| Library / Tipiṭaka / তিপিটক • Tipiṭaka / উদানপাল়ি • Udānapāḷi |
৭. দ্ৰিধাপথসুত্তং
7. Dvidhāpathasuttaṃ
৭৭. এৰং মে সুতং – একং সমযং ভগৰা কোসলেসু অদ্ধানমগ্গপটিপন্নো হোতি আযস্মতা নাগসমালেন পচ্ছাসমণেন। অদ্দসা খো আযস্মা নাগসমালো অন্তরামগ্গে দ্ৰিধাপথং 1। দিস্ৰান ভগৰন্তং এতদৰোচ – ‘‘অযং, ভন্তে, ভগৰা পন্থো; ইমিনা গচ্ছামা’’তি। এৰং ৰুত্তে, ভগৰা আযস্মন্তং নাগসমালং এতদৰোচ – ‘‘অযং, নাগসমাল, পন্থো; ইমিনা গচ্ছামা’’তি।
77. Evaṃ me sutaṃ – ekaṃ samayaṃ bhagavā kosalesu addhānamaggapaṭipanno hoti āyasmatā nāgasamālena pacchāsamaṇena. Addasā kho āyasmā nāgasamālo antarāmagge dvidhāpathaṃ 2. Disvāna bhagavantaṃ etadavoca – ‘‘ayaṃ, bhante, bhagavā pantho; iminā gacchāmā’’ti. Evaṃ vutte, bhagavā āyasmantaṃ nāgasamālaṃ etadavoca – ‘‘ayaṃ, nāgasamāla, pantho; iminā gacchāmā’’ti.
দুতিযম্পি…পে॰… ততিযম্পি খো আযস্মা নাগসমালো ভগৰন্তং এতদৰোচ – ‘‘অযং, ভন্তে, ভগৰা পন্থো; ইমিনা গচ্ছামা’’তি । ততিযম্পি খো ভগৰা আযস্মন্তং নাগসমালং এতদৰোচ – ‘‘অযং, নাগসমাল, পন্থো; ইমিনা গচ্ছামা’’তি। অথ খো আযস্মা নাগসমালো ভগৰতো পত্তচীৰরং তত্থেৰ ছমাযং নিক্খিপিত্ৰা পক্কামি – ‘‘ইদং, ভন্তে, ভগৰতো পত্তচীৰর’’ন্তি।
Dutiyampi…pe… tatiyampi kho āyasmā nāgasamālo bhagavantaṃ etadavoca – ‘‘ayaṃ, bhante, bhagavā pantho; iminā gacchāmā’’ti . Tatiyampi kho bhagavā āyasmantaṃ nāgasamālaṃ etadavoca – ‘‘ayaṃ, nāgasamāla, pantho; iminā gacchāmā’’ti. Atha kho āyasmā nāgasamālo bhagavato pattacīvaraṃ tattheva chamāyaṃ nikkhipitvā pakkāmi – ‘‘idaṃ, bhante, bhagavato pattacīvara’’nti.
অথ খো আযস্মতো নাগসমালস্স তেন পন্থেন গচ্ছন্তস্স অন্তরামগ্গে চোরা নিক্খমিত্ৰা হত্থেহি চ পাদেহি চ আকোটেসুং পত্তঞ্চ ভিন্দিংসু সঙ্ঘাটিঞ্চ ৰিপ্ফালেসুং। অথ খো আযস্মা নাগসমালো ভিন্নেন পত্তেন ৰিপ্ফালিতায সঙ্ঘাটিযা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা নাগসমালো ভগৰন্তং এতদৰোচ – ‘‘ইধ ময্হং, ভন্তে, তেন পন্থেন গচ্ছন্তস্স অন্তরামগ্গে চোরা নিক্খমিত্ৰা হত্থেহি চ পাদেহি চ আকোটেসুং, পত্তঞ্চ ভিন্দিংসু, সঙ্ঘাটিঞ্চ ৰিপ্ফালেসু’’ন্তি।
Atha kho āyasmato nāgasamālassa tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ pattañca bhindiṃsu saṅghāṭiñca vipphālesuṃ. Atha kho āyasmā nāgasamālo bhinnena pattena vipphālitāya saṅghāṭiyā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā nāgasamālo bhagavantaṃ etadavoca – ‘‘idha mayhaṃ, bhante, tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ, pattañca bhindiṃsu, saṅghāṭiñca vipphālesu’’nti.
অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘সদ্ধিং চরমেকতো ৰসং,
‘‘Saddhiṃ caramekato vasaṃ,
মিস্সো অঞ্ঞজনেন ৰেদগূ।
Misso aññajanena vedagū;
ৰিদ্ৰা পজহাতি পাপকং,
Vidvā pajahāti pāpakaṃ,
কোঞ্চো খীরপকোৰ নিন্নগ’’ন্তি॥ সত্তমং।
Koñco khīrapakova ninnaga’’nti. sattamaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / উদান-অট্ঠকথা • Udāna-aṭṭhakathā / ৭. দ্ৰিধাপথসুত্তৰণ্ণনা • 7. Dvidhāpathasuttavaṇṇanā
