| Library / Tipiṭaka / ติปิฎก • Tipiṭaka / อุทานปาฬิ • Udānapāḷi |
๗. ทฺวิธาปถสุตฺตํ
7. Dvidhāpathasuttaṃ
๗๗. เอวํ เม สุตํ – เอกํ สมยํ ภควา โกสเลสุ อทฺธานมคฺคปฎิปโนฺน โหติ อายสฺมตา นาคสมาเลน ปจฺฉาสมเณนฯ อทฺทสา โข อายสฺมา นาคสมาโล อนฺตรามเคฺค ทฺวิธาปถํ 1ฯ ทิสฺวาน ภควนฺตํ เอตทโวจ – ‘‘อยํ, ภเนฺต, ภควา ปโนฺถ; อิมินา คจฺฉามา’’ติฯ เอวํ วุเตฺต, ภควา อายสฺมนฺตํ นาคสมาลํ เอตทโวจ – ‘‘อยํ, นาคสมาล, ปโนฺถ; อิมินา คจฺฉามา’’ติฯ
77. Evaṃ me sutaṃ – ekaṃ samayaṃ bhagavā kosalesu addhānamaggapaṭipanno hoti āyasmatā nāgasamālena pacchāsamaṇena. Addasā kho āyasmā nāgasamālo antarāmagge dvidhāpathaṃ 2. Disvāna bhagavantaṃ etadavoca – ‘‘ayaṃ, bhante, bhagavā pantho; iminā gacchāmā’’ti. Evaṃ vutte, bhagavā āyasmantaṃ nāgasamālaṃ etadavoca – ‘‘ayaṃ, nāgasamāla, pantho; iminā gacchāmā’’ti.
ทุติยมฺปิ…เป.… ตติยมฺปิ โข อายสฺมา นาคสมาโล ภควนฺตํ เอตทโวจ – ‘‘อยํ, ภเนฺต, ภควา ปโนฺถ; อิมินา คจฺฉามา’’ติ ฯ ตติยมฺปิ โข ภควา อายสฺมนฺตํ นาคสมาลํ เอตทโวจ – ‘‘อยํ, นาคสมาล, ปโนฺถ; อิมินา คจฺฉามา’’ติฯ อถ โข อายสฺมา นาคสมาโล ภควโต ปตฺตจีวรํ ตเตฺถว ฉมายํ นิกฺขิปิตฺวา ปกฺกามิ – ‘‘อิทํ, ภเนฺต, ภควโต ปตฺตจีวร’’นฺติฯ
Dutiyampi…pe… tatiyampi kho āyasmā nāgasamālo bhagavantaṃ etadavoca – ‘‘ayaṃ, bhante, bhagavā pantho; iminā gacchāmā’’ti . Tatiyampi kho bhagavā āyasmantaṃ nāgasamālaṃ etadavoca – ‘‘ayaṃ, nāgasamāla, pantho; iminā gacchāmā’’ti. Atha kho āyasmā nāgasamālo bhagavato pattacīvaraṃ tattheva chamāyaṃ nikkhipitvā pakkāmi – ‘‘idaṃ, bhante, bhagavato pattacīvara’’nti.
อถ โข อายสฺมโต นาคสมาลสฺส เตน ปเนฺถน คจฺฉนฺตสฺส อนฺตรามเคฺค โจรา นิกฺขมิตฺวา หเตฺถหิ จ ปาเทหิ จ อาโกเฎสุํ ปตฺตญฺจ ภินฺทิํสุ สงฺฆาฎิญฺจ วิปฺผาเลสุํฯ อถ โข อายสฺมา นาคสมาโล ภิเนฺนน ปเตฺตน วิปฺผาลิตาย สงฺฆาฎิยา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิฯ เอกมนฺตํ นิสิโนฺน โข อายสฺมา นาคสมาโล ภควนฺตํ เอตทโวจ – ‘‘อิธ มยฺหํ, ภเนฺต, เตน ปเนฺถน คจฺฉนฺตสฺส อนฺตรามเคฺค โจรา นิกฺขมิตฺวา หเตฺถหิ จ ปาเทหิ จ อาโกเฎสุํ, ปตฺตญฺจ ภินฺทิํสุ, สงฺฆาฎิญฺจ วิปฺผาเลสุ’’นฺติฯ
Atha kho āyasmato nāgasamālassa tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ pattañca bhindiṃsu saṅghāṭiñca vipphālesuṃ. Atha kho āyasmā nāgasamālo bhinnena pattena vipphālitāya saṅghāṭiyā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā nāgasamālo bhagavantaṃ etadavoca – ‘‘idha mayhaṃ, bhante, tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ, pattañca bhindiṃsu, saṅghāṭiñca vipphālesu’’nti.
อถ โข ภควา เอตมตฺถํ วิทิตฺวา ตายํ เวลายํ อิมํ อุทานํ อุทาเนสิ –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘สทฺธิํ จรเมกโต วสํ,
‘‘Saddhiṃ caramekato vasaṃ,
มิโสฺส อญฺญชเนน เวทคู;
Misso aññajanena vedagū;
วิทฺวา ปชหาติ ปาปกํ,
Vidvā pajahāti pāpakaṃ,
โกโญฺจ ขีรปโกว นินฺนค’’นฺติฯ สตฺตมํ;
Koñco khīrapakova ninnaga’’nti. sattamaṃ;
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อุทาน-อฎฺฐกถา • Udāna-aṭṭhakathā / ๗. ทฺวิธาปถสุตฺตวณฺณนา • 7. Dvidhāpathasuttavaṇṇanā
