| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೬. ದ್ವೀಹಿ ಸೀಲೇಹೀತಿಕಥಾವಣ್ಣನಾ
6. Dvīhi sīlehītikathāvaṇṇanā
೫೮೭-೫೮೯. ಇದಾನಿ ದ್ವೀಹಿ ಸೀಲೇಹೀತಿಕಥಾ ನಾಮ ಹೋತಿ। ತತ್ಥ ‘‘ಸೀಲೇ ಪತಿಟ್ಠಾಯ ನರೋ ಸಪಞ್ಞೋ’’ತಿಆದಿವಚನತೋ (ಸಂ॰ ನಿ॰ ೧.೨೩) ಯಸ್ಮಾ ಲೋಕಿಯೇನ ಸೀಲೇನ ಸೀಲವಾ ಲೋಕುತ್ತರಂ ಮಗ್ಗಂ ಭಾವೇತಿ, ತಸ್ಮಾ ‘‘ಪುರಿಮೇನ ಚ ಲೋಕಿಯೇನ ಮಗ್ಗಕ್ಖಣೇ ಲೋಕುತ್ತರೇನ ಚಾತಿ ದ್ವೀಹಿ ಸೀಲೇಹಿ ಸಮನ್ನಾಗತೋ ನಾಮ ಹೋತೀ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಮಹಾಸಂಘಿಕಾನಂಯೇವ, ತೇ ಸನ್ಧಾಯ ಮಗ್ಗಸಮಙ್ಗೀತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಅಥ ನಂ ‘‘ಯದಿ ಸೋ ಏಕಕ್ಖಣೇ ಲೋಕಿಯಲೋಕುತ್ತರೇಹಿ ದ್ವೀಹಿ ಸೀಲೇಹಿ ಸಮನ್ನಾಗತೋ, ದ್ವೀಹಿ ಫಸ್ಸಾದೀಹಿಪಿ ತೇನ ಸಮನ್ನಾಗತೇನ ಭವಿತಬ್ಬ’’ನ್ತಿ ಚೋದೇತುಂ ದ್ವೀಹಿ ಫಸ್ಸೇಹೀತಿಆದಿಮಾಹ। ಇತರೋ ತಥಾರೂಪಂ ನಯಂ ಅಪಸ್ಸನ್ತೋ ಪಟಿಕ್ಖಿಪತಿ। ಲೋಕಿಯೇನ ಚ ಲೋಕುತ್ತರೇನ ಚಾತಿ ಪಞ್ಹೇ ಪುಬ್ಬೇ ಸಮಾದಿನ್ನಞ್ಚ ಮಗ್ಗಕ್ಖಣೇ ಉಪ್ಪನ್ನಸಮ್ಮಾವಾಚಾದೀನಿ ಚ ಸನ್ಧಾಯ ಪಟಿಜಾನಾತಿ।
587-589. Idāni dvīhi sīlehītikathā nāma hoti. Tattha ‘‘sīle patiṭṭhāya naro sapañño’’tiādivacanato (saṃ. ni. 1.23) yasmā lokiyena sīlena sīlavā lokuttaraṃ maggaṃ bhāveti, tasmā ‘‘purimena ca lokiyena maggakkhaṇe lokuttarena cāti dvīhi sīlehi samannāgato nāma hotī’’ti yesaṃ laddhi, seyyathāpi mahāsaṃghikānaṃyeva, te sandhāya maggasamaṅgīti pucchā sakavādissa, paṭiññā itarassa. Atha naṃ ‘‘yadi so ekakkhaṇe lokiyalokuttarehi dvīhi sīlehi samannāgato, dvīhi phassādīhipi tena samannāgatena bhavitabba’’nti codetuṃ dvīhi phassehītiādimāha. Itaro tathārūpaṃ nayaṃ apassanto paṭikkhipati. Lokiyena ca lokuttarena cāti pañhe pubbe samādinnañca maggakkhaṇe uppannasammāvācādīni ca sandhāya paṭijānāti.
ಲೋಕಿಯೇ ಸೀಲೇ ನಿರುದ್ಧೇತಿ ಪುಚ್ಛಾ ಪರವಾದಿಸ್ಸ, ಖಣಭಙ್ಗನಿರೋಧಂ ಸನ್ಧಾಯ ಪಟಿಞ್ಞಾ ಸಕವಾದಿಸ್ಸ। ಇತರೋ ಪನ ತಂ ವೀತಿಕ್ಕಮಂ ವಿಯ ಸಲ್ಲಕ್ಖೇನ್ತೋ ದುಸ್ಸೀಲೋತಿಆದಿಮಾಹ। ಲದ್ಧಿಪತಿಟ್ಠಾಪನಂ ಪನಸ್ಸ ಪುಬ್ಬೇ ಅಭಿನ್ನಸೀಲತಂಯೇವ ದೀಪೇತಿ, ನ ದ್ವೀಹಿ ಸಮನ್ನಾಗತತಂ। ತಸ್ಮಾ ಅಪ್ಪತಿಟ್ಠಿತಾವ ಲದ್ಧೀತಿ।
Lokiye sīle niruddheti pucchā paravādissa, khaṇabhaṅganirodhaṃ sandhāya paṭiññā sakavādissa. Itaro pana taṃ vītikkamaṃ viya sallakkhento dussīlotiādimāha. Laddhipatiṭṭhāpanaṃ panassa pubbe abhinnasīlataṃyeva dīpeti, na dvīhi samannāgatataṃ. Tasmā appatiṭṭhitāva laddhīti.
ದ್ವೀಹಿ ಸೀಲೇಹೀತಿಕಥಾವಣ್ಣನಾ।
Dvīhi sīlehītikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೦೦) ೬. ದ್ವೀಹಿಸೀಲೇಹಿಕಥಾ • (100) 6. Dvīhisīlehikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೬. ದ್ವೀಹಿಸೀಲೇಹೀತಿಕಥಾವಣ್ಣನಾ • 6. Dvīhisīlehītikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೬. ದ್ವೀಹಿಸೀಲೇಹೀತಿಕಥಾವಣ್ಣನಾ • 6. Dvīhisīlehītikathāvaṇṇanā
