদকং পত্ৰা নাৰা ৰিয ৰিপস্সনা। ইতি বোধিসত্তস্স এত্তাৰতা সমাপত্তিং নিস্সায ৰিপস্সনাপট্ঠপনকালো কথিতোতি ৰেদিতব্বো।
Yathā hi thale nāvampi nāvāya bhaṇḍampi sakaṭabhāraṃ karonti. Udakaṃ patvā pana sakaṭampi sakaṭabhaṇḍampi yuttagoṇepi nāvābhāraṃ karonti. Nāvā tiriyaṃ sotaṃ chinditvā sotthinā supaṭṭanaṃ gacchati, evamevaṃ kiñcāpi samāpattiṃ nissāya vipassanaṃ paṭṭhapeti, vipassanā pana thāmajātā samāpattimpi rakkhati, thāmajātaṃ karoti. Thalaṃ patvā sakaṭaṃ viya hi samāpatti. Udakaṃ patvā nāvā viya vipassanā. Iti bodhisattassa ettāvatā samāpattiṃ nissāya vipassanāpaṭṭhapanakālo kathitoti veditabbo.
যঞ্ঞদেৰাতিআদি কণ্হপক্খে ৰুত্তানুসারেনেৰ ৰেদিতব্বং, ইধাপি অত্থদীপিকং উপমং দস্সেতুং সেয্যথাপীতিআদিমাহ। তত্থ গামন্তসম্ভতেসূতি গামন্তং আহটেসু। সতিকরণীযমেৰ হোতীতি এতা গাৰোতি সতিউপ্পাদনমত্তমেৰ কাতব্বং হোতি। ইতো চিতো চ গন্ত্ৰা আকোটনাদিকিচ্চং নত্থি। এতে ধম্মাতি এতে সমথৰিপস্সনা ধম্মাতি সতুপ্পাদনমত্তমেৰ কাতব্বং হোতি। ইমিনা বোধিসত্তস্স সমথৰিপস্সনানং থামজাতকালো কথিতো। তদা কিরস্স সমাপত্তিং অপ্পনত্থায নিসিন্নস্স অট্ঠ সমাপত্তিযো একাৰজ্জনেন আপাথং আগচ্ছন্তি, ৰিপস্সনং পট্ঠপেত্ৰা নিসিন্নো সত্ত অনুপস্সনা একপ্পহারেনেৰ আরুল়্হো হোতি।
Yaññadevātiādi kaṇhapakkhe vuttānusāreneva veditabbaṃ, idhāpi atthadīpikaṃ upamaṃ dassetuṃ seyyathāpītiādimāha. Tattha gāmantasambhatesūti gāmantaṃ āhaṭesu. Satikaraṇīyameva hotīti etā gāvoti satiuppādanamattameva kātabbaṃ hoti. Ito cito ca gantvā ākoṭanādikiccaṃ natthi. Ete dhammāti ete samathavipassanā dhammāti satuppādanamattameva kātabbaṃ hoti. Iminā bodhisattassa samathavipassanānaṃ thāmajātakālo kathito. Tadā kirassa samāpattiṃ appanatthāya nisinnassa aṭṭha samāpattiyo ekāvajjanena āpāthaṃ āgacchanti, vipassanaṃ paṭṭhapetvā nisinno satta anupassanā ekappahāreneva āruḷho hoti.
