| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೨೩೯. ದ್ವೇನಿಸ್ಸಾರಣಾದಿಕಥಾ
239. Dvenissāraṇādikathā
೩೯೫. ದ್ವೇಮಾ, ಭಿಕ್ಖವೇ, ನಿಸ್ಸಾರಣಾ। ಅತ್ಥಿ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ನಿಸ್ಸಾರಣಂ। ತಞ್ಚೇ ಸಙ್ಘೋ ನಿಸ್ಸಾರೇತಿ, ಏಕಚ್ಚೋ ಸುನಿಸ್ಸಾರಿತೋ, ಏಕಚ್ಚೋ ದುನ್ನಿಸ್ಸಾರಿತೋ। ಕತಮೋ ಚ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ನಿಸ್ಸಾರಣಂ, ತಞ್ಚೇ ಸಙ್ಘೋ ನಿಸ್ಸಾರೇತಿ – ದುನ್ನಿಸ್ಸಾರಿತೋ? ಇಧ ಪನ, ಭಿಕ್ಖವೇ, ಭಿಕ್ಖು ಸುದ್ಧೋ ಹೋತಿ ಅನಾಪತ್ತಿಕೋ। ತಞ್ಚೇ ಸಙ್ಘೋ ನಿಸ್ಸಾರೇತಿ – ದುನ್ನಿಸ್ಸಾರಿತೋ। ಅಯಂ ವುಚ್ಚತಿ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ನಿಸ್ಸಾರಣಂ, ತಞ್ಚೇ ಸಙ್ಘೋ ನಿಸ್ಸಾರೇತಿ – ದುನ್ನಿಸ್ಸಾರಿತೋ।
395. Dvemā, bhikkhave, nissāraṇā. Atthi, bhikkhave, puggalo appatto nissāraṇaṃ. Tañce saṅgho nissāreti, ekacco sunissārito, ekacco dunnissārito. Katamo ca, bhikkhave, puggalo appatto nissāraṇaṃ, tañce saṅgho nissāreti – dunnissārito? Idha pana, bhikkhave, bhikkhu suddho hoti anāpattiko. Tañce saṅgho nissāreti – dunnissārito. Ayaṃ vuccati, bhikkhave, puggalo appatto nissāraṇaṃ, tañce saṅgho nissāreti – dunnissārito.
ಕತಮೋ ಚ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ನಿಸ್ಸಾರಣಂ, ತಞ್ಚೇ ಸಙ್ಘೋ ನಿಸ್ಸಾರೇತಿ – ಸುನಿಸ್ಸಾರಿತೋ? ಇಧ ಪನ, ಭಿಕ್ಖವೇ, ಭಿಕ್ಖು ಬಾಲೋ ಹೋತಿ ಅಬ್ಯತ್ತೋ ಆಪತ್ತಿಬಹುಲೋ ಅನಪದಾನೋ, ಗಿಹಿಸಂಸಟ್ಠೋ ವಿಹರತಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ, ತಞ್ಚೇ ಸಙ್ಘೋ ನಿಸ್ಸಾರೇತಿ – ಸುನಿಸ್ಸಾರಿತೋ। ಅಯಂ ವುಚ್ಚತಿ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ನಿಸ್ಸಾರಣಂ, ತಞ್ಚೇ ಸಙ್ಘೋ ನಿಸ್ಸಾರೇತಿ – ಸುನಿಸ್ಸಾರಿತೋ।
Katamo ca, bhikkhave, puggalo appatto nissāraṇaṃ, tañce saṅgho nissāreti – sunissārito? Idha pana, bhikkhave, bhikkhu bālo hoti abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi, tañce saṅgho nissāreti – sunissārito. Ayaṃ vuccati, bhikkhave, puggalo appatto nissāraṇaṃ, tañce saṅgho nissāreti – sunissārito.
