| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৬. দ্ৰীহি সীলেহীতিকথাৰণ্ণনা
6. Dvīhi sīlehītikathāvaṇṇanā
৫৮৭-৫৮৯. ইদানি দ্ৰীহি সীলেহীতিকথা নাম হোতি। তত্থ ‘‘সীলে পতিট্ঠায নরো সপঞ্ঞো’’তিআদিৰচনতো (সং॰ নি॰ ১.২৩) যস্মা লোকিযেন সীলেন সীলৰা লোকুত্তরং মগ্গং ভাৰেতি, তস্মা ‘‘পুরিমেন চ লোকিযেন মগ্গক্খণে লোকুত্তরেন চাতি দ্ৰীহি সীলেহি সমন্নাগতো নাম হোতী’’তি যেসং লদ্ধি, সেয্যথাপি মহাসংঘিকানংযেৰ, তে সন্ধায মগ্গসমঙ্গীতি পুচ্ছা সকৰাদিস্স, পটিঞ্ঞা ইতরস্স। অথ নং ‘‘যদি সো একক্খণে লোকিযলোকুত্তরেহি দ্ৰীহি সীলেহি সমন্নাগতো, দ্ৰীহি ফস্সাদীহিপি তেন সমন্নাগতেন ভৰিতব্ব’’ন্তি চোদেতুং দ্ৰীহি ফস্সেহীতিআদিমাহ। ইতরো তথারূপং নযং অপস্সন্তো পটিক্খিপতি। লোকিযেন চ লোকুত্তরেন চাতি পঞ্হে পুব্বে সমাদিন্নঞ্চ মগ্গক্খণে উপ্পন্নসম্মাৰাচাদীনি চ সন্ধায পটিজানাতি।
587-589. Idāni dvīhi sīlehītikathā nāma hoti. Tattha ‘‘sīle patiṭṭhāya naro sapañño’’tiādivacanato (saṃ. ni. 1.23) yasmā lokiyena sīlena sīlavā lokuttaraṃ maggaṃ bhāveti, tasmā ‘‘purimena ca lokiyena maggakkhaṇe lokuttarena cāti dvīhi sīlehi samannāgato nāma hotī’’ti yesaṃ laddhi, seyyathāpi mahāsaṃghikānaṃyeva, te sandhāya maggasamaṅgīti pucchā sakavādissa, paṭiññā itarassa. Atha naṃ ‘‘yadi so ekakkhaṇe lokiyalokuttarehi dvīhi sīlehi samannāgato, dvīhi phassādīhipi tena samannāgatena bhavitabba’’nti codetuṃ dvīhi phassehītiādimāha. Itaro tathārūpaṃ nayaṃ apassanto paṭikkhipati. Lokiyena ca lokuttarena cāti pañhe pubbe samādinnañca maggakkhaṇe uppannasammāvācādīni ca sandhāya paṭijānāti.
লোকিযে সীলে নিরুদ্ধেতি পুচ্ছা পরৰাদিস্স, খণভঙ্গনিরোধং সন্ধায পটিঞ্ঞা সকৰাদিস্স। ইতরো পন তং ৰীতিক্কমং ৰিয সল্লক্খেন্তো দুস্সীলোতিআদিমাহ। লদ্ধিপতিট্ঠাপনং পনস্স পুব্বে অভিন্নসীলতংযেৰ দীপেতি, ন দ্ৰীহি সমন্নাগততং। তস্মা অপ্পতিট্ঠিতাৰ লদ্ধীতি।
Lokiye sīle niruddheti pucchā paravādissa, khaṇabhaṅganirodhaṃ sandhāya paṭiññā sakavādissa. Itaro pana taṃ vītikkamaṃ viya sallakkhento dussīlotiādimāha. Laddhipatiṭṭhāpanaṃ panassa pubbe abhinnasīlataṃyeva dīpeti, na dvīhi samannāgatataṃ. Tasmā appatiṭṭhitāva laddhīti.
দ্ৰীহি সীলেহীতিকথাৰণ্ণনা।
Dvīhi sīlehītikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১০০) ৬. দ্ৰীহিসীলেহিকথা • (100) 6. Dvīhisīlehikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৬. দ্ৰীহিসীলেহীতিকথাৰণ্ণনা • 6. Dvīhisīlehītikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৬. দ্ৰীহিসীলেহীতিকথাৰণ্ণনা • 6. Dvīhisīlehītikathāvaṇṇanā