২১৫. সেয্যথাপীতি ইধ কিং দস্সেতি? অযং পাটিযেক্কো অনুসন্ধি, সত্তানঞ্হি হিতূপচারং অত্তনো সত্থুভাৰসম্পদঞ্চ দস্সেন্তো ভগৰা ইমং দেসনং আরভি। তত্থ অরঞ্ঞেতি অটৰিযং। পৰনেতি ৰনসণ্ডে। অত্থতো হি ইদং দ্ৰযং একমেৰ, পঠমস্স পন দুতিযং ৰেৰচনং। অযোগক্খেমকামোতি চতূহি যোগেহি খেমং নিব্ভযট্ঠানং অনিচ্ছন্তো ভযমেৰ ইচ্ছন্তো । সোৰত্থিকোতি সুৰত্থিভাৰাৰহো। পীতিগমনীযোতি তুট্ঠিং গমনীযো। ‘‘পীতগমনীযো’’তি ৰা পাঠো। পিদহেয্যাতি সাখাদীহি থকেয্য। ৰিৰরেয্যাতি ৰিসদমুখং কত্ৰা ৰিৰটং করেয্য। কুম্মগ্গন্তি উদকৰনপব্বতাদীহি সন্নিরুদ্ধং অমগ্গং। ওদহেয্য ওকচরন্তি তেসং ওকে চরমানং ৰিয একং দীপকমিগং একস্মিং ঠানে ঠপেয্য। ওকচারিকন্তি দীঘরজ্জুযা বন্ধিতংযেৰ মিগিং।
215.Seyyathāpīti idha kiṃ dasseti? Ayaṃ pāṭiyekko anusandhi, sattānañhi hitūpacāraṃ attano satthubhāvasampadañca dassento bhagavā imaṃ desanaṃ ārabhi. Tattha araññeti aṭaviyaṃ. Pavaneti vanasaṇḍe. Atthato hi idaṃ dvayaṃ ekameva, paṭhamassa pana dutiyaṃ vevacanaṃ. Ayogakkhemakāmoti catūhi yogehi khemaṃ nibbhayaṭṭhānaṃ anicchanto bhayameva icchanto . Sovatthikoti suvatthibhāvāvaho. Pītigamanīyoti tuṭṭhiṃ gamanīyo. ‘‘Pītagamanīyo’’ti vā pāṭho. Pidaheyyāti sākhādīhi thakeyya. Vivareyyāti visadamukhaṃ katvā vivaṭaṃ kareyya. Kummagganti udakavanapabbatādīhi sanniruddhaṃ amaggaṃ. Odaheyya okacaranti tesaṃ oke caramānaṃ viya ekaṃ dīpakamigaṃ ekasmiṃ ṭhāne ṭhapeyya. Okacārikanti dīgharajjuyā bandhitaṃyeva migiṃ.
মিগলুদ্দকো হি অরঞ্ঞং মিগানং ৰসনট্ঠানং গন্ত্ৰা ‘‘ইধ ৰসন্তি, ইমিনা মগ্গেন নিক্খমন্তি, এত্থ চরন্তি, এত্থ পিৰন্তি, ইমিনা মগ্গেন পৰিসন্তী’’তি সল্লক্খেত্ৰা মগ্গং পিধায কুম্মগ্গং ৰিৰরিত্ৰা ওকচরঞ্চ ওকচারিকঞ্চ ঠপেত্ৰা সযং পটিচ্ছন্নট্ঠানে সত্তিং গহেত্ৰা তিট্ঠতি। অথ সাযন্হসমযে মিগা অকুতোভযে অরঞ্ঞে চরিত্ৰা পানীযং পিৰিত্ৰা মিগপোতকেহি সদ্ধিং কীল়মানা ৰসনট্ঠানসন্তিকং আগন্ত্ৰা ওকচরঞ্চ ওকচারিকঞ্চ দিস্ৰা ‘‘সহাযকা নো আগতা ভৰিস্সন্তী’’তি নিরাসঙ্কা পৰিসন্তি, তে মগ্গং পিহিতং দিস্ৰা ‘‘নাযং মগ্গো, অযং মগ্গো ভৰিস্সতী’’তি কুম্মগ্গং পটিপজ্জন্তি। মিগলুদ্দকো ন তাৰ কিঞ্চি করোতি, পৰিট্ঠেসু পন সব্বপচ্ছিমং সণিকং পহরতি। সো উত্তসতি, ততো সব্বে