| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
த்³வேனிஸ்ஸாரணாதி³கதா²
Dvenissāraṇādikathā
395. த்³வேமா பி⁴க்க²வே நிஸ்ஸாரணாதிஆதி³ வத்து²தோ கம்மானங் குப்பாகுப்பபா⁴வத³ஸ்ஸனத்த²ங் வுத்தங். தத்த² ‘‘அப்பத்தோ நிஸ்ஸாரணங், தஞ்சே ஸங்கோ⁴ நிஸ்ஸாரேதி, ஸுனிஸ்ஸாரிதோ’’தி இத³ங் பப்³பா³ஜனீயகம்மங் ஸந்தா⁴ய வுத்தங். பப்³பா³ஜனீயகம்மேன ஹி விஹாரதோ நிஸ்ஸாரெந்தி, தஸ்மா தங் ‘‘நிஸ்ஸாரணா’’தி வுச்சதி. தஞ்சேஸ யஸ்மா குலதூ³ஸகோ ந ஹோதி, தஸ்மா ஆவேணிகேன லக்க²ணேன அப்பத்தோ. யஸ்மா பனஸ்ஸ ஆகங்க²மானோ ஸங்கோ⁴ பப்³பா³ஜனீயகம்மங் கரெய்யாதி வுத்தங், தஸ்மா ஸுனிஸ்ஸாரிதோ ஹோதி. தஞ்சே ஸங்கோ⁴ நிஸ்ஸாரேதீதி ஸசே ஸங்கோ⁴ தஜ்ஜனீயகம்மாதி³வஸேன நிஸ்ஸாரேதி, ஸோ யஸ்மா தத்த² ‘‘திண்ணங் பி⁴க்க²வே பி⁴க்கூ²னங் ஆகங்க²மானோ ஸங்கோ⁴ தஜ்ஜனீயகம்மங் கரெய்ய – ஏகோ ப⁴ண்ட³னகாரகோ ஹோதி கலஹகாரகோ விவாத³காரகோ ப⁴ஸ்ஸகாரகோ ஸங்கே⁴ அதி⁴கரணகாரகோ, ஏகோ பா³லோ ஹோதி அப்³யத்தோ ஆபத்திப³ஹுலோ அனபதா³னோ, ஏகோ கி³ஹிஸங்ஸட்டோ² விஹரதி அனநுலோமிகேஹி கி³ஹிஸங்ஸக்³கே³ஹீ’’தி (சூளவ॰ 395) ஏவங் ஏகேகேனபி அங்கே³ன நிஸ்ஸாரணா அனுஞ்ஞாதா, தஸ்மா ஸுனிஸ்ஸாரிதோ.
395.Dvemā bhikkhave nissāraṇātiādi vatthuto kammānaṃ kuppākuppabhāvadassanatthaṃ vuttaṃ. Tattha ‘‘appatto nissāraṇaṃ, tañce saṅgho nissāreti, sunissārito’’ti idaṃ pabbājanīyakammaṃ sandhāya vuttaṃ. Pabbājanīyakammena hi vihārato nissārenti, tasmā taṃ ‘‘nissāraṇā’’ti vuccati. Tañcesa yasmā kuladūsako na hoti, tasmā āveṇikena lakkhaṇena appatto. Yasmā panassa ākaṅkhamāno saṅgho pabbājanīyakammaṃ kareyyāti vuttaṃ, tasmā sunissārito hoti. Tañce saṅgho nissāretīti sace saṅgho tajjanīyakammādivasena nissāreti, so yasmā tattha ‘‘tiṇṇaṃ bhikkhave bhikkhūnaṃ ākaṅkhamāno saṅgho tajjanīyakammaṃ kareyya – eko bhaṇḍanakārako hoti kalahakārako vivādakārako bhassakārako saṅghe adhikaraṇakārako, eko bālo hoti abyatto āpattibahulo anapadāno, eko gihisaṃsaṭṭho viharati ananulomikehi gihisaṃsaggehī’’ti (cūḷava. 395) evaṃ ekekenapi aṅgena nissāraṇā anuññātā, tasmā sunissārito.
396. ஓஸாரணாதி பவேஸனா. தத்த² தஞ்சே ஸங்கோ⁴ ஓஸாரேதீதி உபஸம்பத³கம்மவஸேன பவேஸேதி. தோ³ஸாரிதோதி து³ஓஸாரிதோ. ஸஹஸ்ஸக்க²த்தும்பி உபஸம்பாதி³தோ அனுபஸம்பன்னோவ ஹோதி ஆசரியுபஜ்ஜா²யா ச ஸாதிஸாரா, ததா² ஸேஸோ காரகஸங்கோ⁴, ந கோசி ஆபத்திதோ முச்சதி. இதி இமே ஏகாத³ஸ அப⁴ப்³ப³புக்³க³லா தோ³ஸாரிதா. ஹத்த²ச்சி²ன்னாத³யோ பன த்³வத்திங்ஸ ஸுஓஸாரிதா, உபஸம்பாதி³தா உபஸம்பன்னாவ ஹொந்தி, ந தே லப்³பா⁴ கிஞ்சி வத்துங். ஆசரியுபஜ்ஜா²யா பன காரகஸங்கோ⁴ ச ஸாதிஸாரா, ந கோசி ஆபத்திதோ முச்சதி.
396.Osāraṇāti pavesanā. Tattha tañce saṅgho osāretīti upasampadakammavasena paveseti. Dosāritoti duosārito. Sahassakkhattumpi upasampādito anupasampannova hoti ācariyupajjhāyā ca sātisārā, tathā seso kārakasaṅgho, na koci āpattito muccati. Iti ime ekādasa abhabbapuggalā dosāritā. Hatthacchinnādayo pana dvattiṃsa suosāritā, upasampāditā upasampannāva honti, na te labbhā kiñci vattuṃ. Ācariyupajjhāyā pana kārakasaṅgho ca sātisārā, na koci āpattito muccati.
397. இத⁴ பன பி⁴க்க²வே பி⁴க்கு²ஸ்ஸ ந ஹோதி ஆபத்தி த³ட்ட²ப்³பா³திஆதி³ அபூ⁴தவத்து²வஸேன அத⁴ம்மகம்மங், பூ⁴தவத்து²வஸேன த⁴ம்மகம்மஞ்ச த³ஸ்ஸேதுங் வுத்தங். தத்த² படினிஸ்ஸஜ்ஜிதாதி படினிஸ்ஸஜ்ஜிதப்³பா³.
397.Idha pana bhikkhave bhikkhussa na hoti āpatti daṭṭhabbātiādi abhūtavatthuvasena adhammakammaṃ, bhūtavatthuvasena dhammakammañca dassetuṃ vuttaṃ. Tattha paṭinissajjitāti paṭinissajjitabbā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
239. த்³வேனிஸ்ஸாரணாதி³கதா² • 239. Dvenissāraṇādikathā
240. அத⁴ம்மகம்மாதி³கதா² • 240. Adhammakammādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / த்³வேனிஸ்ஸாரணாதி³கதா²வண்ணனா • Dvenissāraṇādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / த்³வேனிஸ்ஸாரணாதி³கதா²வண்ணனா • Dvenissāraṇādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / த்³வேனிஸ்ஸரணாதி³கதா²வண்ணனா • Dvenissaraṇādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 239. த்³வேனிஸ்ஸாரணாதி³கதா² • 239. Dvenissāraṇādikathā
