| Library / Tipiṭaka / तिपिटक • Tipiṭaka / उदानपाळि • Udānapāḷi |
७. द्विधापथसुत्तं
7. Dvidhāpathasuttaṃ
७७. एवं मे सुतं – एकं समयं भगवा कोसलेसु अद्धानमग्गपटिपन्नो होति आयस्मता नागसमालेन पच्छासमणेन। अद्दसा खो आयस्मा नागसमालो अन्तरामग्गे द्विधापथं 1। दिस्वान भगवन्तं एतदवोच – ‘‘अयं, भन्ते, भगवा पन्थो; इमिना गच्छामा’’ति। एवं वुत्ते, भगवा आयस्मन्तं नागसमालं एतदवोच – ‘‘अयं, नागसमाल, पन्थो; इमिना गच्छामा’’ति।
77. Evaṃ me sutaṃ – ekaṃ samayaṃ bhagavā kosalesu addhānamaggapaṭipanno hoti āyasmatā nāgasamālena pacchāsamaṇena. Addasā kho āyasmā nāgasamālo antarāmagge dvidhāpathaṃ 2. Disvāna bhagavantaṃ etadavoca – ‘‘ayaṃ, bhante, bhagavā pantho; iminā gacchāmā’’ti. Evaṃ vutte, bhagavā āyasmantaṃ nāgasamālaṃ etadavoca – ‘‘ayaṃ, nāgasamāla, pantho; iminā gacchāmā’’ti.
दुतियम्पि…पे॰… ततियम्पि खो आयस्मा नागसमालो भगवन्तं एतदवोच – ‘‘अयं, भन्ते, भगवा पन्थो; इमिना गच्छामा’’ति । ततियम्पि खो भगवा आयस्मन्तं नागसमालं एतदवोच – ‘‘अयं, नागसमाल, पन्थो; इमिना गच्छामा’’ति। अथ खो आयस्मा नागसमालो भगवतो पत्तचीवरं तत्थेव छमायं निक्खिपित्वा पक्कामि – ‘‘इदं, भन्ते, भगवतो पत्तचीवर’’न्ति।
Dutiyampi…pe… tatiyampi kho āyasmā nāgasamālo bhagavantaṃ etadavoca – ‘‘ayaṃ, bhante, bhagavā pantho; iminā gacchāmā’’ti . Tatiyampi kho bhagavā āyasmantaṃ nāgasamālaṃ etadavoca – ‘‘ayaṃ, nāgasamāla, pantho; iminā gacchāmā’’ti. Atha kho āyasmā nāgasamālo bhagavato pattacīvaraṃ tattheva chamāyaṃ nikkhipitvā pakkāmi – ‘‘idaṃ, bhante, bhagavato pattacīvara’’nti.
अथ खो आयस्मतो नागसमालस्स तेन पन्थेन गच्छन्तस्स अन्तरामग्गे चोरा निक्खमित्वा हत्थेहि च पादेहि च आकोटेसुं पत्तञ्च भिन्दिंसु सङ्घाटिञ्च विप्फालेसुं। अथ खो आयस्मा नागसमालो भिन्नेन पत्तेन विप्फालिताय सङ्घाटिया येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं निसीदि। एकमन्तं निसिन्नो खो आयस्मा नागसमालो भगवन्तं एतदवोच – ‘‘इध मय्हं, भन्ते, तेन पन्थेन गच्छन्तस्स अन्तरामग्गे चोरा निक्खमित्वा हत्थेहि च पादेहि च आकोटेसुं, पत्तञ्च भिन्दिंसु, सङ्घाटिञ्च विप्फालेसु’’न्ति।
Atha kho āyasmato nāgasamālassa tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ pattañca bhindiṃsu saṅghāṭiñca vipphālesuṃ. Atha kho āyasmā nāgasamālo bhinnena pattena vipphālitāya saṅghāṭiyā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā nāgasamālo bhagavantaṃ etadavoca – ‘‘idha mayhaṃ, bhante, tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ, pattañca bhindiṃsu, saṅghāṭiñca vipphālesu’’nti.
अथ खो भगवा एतमत्थं विदित्वा तायं वेलायं इमं उदानं उदानेसि –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘सद्धिं चरमेकतो वसं,
‘‘Saddhiṃ caramekato vasaṃ,
मिस्सो अञ्ञजनेन वेदगू।
Misso aññajanena vedagū;
विद्वा पजहाति पापकं,
Vidvā pajahāti pāpakaṃ,
कोञ्चो खीरपकोव निन्नग’’न्ति॥ सत्तमं।
Koñco khīrapakova ninnaga’’nti. sattamaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / उदान-अट्ठकथा • Udāna-aṭṭhakathā / ७. द्विधापथसुत्तवण्णना • 7. Dvidhāpathasuttavaṇṇanā