উত্তসিত্ৰা ‘‘ভযং উপ্পন্ন’’ন্তি পুরতো ওলোকেন্তা উদকেন ৰা ৰনেন ৰা পব্বতেন ৰা সন্নিরুদ্ধং মগ্গং দিস্ৰা উভোহি পস্সেহি অঙ্গুলিসঙ্খলিকং ৰিয গহনৰনং পৰিসিতুং অসক্কোন্তা পৰিট্ঠমগ্গেনেৰ নিক্খমিতুং আরভন্তি। লুদ্দকো তেসং নিৰত্তনভাৰং ঞত্ৰা আদিতো পট্ঠায তিংসম্পি চত্তালীসম্পি মিগে ঘাতেতি। ইদং সন্ধায এৰঞ্হি সো, ভিক্খৰে, মহামিগসঙ্ঘো অপরেন সমযেন অনযব্যসনং আপজ্জেয্যাতি ৰুত্তং।
Migaluddako hi araññaṃ migānaṃ vasanaṭṭhānaṃ gantvā ‘‘idha vasanti, iminā maggena nikkhamanti, ettha caranti, ettha pivanti, iminā maggena pavisantī’’ti sallakkhetvā maggaṃ pidhāya kummaggaṃ vivaritvā okacarañca okacārikañca ṭhapetvā sayaṃ paṭicchannaṭṭhāne sattiṃ gahetvā tiṭṭhati. Atha sāyanhasamaye migā akutobhaye araññe caritvā pānīyaṃ pivitvā migapotakehi saddhiṃ kīḷamānā vasanaṭṭhānasantikaṃ āgantvā okacarañca okacārikañca disvā ‘‘sahāyakā no āgatā bhavissantī’’ti nirāsaṅkā pavisanti, te maggaṃ pihitaṃ disvā ‘‘nāyaṃ maggo, ayaṃ maggo bhavissatī’’ti kummaggaṃ paṭipajjanti. Migaluddako na tāva kiñci karoti, paviṭṭhesu pana sabbapacchimaṃ saṇikaṃ paharati. So uttasati, tato sabbe uttasitvā ‘‘bhayaṃ uppanna’’nti purato olokentā udakena vā vanena vā pabbatena vā sanniruddhaṃ maggaṃ disvā ubhohi passehi aṅgulisaṅkhalikaṃ viya gahanavanaṃ pavisituṃ asakkontā paviṭṭhamaggeneva nikkhamituṃ ārabhanti. Luddako tesaṃ nivattanabhāvaṃ ñatvā ādito paṭṭhāya tiṃsampi cattālīsampi mige ghāteti. Idaṃ sandhāya evañhi so, bhikkhave, mahāmigasaṅgho aparena samayena anayabyasanaṃ āpajjeyyāti vuttaṃ.
‘‘নন্দীরাগস্সেতং অধিৰচনং, অৰিজ্জাযেতং অধিৰচন’’ন্তি এত্থ যস্মা ইমে সত্তা অৰিজ্জায অঞ্ঞাণা হুত্ৰা নন্দীরাগেন আবন্ধিত্ৰা রূপারম্মণাদীনি উপনীতা ৰট্টদুক্খসত্তিযা ঘাতং লভন্তি। তস্মা ভগৰা ওকচরং নন্দীরাগোতি, ওকচারিকং অৰিজ্জাতি কত্ৰা দস্সেসি।
‘‘Nandīrāgassetaṃ adhivacanaṃ, avijjāyetaṃ adhivacana’’nti ettha yasmā ime sattā avijjāya aññāṇā hutvā nandīrāgena ābandhitvā rūpārammaṇādīni upanītā vaṭṭadukkhasattiyā ghātaṃ labhanti. Tasmā bhagavā okacaraṃ nandīrāgoti, okacārikaṃ avijjāti katvā dassesi.
