| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
239. த்³வேனிஸ்ஸாரணாதி³கதா²
239. Dvenissāraṇādikathā
395. த்³வேமா, பி⁴க்க²வே, நிஸ்ஸாரணா. அத்தி², பி⁴க்க²வே, புக்³க³லோ அப்பத்தோ நிஸ்ஸாரணங். தஞ்சே ஸங்கோ⁴ நிஸ்ஸாரேதி, ஏகச்சோ ஸுனிஸ்ஸாரிதோ, ஏகச்சோ து³ன்னிஸ்ஸாரிதோ. கதமோ ச, பி⁴க்க²வே, புக்³க³லோ அப்பத்தோ நிஸ்ஸாரணங், தஞ்சே ஸங்கோ⁴ நிஸ்ஸாரேதி – து³ன்னிஸ்ஸாரிதோ? இத⁴ பன, பி⁴க்க²வே, பி⁴க்கு² ஸுத்³தோ⁴ ஹோதி அனாபத்திகோ. தஞ்சே ஸங்கோ⁴ நிஸ்ஸாரேதி – து³ன்னிஸ்ஸாரிதோ. அயங் வுச்சதி, பி⁴க்க²வே, புக்³க³லோ அப்பத்தோ நிஸ்ஸாரணங், தஞ்சே ஸங்கோ⁴ நிஸ்ஸாரேதி – து³ன்னிஸ்ஸாரிதோ.
395. Dvemā, bhikkhave, nissāraṇā. Atthi, bhikkhave, puggalo appatto nissāraṇaṃ. Tañce saṅgho nissāreti, ekacco sunissārito, ekacco dunnissārito. Katamo ca, bhikkhave, puggalo appatto nissāraṇaṃ, tañce saṅgho nissāreti – dunnissārito? Idha pana, bhikkhave, bhikkhu suddho hoti anāpattiko. Tañce saṅgho nissāreti – dunnissārito. Ayaṃ vuccati, bhikkhave, puggalo appatto nissāraṇaṃ, tañce saṅgho nissāreti – dunnissārito.
கதமோ ச, பி⁴க்க²வே, புக்³க³லோ அப்பத்தோ நிஸ்ஸாரணங், தஞ்சே ஸங்கோ⁴ நிஸ்ஸாரேதி – ஸுனிஸ்ஸாரிதோ? இத⁴ பன, பி⁴க்க²வே, பி⁴க்கு² பா³லோ ஹோதி அப்³யத்தோ ஆபத்திப³ஹுலோ அனபதா³னோ, கி³ஹிஸங்ஸட்டோ² விஹரதி அனநுலோமிகேஹி கி³ஹிஸங்ஸக்³கே³ஹி, தஞ்சே ஸங்கோ⁴ நிஸ்ஸாரேதி – ஸுனிஸ்ஸாரிதோ. அயங் வுச்சதி, பி⁴க்க²வே, புக்³க³லோ அப்பத்தோ நிஸ்ஸாரணங், தஞ்சே ஸங்கோ⁴ நிஸ்ஸாரேதி – ஸுனிஸ்ஸாரிதோ.
Katamo ca, bhikkhave, puggalo appatto nissāraṇaṃ, tañce saṅgho nissāreti – sunissārito? Idha pana, bhikkhave, bhikkhu bālo hoti abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi, tañce saṅgho nissāreti – sunissārito. Ayaṃ vuccati, bhikkhave, puggalo appatto nissāraṇaṃ, tañce saṅgho nissāreti – sunissārito.
396. த்³வேமா , பி⁴க்க²வே, ஓஸாரணா. அத்தி², பி⁴க்க²வே, புக்³க³லோ அப்பத்தோ ஓஸாரணங் தஞ்சே ஸங்கோ⁴ ஓஸாரேதி, ஏகச்சோ ஸோஸாரிதோ, ஏகச்சோ தோ³ஸாரிதோ. கதமோ ச, பி⁴க்க²வே, புக்³க³லோ அப்பத்தோ ஓஸாரணங், தஞ்சே ஸங்கோ⁴ ஓஸாரேதி – தோ³ஸாரிதோ? பண்ட³கோ, பி⁴க்க²வே, அப்பத்தோ ஓஸாரணங், தஞ்சே ஸங்கோ⁴ ஓஸாரேதி – தோ³ஸாரிதோ. தெ²ய்யஸங்வாஸகோ, பி⁴க்க²வே, அப்பத்தோ ஓஸாரணங், தஞ்சே ஸங்கோ⁴ ஓஸாரேதி – தோ³ஸாரிதோ. தித்தி²யபக்கந்தகோ, பி⁴க்க²வே…பே॰… திரச்சா²னக³தோ, பி⁴க்க²வே… மாதுகா⁴தகோ, பி⁴க்க²வே… பிதுகா⁴தகோ, பி⁴க்க²வே… அரஹந்தகா⁴தகோ, பி⁴க்க²வே… பி⁴க்கு²னிதூ³ஸகோ, பி⁴க்க²வே… ஸங்க⁴பே⁴த³கோ, பி⁴க்க²வே… லோஹிதுப்பாத³கோ, பி⁴க்க²வே… உப⁴தொப்³யஞ்ஜனகோ, பி⁴க்க²வே, அப்பத்தோ, ஓஸாரணங், தஞ்சே ஸங்கோ⁴ ஓஸாரேதி – தோ³ஸாரிதோ. அயங் வுச்சதி, பி⁴க்க²வே, புக்³க³லோ அப்பத்தோ ஓஸாரணங், தஞ்சே ஸங்கோ⁴ ஓஸாரேதி – தோ³ஸாரிதோ. இமே வுச்சந்தி, பி⁴க்க²வே, புக்³க³லா அப்பத்தா ஓஸாரணங், தே சே ஸங்கோ⁴ ஓஸாரேதி – தோ³ஸாரிதா.
396. Dvemā , bhikkhave, osāraṇā. Atthi, bhikkhave, puggalo appatto osāraṇaṃ tañce saṅgho osāreti, ekacco sosārito, ekacco dosārito. Katamo ca, bhikkhave, puggalo appatto osāraṇaṃ, tañce saṅgho osāreti – dosārito? Paṇḍako, bhikkhave, appatto osāraṇaṃ, tañce saṅgho osāreti – dosārito. Theyyasaṃvāsako, bhikkhave, appatto osāraṇaṃ, tañce saṅgho osāreti – dosārito. Titthiyapakkantako, bhikkhave…pe… tiracchānagato, bhikkhave… mātughātako, bhikkhave… pitughātako, bhikkhave… arahantaghātako, bhikkhave… bhikkhunidūsako, bhikkhave… saṅghabhedako, bhikkhave… lohituppādako, bhikkhave… ubhatobyañjanako, bhikkhave, appatto, osāraṇaṃ, tañce saṅgho osāreti – dosārito. Ayaṃ vuccati, bhikkhave, puggalo appatto osāraṇaṃ, tañce saṅgho osāreti – dosārito. Ime vuccanti, bhikkhave, puggalā appattā osāraṇaṃ, te ce saṅgho osāreti – dosāritā.
கதமோ ச, பி⁴க்க²வே, புக்³க³லோ அப்பத்தோ ஓஸாரணங், தஞ்சே ஸங்கோ⁴ ஓஸாரேதி – ஸோஸாரிதோ? ஹத்த²ச்சி²ன்னோ, பி⁴க்க²வே, அப்பத்தோ ஓஸாரணங், தஞ்சே ஸங்கோ⁴ ஓஸாரேதி, ஸோஸாரிதோ. பாத³ச்சி²ன்னோ, பி⁴க்க²வே…பே॰… ஹத்த²பாத³ச்சி²ன்னோ, பி⁴க்க²வே… கண்ணச்சி²ன்னோ , பி⁴க்க²வே… நாஸச்சி²ன்னோ, பி⁴க்க²வே… கண்ணனாஸச்சி²ன்னோ, பி⁴க்க²வே… அங்கு³லிச்சி²ன்னோ, பி⁴க்க²வே… அளச்சி²ன்னோ, பி⁴க்க²வே… கண்ட³ரச்சி²ன்னோ, பி⁴க்க²வே… ப²ணஹத்த²கோ, பி⁴க்க²வே… கு²ஜ்ஜோ, பி⁴க்க²வே… வாமனோ, பி⁴க்க²வே… க³லக³ண்டீ³, பி⁴க்க²வே… லக்க²ணாஹதோ, பி⁴க்க²வே… கஸாஹதோ, பி⁴க்க²வே… லிகி²தகோ, பி⁴க்க²வே… ஸீபதி³கோ, பி⁴க்க²வே… பாபரோகீ³, பி⁴க்க²வே… பரிஸதூ³ஸகோ, பி⁴க்க²வே… காணோ, பி⁴க்க²வே… குணீ, பி⁴க்க²வே… க²ஞ்ஜோ, பி⁴க்க²வே… பக்க²ஹதோ, பி⁴க்க²வே… சி²ன்னிரியாபதோ², பி⁴க்க²வே… ஜராது³ப்³ப³லோ, பி⁴க்க²வே… அந்தோ⁴, பி⁴க்க²வே… மூகோ³, பி⁴க்க²வே… ப³தி⁴ரோ, பி⁴க்க²வே… அந்த⁴மூகோ³, பி⁴க்க²வே… அந்த⁴ப³தி⁴ரோ, பி⁴க்க²வே… மூக³ப³தி⁴ரோ, பி⁴க்க²வே… அந்த⁴மூக³ப³தி⁴ரோ, பி⁴க்க²வே, அப்பத்தோ ஓஸாரணங், தஞ்சே ஸங்கோ⁴ ஓஸாரேதி – ஸோஸாரிதோ. அயங் வுச்சதி, பி⁴க்க²வே, புக்³க³லோ அப்பத்தோ ஓஸாரணங், தஞ்சே ஸங்கோ⁴ ஓஸாரேதி – ஸோஸாரிதோ. இமே வுச்சந்தி, பி⁴க்க²வே, புக்³க³லா அப்பத்தா ஓஸாரணங், தே சே ஸங்கோ⁴ ஓஸாரேதி – ஸோஸாரிதா.
Katamo ca, bhikkhave, puggalo appatto osāraṇaṃ, tañce saṅgho osāreti – sosārito? Hatthacchinno, bhikkhave, appatto osāraṇaṃ, tañce saṅgho osāreti, sosārito. Pādacchinno, bhikkhave…pe… hatthapādacchinno, bhikkhave… kaṇṇacchinno , bhikkhave… nāsacchinno, bhikkhave… kaṇṇanāsacchinno, bhikkhave… aṅgulicchinno, bhikkhave… aḷacchinno, bhikkhave… kaṇḍaracchinno, bhikkhave… phaṇahatthako, bhikkhave… khujjo, bhikkhave… vāmano, bhikkhave… galagaṇḍī, bhikkhave… lakkhaṇāhato, bhikkhave… kasāhato, bhikkhave… likhitako, bhikkhave… sīpadiko, bhikkhave… pāparogī, bhikkhave… parisadūsako, bhikkhave… kāṇo, bhikkhave… kuṇī, bhikkhave… khañjo, bhikkhave… pakkhahato, bhikkhave… chinniriyāpatho, bhikkhave… jarādubbalo, bhikkhave… andho, bhikkhave… mūgo, bhikkhave… badhiro, bhikkhave… andhamūgo, bhikkhave… andhabadhiro, bhikkhave… mūgabadhiro, bhikkhave… andhamūgabadhiro, bhikkhave, appatto osāraṇaṃ, tañce saṅgho osāreti – sosārito. Ayaṃ vuccati, bhikkhave, puggalo appatto osāraṇaṃ, tañce saṅgho osāreti – sosārito. Ime vuccanti, bhikkhave, puggalā appattā osāraṇaṃ, te ce saṅgho osāreti – sosāritā.
த்³வேனிஸ்ஸாரணாதி³கதா² நிட்டி²தா.
Dvenissāraṇādikathā niṭṭhitā.
வாஸப⁴கா³மபா⁴ணவாரோ நிட்டி²தோ பட²மோ.
Vāsabhagāmabhāṇavāro niṭṭhito paṭhamo.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / த்³வேனிஸ்ஸாரணாதி³கதா² • Dvenissāraṇādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / த்³வேனிஸ்ஸாரணாதி³கதா²வண்ணனா • Dvenissāraṇādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / த்³வேனிஸ்ஸாரணாதி³கதா²வண்ணனா • Dvenissāraṇādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / த்³வேனிஸ்ஸரணாதி³கதா²வண்ணனா • Dvenissaraṇādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 239. த்³வேனிஸ்ஸாரணாதி³கதா² • 239. Dvenissāraṇādikathā
