| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
६. द्वीहि सीलेहीतिकथावण्णना
6. Dvīhi sīlehītikathāvaṇṇanā
५८७-५८९. इदानि द्वीहि सीलेहीतिकथा नाम होति। तत्थ ‘‘सीले पतिट्ठाय नरो सपञ्ञो’’तिआदिवचनतो (सं॰ नि॰ १.२३) यस्मा लोकियेन सीलेन सीलवा लोकुत्तरं मग्गं भावेति, तस्मा ‘‘पुरिमेन च लोकियेन मग्गक्खणे लोकुत्तरेन चाति द्वीहि सीलेहि समन्नागतो नाम होती’’ति येसं लद्धि, सेय्यथापि महासंघिकानंयेव, ते सन्धाय मग्गसमङ्गीति पुच्छा सकवादिस्स, पटिञ्ञा इतरस्स। अथ नं ‘‘यदि सो एकक्खणे लोकियलोकुत्तरेहि द्वीहि सीलेहि समन्नागतो, द्वीहि फस्सादीहिपि तेन समन्नागतेन भवितब्ब’’न्ति चोदेतुं द्वीहि फस्सेहीतिआदिमाह। इतरो तथारूपं नयं अपस्सन्तो पटिक्खिपति। लोकियेन च लोकुत्तरेन चाति पञ्हे पुब्बे समादिन्नञ्च मग्गक्खणे उप्पन्नसम्मावाचादीनि च सन्धाय पटिजानाति।
587-589. Idāni dvīhi sīlehītikathā nāma hoti. Tattha ‘‘sīle patiṭṭhāya naro sapañño’’tiādivacanato (saṃ. ni. 1.23) yasmā lokiyena sīlena sīlavā lokuttaraṃ maggaṃ bhāveti, tasmā ‘‘purimena ca lokiyena maggakkhaṇe lokuttarena cāti dvīhi sīlehi samannāgato nāma hotī’’ti yesaṃ laddhi, seyyathāpi mahāsaṃghikānaṃyeva, te sandhāya maggasamaṅgīti pucchā sakavādissa, paṭiññā itarassa. Atha naṃ ‘‘yadi so ekakkhaṇe lokiyalokuttarehi dvīhi sīlehi samannāgato, dvīhi phassādīhipi tena samannāgatena bhavitabba’’nti codetuṃ dvīhi phassehītiādimāha. Itaro tathārūpaṃ nayaṃ apassanto paṭikkhipati. Lokiyena ca lokuttarena cāti pañhe pubbe samādinnañca maggakkhaṇe uppannasammāvācādīni ca sandhāya paṭijānāti.
लोकिये सीले निरुद्धेति पुच्छा परवादिस्स, खणभङ्गनिरोधं सन्धाय पटिञ्ञा सकवादिस्स। इतरो पन तं वीतिक्कमं विय सल्लक्खेन्तो दुस्सीलोतिआदिमाह। लद्धिपतिट्ठापनं पनस्स पुब्बे अभिन्नसीलतंयेव दीपेति, न द्वीहि समन्नागततं। तस्मा अप्पतिट्ठिताव लद्धीति।
Lokiye sīle niruddheti pucchā paravādissa, khaṇabhaṅganirodhaṃ sandhāya paṭiññā sakavādissa. Itaro pana taṃ vītikkamaṃ viya sallakkhento dussīlotiādimāha. Laddhipatiṭṭhāpanaṃ panassa pubbe abhinnasīlataṃyeva dīpeti, na dvīhi samannāgatataṃ. Tasmā appatiṭṭhitāva laddhīti.
द्वीहि सीलेहीतिकथावण्णना।
Dvīhi sīlehītikathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१००) ६. द्वीहिसीलेहिकथा • (100) 6. Dvīhisīlehikathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ६. द्वीहिसीलेहीतिकथावण्णना • 6. Dvīhisīlehītikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ६. द्वीहिसीलेहीतिकथावण्णना • 6. Dvīhisīlehītikathāvaṇṇanā