মিগলুদ্দকো হি একদাপি তেসং সাখাভঙ্গেন সরীরং পুঞ্ছিত্ৰা মনুস্সগন্ধং অপনেত্ৰা ওকচরং একস্মিং ঠানে ঠপেত্ৰা ওকচারিকং সহ রজ্জুযা ৰিস্সজ্জেত্ৰা অত্তানং পটিচ্ছাদেত্ৰা সত্তিং আদায ওকচরস্স সন্তিকে তিট্ঠতি, ওকচারিকা মিগগণস্স চরণট্ঠানাভিমুখী গচ্ছতি । তং দিস্ৰা মিগা সীসানি উক্খিপিত্ৰা তিট্ঠন্তি, সাপি সীসং উক্খিপিত্ৰা তিট্ঠতি, তে ‘‘অম্হাকং সমজাতিকা অয’’ন্তি গোচরং গণ্হন্তি। সাপি তিণানি খাদন্তী ৰিয সণিকং উপগচ্ছতি। আরঞ্ঞিকো যূথপতিমিগো তস্সা ৰাতং লভিত্ৰা সকভরিযং ৰিস্সজ্জেত্ৰা তদভিমুখো হোতি।
Migaluddako hi ekadāpi tesaṃ sākhābhaṅgena sarīraṃ puñchitvā manussagandhaṃ apanetvā okacaraṃ ekasmiṃ ṭhāne ṭhapetvā okacārikaṃ saha rajjuyā vissajjetvā attānaṃ paṭicchādetvā sattiṃ ādāya okacarassa santike tiṭṭhati, okacārikā migagaṇassa caraṇaṭṭhānābhimukhī gacchati . Taṃ disvā migā sīsāni ukkhipitvā tiṭṭhanti, sāpi sīsaṃ ukkhipitvā tiṭṭhati, te ‘‘amhākaṃ samajātikā aya’’nti gocaraṃ gaṇhanti. Sāpi tiṇāni khādantī viya saṇikaṃ upagacchati. Āraññiko yūthapatimigo tassā vātaṃ labhitvā sakabhariyaṃ vissajjetvā tadabhimukho hoti.
সত্তানঞ্হি নৰনৰমেৰ পিযং হোতি। ওকচারিকা আরঞ্ঞিকস্স মিগস্স অচ্চাসন্নভাৰং অদত্ৰা তদভিমুখীৰ পচ্ছতো পটিক্কমিত্ৰা ওকচরস্স সন্তিকং গচ্ছতি, যত্থ যত্থস্সা রজ্জু লগ্গতি, তত্থ তত্থ খুরেন পহরিত্ৰা মোচেতি, আরঞ্ঞিকো মিগো ওকচরং দিস্ৰা ওকচারিকায সম্মত্তো হুত্ৰা ওকচরে উসূযং কত্ৰা পিট্ঠিং নামেত্ৰা সীসং কম্পেন্তো তিট্ঠতি, তস্মিং খণে সত্তিং জিৰ্হায লেহন্তোপি ‘‘কিং এত’’ন্তি ন জানাতি, ওকচরোপি সচস্স উপরিভাগেন তং মিগং পহরিতুং সুখং হোতি, পিট্ঠিং নামেতি। সচস্স হেট্ঠাভাগেন পহরিতুং সুখং হোতি, হদযং উন্নামেতি। অথ লুদ্দকো আরঞ্ঞিকং মিগং সত্তিযা পহরিত্ৰা তত্থেৰ ঘাতেত্ৰা মংসং আদায গচ্ছতি। এৰমেৰ যথা সো মিগো ওকচারিকায সম্মত্তো ওকচরে উসূযং কত্ৰা সত্তিং জিৰ্হায লেহন্তোপি কিঞ্চি ন জানাতি, তথা ইমে সত্তা অৰিজ্জায সম্মত্তা অন্ধভূতা কিঞ্চি অজানন্তা রূপাদীসু নন্দীরাগং উপগম্ম ৰট্টদুক্খসত্তিযা ৰধং লভন্তীতি ভগৰা ওকচরং নন্দীরাগোতি, ওকচারিকং অৰিজ্জাতি কত্ৰা দস্সেসি।
