| Library / Tipiṭaka / तिपिटक • Tipiṭaka / महावग्गपाळि • Mahāvaggapāḷi |
२३९. द्वेनिस्सारणादिकथा
239. Dvenissāraṇādikathā
३९५. द्वेमा, भिक्खवे, निस्सारणा। अत्थि, भिक्खवे, पुग्गलो अप्पत्तो निस्सारणं। तञ्चे सङ्घो निस्सारेति, एकच्चो सुनिस्सारितो, एकच्चो दुन्निस्सारितो। कतमो च, भिक्खवे, पुग्गलो अप्पत्तो निस्सारणं, तञ्चे सङ्घो निस्सारेति – दुन्निस्सारितो? इध पन, भिक्खवे, भिक्खु सुद्धो होति अनापत्तिको। तञ्चे सङ्घो निस्सारेति – दुन्निस्सारितो। अयं वुच्चति, भिक्खवे, पुग्गलो अप्पत्तो निस्सारणं, तञ्चे सङ्घो निस्सारेति – दुन्निस्सारितो।
395. Dvemā, bhikkhave, nissāraṇā. Atthi, bhikkhave, puggalo appatto nissāraṇaṃ. Tañce saṅgho nissāreti, ekacco sunissārito, ekacco dunnissārito. Katamo ca, bhikkhave, puggalo appatto nissāraṇaṃ, tañce saṅgho nissāreti – dunnissārito? Idha pana, bhikkhave, bhikkhu suddho hoti anāpattiko. Tañce saṅgho nissāreti – dunnissārito. Ayaṃ vuccati, bhikkhave, puggalo appatto nissāraṇaṃ, tañce saṅgho nissāreti – dunnissārito.
कतमो च, भिक्खवे, पुग्गलो अप्पत्तो निस्सारणं, तञ्चे सङ्घो निस्सारेति – सुनिस्सारितो? इध पन, भिक्खवे, भिक्खु बालो होति अब्यत्तो आपत्तिबहुलो अनपदानो, गिहिसंसट्ठो विहरति अननुलोमिकेहि गिहिसंसग्गेहि, तञ्चे सङ्घो निस्सारेति – सुनिस्सारितो। अयं वुच्चति, भिक्खवे, पुग्गलो अप्पत्तो निस्सारणं, तञ्चे सङ्घो निस्सारेति – सुनिस्सारितो।
Katamo ca, bhikkhave, puggalo appatto nissāraṇaṃ, tañce saṅgho nissāreti – sunissārito? Idha pana, bhikkhave, bhikkhu bālo hoti abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi, tañce saṅgho nissāreti – sunissārito. Ayaṃ vuccati, bhikkhave, puggalo appatto nissāraṇaṃ, tañce saṅgho nissāreti – sunissārito.
३९६. द्वेमा , भिक्खवे, ओसारणा। अत्थि, भिक्खवे, पुग्गलो अप्पत्तो ओसारणं तञ्चे सङ्घो ओसारेति, एकच्चो सोसारितो, एकच्चो दोसारितो। कतमो च, भिक्खवे, पुग्गलो अप्पत्तो ओसारणं, तञ्चे सङ्घो ओसारेति – दोसारितो? पण्डको, भिक्खवे, अप्पत्तो ओसारणं, तञ्चे सङ्घो ओसारेति – दोसारितो। थेय्यसंवासको, भिक्खवे, अप्पत्तो ओसारणं, तञ्चे सङ्घो ओसारेति – दोसारितो। तित्थियपक्कन्तको, भिक्खवे…पे॰… तिरच्छानगतो, भिक्खवे… मातुघातको, भिक्खवे… पितुघातको, भिक्खवे… अरहन्तघातको, भिक्खवे… भिक्खुनिदूसको, भिक्खवे… सङ्घभेदको, भिक्खवे… लोहितुप्पादको, भिक्खवे… उभतोब्यञ्जनको, भिक्खवे, अप्पत्तो, ओसारणं, तञ्चे सङ्घो ओसारेति – दोसारितो। अयं वुच्चति, भिक्खवे, पुग्गलो अप्पत्तो ओसारणं, तञ्चे सङ्घो ओसारेति – दोसारितो। इमे वुच्चन्ति, भिक्खवे, पुग्गला अप्पत्ता ओसारणं, ते चे सङ्घो ओसारेति – दोसारिता।
396. Dvemā , bhikkhave, osāraṇā. Atthi, bhikkhave, puggalo appatto osāraṇaṃ tañce saṅgho osāreti, ekacco sosārito, ekacco dosārito. Katamo ca, bhikkhave, puggalo appatto osāraṇaṃ, tañce saṅgho osāreti – dosārito? Paṇḍako, bhikkhave, appatto osāraṇaṃ, tañce saṅgho osāreti – dosārito. Theyyasaṃvāsako, bhikkhave, appatto osāraṇaṃ, tañce saṅgho osāreti – dosārito. Titthiyapakkantako, bhikkhave…pe… tiracchānagato, bhikkhave… mātughātako, bhikkhave… pitughātako, bhikkhave… arahantaghātako, bhikkhave… bhikkhunidūsako, bhikkhave… saṅghabhedako, bhikkhave… lohituppādako, bhikkhave… ubhatobyañjanako, bhikkhave, appatto, osāraṇaṃ, tañce saṅgho osāreti – dosārito. Ayaṃ vuccati, bhikkhave, puggalo appatto osāraṇaṃ, tañce saṅgho osāreti – dosārito. Ime vuccanti, bhikkhave, puggalā appattā osāraṇaṃ, te ce saṅgho osāreti – dosāritā.