೩೯೬. ದ್ವೇಮಾ , ಭಿಕ್ಖವೇ, ಓಸಾರಣಾ। ಅತ್ಥಿ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ಓಸಾರಣಂ ತಞ್ಚೇ ಸಙ್ಘೋ ಓಸಾರೇತಿ, ಏಕಚ್ಚೋ ಸೋಸಾರಿತೋ, ಏಕಚ್ಚೋ ದೋಸಾರಿತೋ। ಕತಮೋ ಚ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ – ದೋಸಾರಿತೋ? ಪಣ್ಡಕೋ, ಭಿಕ್ಖವೇ, ಅಪ್ಪತ್ತೋ ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ – ದೋಸಾರಿತೋ। ಥೇಯ್ಯಸಂವಾಸಕೋ, ಭಿಕ್ಖವೇ, ಅಪ್ಪತ್ತೋ ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ – ದೋಸಾರಿತೋ। ತಿತ್ಥಿಯಪಕ್ಕನ್ತಕೋ, ಭಿಕ್ಖವೇ…ಪೇ॰… ತಿರಚ್ಛಾನಗತೋ, ಭಿಕ್ಖವೇ… ಮಾತುಘಾತಕೋ, ಭಿಕ್ಖವೇ… ಪಿತುಘಾತಕೋ, ಭಿಕ್ಖವೇ… ಅರಹನ್ತಘಾತಕೋ, ಭಿಕ್ಖವೇ… ಭಿಕ್ಖುನಿದೂಸಕೋ, ಭಿಕ್ಖವೇ… ಸಙ್ಘಭೇದಕೋ, ಭಿಕ್ಖವೇ… ಲೋಹಿತುಪ್ಪಾದಕೋ, ಭಿಕ್ಖವೇ… ಉಭತೋಬ್ಯಞ್ಜನಕೋ, ಭಿಕ್ಖವೇ, ಅಪ್ಪತ್ತೋ, ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ – ದೋಸಾರಿತೋ। ಅಯಂ ವುಚ್ಚತಿ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ – ದೋಸಾರಿತೋ। ಇಮೇ ವುಚ್ಚನ್ತಿ, ಭಿಕ್ಖವೇ, ಪುಗ್ಗಲಾ ಅಪ್ಪತ್ತಾ ಓಸಾರಣಂ, ತೇ ಚೇ ಸಙ್ಘೋ ಓಸಾರೇತಿ – ದೋಸಾರಿತಾ।
396. Dvemā , bhikkhave, osāraṇā. Atthi, bhikkhave, puggalo appatto osāraṇaṃ tañce saṅgho osāreti, ekacco sosārito, ekacco dosārito. Katamo ca, bhikkhave, puggalo appatto osāraṇaṃ, tañce saṅgho osāreti – dosārito? Paṇḍako, bhikkhave, appatto osāraṇaṃ, tañce saṅgho osāreti – dosārito. Theyyasaṃvāsako, bhikkhave, appatto osāraṇaṃ, tañce saṅgho osāreti – dosārito. Titthiyapakkantako, bhikkhave…pe… tiracchānagato, bhikkhave… mātughātako, bhikkhave… pitughātako, bhikkhave… arahantaghātako, bhikkhave… bhikkhunidūsako, bhikkhave… saṅghabhedako, bhikkhave… lohituppādako, bhikkhave… ubhatobyañjanako, bhikkhave, appatto, osāraṇaṃ, tañce saṅgho osāreti – dosārito. Ayaṃ vuccati, bhikkhave, puggalo appatto osāraṇaṃ, tañce saṅgho osāreti – dosārito. Ime vuccanti, bhikkhave, puggalā appattā osāraṇaṃ, te ce saṅgho osāreti – dosāritā.
ಕತಮೋ ಚ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ – ಸೋಸಾರಿತೋ? ಹತ್ಥಚ್ಛಿನ್ನೋ, ಭಿಕ್ಖವೇ, ಅಪ್ಪತ್ತೋ ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ, ಸೋಸಾರಿತೋ। ಪಾದಚ್ಛಿನ್ನೋ, ಭಿಕ್ಖವೇ…ಪೇ॰… ಹತ್ಥಪಾದಚ್ಛಿನ್ನೋ, ಭಿಕ್ಖವೇ… ಕಣ್ಣಚ್ಛಿನ್ನೋ , ಭಿಕ್ಖವೇ… ನಾಸಚ್ಛಿನ್ನೋ, ಭಿಕ್ಖವೇ… ಕಣ್ಣನಾಸಚ್ಛಿನ್ನೋ, ಭಿಕ್ಖವೇ… ಅಙ್ಗುಲಿಚ್ಛಿನ್ನೋ, ಭಿಕ್ಖವೇ… ಅಳಚ್ಛಿನ್ನೋ, ಭಿಕ್ಖವೇ… ಕಣ್ಡರಚ್ಛಿನ್ನೋ, ಭಿಕ್ಖವೇ… ಫಣಹತ್ಥಕೋ, ಭಿಕ್ಖವೇ… ಖುಜ್ಜೋ, ಭಿಕ್ಖವೇ… ವಾಮನೋ, ಭಿಕ್ಖವೇ… ಗಲಗಣ್ಡೀ, ಭಿಕ್ಖವೇ… ಲಕ್ಖಣಾಹತೋ, ಭಿಕ್ಖವೇ… ಕಸಾಹತೋ, ಭಿಕ್ಖವೇ… ಲಿಖಿತಕೋ, ಭಿಕ್ಖವೇ… ಸೀಪದಿಕೋ, ಭಿಕ್ಖವೇ… ಪಾಪರೋಗೀ, ಭಿಕ್ಖವೇ… ಪರಿಸದೂಸಕೋ, ಭಿಕ್ಖವೇ… ಕಾಣೋ, ಭಿಕ್ಖವೇ… ಕುಣೀ, ಭಿಕ್ಖವೇ… ಖಞ್ಜೋ, ಭಿಕ್ಖವೇ… ಪಕ್ಖಹತೋ, ಭಿಕ್ಖವೇ… ಛಿನ್ನಿರಿಯಾಪಥೋ, ಭಿಕ್ಖವೇ… ಜರಾದುಬ್ಬಲೋ, ಭಿಕ್ಖವೇ… ಅನ್ಧೋ, ಭಿಕ್ಖವೇ… ಮೂಗೋ, ಭಿಕ್ಖವೇ… ಬಧಿರೋ, ಭಿಕ್ಖವೇ… ಅನ್ಧಮೂಗೋ, ಭಿಕ್ಖವೇ… ಅನ್ಧಬಧಿರೋ, ಭಿಕ್ಖವೇ… ಮೂಗಬಧಿರೋ, ಭಿಕ್ಖವೇ… ಅನ್ಧಮೂಗಬಧಿರೋ, ಭಿಕ್ಖವೇ, ಅಪ್ಪತ್ತೋ ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ – ಸೋಸಾರಿತೋ। ಅಯಂ ವುಚ್ಚತಿ, ಭಿಕ್ಖವೇ, ಪುಗ್ಗಲೋ ಅಪ್ಪತ್ತೋ ಓಸಾರಣಂ, ತಞ್ಚೇ ಸಙ್ಘೋ ಓಸಾರೇತಿ – ಸೋಸಾರಿತೋ। ಇಮೇ ವುಚ್ಚನ್ತಿ, ಭಿಕ್ಖವೇ, ಪುಗ್ಗಲಾ ಅಪ್ಪತ್ತಾ ಓಸಾರಣಂ, ತೇ ಚೇ ಸಙ್ಘೋ ಓಸಾರೇತಿ – ಸೋಸಾರಿತಾ।
Katamo ca, bhikkhave, puggalo appatto osāraṇaṃ, tañce saṅgho osāreti – sosārito? Hatthacchinno, bhikkhave, appatto osāraṇaṃ, tañce saṅgho osāreti, sosārito. Pādacchinno, bhikkhave…pe… hatthapādacchinno, bhikkhave… kaṇṇacchinno , bhikkhave… nāsacchinno, bhikkhave… kaṇṇanāsacchinno, bhikkhave… aṅgulicchinno, bhikkhave… aḷacchinno, bhikkhave… kaṇḍaracchinno, bhikkhave… phaṇahatthako, bhikkhave… khujjo, bhikkhave… vāmano, bhikkhave… galagaṇḍī, bhikkhave… lakkhaṇāhato, bhikkhave… kasāhato, bhikkhave… likhitako, bhikkhave… sīpadiko, bhikkhave… pāparogī, bhikkhave… parisadūsako, bhikkhave… kāṇo, bhikkhave… kuṇī, bhikkhave… khañjo, bhikkhave… pakkhahato, bhikkhave… chinniriyāpatho, bhikkhave… jarādubbalo, bhikkhave… andho, bhikkhave… mūgo, bhikkhave… badhiro, bhikkhave… andhamūgo, bhikkhave… andhabadhiro, bhikkhave… mūgabadhiro, bhikkhave… andhamūgabadhiro, bhikkhave, appatto osāraṇaṃ, tañce saṅgho osāreti – sosārito. Ayaṃ vuccati, bhikkhave, puggalo appatto osāraṇaṃ, tañce saṅgho osāreti – sosārito. Ime vuccanti, bhikkhave, puggalā appattā osāraṇaṃ, te ce saṅgho osāreti – sosāritā.
ದ್ವೇನಿಸ್ಸಾರಣಾದಿಕಥಾ ನಿಟ್ಠಿತಾ।
Dvenissāraṇādikathā niṭṭhitā.
ವಾಸಭಗಾಮಭಾಣವಾರೋ ನಿಟ್ಠಿತೋ ಪಠಮೋ।
Vāsabhagāmabhāṇavāro niṭṭhito paṭhamo.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ದ್ವೇನಿಸ್ಸಾರಣಾದಿಕಥಾ • Dvenissāraṇādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ದ್ವೇನಿಸ್ಸಾರಣಾದಿಕಥಾವಣ್ಣನಾ • Dvenissāraṇādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ದ್ವೇನಿಸ್ಸಾರಣಾದಿಕಥಾವಣ್ಣನಾ • Dvenissāraṇādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ದ್ವೇನಿಸ್ಸರಣಾದಿಕಥಾವಣ್ಣನಾ • Dvenissaraṇādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨೩೯. ದ್ವೇನಿಸ್ಸಾರಣಾದಿಕಥಾ • 239. Dvenissāraṇādikathā