Sattānañhi navanavameva piyaṃ hoti. Okacārikā āraññikassa migassa accāsannabhāvaṃ adatvā tadabhimukhīva pacchato paṭikkamitvā okacarassa santikaṃ gacchati, yattha yatthassā rajju laggati, tattha tattha khurena paharitvā moceti, āraññiko migo okacaraṃ disvā okacārikāya sammatto hutvā okacare usūyaṃ katvā piṭṭhiṃ nāmetvā sīsaṃ kampento tiṭṭhati, tasmiṃ khaṇe sattiṃ jivhāya lehantopi ‘‘kiṃ eta’’nti na jānāti, okacaropi sacassa uparibhāgena taṃ migaṃ paharituṃ sukhaṃ hoti, piṭṭhiṃ nāmeti. Sacassa heṭṭhābhāgena paharituṃ sukhaṃ hoti, hadayaṃ unnāmeti. Atha luddako āraññikaṃ migaṃ sattiyā paharitvā tattheva ghātetvā maṃsaṃ ādāya gacchati. Evameva yathā so migo okacārikāya sammatto okacare usūyaṃ katvā sattiṃ jivhāya lehantopi kiñci na jānāti, tathā ime sattā avijjāya sammattā andhabhūtā kiñci ajānantā rūpādīsu nandīrāgaṃ upagamma vaṭṭadukkhasattiyā vadhaṃ labhantīti bhagavā okacaraṃ nandīrāgoti, okacārikaṃ avijjāti katvā dassesi.
ইতি খো, ভিক্খৰে, ৰিৰটো মযা খেমো মগ্গোতি ইতি খো, ভিক্খৰে, মযা ইমেসং সত্তানং হিতচরণেন সম্মাসম্বোধিং পত্ৰা অহং বুদ্ধোস্মীতি তুণ্হীভূতেন অনিসীদিত্ৰা ধম্মচক্কপ্পৰত্তনতো পট্ঠায ধম্মং দেসেন্তেন ৰিৰটো খেমো অরিযো অট্ঠঙ্গিকো মগ্গো, পিহিতো কুম্মগ্গো , অঞ্ঞাতকোণ্ডঞ্ঞাদীনং ভব্বপুগ্গলানং ঊহতো ওকচরো নন্দীরাগো দ্ৰেধা ছেত্ৰা পাতিতো, নাসিতা ওকচারিকা অৰিজ্জা সব্বেন সব্বং সমুগ্ঘাতিতাতি অত্তনো হিতূপচারং দস্সেসি। সেসং সব্বত্থ উত্তানত্থমেৰাতি।
Iti kho, bhikkhave, vivaṭo mayā khemo maggoti iti kho, bhikkhave, mayā imesaṃ sattānaṃ hitacaraṇena sammāsambodhiṃ patvā ahaṃ buddhosmīti tuṇhībhūtena anisīditvā dhammacakkappavattanato paṭṭhāya dhammaṃ desentena vivaṭo khemo ariyo aṭṭhaṅgiko maggo, pihito kummaggo , aññātakoṇḍaññādīnaṃ bhabbapuggalānaṃ ūhato okacaro nandīrāgo dvedhā chetvā pātito, nāsitā okacārikā avijjā sabbena sabbaṃ samugghātitāti attano hitūpacāraṃ dassesi. Sesaṃ sabbattha uttānatthamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
দ্ৰেধাৰিতক্কসুত্তৰণ্ণনা নিট্ঠিতা।
Dvedhāvitakkasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৯. দ্ৰেধাৰিতক্কসুত্তং • 9. Dvedhāvitakkasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৯. দ্ৰেধাৰিতক্কসুত্তৰণ্ণনা • 9. Dvedhāvitakkasuttavaṇṇanā