कतमो च, भिक्खवे, पुग्गलो अप्पत्तो ओसारणं, तञ्चे सङ्घो ओसारेति – सोसारितो? हत्थच्छिन्नो, भिक्खवे, अप्पत्तो ओसारणं, तञ्चे सङ्घो ओसारेति, सोसारितो। पादच्छिन्नो, भिक्खवे…पे॰… हत्थपादच्छिन्नो, भिक्खवे… कण्णच्छिन्नो , भिक्खवे… नासच्छिन्नो, भिक्खवे… कण्णनासच्छिन्नो, भिक्खवे… अङ्गुलिच्छिन्नो, भिक्खवे… अळच्छिन्नो, भिक्खवे… कण्डरच्छिन्नो, भिक्खवे… फणहत्थको, भिक्खवे… खुज्जो, भिक्खवे… वामनो, भिक्खवे… गलगण्डी, भिक्खवे… लक्खणाहतो, भिक्खवे… कसाहतो, भिक्खवे… लिखितको, भिक्खवे… सीपदिको, भिक्खवे… पापरोगी, भिक्खवे… परिसदूसको, भिक्खवे… काणो, भिक्खवे… कुणी, भिक्खवे… खञ्जो, भिक्खवे… पक्खहतो, भिक्खवे… छिन्निरियापथो, भिक्खवे… जरादुब्बलो, भिक्खवे… अन्धो, भिक्खवे… मूगो, भिक्खवे… बधिरो, भिक्खवे… अन्धमूगो, भिक्खवे… अन्धबधिरो, भिक्खवे… मूगबधिरो, भिक्खवे… अन्धमूगबधिरो, भिक्खवे, अप्पत्तो ओसारणं, तञ्चे सङ्घो ओसारेति – सोसारितो। अयं वुच्चति, भिक्खवे, पुग्गलो अप्पत्तो ओसारणं, तञ्चे सङ्घो ओसारेति – सोसारितो। इमे वुच्चन्ति, भिक्खवे, पुग्गला अप्पत्ता ओसारणं, ते चे सङ्घो ओसारेति – सोसारिता।
Katamo ca, bhikkhave, puggalo appatto osāraṇaṃ, tañce saṅgho osāreti – sosārito? Hatthacchinno, bhikkhave, appatto osāraṇaṃ, tañce saṅgho osāreti, sosārito. Pādacchinno, bhikkhave…pe… hatthapādacchinno, bhikkhave… kaṇṇacchinno , bhikkhave… nāsacchinno, bhikkhave… kaṇṇanāsacchinno, bhikkhave… aṅgulicchinno, bhikkhave… aḷacchinno, bhikkhave… kaṇḍaracchinno, bhikkhave… phaṇahatthako, bhikkhave… khujjo, bhikkhave… vāmano, bhikkhave… galagaṇḍī, bhikkhave… lakkhaṇāhato, bhikkhave… kasāhato, bhikkhave… likhitako, bhikkhave… sīpadiko, bhikkhave… pāparogī, bhikkhave… parisadūsako, bhikkhave… kāṇo, bhikkhave… kuṇī, bhikkhave… khañjo, bhikkhave… pakkhahato, bhikkhave… chinniriyāpatho, bhikkhave… jarādubbalo, bhikkhave… andho, bhikkhave… mūgo, bhikkhave… badhiro, bhikkhave… andhamūgo, bhikkhave… andhabadhiro, bhikkhave… mūgabadhiro, bhikkhave… andhamūgabadhiro, bhikkhave, appatto osāraṇaṃ, tañce saṅgho osāreti – sosārito. Ayaṃ vuccati, bhikkhave, puggalo appatto osāraṇaṃ, tañce saṅgho osāreti – sosārito. Ime vuccanti, bhikkhave, puggalā appattā osāraṇaṃ, te ce saṅgho osāreti – sosāritā.
द्वेनिस्सारणादिकथा निट्ठिता।
Dvenissāraṇādikathā niṭṭhitā.
वासभगामभाणवारो निट्ठितो पठमो।
Vāsabhagāmabhāṇavāro niṭṭhito paṭhamo.
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / द्वेनिस्सारणादिकथा • Dvenissāraṇādikathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / द्वेनिस्सारणादिकथावण्णना • Dvenissāraṇādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / द्वेनिस्सारणादिकथावण्णना • Dvenissāraṇādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / द्वेनिस्सरणादिकथावण्णना • Dvenissaraṇādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / २३९. द्वेनिस्सारणादिकथा • 239. Dvenissāraṇādikathā
